Zesopa icca danirri Deoza dada toqquimade, icca uima uauati toqquimade deni torrauicca
1Uima onihi onihi tiadeniza uati oneraha uima bicani deni torraniccape arrima narraro: Icca danirri Deoza dada toqquimade, icca uima uauati toqquimade deni torrauicca icarrini. Narraripa Zeso. Deorrine bazimaza deni torrazapa memeuarri madirrari. Deo Bicabote uinori nauatoniuarri uittarirrari. 2Pouapa Deoza uauatizemana nauicca ozaza zepe irrirrari. Narrarope Deo tazari parrissehecca. Ia Zozossede Deo Pouana Poua tazari icanauatorraro. Madirrarrine rrerani.
3Nazapa arrirraro namicca Deoza dada toqquimade deni torrauicca bazimapa Deo pouadeni icatterrizabaqquirrari, Deo tazariuarri zepedeni ihirrimana nauiuarrine. Arra Deoza dada toqquimade deni torrauiccapa madirra Deoza uatizemanaza poccadeni da naqquinarra Deoza da da ihiqquimemana narraro. Madirradenicca uimasiri manaconi bani bedi naco da da ihiqquimemana narrari. Nazapa icca danirri dada toqquimade deni torrauicca Zeso naco icca uimasiri manaconi Deoza da inaniuarrine carrirrari. 4Zesopa arrirraro namizapa icca danirri dada toqquimade torra-rraraui. Noueraui. Arrirraro namizape Deoza dada toqquimade animanaui. Narraridenina madirradenicca da naqquinarra Deoza da da ihiqquimemana narraro. Pina Moizecca marinarrassa inanemanarraro. 5Pouadenipa arrirraro namiza Deo tazariuarri zepedeni irrimanarrari. Narraro ozape memeuarriccassa naraha namiuarriccape assirani rrerani. Memeuarriccana assirani. Namiuarricca canautorrarope corimani nauatoqquiri inaniuarrine Deo uati tarrari. Poua tazari Moize icanauatoniuarrine icazosseza Atti arrama narrari: —Ssono Sinaiuarri timadiza occa oza tiaza noue ocanade. Narrarossa narraro ticanauatorri. Tibodi uatonissa teza pina tia mari ocanarrarossa tinanarri −naui nade Deo Moizeza. Nezape narraro Deo tazari canauatoue carriquezape nauiza Deoza dada toqquimadedeni zepedeni irrimanarrari. Naraha narrarideni zepedeni irrimanarraripa pina memeuarri Zeso zepe irrirrarissa nerrerani. 6Deopa Poua Bedi Zesozana cacauehe denima bica tanicca da inarraro. Arrirraro namiza Deocca zossenirri taidecca ecauemanarrarope arrimani. Narraro Deocca zossenirri taideccaza madirra: —Rrehe, iboraqquiri inana −quenazapa pouadeniza uima bicani torraniuarrine Deo uati taporaha narraro naqui arrimani torrarraro. Deo tezerre rrehe icanireniuarrinecca uima zati Zesorrine torrarrarope uima denima bica tanicca iaza anirraro. Pocca rrehe canirenirri zati denima bica tarrarope Deo Poua uati taporraricca denima bica tarrarorrine. Narraroa arri Zeso Cristo icca danirri Deoza dada toqquimade, icca uima uauati toqquimade deni torrauiccapa icca uima Deoza parrirenissa taniuarrine ia tonaparrire-baqquiuissa tauitoui.
7Deopa pocca zossenirri taidecca Moizeza da inezape Izarraeo potemauideniza uati tarrari: —Ouattizara iboraqquiri tiquenarri −naza madirra attidenipa: —Rrehe, Tettiza iboraqquiri inanitoui −quenarrari. Deo tezerre rrehe canirerrari. Naraha narraro pocca rrehe canirenirri madirracca uimasiri inarricaniuarrine parrire-rrerani. Rridacca parrirenissa tezape Deo pocca rrehe canirenirri: -onihira torrana −narrarauitouiraha. 8Naraha pocca marinarraza iboraqquiri nauiuarrine parriremana-rraraui qqui qqui tazapa Poua bodi: —Rraho, occa rrehe canirenirriza madirra tobiquemanauissa tauiuarrine parrire-rrerani nauato onani −narrari. Nazapa Poua Attia:
—Niza occa rrehe canirenirricca uima zati onananiuarrinecca uada bacco tanitoui −naui nade Deo.
—Narraro uadazape Izarraeo potemauideni, Zoda potemauideni, narrarideni bazimaza occa rrehe canirenirricca uima zati onananitoui.
9Arri rrehe canirenirricca uima zati onananiuarrinepe pina occa rrehe canirenirri taidecca pouadeni potaporrarideniza onanaporrarossa nerreranitoui.
Narraridenipa zama Ezitocca madirraza nanarrizo toquerrenazanapo-rrarauiuarrine odinibaqquirraride.
Pina pouadeni zepedeniza mari ozanabaqquiza rroca oninebaqquirrarissa narraride.
Nezape occa marinarra pouadeniza da oneza Otezerre rrehe icanireraha touibomanazapa onebobaqquirraride −naui nade Deo.
10—Occa marinarraza iboraqquiri nauiuarrine parriremana-rraraui qqui oneza Ouattipe: Izarraeo potemauideniza occa rrehe canirenirricca uima zatira onanana, onarraro −naui nade Deo.
—Nazama occa rrehe canirenirri zatipe arrima naniuarrine:
Pouadeni bodiza onananitoui, pina pouadeni bodiza dozo onarrarossa nanitoui, uatideni rrimemana-rrarauiuarrine.
Pouadeni Cacauade Deo orranitoui, pouadeni naco occa madirra toquerrenauitoui.
11Nazana pouadeni tesse Ouatti mittemanauiuarrine mari mari quena-rrarauitoui.
Pouadeni imecotedeniza, poccadeni madirra bazimaza: “Ia Zozossede Deo Atti ticauatterarri” quena-rrarauitoui.
Madirra bazima Ouaza noccodeni rrizeraqquiri nauitoui. Ouatti naqui mittemanauissa tauitoui.
Arramani toquerrenarrarideni, deni toquerrenarrarideni bazima Ouatti mittemanauissa tauitoui.
12Pouadenitoui ouati uana teza poccadeni uaidirehe sse onezape noueranitoui.
Poccadeni uimasiriza: “Peperri, ouati rrimani” onezape narraroza obodi uatomapoma-rreranitoui −naui nade Deo.
13Nazama Deo pocca rrehe canirenirri zati tauimarini uati tazapa Pouarrine rrehe canirenirri taideccape rradani torrarraro. Nezape narraro rrehe canirenirri rradani torrezape ponima torrarraro. Amossi nabote nani.
