2 Corintodeniza 13

₁Taide tiadeni qquide occani pamade. Rridapana tiadeni qquide occapomaniuarrine onarrorani. Nani tiadeniuarri bacco onapomezape ticcadeni uima cattemade onarrorreranitoui. Tetideni rrimemana-rrerarri: Madirra uima tonanazapa pouadeni noccoza qqui toquenarrarideni uima cacattemadeza uati toquenaui bica tani. Madirra pamaha, 3 quenaha naco uati toquenaza parrireni. ₂Nezape taide uima ticarrimanaporrarodeni, arri tiadeni bazimaza naqui ouatti timittemananissa tarri, onarraro. Uarrano toccaporrariza tiadeni qquide oqquezape ticcadeni uimasiri tinebomananiuarrine tiadeni uati ocanabaqquide. Rridapana uarri taniza omadiza naqui ouatti nema onapomarraro: Uimasiri tinebomanarri! Tinebomana-rrereza bacco onapomezape ticcadeni uimasiri mouaraza onauana-rreranitoui. Ouatti dacoraza tiadeni uati ocanabaqqui-pomanitoui. ₃Nema onarrarope occa uima nattome tiqueneza: —Paoropa parrissa Cristo atti uati uati tarrarico? −titiquena narraro. Naraha Zeso Cristopa dacorarrari. Ticcadeni uimasiri manaconi tiadeni tonarrizo-baqquiuiuarrine rrapari tarrararrari. Pocca dacorehe tiadeniza auato inananitoui. ₄Pouapa pina rrapari tarrarissa naza aua porimacossaniza zoqquerrari. Naraha Deo pocca dacorehe pouaza inanezape nauatoniza camitta taha madirrari. Ia naqui narrarossa inarraro. Zeso Cristocca rraparie icarriraha pocca iquerrenezape Deocca dacorehe icarrini. Narraro dacorehema tiadeni acco canade imadirraro.

₅Tibodideni uatonissa tarri. Ticcadeni rrehenirri dacoraqui? Rrari, tiadeni nattome tinanimanarri. —Parrissa Zeso Cristo ouaza madico? −tiquenarri. Zeso Cristo tiadeniza madi-rrarazapa ticcadeni rrehenirri zori taccani. ₆Icca uima nattome tiqueneza naqui zori inanani qqui tiquenerreranitoui. Parrissa Zeso Cristo iaza madiui tiadeniza auato taniuarrine nauato onarraro. ₇Deoza uatide iquerrenezape: —Abi Deo, imecotedeni Corintocca uaidirehe inanemana-rreraniuarrine bodideni acco ticanabaqquina −ihinanarraro. Narraro icca uatinarrape icca marinarra tossamoni noppineni icappineza rrerani. Parrissa ticcadeni madie parrirenissa taniuarrine touini ineza Deoza uati uati inarraro. Arri tiadeni mari icanabaqquirraro pina zori tarrarossa nanitide naraha peperri, nema nehe, inarraro. ₈Deocca parrisseheza uima inananiuarrine iparrire-rrerani. Deocca parrissehema timadimananiuarrine tiadeni acco icanabaqquiniuarrinena bica tani. ₉Nezape rrapariqquiri ineraha etizerraro. Zeso Cristoza ticcadeni rrehenirri todacorani naniuarrinena touini inarraro. Titouideni Deoza uati uati inarrarope ticcadeni uima Deoza parrirenissa taniuarrine. ₁₀Narrarorrine arri timadimananiuarri occapoma-rreraccaza occa uima teppe tiadeniza dozo onarraro, nani bacco onerreraccazama ticcadeni uima ticattememanaponiuarrine. Nezape nani bacco oneza ouatti dacoraza tiadeni uati ocanabaqqui-rreranitoui. Ia Zozossede Deo pocca zossehe ouaza inanarrarope ticcadeni rrehenirri todacorani naniuarrine. Ticcadeni rrehenirri rricaniuarrine rrerani.

₁₁Rrehe ouimecotedeni Zeso Cristoza rrehe tiquenarraro, arrirrarope occa uima rricanicca. Deozara tetetizemana narri, onarraro. Ticcadeni uima ticattememanarri, ticcadeni madie tobicaniuarrine. Tibodideni acco acco ticanana. Timecotedeni tezerre rrehe ticanirenissa tarri. Ticarronerara caneza timadimananissa tarri. Nema tiquenezape Deo tiadeniza madiuitoui. Deopa touati uanehe rrinede, rronehe rrinede naco.

₁₂Nani timadimananiuarri timecotedeni tezerre bacco ticanirezape nirra tiqueneza dama, ticauarrocossa titiquena narri, onarraro. Arri omadinicca imecotedeni naco bazima tiadeniza nirra quenarrari.

₁₃Ia Zozossede Zeso Cristopa tiadeniza uima bicani inanana, onarraro. Deocca touati uanehe naqui tiadeniza torrazanapona. Poua Corime tibodideniza madi-zanapona, onarraro. Peperri.