2 Corintodeniza 11

₁Ouimecotedeni, ouattipe tiadeniza pina obodi tossamorrarossa nanitide. Naraha nema nehe ouaza tedimana-rrerarri. Mouaraza ouatti timittemanaccarri, onarraro. ₂Ia Zozossedera tinarrarimanauiuarrine oneza Deorrine tecconedeni uadi onarraro. Ouape pina tabira zorroranicca abissa onarraro. Tiadenipe pina zouato zorroranissa tiquenarraro. Cristo tiadeni tocarribaqquiuiuarrine pouaza uati onaporrarode: —Corintouarri quequeriqquimana narraridenipa ticca toquerrenana −onapode. Nema onarrarope pina zouato bica tarraro maqquiderreza ssamo taccarrarossa tiquenarraro Cristoza tiadeni da onabaqquiniuarrine touini onarraro. ₃Zeso Cristoza rrehe tiquenarrarope bica tade. Poua orrarirrarizara dameraqquiri tiquenade. Naraha madirra ouaha tiadeni tocamaizabaqquiui noppine ocappinani. Pina maittaccazama macca maizehe nauatorride rabotepa Eba icamaizarrarossa narraroa maizehecca marinarraza parrissa tiquenezape ticcadeni rrehenirri Cristoza torraparirana, onarraro. ₄Nema onarrarope tiadeniza marinarra onihi bacco neza timittemananiuarrine touini tiquenani. Arra Zeso tauimari onihi rriza tarraro mari mari quenaza mittade nacassaqquiri tiquenarraro. Tocorime ouaha pina Deo Corimessa narrararaha tiadeniza torrauiuarrine rrehe tiquenarraro. Madirra tocassiuauerauiuarrine tauimari onihi naqui pina taide timittemanaporrarossa nerrereraha narraroza parrissa tiquenarraro. ₅Narrari maizehe mamaridedenipa: —Iape Zeso Cristocca zozosse tabaqqui iquerrenani −quenaraha pouadeni attiza pouadeni deni tonanemanarrari. Naraha ouape pouadeniza arrimani orrarrerani. ₆Arri ouape uima uatide ssamo onarraro nitide. Naraha obodiza nauato onani: marinarra parrisseheccape zori onana-rrerani. Narraro marinarra parrissehecca nauato onarrarope occa marinarra, occa madieza naqui tiadeniza auato onanazanaporraro.

₇Tiadeniza omadizape Zeso Cristo tauimari icassiuaueraniuarrinecca manaconi rrirehe tiadeni mari ocanabaqquide. (Nazapa motadeni attipa: —A, marinarra manaconi rrireheccape ponima −quequenanarrari. Naraha ouape occa tarabaia onihiccazana omadirrarode.) Nema onezape oua arrimani onanarrarossa neza Deocca uima bicani ticassiuaueraniuarrinecca tiadeniza torraniuarrinena ozepe irrirrarode. Naraha nema onarrarope tiadeniza bica terreraqui? ₈Zama onihicca Zeso Cristoza quequeriqquimana narraridenicca ziniro ouaza da iquenarraroza omadirrarode. Narraro poccadeni da naqquinarra odirrizarrarossa neza manaconi rrirehe tiadeni maride ozepe irrirrarode. ₉Tiadeniuarri omadiza naqui ocappirezape: —Ouaza da tiquenarri −onerrerade. Arra ouimecotedeni Masedoniacca bacco quenarraridenina ocappiranicca ouaza da iquenarrarode. Tiadeniza occa madie narro terreraniuarrinepe ticcadeni zinirotoui uati uati onerrerade. Rridapana naqui narrarossa ozanaponitoui. Zinirotoui uatira onani. ₁₀Arri manaconi rrirehe tiadeni maride orrarrarocca uimape ouaza bica tarraro. Narraro uimaza ohouatize narraro. Nezape zama arobeni Acaia nemaneheza occarizaniuarricca madirra occa uatizehe inarrizomananiuarrine ssamo tani. Pina Zeso Cristocca parrissehe nauato onarrarossa narraro occa uatizehepe nema zanaponitoui nauato onarraro. ₁₁Nerrecotoui ouatti nema onarraro? Tiadeniza nacassera onarraroqui? Nouerani. Deopa obodi nauato taui: tiadeniza nacassa onani, titouideni ouati uana tarraro.

₁₂Nema nehe manaconi rrirehe tiadeni mari ocanabaqquiniuarrine onezape narrarossa onanazanaponitoui. Nema onanezape maizehe mamaridedenicca uima onarricanitoui. Attidenipa: —Ia naqui madirra mari icanabaqquirrari pina Paorodenissa inarraro −quenaraha zinirotouira mari mari quenarrari. ₁₃Pouadenipa Zeso Cristocca zozosse tabaqqui parrissehecca attidenissa quenaza tiadeni tocamaizabaqqui-manarrari: —Zeso Cristo ia tocazossebaqquirrari −quenaraha maizemanarrari. ₁₄Naraha poccadeni maizeheza uarro icanirerrerana. Maizehe rrinede Tocorime-Tamine naco poua namaizaza pina Deocca zozosse memeuarricca ssiuarra tarrarissa naza madirra icamaizabaqquiuiuarrine. ₁₅Nama nazapa Tocorime-Taminecca uimaza zepedeni irrimanarrarideni pouadeni narrizemanaza pina bicaqquiri narrarissa quenaza madirra ihicamaizabaqqui narrari. Naraha niza zotodepa poccadeni uaidirehe manaconi pouadeniza narrizoue torranitoui.

₁₆Tiadeniza uati onapomana. Ouaza: —Paoropa bodi tossamorrari −tiquenerrerarri. Naraha tibodideni nema tiquenezape peperri. Pina madirra bodi tossamorrarissa oneza otauimari bica tarraro denima uati oneza timittemanarri. ₁₇Tiadeniza otauimari uati onarrarope ia Zozossede atti rrerani. Oua otauimarira uati uati onarrarope obodi tossamorrarossa narraro nauato onani. ₁₈Mamaridedeni uapi taha tiadeniza uati uati toquenaza: —Irrine bica tani −quequenanaraha pouadenipa pouadeni tauimarira uati uati totoquena narrari. Nezape oua naqui otauimarira uati onana, onarraro. ₁₉Tiadenipe nauatorridede tirrireraha madirra bodideni tossamomanarraridenicca marinarra mittade nacassaqquiri tiquenarraro. ₂₀Poccadeni marinarra mittade nacassaqquiri tiqueneraha poccadeni uaidirehe tinauanemanarraro. Pouadeni attissa tinanemananiuarrine attideni dacoraza tiadeni zosse zosse quequenanaraha manaconi rrirehe tizepedeni irrimanarraro. Tizepedenitarri, ticcadeni ziniro inarriquemanarraro. Tiadeni tocamaiza-baqquimanarrari. Pouadeni deni tonanemanazapa tiadeni arramani tonanabaqqui-manarrari. Tipanodeni uauacca totonanabaqquimana narrari. Naraha poccadeni uaidirehe tiadeniza bica tanitide. ₂₁Rraho ocappinarrarossa neraha nema nehe uati onana: Iape rrapariqquiri inarraro! Tiadeniza pina narraridenirrinessa inananiuarrine iparrire-rrerani. Pouadenipa: —Irrine bica tani −quenauiuarrine uaqquiraqquiri nazapa oua naqui otauimari uatide uaqquira onana. Pina madirra bodi tossamorrari uati uati tarrarissa oneraha nema nehe uati onana. ₂₂Arrana, pouadeni attipa: —Iape parrissa Izarraeo potemaui zodeo madirra iquerrenani −quenaraha oua naqui zodeo. —Zodeodeni atti ebereo nauatoqquiri inani −quenaraha oua naqui narraro touatti ebereope ouatti. —Icca idipa Abarahao −quenaraha oua naqui pocca madirra orrani. ₂₃—Iape Zeso Cristocca zozosse tabaqqui iquerrenani −quenaraha ouana denima. Arri ouana denima onarrarope pina madirra bodi tossamorrari uati uati tarrarissa onarraro. Pouadenipa Zeso Cristoza zepedeni irrimanaraha ouana denima. Toponi cocoroza naco uezemanaraha ouana denima toponi cocoroza ouezerre narizaponi narraro. Cocossi tonauane-manaraha ouana denima cocossi onauanarizarrarode. Oppinehe onihi, onihirrine ozoqquebote narizade. ₂₄Rrehe, ouape narrizoue onauanani uapi tade. Zodeodeni ouaza boqueqquiri narrari attideni: —Paoropa uaidira taui −quequenanaza oua cossi quenani 39 nehe onauanaporraro. Zotode naqui oua cossi quenani 39 nehe onauanapomade. Zotode naco nama quenapomade. Uarrano ouahaza nama, uarrano ouahaza nama quenarraride. ₂₅Auaza naqui oua idemanani 3 nade. Sibaza naqui oua iquenaqquimanani orraride. Ocasserehe onihi onauanarraro naqui Zeso tauimari mari ocanarizabaqquiuiuarrine darroni imeniza bobode oqquezape darroni imeni rre tocanade. Bobode onihiza occapomeza naqui darroni imeni rre tocanapomade. Zotode occapomeza naqui darroni imeni rre tocanapomade. Ocasserehe onihi onauanarrarope coriza imeni nocconiza rre ocaneza otabozape zome, onassiuarra, marri ouaccapoma nade. ₂₆Bobode orrani uapi tezape oppina tanicca onauanani uapi tade. Ueni ssahaha naui dacorabote oppinani ouarraro. Bobotidedenirrine oppinani ouarraro. Occa madirradenirrine oppinani ouarraro. Madirra ouahadenirrine naqui oppinani ouarraro. Oza pananiuarri naqui oppinani ouariza nade. Oza noueraniuarri naqui oppinani ouade. Coriza imeniza naqui oppinani ouapomade. Zesoza rrehe quenaraha maizemanarraridenirrine ocasserani oua-zanaporrarode. ₂₇Tarabaia imeni ocarriza naqui onauanade. Uaidira tanicca onihi, onihi ouaza bacco bacco zanaporrarode. Zome ouada-rrerani naqui uapi tade. Pemi onauana, obacco rroconi onauana narizade. Ssirini torreza naqui ocasserani ouariza narrarode. Occa etero ocarriqueza naqui ossirinissa tade.

₂₈Rrehe, ocasserehe uapi tehe onauanarizerre naraha uima onihiuarri naqui obodi uatoto canerre narraro. Arra Zeso Cristoza quequeriqquimana narrari uapimadenitoui obodi uatoto cazanapozape nerrecoma quenaui? ohozanapo narraro. ₂₉Madirra orrariacca rrehenirri torraparizape oua naqui obodi torraparirrarossa narraro. Ouahapa poua tesserrine uimasiri inanezape ouadirraro.

₃₀Ouape oua deni onananiuarrine nacassera onani. Naraha nema nehe ocasserani onauanarizarrarocca uima uati uati onaccana, otauimari rrapari onanicca tiadeniza auato taniuarrine. ₃₁Ia Zozossede Zeso Cristo Imehi Deopa omaize-rrerani nauato tarrari. Pouaza etizezanaponiuarrine bica tani. ₃₂Arri ouaza uima ssonariporraro tauimarini timittemaneza rrapari onani nauatoqquiri tiquenaniuarrine. Narrarope maittaccazama oza panani Damascouarri omadiza poccadeni tamine deni torraui Aretacca zossenirri zama cacauadepa oua dama iquenaniuarrine icazossebaqquirrari. Pouarrine otoui oza panani uapiuarri siba ua nauarraninicca noccobirri bazima ecauarize-mananissa tarrarode. ₃₃Naraha otessedeni oua acco icanemanade. Oza panani siba sse nauarranini memeuarricca noccobirri bedeniuarri ssarri couauiza otessedeni oua inarrimemaneza oua tappa icanaronemanade. Nezape tozepe orranitouiraha zori onarrarode.