2 Corintodeniza 9
Zeso Cristoza rrehe quenarrarideniza da inaqquinarra tauimarini
1Nazama Zerozareuarricca Zeso Cristoza rrehe quenarrarideni acco ticanabaqqui-manauiuarrine ticcadeni da naqquinarra tauimarini tiadeniza uati onapode. Nezape arrirraro uima teppeza: —Da tiquenarri −onapoma-rrerani. 2Pouadeni accode nacassaqquiri tiquenani nauato onaporrarorrine zama Masedoniauarri occarizezape titauimarideni uati uati ohonariza narrarode. Ticcadeni uima bica tarrarorrine ouatizeza pouadeniza arrima onade: —Ouimecotedeni zama arobeni Acaiauarri madimanarraridenipa uarrano toccaporrariza imecotedeni Zerozareuarricca acco icanabaqqui-manauiuarrine narroremanapode −onarizarrarode. Nazapa imecotedeni Masedoniacca mota uapi taha ticcadeni uima bicani mittemanazapa pouadeni naco: —Rrehe ia naqui imecotedeni Zerozareuarricca acco icanabaqquina −quenarraride. 3Tiadenipe dade nacassaqquiri tiquenani nauato oneraha tiadeni acco tocanabaqqui-manauiuarrine imecotedeni 3 quenaha tiadeniuarri zosse onabaqquirrari. Nema onarrarope da taqquimananiuarrine tinarroremananissa tanitoui. Nazana titauimarideni uati uati onarizaporraro parrissa torrezape etti maizehe torra-rreranitoui. 4Nani tiadeniuarri occapomezape imecotedeni Masedoniacca naco ouaza rraui torrauiuarrine nitide. Naraha ticcadeni da naqquinarra tinarroremane-rrereza bacco inezape nerrecoma onapazerre? Ticcadeni uimarrine ouatizeporaha ouattissa tinanemana-rrerezape obodi ocappinanissa nanitoui. Tiadeni naqui da taqquimana-rrerezape ticappinemananissa narana, onarraro. 5Narraro noppineni ocappinezape tiadeniza uatide Titodeni zosse onabaqquipona, onarrarode. Pouadenipa tiadeni acco tocanabaqqui-manauitoui, ticcadeni da naqquinarra tinarroremanaponiuarrine. Arri taide tettidenipe: —Rrehe da inaqquinitoui −tiquenaporraro tettidenissa tinanemanana, onarraro. Nema tiquenezape accoraqquiri tiquenani auato tanitoui. Naraha dade nacasseraqquiri tiquenaza ticcadeni da naqquinarra tinarrorapo-rrerezape ticcadeni accoue auato tanitoui.
6Arrirraro uimaza tibodideni uatome-manarri: Madirrapa ppa taui nocco bazira taha dappo inazapa bono bazira taha bite ina taui. Uemaui dappo inazapa bono uemaui bite ina taui. 7Madirra poua tesse accode nacassa tazapa bodi uatoza: —Arrima nehe da onana −naza da inezape pocca uima Deoza bica tani. Madirra acco taraha da inezape pocca uima Deoza bica terrerani. Madirra dade nacassera taraha madirra ouaha attirrine da inaza naqui pocca uima Deoza bica terrerani. Dadecca uima Deoza bica tarrarope madirrapa bodi uatizeza da inazana pouaza Deo uatizerrari. 8Deopa tiadeniza bica tanicca onihi onihi dade accora tarrari. Ticappiremane-rreraniuarrine tiadeniza uemani da inezape madirra ouahadeni acco ticanabaqquiuiuarrine tiparriremananitoui. Tiadeni naqui uima bicani onihi onihi tinanarizemananiuarrine Deo tiadeni tonaparrire-baqquiuissa tauitoui. 9Madirra accora tarraricca uimape Deo Atti dozo naniza arrima naporraro:
—Cappiremanarrarideniza dade accora tarrari.
Uima bicani inanarizarrarope nema zanaponitoui
−nani Deo Atti dozo naniza. 10Deopa ppa taui nocco da inarrari, irripaniuarrinecca naco da inarrari. Narraro uimassa narrarope ticappiremananicca Deo tiadeniza da inarizanissa tanitoui. Denima tiadeniza da inezape cappiremanarrarideniza accoraqquiri tiquenanitoui. Tirrinedeni pina bono bite naui uemarrarissa nanitoui. 11Nema tiquenezape Deocca danirri bica tanicca sseqquiri tiquenanitoui. Madirra ouahadeniza naqui dade accoraqquiri tiquenanitoui. Nezape ticcadeni da naqquinarra imecote cappiremanarrarideniza zosse tiquenarraro zorro inaza pouadeniza da inezape pouadenipa Deoza uatizemanauitoui. 12Nezape Zerozarecca imecotedeni ticcadeni da naqquinarra carrimanazapa pouadeni cappiremanauicca mitta quenaza uatizemanauitoui. Deoza naco uatizemanaza: —Rrehe Abi Deo, tirrine bica tani −quenauitoui. 13Imecotedeni acco ticanabaqquimanazapa Zeso Cristo tauimari icassiuaueraniuarrineccaza iboraqquiri tiquenarrarorrine auato taniuarrine. Arri pouadeniza, madirra ouahadeniza naqui accoraqquiri tiquenezape Deoza uatizemanaza: —Rrehe Abi Deo, tiana deni tirrani, bica tinani −quenauitoui. 14Pouadeni naco tiadeniza uatideni uanaqquiri nazapa titouideni Deoza uati uati quenauitoui. Deopa tiadeniza pocca touati uanehe, pocca biquehe inanarrarorrine Pouaza: —Tirrine bica tani −quenauitoui.
15Deocca danirri iaza Poua Bedi bicabote, deni torrarrari. Etti denima bica tanicca uati inaniuarrine iparrire-rrerani. Deoza etizeza: —Rrehe peperriua! Ticca danirri iaza bica tani −inana.
2020 Sociedade Bíblica do Brasil
