Deocca zossenirri Moize dozo inarraroza iboraqquiri inaniuarrinequi?
1Rraho! Tiadeni Carasiauarri timadirize-manarrarodenipe tibodideni uatome-mananiuarrine ssamoqquiri tiquenarraro. Nerrecorrari attirrine tibodideni tossamorraro? Nani tiadeniuarri Zeso Cristo aua porimacossaniza zoqquerrari tauimari ouacomera-rizapozape pina qqui tiquenarrarissa narraride. Naraha rridapanape uima onihizana tiquerrenarraro. 2Rrari, arrirraro ouatti orrarie tecomeremananiuarrine touini onarraro. Arra Deo Poua Corime tiadeniza inanarizarraripa Moizecca marinarraza iboraqquiri tiquenarrarorrinequi? Nouerani! Zeso Cristo tauimari timittemaneza parrissa tiquenezana Deo Poua Corime tiadeniza inanarizarraride. 3Nerrecotoui timittemananissa terrerarraro? Arra Zeso Cristoza rrehe tiquenapozama Deo Corime tiadeni acco tocanabaqquirrari, Zeso Cristo tauimariza timadimananiuarrine. Naraha nerrecotoui rridapanape ticcadeni uima torrizarraro? Arri tettidenipe: —Icca uima Deoza parrirenissa taniuarrine Moizecca marinarrassa inanana −tiqueneraha. Nema tiquenanipe bica terrerani, onarraro. 4Arrina Zeso Cristo tauimariza rrehe tiquenezape Deo tiadeniza uima bicani inanarrarope ponimaqui? Ponima rrerani! 5Rrari, tibodideni uatome-manarri: Deopa tiadeniza Poua Corime inanarizarrari, arra tiadeniuarri naco canauatori canarizarrari. Naraha nerrecotoui nama narraritta? Moizecca marinarraza iboraqquiri tiquenarrarorrinequi? Nouerani! Zeso Cristo tauimari timittemaneza rrehe tiquenarrarorrinena nama narrari.
6Rrari, Abarahao tauimariza tibodideni uatome-manarri. Abarahaopa Deoza parrissa narrarirrine Deo Attipa: —Abarahaocca uimape ouaza bica tani −narrari. 7Nazama madirra Deoza parrissa quenarraridenipa pina Abarahao parrissa narrarissa quenarrari. Narrarideniza: —Parrissa Abarahao potemauideni −ihinanarraro. 8Maittaccazama Deo Atti dozo naporraroza arrirraro uima auato inanaporraro: Zodeo querrena-rrararrarideni Deoza parrissa quenazapa poccadeni uima Deoza tobicanitoui. Deopa pouadeniza: —Tiadeniza uima nouerani. Bicaqquiri tiquenani −nauitoui. Narraro uima bicani madirra tocassiuauerauiuarrinecca Deo Abarahaoza uati taporrari: —Deorrine tipotemani zotodeccazana arrirraro zamacca madirra bazimaza uatizeheri torrarizanitoui −naporrari. 9Nazama Abarahaoza uatizeheri torrarrarope Deoza parrissa narrarirrine. Narrarossa narraroa madirra uapima Deoza parrissa quenarrarideniza uatizeheri torrarizanitoui.
10Naraha madirra attidenia: —Moizecca marinarraza iboraqquiri inezape icca uima Deoza tobicanitoui –quequenanaraha narraridenipa tocassiuauera-rrarauitoui. Deo pocca narrizoue pouadeniza inananitoui. Narraro uimape Deo Atti dozo naniza arrima narraro: —Deocca zossenirri nemaneheza madirra ibora tarrararraripa narrizoueza torrauitoui −nani nade. 11Nezape iaza auato tarraro: Madirracca uima Deoza bica tarrarope Moizecca marinarrassa inanarrarorrine rrerani. Icca uima Deoza bica tarrarope Pouaza parrissa inezana parri. Deo Atti dozo naniza arrima narraro: —Madirra bica tarrari Deoza parrissa narraripa narraro rrehenirrima madi-zanapouitoui −nani nade. 12Naraha Deocca zossenirri taidecca Moize dozo inarrarozara madirraripa rrehenirri rriraha madiuitoui. Deo Atti dozo nanizape arrima narraro: —Arrirraro zossenirrissa inaneza madirraripa narraro zossenirrizara madiuitoui −nani nade.
13Naraha Cristopa ia todinibaqquiuiuarrine zoqquerrari. Deocca zossenirrissa inaneza imadiniuarrine iparrire-rrerezape Deo pocca narrizoue iaza inassonarinitouiraha Cristozana inassonarirraro. Pouaza torrarrarope pina Moize dozo inaporraroccassa narraro: —Auaza que taza zoqquerraripa Deocca narrizoue carrirrari −nani nade. 14Cristo ia todinibaqquirraripa arra zodeo querrena-rrararrari pouaza rrehe quenarrarideni naco uatizeheri carrimanauiuarrine. Narraro uatizeheripe Deo Abarahaoza uati taporrarissa narraro pouadeniza torraniuarrine. Uima onihi naqui iape Zeso Cristoza rrehe inezape Deo Poua Corime iaza inanarizarrari, pina Poua uati taporrarissa narraro iaza da inarrari.
Deo pocca uima bicani inananiuarrinecca uima uati taporrari, zotodena pocca marinarra da inarraro
15Ouimecotedeni, arrirraro namiza imadirrarocca uimaza tiadeni mari ocanabaqquina. Madirrapa poua tesse tezerre —Rrehe icanirena −quenazapa poccadeni rrehe canirenirri papeoza dozo iquenarraro. Nazapa narraro papeoza pouadeni zepe ppa quenazapa madirra ouaha atti: —Narraro dozonirripe poni, nebona −nauiuarrine ssamo tani. Uima onihi inauarimananiuarrine naqui oppina tani. 16Narraro uimassa narraroa Deopa taide Abarahaoza uati taporraricca cacarriqquimeraniuarrine ssamo tani. Poua Atti Abarahaoza: —Tiaza, tipotemaniza uima bicani onananitoui −naporrari. Naraha Deo Atti dozo nanizape: —Tipotemani bazimaza −nerrerarraro. Poua potemaui orrariazana dozo narrarode. Narraripa Cristo. 17Narraro Deo uati taporraricca uima uati onarrarope arrima narraro: Abarahaopa Deoza parrissa naza Deo Abarahao tezerre rrehe canireui quenade. Naraha zotode uarrano 430 naha tossoniqquimazana Deo pocca zossenirri Moizeza da ineza dozo inarraro. Naraha narraro zossenirripe Deo Abarahao tezerre rrehe canirerraricca uima inassamoniuarrine parrire-rrerani. Deo Abarahaoza uati taporraricca uima naqui ponima inananiuarrine parrire-rrerani. 18Arrina, rridacca Deo pocca uima bicani icassiuaueraniuarrinecca Moizecca marinarraza iboraqquiri narraridenizara da inezape arra Deo Poua Attissa inana-rreranitouiraha. Poua uati tapouicca naqui ponima torranitouiraha. Deo Poua uati taporraricca danirripe manaconi rrirehe Abarahaoza da inarrarossa narraro. Abarahao Deoza ibora tarrarirrine rraraui. 19Nezape tettidenia: —Nerrecotouira Deopa pocca zossenirri Moizeza da inarrarotte? −tiquenanitiderra. Narrarope madirradenicca uimasiri pouadeniza auato taniuarrine. Abarahaoza uima bicani uati taporrari nattinipe Deo pocca zossenirri da inarraro. Narraro zossenirri ecauemana-rronarrarope Abarahao potemaui bicabote orraria ccarronaui bacco tarraroparri. Nazama Deo pocca zossenirri da inezape madirradeniza uati tarrararrari. Pocca zozosse tabaqquiza uati tazana pouadenina Moizeza uati iqquime-manarraro. Nazapa Moizena madirradeni mari icanabaqquirrari. 20Naraha Deo Abarahaoza uati tapozapa Poua Atti uati toqquimade rriraha uati tarrari. Deo Poua motta: —Ouattissa nehe onananitoui −naui nade Abarahaoza.
Deo pocca zossenirri da inarrarope Zeso Cristoza bacco inaniuarrine ia acco canarraro
21Nazama Deo pocca zossenirri Moizeza da inarrarope Deo Poua uati taporraricca uima bicani inassamoniuarrine parrirequi? Nouerani! Rridacca Moizecca marinarra camittehe rriquerreranicca dade parrirezape narraro marinarraza iboraqquiri ineza icca uima Deoza tobicanitouiraha. 22Naraha Deo Attiza uima imittarrarope ia bazima uimasiriza pina tozepe iquerrenarrarossa narraro. Narraro uimasiriza ia tappa tabaqquiuiuarrinepa Zeso Cristona orrariui. Madirra bazima pouaza rrehe quenarrarideniza Deocca uima bicani torranitoui.
23Naraha Zeso Cristoza rrehe inerreraqquezape Moizecca marinarraza imadirronarrarorrine pina toponi cocoroza ezarrarossa inarrarode. Narraroza imadirronarraroa Zeso Cristo tauimari imitteza rrehe inezape iqquenarrarossa narrarode. 24Narraro uimassa narraro uati onana, timittemananissa taniuarrine, onarraro. Moizecca marinarrape Zeso Cristoza bacco inaniuarrine pina ia tonequebaqquirrarossa narraro. Pina erredeni cacauade erredeni inequeriza-baqquirrarissa narrarode. Zeso Cristo tauimari icassiuaueraniuarrinecca imitteza rrehe inezape icca uima Deoza tobicarraro. Iaza Deo Attipa: —Bicaqquiri tiquenani −narrari. 25Naraha rridapana Zeso Cristoza rrehe inezape Moizecca marinarrape pina ia cacauadessa napoma-rrerani.
26Zeso Cristoza rrehe tiquenezape Deo pocca erredeni tiquerrenarraro. 27Pouaza rrehe tiquenezape passo dopaniza niniqui ticarrimanarrarode. Nezape pouaza tirrariqquimanarraro. Cristo pocca madiessa tinanemanehe timadimanarraro. 28Tiadeni bazima Zeso Cristoza rrehe tiquenarrarope zodeodeni, zodeo rrararrarideni, zozossedeni, zozosse rrararrarideni, maqquiderredeni, amonerredeni bazima Zeso Cristoza tirrariqquimananissa tarraro. 29Zeso Cristoza tiquerrenezape Abarahao potemaui tiquerrenani. Nezape Deo Abarahaoza uima bicani uati taporraricca tiadeniza naqui torrarraro.
