2 Corintodeniza 12

₁Oua motta otauimariza: —Bica onani, deni orrani −onezape Deo ouaza: —Rrehe, tettipe bica tani −nauiuarrineco? Noueraui. Naraha nema nehe oua Zozossede Deo ouaza auato inanarrarocca, oua tonauattarraricca uima naqui tiadeniza ouacomeraniuarrine. _2-3Maittaccazama uarrano rricaui 14 nazapa Cristoza rrehe narrari orrariapa Deo Corimerrine pina pocca uadassa naraha parrissa qqui tarrari. Deo Corime memeuarri poua iaccamacossazapa Deo madiuiuarri bacco tarrari. Assire iaccamacossarrari uitide, corime uitide, ssamo onani. Naraha Deona nauato tarrari. ₄Naraha parrissa nauato onarrarope memeuarricca zama bicaniuarri Deo Corime narrari iaccamacossazapa uima bicani cacomehecca mittarrari. Mittaraha narraro uima madirraza ecomeraniuarrine Deo ecossanissa tarraro. ₅Ouape pocca uima nauato onarraroza ouatizenipe bica tarraro. Naraha oua deni onaneza ouatizeniuarrinepe nacassera onani. Ouape arrimani. Rrapari onarrarozana ouatizeniuarrine nacassera onarraro. ₆Naraha occa uima bicani uati uati oneza naqui ponimacca rrerani. Parrissehera uati uati onaniuarrineraha zamarrima onarraro. Arri uati onani madirra mittemanazapa: —A, Paoropa nauatorride rarrari −quenarana oneza. Occa madierrine, ouattirrine madirra oua deni inanemananiuarrine nacassera onarraro. ₇Deo ouaza bica tanicca deni torranicca auato inanarrarozana obodi: Rrehe, deni orrani onaniuarrineraha nema onerreraniuarrine ocassera tanicca ouaza torrarraro. Narraro comanipe ouassireza pina Tocorime-Taminerrine atia ttodi izanarrarissa narraro. ₈Narraro comanirrine ocasserani onauanazanapo-rreraniuarrine oua Zozossede Deoza uati onarraro, uati onapomarraro, uati omanipomarraro naraha tomossi-rrerani. ₉Naraha ouaza oua Zozossede Deo attipa: —Tiaza ouati uana tarraro. Ocasserehe tinauananirrine tia acco ocananitoui. Occa dacorehepe madirra rrapari tarrarizana denima auato tani −nade ouaza. Poua atti nama nazapa rrapari oneraha ouatizerraro. Rrapari oneza Cristopa ouaza pocca dacorehe auato inanarraro. ₁₀Rrehe, rrapari oneza oua itamassomaneza, ocappireza naqui ouatizerraro. Nanarrizo orreza, narro tanicca onauaneza naqui Cristoza damera onarrarorrine onauana-zanapozape ouatizerraro. Nema onarrarope mirrira oneza obodina todacorani narraro.

₁₁Oua motta occa uimara uati uati onezape pina madirra bodi tossamorrarissa oneraha ouaza tettideni rrima tiquenaza nema onarraro. Tiadenina otauimari tetecomeremana naniuarrine occa uima nauatoqquiri tiquenaraha. Arra maizehe mamaridedenizana dameraqquiri tiquenarraro. Narraridenipa oua arrimani inanemanaraha peperri, pina ponimaccassa onarraro. Naraha pouadeniza arrimani orrarrerani. ₁₂Ouape parrissa Zeso Cristo oua cazosserrari tiadeniza auato onanarizarraro. Arri Deorrine ocanauatori canarraro, arri qqui tiquenapo-rrerarrarocca naqui auato onanarraro. Ocasserehe ouaza ssonariza naqui mouaraza onauanani auato tarraroparri. ₁₃Uima orrariena orrine zori tiquenarraro. Narraroa tiadeniza zinirotoui uati uati onerrerade. Nema onezape pina tiadeni arrimani onanabaqquirrarossa narraro. Arra Zeso Cristoza quequeriqquimana narrari ouahadenizape zinirotoui uati uati onade. Naraha tiadenizape occa madie narro terreraniuarrine nema onerrerade. Naraha orrine tiadeniza bica terrerezape: Peperri, orrine bica terrerani, onarraro.

₁₄Taide tiadeni qquide occani pamade. Rridapana tiadeni qquide occapomaniuarrine onarrorani. Nani tiadeniuarri bacco onapomeza naqui occa madie tiadeniza narro terreraniuarrine ouaza da tiquenarri onerreranitoui. Ouape ticarrimananicca touini onerrerani. Titouidenina onarraro. Ouape pina ticcadeni abissa onarraro. Erredenipa imehideni cappiremanauicca mitta mitta quena-rraraui. Imehidenina bedideni cappiremanauicca mitta mitta quenarrari. ₁₅Nezape oua ocarrirrarocca nemanehe tiadeniza dade nacassa onani. Tiadeniza uima bicani torraniuarrine ouassire naqui tiadeniza ouaccorarraro. Tiadeniza accora oneraha ticcadeni uima ouaza rriza tarraro. Ouape titouideni denima ouati uana zanaporaha tiadenina ouaza tetideni touanerarronarraro.

₁₆Occa madie tiadeniza narrora taniuarrine ticcadeni ziniroza omadi-rrerani nauatoqquiri tiqueneraha ouaza tiadeni mota tettidenipe: —Paoropa maizade nauato tarrari. Ia tocamaizabaqquiuissa tarrari −quenarrari. ₁₇Naraha nerrecora tiadeniza onanaza tiadeni ocamaizabaqquirrarotte? Tiadeniuarri zosse onabaqquirrari orraria ticcadeni zinirotoui tiadeni tocamaizabaqquirrari ttarana? Noueraui! ₁₈Arra uarrano toccaporrariza Titona tiadeni qquide toccauiuarrine pouaza uati oneza toccade. Pouaza imecote ouaha naco zosse onarraride. Naraha Titopa zinirotoui tiadeniza maizarrari ttarana? Noueraui! Pouapa pina ouassa narrari. Poua bodi touini nauiccapa pina oua obodi touini onaniccassa narraro. Oua, Tito tezerrepe Zeso Cristocca marinarrassa inaneza imadirraro. Narrarossa icanirerraro.

₁₉Arri icca uima uati uati onarrarope tiadeniza: —Icca uima zori terrerani, tossamo-rrerani −inaniuarrine rrerani. Ia Zeso Cristocca zozosse iquerrenarrarope tiadeniza uima bicani torraniuarrinera uati uati inarraro. Deopa etti mittaui nauatoqquiri inarraro. Ouimecotedeni, tiadeniza ouati uana tani. Izepe irrie bazimape Zeso Cristoza rrehe tiquenarraro todacorani naniuarrine. ₂₀Titouideni obodi uatorraro: Tiadeni qquide occapomezape ticcadeni uima nerrecoma napazerre? ohonanarraro. Ticcadeni uima bica teza nani bacco onaniuarrine touini onani. Tiadeni naqui ticcadeni uimaza ouatizeniuarrine touini tiquenani. Naraha ticcadeni uima bica terreranicca noppinena ocappinarraro. Ticauadirere caneza timadimananitide. Madirra carrirraricca acconi tetedimana nanitide. Amazati tedimaneza arrauarri rroua, arrauarri rroua tiquenanitide. Accoqquiri tiqueneza timadimananitide. Narraro noppineni ocappinarraro. Titessedeniza tatamasso tiquenanitide. Ponimacca uima uatirridede tirriranitide. —Ouana deni orrani, bica onani −titiquena nanitide. Tiqueriqquimaneza arrauarri rroua, arrauarri rroua tiqueneza ticcadeni uima toccanissa terreranitide. Nema tinanemanezape ouatize-rreranitoui. Tiadeni naqui tiadeni uati ocanabaqquiza ouaza tetizemane-rreranitoui. ₂₁Rrehe, naniuarri bacco onanipomezape ticcadeni uimarrine Deo tezerrema ocomehi nani noppineni ocappinarraro. Ticcadeni uimarrine orri orri ozanapopazerre? onarraro. Arri tiadeni mota uapi tinehe taidezama uimasirima madimanarronarraria rridapana naco nebomana-rrarauitide. Pouadenipa uaidirehe oppina tanicca tonanade dameraqquiri naccauitide. Uananehe bazima ihinanarizemana naccanitide. Uima uaidira tanicca tonanade dameraqquiri naccauitide, oneza ocappinarraro.