Carasiadeniza 4

₁Deocca erredeni iquerrenarrarope arrirraro namiza imadirrarocca uimassa narraroza tiadeni mari ocanabaqquina. Madirra zoqquezapa zepetarri zepepero poua bediza totorra narraro. Poua bedipa imehi zepetarri zepepero nemanehe carriuiuarrineraha auera taccazapa pina pocca madirracca zozosse tarabaiarrinessa naha madiccarrari. ₂Erredeni auera taccazapa poua cacauade carri, imehi zepetarri zepepero cacauade carri narrari. Narrarideniza madirronarraria arra imehi ua izanauicca uarrano bacco tarrari. ₃Ia naqui taide arrirraro namicca uimaza iboraqquiri inapozape pina madirracca zozossessa inaccade. Pina arra erredeni imehi zepetarri zepepero pouaza torraniuarrine touini madirrarissa inapode. ₄Naraha Deo pocca erredeni Zeso Cristo madirra iassa naha zosse inaronauiuarrinecca uada bacco teza amonerreza tossonarrari. Moizecca marinarraza ibora tauiuarrine tossonarraride. ₅Rrehe, Moizecca marinarraza zozosse iquerrenaporaha zotodepe narraro marinarraza ia todinibaqquiuiuarrine ccaronarraride Zeso. Nazapa Deo iaza: —Occa zozossedeni −narrararrari. —Occa erredenideni −narrari. ₆Nazama Deo pocca erredeni iquerreneza naqui Poua Bedi Corime iaza madiuiuarrine ibodiza zosse izimarraride. Narrarirrinena ettipe: —Parrissa, Tiape icca Abi Deo −inarraro. ₇Rridapanape zozosse tiquerrena-rrerani. Deopa tiadeniza: —Occa erredenideni −narrari. Nezape pocca erredeni tiquerrenarrarorrine Deo Poua pocca tiadeniza inanarizanitoui.

₈Rrehe, taide Deoza ssamoqquiri tiquenapozape tiadeni cacauade pouamaccazara: —Ia cacauade −titiquenapo narraro. Narrari tiadeni cacauade maizeheccaza tiquerrenapoccade. ₉Naraha rridapanana Deorrine pocca erredeni tiquerrenezape Pouaza nauatoqquiri tiquenani. Deo Poua naco tiadeniza nauato tarrari. Naraha nerrecotoui tiadeni cacauadeboteza tiquerrenani-pomaniuarrine? Narraripa pouamacca. Dacorehe carri-rraraui. ₁₀Uima onihi naqui. Erretecca dameraqquiri tiquenarraro. Tettidenipe: —Errete ecauezape icca uima Deoza bica taniuarrine −tiquenarraroqui? Pina erretecca uada bacco teza narraro errete tinanemana, abazico cauittauicca errete tinanemana, uizarracca zamatapa ppa taui bono bitedecca errete tinanemana, uarrano namanahacca errete tinanemana narraro. ₁₁Nazama ticcadeni uima torrizezape ocappineza: —Rraho, ponima tiadeni maride ozepe irrirrarottaqui? −ohonanarraro.

_12-13Ouimecotedeni, ouassa tiquenarri, onarraro. Pina zodeodenicca marinarraza zozosse orrarrerarrarossa tiquenarri. Oua naqui arri tiadenissa onarraro, zodeo querrena-rrararrarideniza ohocarrima nani nauatoqquiri tiquenani. Oua qqui tiquenapoza naqui coma oneraha oua tinacasseremana nerrerade. Narraro comanirrinea tiadeniuarri Zeso Cristo tauimari icassiuaueraniuarrinecca mari mari ohonanarraro nauatoqquiri tiquenarraro. ₁₄Coma oneza narraro tiadeni nattome tabaqquirraro. Narrarorrine ouaza nacasseraqquiri tiquenanitouiraha nema tiquenerrerade. Oua tettarromana-rrerade. Tiadeniza bacco ozimazape pina Deocca zozosse memeuarricca tiadeniza bacco tozimarrarissa onarraro. Ouaza bicaqquiri tiquenade. Otoui tiqueneza naqui pina Zeso Cristo pouatoui tiquenarrarossa nade. ₁₅Naraha nauato onani: Taidepe otoui tetideni uanaqquiri neza tiparriremanezape onocco tobicaniuarrine tinoccodenira tidinemaneza ouaza da tiquenanitouiraha. ₁₆Naraha rridapanape ticcadeni uadi orrarraroqui? Parrissehera tiadeniza uati onezape ouaza tedimananitide, onarraro.

₁₇Tiadenipe mamaridedeni ouaha ticarrimanani nauato onani. Narraridenipa poccadeni mamari tabaqqui tiquerrenaniuarrine dameraqquiri narrari. Naraha poccadeni uimape bica terrerani. Occa marinarra tinebomaneza poccadeni marinarrazara dameraqquiri tiquenaniuarrine touini quenarrari. ₁₈Madirra ouahadeni titouideni dameraqquiri nauiuarrine bica tani, oppinera tani, poccadeni uima bica teza. Ouaza naqui dameraqquiri tiquenaniuarrine bica tani, onarraro. Nema tizanapomanana. Tiadeniza omadiza omadi-rrereza naqui, onarraro. ₁₉A, otessedeni, tiadenipe occa erredenissa tiquenani. Ticcadeni uima ouaza ocassera tezape pina amonerre poni bedi tossonauiuarrine comene auarrarossa onarraro. Tiadenipe Zeso Cristo pouassa tiquenaniuarrine bacco tiquenerrerezape ouaza ocassera-zanapoccanitoui. ₂₀Rraho, rridapanape tiadeniuarri omadiccaraho, onarraro. Rridacca tiadeniuarri omadizape ouatti bica teza tiadeniza uati onanitouiraha. Arrina, ticcadeni uimarrine ssamoni oueza nerrecoma onaniuarrine? onarraro.

₂₁Rrari, tiadeni Moizecca marinarraza timadimana-zanaponiuarrine touini tiquenarrarope ouatti tecomeremanarri: Moizecca marinarra ua quenaza Abarahao tauimari titimittemana nerrerattaqui? onarraro. ₂₂Arri maittaccazama Moize dozo inaporrarope arrima narraro: Abarahaopa bedi pamaha carrirrari. Ouahapa zozosse torrani bodinitarri. Ouahapa poua pocca amonerre parrissehecca bodinitarri quenarrari. ₂₃Narrarideni pamahapa Abarahao bedi querrenaraha zozosse torrani bodinitarri tossonarraripa pina ia bazima icca abirrine ami rriueza issonarrarossa narrari. Naraha Abarahao pocca amonerreza tossonauiuarrinena Deo Abarahaoza: —Orrine erredeni ticarrimananitoui −narrari. Nezape Sara ccaraniraha erredeni carriza tossonarrari. Deo uati taporrari parrirenissa tarraro.

₂₄Abarahaocca amonerre pamehe tauimarinideniza uima iattaniuarrine auato tarraro. Amonerre pamehepe pina Deocca rrehe canirenirri pamehecca uimassa quenarraro. Taidepe amonerre zozosse torranicca uima qqui inapona. Narraro amonerre oninipe Acara. Acarape zozosserre narraro poni potemanideni naco zozosse toquerrena-zanaporrari. Acaracca uimape pina Deo pocca madirra tezerre ssono Sinaiuarri rrehe canirerraricca uimassa narraro. ₂₅Narraro ssonope zama onini Arabiauarri uarraro. Naniuarri Moize Deocca zossenirri dozo inaporraro. Narraro zossenirriza Deopa pocca madirra tezerre rrehe canireporrari. Nazama oza panani Zerozareuarri madimanarrarideni naco narraro rrehe canirenirriza iboraqquiri naccarrari. Narraridenipa Moizecca marinarraza zozosse toquerrenarrarissa quenazapa pina Acara tauimarinissa narraro carrimanarrari. ₂₆Naraha Abarahao bedimeni zozosse torrani rrerarraro Saracca uimape pina Deocca rrehe canirenirri zaticca uimassa narraro. Pina Zerozare zati memeuarricca uimassa narraro. Narraro oza pananipe icca oza rriquerreranicca. Iape Moizecca marinarraza zozosse iquerrena-rrerazape Zerozare zaticca madirra iquerrenarraro. Pina Saracca erredenissa inarraro. ₂₇Narraro uimape Deo Atti dozo naniza arrima narraro:

₂₈Ouimecotedeni, tiadenipe pina Saracca erredeni Izaquissa tiquenarraro. Deopa: —Abarahao potemaui uapi tauitoui −naporraripa arri tiadeni parri. ₂₉Naraha maittaccazama Abarahao madiza poua bedi taidecca arra pina ia bazima icca abirrine ami rriueza issonarrarossa narraripa poua ouaha nanarrizo narizarrari quenade. Arra Abarahao bedi zotodecca Deo Corimerrine tossonarrari Izaquipa bica taraha taideccana uadi tarrari. Rridapana narraro uimassa narraro torrarizarraroa Zeso Cristo tauimariza iquerrenarrarodeni nanarrizo iquerrenarraro, Moizecca marinarraza zozosse toquerrenarraridenirrine. ₃₀Naraha Deo Attipa nerrecoma narraritta? Rrehe, Deo Atti Moize dozo inarrarope: —Narraro amonerre zozosse torrani poni bedima zosse tininebaqquirro. Niza imehi zoqquezapa poua zepetarribote zozosse torrani bediza torra-rreraniuarrine. Narraro amonerre parrissehecca bedizana imehi zepetarribote torraniuarrine −napoui nade. ₃₁Ouimecotedeni, iape pina zozosse torrani potemanissa inerrerani. Zeso Cristo tauimariza rrehe inezape Moizecca marinarraza zozosse iquerrena-rrerarraro. Iape pina zozosse torrani rrerarraro potemanissa inarraro.