Carasiadeniza 1

₁Nirra ouimecotedeni? Occa uima tiadeniza dozo onarraro. Ouape Paoro, Zeso Cristocca zozosse orrani. Madirra atti touaccade orrarrerani. Madirrapa oua zosse narizade noueraui. Oua zossedepa Zeso Cristo, poua nauatonide Abi Deo tezerre. ₂Oua, ouimecotedeni ouaza madimanarrarideni tezerre tiadeniza dozo inarraro. Nani zama arobeni Carasiauarri titiqueriqquiriza narraro bazimaza: —Nirra, bicaqquiri tiquenaqui? −inarraro. ₃Arra icca Abi Deo, ia Zozossede Zeso Cristo pouadeni pamaha tiadeniza poccadeni biquehe, poccadeni touati uanehe inanemana-zanapona, inarraro. Poccadeni rronehe naqui tiadeniza torrazanapona, inarraro. ₄Zeso Cristopa icca uimasiri manaconi zoqqueuiuarrine poua ccaccorarrari. Nama narraripa arrirraro zamacca uima uaidira taniccaza iquerrenazanapo-rreraniuarrine. Icca Abi Deo ia todinibaqquiuiuarrine touini napoza: —Occa erredeni Zesopa madirracca uimasiri manaconi zoqqueuitoui −napode. ₅Abi Deo nama nazapa Pouaza: —Bica tinani, deni tirrani! −ihizanapo nana, onarraro. Parrissa nema nana.

₆Deopa uati cauanari canaza titouideni uaua narrari. Arra ia Zozossede Zeso Cristo itoui uati uana taza ia tonassiuauabaqquiuiuarrinecca uimaza iboraqquiri tiquenaporaha amazati poua tauimari tinebomanarraro. Icassiuaueraniuarrinecca uima onihizara tiquerrenezape tirraborrerimanarri narraro. ₇Icassiuaueraniuarrinecca uima onihi nouerarraro. Naraha ticcadeni rrehenirri moua moua quenarrari carri taui. Narraridenirrinena ticcadeni uima tossamorraro. Pouadenipa Zeso Cristo tauimari icassiuaueraniuarrinecca torrizaniuarrine touini quenarrari. ₈Naraha icassiuaueraniuarrinecca uima tiadeni mari icanabaqquiporrarope parrissehecca. Marinarra narrarossa nerreranicca maride ccarronaza tiadeni mari tocanabaqquizapa timittemane-rrerana. Madirra ouaha uitide, oua nitide, Deocca zozosse memeuarricca ccaronarrari uitide icassiuaueraniuarrinecca uima onihi tiadeni mari tocanabaqquizapa narrari mamarideza Deocca narrizoue ssonarina, onarraro. ₉Pina tiadeniza uati onaporrarossa narraro tiadeniza dozo onapomarrarope: Zeso Cristo tauimari icassiuaueraniuarrinecca pina tiadeni mari icanabaqquiponiccassa nerrerarraro tiadeni mari tocanabaqquizapa narrari mamarideza Deocca narrizoue ssonarina, onarraro. ₁₀Ouatti nema onarrarope madirra ouaza: —Rrehe, Paoropa bica taui −quenauiuarrine touini onarraroqui? Nouerani! Deona ouaza: —Rrehe Paoro, tirrine bica tani −nauiuarrinena touini onarraro. Arrina, madirrara onauatizebaqquina onezape Zeso Cristocca zozosse orrarreranitouiraha.

₁₁Ouimecotedeni, arrirraro uima timittemananissa tana: Zeso Cristo tauimari icassiuaueraniuarrinecca tiadeniza ouacomerarrarope madirra poua bodiza inauatorraro rrerani. ₁₂Arri, ouattarrarope madirrarrine ouaza torra-rrerani. Madirra oua mari cana-rrararaha Zeso Cristo pouana narraro uima oua tonauattarraride.

₁₃Tiadenipe occa uima taidecca timittemanapode. Taidepe zodeodenicca marinarrazara damera onapoccade. Occa uima timittemanaporraro naqui arra Deocca madirra Zeso Cristoza rrehe quenarrarideniza uaidira onaporrarode. Zeso Cristo tauimari nebomanauiuarrine pouadeni ohonarrizobaqquiriza narraride. ₁₄Occa madirra pina occa uarranossa quenarrarideni tezerre zodeodenicca marinarraza damamera inarizaporaha ouana denima damera onarraro. Icca ididenicca marinarra ouacauanissa taniuarrine denima damera onarrarode. ₁₅Naraha Deopa pocca zozosse orraniuarrine taide ossona-rreraccazama oua tocatterrizarrari. Ouape bica onerrereraha ouaza uati uana taza otoui uaua narraride. Nazana Pouarrine occa uima cacarriqquimerarraro. Poua touini naza Poua Bedi oua qqui tonanarrari. ₁₆Poua Bedi Zeso Cristo oua qqui tonanarraripa zodeo querrena-rrararrarideniuarri poua tauimari icassiuaueraniuarrinecca ouacomera-rizaniuarrine. Deopa ouaza nama naraha Zeso tauimari ouattaniuarrine madirradeni tezerre uimahaha icananiuarrine pouadeniza oqquerreraccade. Noueraccade. ₁₇Oza panani Zerozareuarri naqui oqquerreraccade. Nauiza Zeso pocca zozosse tabaqqui toquerrenauiuarrine uaua inabaqquiporrarideni madimanaraha pouadeni qquide occana onerreraccade. Ouape nani oza panani Damascoza bacco onapoza Zeso qqui onaraha zama Arabiauarrina occaporraro. Nanizana omadi-zanapoccade. Uada uapi tezana Damascouarri occanipomarrarode.

₁₈Nazapa uarrano 3 tossoniqquimazana Zerozareuarri Pedoro qquide oqquemoranirrarode. Naui Pedoroza uada 15 nehe omadirrarode. ₁₉Nauiza naco ia Zozossede Zeso poua imecote Tiaco qqui onaporrari. Naraha Zesocca zozosse tabaqqui ouahadenipa qqui onabaqqui-rraraccade. ₂₀Deopa ouatti mittaui, omaize-rrerani. Ouatti tiadeniza dozo onarrarope parrissa.

₂₁Nani zotodepe zama arobeni Siriauarri occarraro. Zama arobeni Sirisiauarri naqui occarizarrarode, Zeso Cristo tauimari maride. ₂₂Naraha imecotedeni zama arobeni Zodeauarricca Zeso Cristoza quequeriqquimana narraridenipa oua qqui toquena-rraraccade. ₂₃Pouadenipa zama onihicca madirra otauimari uati uati zazanapomana naza mimittemana naporrari. Attidenipa: —Narraria taidepa Zeso Cristo tauimariza toquerrenarrarideni narrizode ccaccarizapo narraride. Zeso Cristo tauimari icassiuaueraniuarrinecca rricaniuarrine damera taporaha rridapanana narraro uima ehecomerariza narraro –quenaui nade. ₂₄Nema onani otauimari mittemanazapa Deoza uatizemanarrari.