Carasiadeniza 2
Bobode torrarrari Zerozareza bacco tauiuarrine
1Rrehe, uarri taniuarri omadizape uarrano 14 naha omadirraro. Zotodepe Zerozareuarri oqquemorani-pomarrarode. Narraro bobodezape Banabe, Tito tezerre ouaza touedemoranirraride. 2Naniuarri oqquemorani-pomarrarope taide Deopa occaniniuarrine bica tani auato inaneza oqquemoranirraro. Nezape Zerozare bacco onaniza Zeso Cristoza rrehe quenarrari bazimaza occa marinarracca uima uati onabaqquirrarode. Ime rrocouideni pouadenira queriqquimanaza naco occa marinarracca uima mittemanauissa tauiuarrine uati onabaqquirrarode. —Zodeo querrena-rrararrarideniza Zeso Cristo tauimari icassiuaueraniuarrinecca ouacomera-rizaniccape arrima narraro −onade. Obodipe: Occa uimaza nerrecoma quenaui? oneza uati onarrarode. Ouatti mittemanaza: Occa marinarra taide ouacomera-rizaponicca pina ponimassa nerrerattaqui? Occa marinarra rridapanacca naqui ponimaqui? oneraha nouerani. Pouadeniza bica tade. 3Arra otesse Tito ouaza ccarizarrariza naco bicaqquiri narrari. Pouapa zama Cresiauarricca madirraraha pouaza: —Zodeodenicca zopori cotani eteroni uissinarra ticarrirri −quena-rrarade. 4Narraro uissinarracca uimape nouereraha zodeodeni motapa narrarotoui dameraqquiri narrari. Narraridenipa Zeso Cristoza parrissa quenaraha maizemanarrari. Pouadenipa iqueriqquiniza rrauizimarrari, ia noccozade. Zeso Cristo tauimarirrine Moizecca marinarraza imadi-rrereraha narraridenina Moizecca marinarraza ia tonananibaqquiuiuarrine touini quenarrari. 5Rrehe, narrarideni mamaizadedenipa dameraqquiri naraha pouadeni attiza ibobora inerrerade. Nouerade. Zeso Cristo tauimari icassiuaueraniuarrinecca orrarinina parrissa! Carasiauarri timadimanarrarodenipe narrarozara parrissa tizanapomanani bica tani, inarraro.
6Rrehe, ouape nani Zerozareza Zeso Cristoza rrehe quenarrari ime rrocouideni Zeso Cristo tauimari mari mari onarraro nattome quenaraha zori onanani nouerade. Attidenipa: —Arrima narraro naqui mari mari tarri −quena-rrarade. Ime rrocouideni querrenaraha ocappina-rrerade. Arra Deozapa deni toquerrenarrarideni, arramani toquerrenarrarideni bazima narrarissa caniqquimerarrari. 7Nazama ime rrocouideni occa uima mittemanazapa: —Rrehe, bica tani −quenade. Arra zodeo querrena-rrararrarideniza Zeso Cristo tauimari icassiuaueraniuarrinecca ouaccora-rizaniuarrine Deo oua cazosserrari pouadeniza auato tarraro. Pouadeni attipa: —Parrissa Paorocca uima pina Pedoro zodeodeni maride Deo icazosserrarissa narraro −quenade. 8Deo Poua orrarirrarina Pedoro zosse inarrari, zodeodeniza Zeso Cristo tauimari eccorarizaniuarrine. Oua naqui zodeo querrena-rrararrarideniza Zeso Cristo tauimari ouaccora-rizaniuarrine oua cazosserrari.
9Zodeo querrena-rrararrarideni maride orraniuarrine Deo oua cazosserraricca uimape arra Tiaco, Pedoro, Zouao quenarrarideniza auato tarraro. Narraridenipa Zeso Cristoza quequeriqquimana narrarideni cacauade deni toquerrenauicca. Nazama oua, Banabe tezerre zodeo querrena-rrararrarideniza maride icadarizaniuarrine pouadeniza bica tezape izepe cobo tabaqquiza attidenipa: —Peperri. Tiadenipe zodeo querrena-rrararrarideniza tizepedeni irrimananiuarrine bica tani. Iana zodeodenizara izepe irriniuarrine −quenade. 10Narraridenipa uima orrariera iaza uati toquenade: —Arra Zerozareuarricca imecotedeni mota cappiremanarrarideniza tetideni rrimemana terrerana. Ticcadeni da naqquinarra mota pouadeniza da da tizanapomanana −quenade. Narraro uimaza: —Rrehe, nema onana −onapozama nema onanarronarraro.
Paoropa Pedoro rroua icanarrari
11Pedoropa imadinicca oza panani Atioquiauarri ccarronaza nauiza pocca uima bica taporaha zotode pouarrine bica terrerani. Narraro qqui onezape madirra bazima mittemanauiuarrine pouaza uati uati onarrarode. 12Arra Pedoropa taide zodeo querrena-rrararrarideniza rripade totoqquezima naporrari. Naraha zotodepa imecotedeni Zerozareuarricca Tiaco zosse inarronabaqquirrari. Narrarideni rrauirronaza Pedorocca uima torrizarraro. Arra imecotedeni Zerozareccapa zodeo querrena-rrararrarideniza rrarraui torrezima narrararrari. Pouadenizape zopori cotani eteroni uissinarra cappiremanarrarideniza rripade oppina tarraro. Nazapa narrarideni noppine Pedoro zodeo querrena-rrararrarideniza rripade neborrari. Nazapa zodeo querrenarrari uissinarra carrimanarrarideniuarrira rripade totoqquezima narraride. 13Nama nazapa imecote Atioquiacca zodeodeni mota naco pina Pedorossa quenarrari, zodeo querrena-rrararrarideniza touarrimanarrari. Banabe naco narraridenizama touarrirrari. 14Nezape poccadeni uima bica terrerani qqui onade. Naraha uima toccanissa tarrarope zodeodeni, zodeo querrena-rrararrarideni bazima Zeso Cristoza rrehe inezape pouana ia tonassiuauabaqquirrari. Narrarona parrissa icassiuaueraniuarrinecca uima. Arri poccadeni uima bica terrerezape Zeso Cristoza quequeriqquimana narrari bazima mittemanauiuarrine Pedoroza uati onarrarode: —Tiape zodeoraha pina zodeo querrena-rrararraridenissa tehe timadiccade. Zesoza tirrarrarorrine Moizecca marinarra tineborrarode. Nema taporaha nerrecotoui rridapanape: “Zodeo querrena-rrararrarideni Moizecca marinarraza iboraqquiri nana” tarraro? Nema tanipe bica terrerani −onarrarode.
Icassiueueraniuarrinepe Zeso Cristozara rrehe inarraro
15Iape zodeodeniza issonezape zodeodeni iquerrenarraro. Iape pina zodeo querrena-rrararrari uimasiri sseqquiri narraridenissa inerrerani. 16Naraha ibodiza nauatoqquiri inarraro: Deocca zossenirri Moize dozo inarraroza iboraqquiri inarrarope icca uima Deoza parrirenissa taniuarrine parrire-rrerani. Zeso Cristo tauimariza parrissa inezana pouarrine icca uima Deoza parrirenissa tarraro. Zeso Cristoza parrissa inezape icca uima Deoza parrirenissa tarrarorrine ia tonassiuauabaqquirrari. Nazama icassiuaueraniuarrinepe Deocca zossenirrissa inanarrarorrine rrerani.
17Ettipe: —Zeso Cristoza parrissa ineza icca uima parrirenissa taniuarrine −inezape arra zodeodeni Deocca zossenirriza dameraqquiri narraridenipa iaza: —Deocca zossenirri taidecca tinebomanezape uimasiri sseqquiri tiquenani −quequenanarrari. Naraha Zeso Cristorrine uimasiri inanarraroqui? Nouerani! Uimape nema nerrerani, onarraro. 18Naraha ouape Deocca zossenirri taidecca oneborraro odimanizape uimasiri onanani auato tarraro. 19Maittaccazama Deocca zossenirri taidecca ouacauezape occa uima Deoza onaparrirenissa taniuarrine ssamo tade. Naraha Zeso Cristocca orrezape poua tezerre oua naqui aua porimacossaniza ozoqquerrarossa narrarode. Narrarope Deocca zossenirri taideccaza pina ouatiarrarossa narraro. Rridapanape Deo Poua toui nauiccara onananiuarrine omadirraro. 20Ouape Zeso Cristo tezerre aua porimacossaniza ipamarronarrarossa neza occa madie rradanibotepe rricarraro. Rridapanapa Cristona ouaza madirrari. Nazama arrirraro namiza ouassirema omadiccazape Deo Bedi Zeso Cristoza rrehe ozanapoza omadirraro. Narrarina otoui uati uana tarraride. Oua tonassiuauauiuarrine zoqqueheza poua ccaccorarraride. 21Deopa itoui uati cauanari canaza Poua Bedi eccorarrari, icca uimasiri manaconi. Nezape pocca danirri bicani ouattarronirrine rrerani. Rridacca Moizecca marinarraza icassiuaueraniuarrine parrirezape arra Zeso Cristopa pouama zoqqueuitouiraha. Naraha pouama zoqque-rrararrari. Parrissa icassiuaueraniuarrinena itoui zoqquerraride.
2020 Sociedade Bíblica do Brasil