Zeso Cristorrine Moizecca marinarraza zozosse iquerrene-rrerani
1Zeso Cristopa Moizecca marinarraza imadizanapo-rreraniuarrine ia tappa tabaqquirrari. Nezape Zeso Cristo tauimarizara dameraqquiri tiquenarri. Moizecca marinarrape tinebomanana, narrarocca zozosse tiquerrenanipoma-rreraniuarrine.
2Ouape Paoro. Ouatti timittemananissa tarri. Zopori eteroni cotani uissinarra ticappiremaneraha narraro uissinarra touini tiquenezape tirrinedeni Zeso Cristopa pouamassa nauitoui. Nezape ticcadeni uima Deoza tobicaniuarrine Cristo tiadeni acco tocanabaqqui-rrarauitoui, onarraro. 3Tiadeniza uati omanipomarraro: Zodeo rrararrari zopori cotani eteroni uissinarra carrirraripa Moizecca marinarra nemanehessa inanazanaponiuarrine. Nama narrarazapa pouaza toppinanitoui. 4Parrissa tibodidenipe: —Moizecca marinarrassa onaneza oua orrine Deoza occa uima parrirenissa tanitoui −tiquenezape Zeso Cristoza tiarrimanarraro. Deocca touati uanehe tettarromanarraro. 5Naraha icca uima Deoza parrirenissa taniuarrine touini inezape Zeso Cristoza parrissa ineza Deo Corime ia acco canazapa icca uima Deoza tobicarraro. 6Zeso Cristoza iquerrenanissa tezape zopori cotani eteroni uissinarra icarriza icarri-rrereza naqui Deozape narrarossa caniqquimerarraro. Narraro uissinarracca uimape ponima torrarraro. Naraha uima parrisseheccape Zeso Cristo tauimariza rrehe inanissa tarrarona parri. Narraro rrehenirri auato taniuarrinepe Deocca touati uanehema itessedenitoui eti cauanarizerara canezana bica tani.
7Rraho, taidepe parrissehe tauimarini timittemanapoza narrarossa tinanemanapode. Naraha nerrecorrari atti timittemaneza ticcadeni iborehe tinebomanarrarotte? 8Narraricca marinarrape Deocca zossenirri rrerani. Deo tiadeni uaua tabaqquirraripa Poua Bedi Zeso Cristoza tiquerrenaniuarrine. 9Arrana pao ssarra tauiuarrine cacarrima bazira taha icanarrimazapa pao namanaha ssarra tarrari. Narraro uimape marinarra onihi tauimarini. Arri maizehecca marinarrape bazira teraha parrissehecca marinarraza carrimezape parrissehecca tossamo tani. 10Naraha obodiza nauato onarraro: Ia Zozossede Deo tiadeni touacaua-baqquiuissa taui, marinarra onihiza tiquerrene-rreranitoui. Occa marinarrazara tiquerrena-zanaponitoui, onarraro. Naraha arra maizehe tiadeni mari tocanabaqquidepa nerrecouarricca? Ssamo oneraha niza zotode Deo inarrizouitoui nauato onani.
11Ouimecotedeni, tibodideni uatome-manarri. Tiadeniza: —Zopori cotani eteroni uissinarra ticarrimanarri −ohonariza nezape zodeodeni ouaza nacasseraqquiri narrarauitouiraha. Zeso Cristo aua porimacossaniza itoui zoqquerrari tauimari mari mari onarrarorrine zodeodeni ouaza nacasseraqquiri narrari. 12Naraha tiadeniza moua moua quenarrarideni: —Zopori cotani eteroni uissinarra ticarrimanarri −quequenanarraridenipa poua pouadeni zoporira nemanehe uissi toppiccaraho, onarraro.
13Ouimecotedeni, Deo titouideni uaua nazapa Moizecca marinarraza tiadeni tappa tabaqquirrari. Rridapanape Moizecca marinarra pina tiadeni zossedessa nerrerani. Naraha tibodideni touini tiquenanicca tinanarizemana terrerarri. Arrima tinanemanazana bica tani: Deo pocca touati uanehezara timecotedeni tezerre acco acco ticanarizerara canana, onarraro. 14Deocca zossenirri nemanehe uati timanimananiuarrinepe uapi teraha tassaqquinicca orrariepe: —Tinorideniccaza tetideni uanaqquiri narri, pina tiadeniza tetideni uanaqquiri narrarossa narri −naui nade. 15Arri timecotedeni tezerre tatamasso ticanarizereza pina cca cca ticanarizerarrarossa nezape parri, tirrinedeni Zeso Cristoza titiqueriqqui narrarope tossamorana, onarraro.
Deo Corime ibodiza madizapa icca madie bica taniuarrine
16Ouimecotedeni, ouattipe: Deo Corime tibodideniza madizapa pocca zossenirriza iboraqquiri tiquenarri. Nema tiquenezape tibodidenicca uaidirehe touini tiquenerreraniuarrine, onarraro. 17Ibodicca uaidirehepe Deo Corimeza uadi tarraro. Manaco Deo Corimepa ibodicca uaidireheza uadi tarrari. Narraro uima pamehepe ibodiza cacauadire narraro. Nezape Deo Corime tibodideniza madirrarirrine touini tiquenanicca tinanemananiuarrineraha ecossa tani. 18Deo Corimepa timadimananissa taniuarrine tiadeni zosse zosse nauitoui. Pocca zossenirriza iboraqquiri tiquenezape Moizecca marinarraza timadimana-rrerani.
19Ia bazima nauatoqquiri inani: Madirra pouadeni bodiza uaidirehe touini quenazapa Deo nacassera tauicca inanemana tani. Pina pocca amonerre rrereraha touini damera tarrari, ponicca maqqui rrararaha toui damera tarraro, poua tesse tezerre, poni tassani tazarrani uananehe oppina tanicca inanemanarraro, uima uaidira tanicca tonanade damera tarrari. Narraro uima uapimaza Deo nacassera tarrari. 20Pina siba nauatoniza, zoppinerredeniza naco: —Ia cacauade −quenarrari. Pina ttemode, tomade, caribarrade touini dameraqquiri narrari. Denimape nacasserehe, tamassoue, poua tesseccaraha touini narrari. Amazati cauadirerrari, arrauarri nacassera arrauarri nacassera narizemanarrari, pouadenirrine madirra tonarraribaqquimanarrari. Narraro uima bazimaza Deo nacassera tarrari. 21Denimapa zepe sse tarraricca acconi uadirrari, nocco rrano tarrari, uaqquira taha ccarizarrari. Nema nanicca uima bazimape uaidira tarraro Deoza. Naraha tiadeniza parri, onarraro. Naniuarri omadiza tiadeni mari ocanabaqquiporrarossa narraro tiadeniza dozo onapomarraro: Deo nacassa tauicca uaidirehe inanemanarrarodenipa niza Zeso Cristo ccanipomaza Deocca cacaueheuarri toquerrena-rrarauitoui.
22Naraha Zeso Cristoza iquerrenezape icca uima pina aua bicaui bonorride rarrarissa narraro. Deo Corimerrine bono inarrarope pina touati uanehe, uatizehe, rronehe narraro. Rrehe, Deo Corime ibodiza madirrarirrinea iape uapimaza eti uanaqquiri narraro. Deocca uatizehema imadirraro. Rroneqquiri ineza imadirraro, amazati edi-rrerarraro, etti bica teza uati uati inarraro. Uima bicanira inanarraro, Deozara rrehe izanaporraro. 23—Iana deni iquerrenani −inerrerarraro. Uimasiri inane-rreraniuarrine ia ecauarraro. Narraro uima bicani bazimape Deo Corimerrine icarrirraro. Narraro uima bazimaza Deo naco, madirra naco: —Uaidira tani, oppina tani −quena-rraraui. 24Nazama Zeso Cristoza iquerrenarrarope poua tezerre aua porimacossaniza ibodiza uaidirehe touini inanicca rricarraro. Imeza touini inanicca, ibodi uatoue uaidira tanicca bazima rricarraro. 25Nezape Deo Corimerrine icca madie cacarriqquimerezape pocca zossenirriza iboraqquiri inana, onarraro. 26Nezape etti: —Iana nauatoqquiri inani, deni iquerrenani −inerrerana. Itesseza edirrerana. Ettipe: —Tiape ouassa taqui? −inerrerana. Itesse nauato taza poua zepetarri toui naco irrami-rrerana, onarraro.