Imecotedeni tezerre acco acco icananiuarrine
1Rrehe ouimecotedeni, Deo Corimecca zossenirriza iboraqquiri tiquenarrarodenipe timecote orraria uimasiriza touedimazapa acco ticanemanarro, onarraro. Deocca touati uanehema mouaraza timecote pina tinatememani-manapomarro. Tiadeni naqui tiadeni tecauemanarri. Tibodideniza: —Ia naqui uaidira tanicca inanerana −tiquenana, onarraro. 2Timecote ocasserani auazapa acco ticanemanana. Manaco ocasserani temaneza tiadeni acco tocanabaqquiuiuarrine bica tani. Timecotedeni tezerre arriuarri acco, arriuarri acco titicanarizera nezape Zeso Cristocca marinarrassa tinanemananiuarrine, onarraro.
3Madirrapa poua bodiza: —Nauato onani −naraha ssamo tazapa poua poua tocamaizani taui. 4Rrari, ia bazima icca madiera nattome inana, onarraro. Irrine parrissa bica tezape narraroza etizeni bica tani. Imecotedenicca madie nattome inerrerana. Imecotedenirrine qqui ineza: —Irrinena denima bica tani −inerrerana. Nema inanipe pina: —Iana nauatoqquiri inani −inarrarossa nerana. 5Ia orrari inehecca uimape irrine. Bica teza, bica terrereza naqui icca uima manaconi iaza torranitoui.
6Rrehe, tiadeni mariderrine Deo Atti ticauatterezape tiadeni marideza accoraqquiri tiquenana, onarraro. Ticarrimananicca bazima pouaza accoraqquiri tiquenaniuarrinepe bica tani, onarraro.
7Parri, tiadeni ticamaizanimanerana. Madirra iape Deo icamaizauiuarrine iparrire-rrerani. —Deo qqui tarraraui, icamaizana −tiquenerrerana, onarraro. Ppa taui nocco ppa tiquenazapa narrari ppa taui bonora bite tirrizemanauitoui. Arri ticcadeni uimape zamatapa nocco ppadecca uimassa narraro. 8Uaidirehe tinanemanezape zoqquehe rriquerreraniccauarri tiquerrenanitoui. Naraha Deo Corime nacassa tauiccara tinanemanezape camittehe rriquerreranicca ticarrimana-zanaponitoui. 9Nezape uima bicani inana-zanaponiuarrine rrao iquerrena-rrerana. Irrapari-rrerezape niza zotode bono bicaui bite irrizauitoui. Narrari bonopa Deo pocca biquehe iaza inananitoui. 10Nezape uima bicani inananiuarrine iparrirezape nema inanana, onarraro. Taidepa imecotedeni Zeso Cristoza rrehe quenarrarideni inanabicabaqquipona, zotodena madirra bazima inanabicabaqquina, onarraro.
Paorocca uima rricanicca
11Occa dozonirri qqui tiquenarri. Arri tiadeniza dozo onarrarope ozepeza occa dozonarra pota taza dozo onarrarorrine. 12Rrehe, tiadeniza zodeo attidenipa: —Rrari, tiadeni naqui iassa tiquenarri. Zopori eteroni cotani uissinarra ticarrimanana −quenaui carri taui. Naraha attideni nama quenarraridenipa pouadeni tesse attideni: —Rrehe, tirrinedeni bica tani −quenauiuarrine touini quenarrari. Narraridenipa Zeso Cristo aua porimacossaniza zoqquerrari tauimariza rrehe quenaraha nanarrizo toquerrenaui noppineni cappinemanazapa zopori cotani eteroni uissinarracca uima nebomana-rrararrari. 13Naraha narraro uissinarra carrimanarraridenipa Moizecca marinarra nemanehessa inanemana-rrereraha narraro uissinarra ticarrimananiuarrine tiadeniza dameraqquiri naui. Pouadeni attipa: —Ettiza narraro uissinarra carrimanaui −quenauiuarrine touini quenarrari. 14Naraha ouape otesseza: —Orrine bica tani −onaniuarrine nacassera onani. Ia Zozossede Zeso Cristo aua porimacossaniza zoqquerrari tauimarira ouacomeraniuarrinena nacassa onarraro. Poua zoqquerrarirrine arrirraro namicca uaidirehepe pina uatiarrarossa narraro ouaza. Narraro uaidirehe onanapomaniuarrine touini onerrerani. Poniza pina ouatiarrarossa narraro. 15Arra uissinarra carrirrari, uissinarra cappirarrari naco narrarissa caniqquimerarrari. Narraro uissinarracca uimape ponima torrani. Naraha Zeso Cristoza rrehe inarraro uimana ponima torra-rrerani. Narrarirrinena ibodi zati torrarraro. Narraro uima orrariena bica tarraro. 16Nazama arrirraro marinarrassa inanemanarrarodeniza Deo pocca rronehe, pocca touati uanehe torrana, onarraro. Narraridenipa Deocca madirra parrissehecca.
17Rridapanape ouaza uadiqquiri narrarideni denima oua inarrizomana-pomaniuarrine nacassera onani, onarraro. Ouape Zeso Cristocca zozosse orrarrarorrine narrizoue onauanarizani auato tarraro. Arra ouaza nacasseraqquiri narraridenirrine ouime toberoromaroni.
18Rrehe ouimecotedeni, ia Zozossede Zeso Cristopa tiadeniza pocca biquehe, pocca touati uanehe inanana, onarraro. Parrissa nema nana.
