2 Corintodeniza 10

₁Oua Paoro ouatti bica teza tiadeniza uati onana, ouattissa tinanemananiuarrine. Arra tiadeni mota ouaza uima ponimacca uati uati quenaui omittarraro. Attidenipa: —Paoro ibaccoza uazapa inoppine cappina tade. Naraha uarri taniza madizapa poua atti dacoranicca dozode cappinera tarrari −quenarrari ttarana. Nezape pina Cristo rrone tarrari, bica tarrarissa oneza tiadeniza uati onana: ₂Ticcadeni uima ticattememanaporri, onarraro. Nema tiquenezape niza tiadeniuarri occapomeza tiadeniza ouadi-rreranitoui. Madirra iaza tatamasso quenarrarideniza uatide ocappina-rrerani. Arra attideni: —Paorodenipa pina arrirraro namicca uimatoui dameraqquiri narraridenissa quenaza pouadeni touini quenauicca touira madimanarrari −quequenanaraha iape nema inerrerani. ₃Iape parrissa arrirraro namicca madirra iquerrenani. Naraha arri icauadirerrarope pina arrirraro namicca madirracca rraziressa nerrerani. ₄Icca rrazirerrinepe pina arrirraro namicca madirraccassa nerrerani. Icca rrazirerrinepe Deocca dacorehe icarrirraro. Narraroza uimasiri tazarrani icauadirerraro. Uimasiri dacoranicca pina siba sse nauarranini dacorarrarossa neraha Deocca dacoreherrine bararirizehe rricarrarossa nanitoui. Deocca dacoreheza Zeso Cristoza nacasseraqquiri narraridenicca maizehe inarricanissa tanitoui. ₅Madirradenicca deni torrehe naqui inarricanitoui. Madirrapa Deocca parrissehe tocauatterauiuarrineraha pouadeni deni totonanadedeni ecossemanarraro. Poccadeni deni torrehe inarriquezape pouadeni bodicca uatoue Cristocca parrisseheza nattome inauitoui. Nezape pouadeni bodicca uatoue maizehe torrani auato tanitoui. Bodideni cacarriqquimeraza Cristozana touiboremanauiuarrine, onarraro. ₆Tiadeni bazima Cristoza iboraqquiri tiquenanissa taniuarrine imadiccani. Niza Cristoza iboraqquiri tiquenanissa tezape arra motadeni Cristoza ibobo tarraripa etti dacoraza uati icanabaqquiuiuarrine inarrorani. Pina inarrizobaqquirrarissa nauitoui.

₇Tiadenipe madirra uapi qquidera orrarirraro. Madirra bodicca uima ssamoqquiri tiquenani. Arra madirra attipa: —Ouape Zeso Cristocca zozosse orrarraro −nazapa poua bodi uatona: Ia naqui pina pouassa inarraro, Zeso Cristocca zozosse tabaqqui iquerrenani. ₈Arri oua motta ouattipe: —Ia Zozossede Zeso Cristopa ouaza pocca zossehe denima inanarraro −onaniuarrine nacassera oneraha nema onaniuarrine ocappina-rrerani. Parrissa Zeso Cristocca zossehe ocarrirraro. Narraro zossehe ouaza inanarrarope tiadeni mari ocanabaqquinissa taniuarrine, ticcadeni rrehenirri todacorani naniuarrine. Ticcadeni rrehenirri rricaniuarrine rrerani. ₉Occa uima teppepe pina tiadeni uarro tonanabaqquiniuarrinessa neraha narraro touini onerrerani. ₁₀Arra ouaza parrima onani quenarrarideni attidenipa: —Paorocca marinarra pocca uima teppeza dozo inarrarope dacorani. Naraha poua assire ibaccouarri uazapa atti rrapari taui. Uatide ssamo taui −quenarrari. ₁₁Naraha attideni nama quenarrarideniza: Parri, tibodideni uatomananissa tarri, onarraro. Niza tiadeniuarri rrauirreza tibaccodeniuarri idomo uezape ouatti dacoranitoui. Pina uarri taniza omadiza occa uima teppe tiadeniza dozo onarrarossa nanitoui.

₁₂Madirra ouahadenipa poccadeni uimazara uatizemanarrari. —Iape bicaqquiri inani. Irrine bica tani −quequenanaraha iape nema inaniuarrine icappinarraro. Pouadenipa poccadeni uimazara pouadeni nattome tanimanarrari. Nama quenarrarirrine poccadeni uimape rriza tarraro. ₁₃Iape icca uima rrerarraroza: —Irrine bica tani −inerrerani. Naraha Deoza izepe irriniuarrinepe Poua ia tocazossebaqquirrarizana: —Irrine bica tani −inaniuarrine oppinera tani. Poua ia tocazossebaqquirrarirrine tiadeniuarri bacco ineza tiadeni mari icanabaqquirrarode. ₁₄Rrehe, iana taide tiadeniuarri Zeso Cristo tauimari icassiuaueraniuarrinecca tiadeni maride bacco inapode. Tiadeniuarri rrauirrapo-rrerezape: —Corintouarri irrine bica tani −inerreranitouiraha. ₁₅Madirra ouaha zepe irrirrariza ettipe: —Irrine bica tani −inerrerani. Poua zepe irriuiuarri izepe irrirrerezape icca uima rrerani. Naraha tiadenizana izepe irrizanaponiuarrine rripapa inani. Ticcadeni rrehenirri napi zanapozape denima tiadeniza izepe irrizanaponiuarrine. ₁₆Timadimanani deniuarri Zeso Cristo tauimari icassiuaueraniuarrinecca maride rrauirraniuarrine naqui rripapa inani. Naraha mamaride ouahadeni mari icanabaqqui-manapouiuarri rrauirraniuarrinepe touini inerrerani. Naniuarri madirra ouahadenirrine Deo Atti torraporaha narraroza: —Irrine bica tani −inerreraniuarrine.

₁₇Nema onarrarope Deo Atti dozo naniza arrima naporraro: —Madirrapa pouarrine bica taza: “Orrine bica tani” narrarana. Poua atti: “Deorrine bica tani” nazana poua atti Ouaza bica tani −naui nade Deo. ₁₈Madirra parrissa bica tarraripa: —Ouana bica onani −narraraui. Ia Zozossede Deona pouaza: —Bica tinani −nazapa parrissa iaza, Deoza naco bica tarrari.