Accoraqquiri narrarideni cappiremanarrarideniza da inaqquimananiuarrine
1Rrehe ouimecotedeni, rridapanana zama Masedoniacca Zeso Cristoza quequeriqquimana narrarideniza Deo pocca biquehe, pocca touati uanehe inanarizarrarocca uima tiadeniza uati onana. 2Nauiuarricca imecotedenipa ocasserani onihi onihi inauanemaneraha uatizemaneri narrari. Pouadenipa cappiremanaha madimanaraha accoraqquiri nazapa pina sseqquiri narraridenissa quenarrari. 3Parrissa onoccoza qqui onarrarocca tiadeniza uati onarraro. Pouadenipa uatizemaneri naza da inaqquimanarraro. Denima da iquenaniuarrine parriremana-rrararaha denima da iquenapomarraro. Madirra ouaha pouadeniza: —Nema tiquenarri −quena-rrararaha. Pouadeni touini quenaza: —Rrari, nema inanana −quenarrari. 4Zama Zodeauarricca Deoza toquerrenarrarideni acco icanabaqqui-manauiuarrine touini quenazapa iaza uatide dameraqquiri narrari. Attidenipa: —Icca da naqquinarra pouadeniza zosse inaniuarrine rrehe tiquenarri −quenade. 5Nazama iape poccadeni da naqquinarracca uima nauatoto inaporaha denima uima bicani inanemananiuarrinepe ssamomo inaporraro. Arra pouadenipa Deoza pouadeni ccaccoremanarrari. Iaza naco pouadeni ccaccoremanarrari, ettiza iboraqquiri nauiuarrine. Nama quenazapa Deo Poua nacassa tauicca inanemananissa tarraro.
6Nazama Masedoniacca Zesoza rrehe quenarrarideni tauimarideni bica tezape Titoza arrima inarraro: —Tito, Corintouarri ticcaniza poccadeni da naqquinarra tidipomarri −inade. Arra pouapa taide ticcadeni da naqquinarra idipode. Nezape narraro da naqquinarra bicabote rricanissa taniuarrine Tito zosse inanipomarrari. 7Tiadenipe uima bicani sseqquiri tiquenarraro. Deoza rrehe tiquenani dacorarraro. Deo Atti maride naqui nauatoqquiri tiquenarraro. Deocca zossenirri timittemananissa tarraro. Timecotedeni accode naqui dameraqquiri tiquenarraro. Irrine touati uanehe ticauatterarraroma timadimanarraro. Nema tiquenezape timecotedeni cappiremanarrarideni acco canade naqui accoraqquiri tiquenani bica tani, onarraro.
8Naraha ouatti nema onarrarope tiadeniza zosse zosse onerrerani. Zeso Cristoza quequeriqquimana narrari ouahadenicca da naqquinarra tauimarini timittemananiuarrine poccadeni uima dozo onarraro. Arri poccadeni uima timittemanezape tiadeni naqui nacassaqquiri tiqueneza da taqquimana-pomaniuarrine, onarraro. Accoraqquiri tiquenezape parrissa timecotedeniza tetideni uanaqquiri nani auato tinanemananitoui. 9Tiadenipe ia Zozossede Zeso Cristocca biquehe, pocca touati uanehe nauatoqquiri tiquenani. Pouapa memeuarri madiza bazima carrirrari. Cappira-rraraha madiuissa taporrari. Naraha titouideni namiuarri ccaronazapa pina cappirarrarissa naha madirrarirrine tiadenipe sseqquiri tiquenarraro.
10Arra uarrano toccaporrariza zama onihicca Zeso Cristoza quequeriqquimana narraridenicca da naqquinarra nouerapoccaza tiadenina taide: —Imecotedeni acco icanabaqquina −tiquenezape tetizemaneza narraro uima tinauatomanaporrarode. Nazama tiadeniza uima bica taniuarrinepe obodi uatorrarocca tiadeniza dozo onarraro. 11Arri ticcadeni da naqquinarrape tinequeriqquimananissa tana. Pina uarrano toccaporrariza tetizemaneza da taqquimanaporrarossa tinanemanana rricaniuarrine. Sseqquiri narrarideni, bazira tehe carrimanarrarideni naco pouadeni carrimanauicca mota da iquenana. 12Madirra carriza parrissa dade nacassa tazapa pocca danirriza Deo nacassa tarrari. Madirra cappiraza da inarraraza oppinera tani. Deopa cappirarrariza: —Da tinarri −narrararrari.
13Narraro da naqquinarracca uimape timecotedenizara da tiquenaza tiadenipe ticappiremana naniuarrine rrerani. Tiadeni ticappiremana-rrereza timadimana, pouadeni naco cappiremana-rraraza madimana nazana bica tani. 14Rridapana ticarrimaneza pouadeni acco ticanabaqqui-manauiuarrine tiparriremanaccani. Niza zotode tiadeni naqui ticappiremaneza manaco tiadeni acco tocanabaqqui-manauitoui. Arriuarri nema, arriuarri nema inarizezape bazimaza parrirenissa tanitoui. 15Pina Izarraeo potemaui zodeodeni tauimaridenissa narraro. Pouadeni tapari memeuarricca catorrarizarrari inaqquemanaui tauimari Deo Atti dozo naniza arrima narraro: —Uemaui inaqquemanarrari pouadeniza mota torra-rraraui. Bazira taha inaqquemanarrari naco zori tarra canima-rraraui −nani nade Deo Atti dozo naniza.
Tito poua tessedeni pamaha tezerre da inaqquinarratoui Corintouarri rraui torrauiuarrine
16Deoza ouatizeza: —Rrehe Abi, tirrine bica tani −onarraro. Deorrine Tito bodipa pina obodissa nazapa poua tezerre titouideni damamera inarraro. 17Pouapa taide tiadeni qquide touini naporrari. Tiadeniuarri toccauiuarrine pouaza uati onezape amazati: —Rrehe, touini onani −narrari. Rridapana poua nacassa taza toccarrari.
18Arra Titoza imecote Zeso Cristoza rrehe narrari ouaha naco tiadeniuarri zosse inarrari. Pouapa Zeso Cristo tauimari icassiuaueraniuarrinecca maride nauato tarrari. Zeso Cristoza quequeriqquimana nauicca onihi onihi narizarrarocca imecotedeni pouaza nacassaqquiri narrari. —Pouapa bica tarrari, Deo Atti maride nauato tarrari −quequenanarrari. 19Narrari imecotepa iaza toccauiuarrine icatterrize-manaporrari. Arri uapimacca da naqquinarra Zerozareuarri iaqquezape ia acco tocanabaqquiuiuarrine. Narraro da inaqquinarra imecotedeniza da inezape Deoza uatizemanaza: —Rrehe Abi Deo, tirrine bica tani −quenauiuarrine. Imecotedeni acco canade nacassaqquiri inarraro naqui auato taniuarrine. 20Narraro da naqquinarra bicabote idizape iaccanissa taniuarrine touini inarraro. Inassamozape: —Tirrinedeni bica terrerani −quenarana, inarraro. 21Narrarorrine ticcadeni da naqquinarra iaccanissa tana, inarraro. Deoza, imecotedeni bazimaza naqui icca uima bica, parrirenissa taniuarrine touini inarraro.
22Pouadeni pamahaza imecote Zeso Cristoza rrehe narrari ouaha toccauiuarrine zosse onarrari. Poua zepe irririzaui onihi onihi qqui qqui ozanapozape pouapa madirra acco canade nacassa taui nauato onani. Ticcadeni uima mittazapa tiadeniuarri toccade nacassa tarrari. Poua atti naco: —Rrehe imecotedeni Corintouarriccapa pouadeni attissa inanemananitoui −narrari.
23Nazama Titoza madirra attideni: —Arrarraripa nerreco madirra? −quenazapa uati tiquenana: —Paoro uatimade, tiadeni acco canade Paoro poua tezerre zepedeni irrimanarrari −tiquenana. Imecote pamahaza naco: —Nerreco madirradeni? −quenazapa arrima tiquenana: —Zeso Cristoza quequeriqquimana narraridenicca zossenirri uedarronarrari −tiquenana. Pouadenipa Zeso Cristorrine poccadeni madie bica teza madimanarrari. 24Nema nezape naui tiadeniuarri bacco toquenazapa Deocca touati uanehema pouadeniza bicaqquiri tiquenana. Nema tiquenezape Zeso Cristoza quequeriqquimana narrarideni Titodeniza tetideni uanaqquiri nani nauatoqquiri nauiuarrine. Arri etti naqui: —Corintouarricca Zeso Cristoza rrehe quenarraridenipa bicaqquiri naui −inarraro uati uati inarizaporraro naqui parrissa torrarraro nauatoqquiri nauiuarrine.
