2 Corintodeniza 7

₁Ouimecotedeni, tiadeniza ouati uana tani. Deo pocca madirraza uati taporraricca rridapana arri iaza bacco narraroparri. Nema nezape ibodi uisso tehe imadina. Essire inauaidira-rreraniuarrine ia ecauana. Pina issicari-rreraniuarrine soue taniza iccariuarrarrarossa inana. Deo noppine icappineza imadinissa zanapona. Ibodi uisso, ssiuarra tehe imadi-zanaponiuarrine Pouazara damamera inana.

₂Tiadeniza uati omanipomana: Iaza nacassaqquiri tiquenapomarri! onarraro. Naza tiadeniza icca uima parrirenissa tade. Tiadeni inarrizobaqqui-rrerade. Maizeheza naqui tiadeni icamaizabaqqui-rrerade. Nouerade. ₃Nema onarrarope ticcadeni uima bica terrerani, onerrerani. Pina taide tiadeniza uati onarrarossa narraro uati omanipomarraro: Titouideni ouati uana tarraro. Narrarope omadiza, ozoqqueza naqui tiadeniza ouati uana tarrarope nema zanaponitoui. ₄Tiadenipe uima tinaparriremananissa tarraro nauato onani. Ticcadeni uima bica tarrarorrine ouatizerraro. Ocasserani eraha nema nehe obodi bica teza ouatizeni.

₅Zama Masedoniauarri bacco inezape rrassi inerrerade. Uima ocassera tanicca rriquerrerade. Arriuarri uima, arriuarri uima narizezape ibodi naqui icappinarrarode. ₆Naraha Deopa madirra bodi ocassera taza uatize-rrararrari nauatizede parrirerrari. Pouapa ia tonauatizebaqquirraride, arra imecote Tito bacco narronaza. ₇Tito qqui inaza pocca uima imittezape etizede. Poua attipa: —Corintocca imecotedenirrine ouatizede −narrari. Poua atti naco: —Paoro, tia qquide touini quenarrari. Tiaza uima ssonarirrarorrine titoui orri orri quequenanarrari. Tiaza uatideni uanaqquiri nazapa titoui dameraqquiri narrari −nazapa pouarrine denima ouatizerrarode.

₈Occa uima teppe tiadeniza dozo onarraro qqui tiqueneza orri tiquenani omittezape: Rraho orrine bica terrerarraro, onapode. Naraha rridapana nema onerrerani. Arri orri tiquenarrarope bazira tani, uada uapi terrerade. ₉Rridapanape tirrinedeni ouatizeni. Arri orri tiquenarrarorrine rrerani. Tibodideni cacarriqquimeraza Deoza tiquerrenani-pomarrarorrinena ouatizerraro. Ticcadeni orrie ocassera taraha nema nehe tinauanemanarrarope Deoza bica tani. Nema nezape occa uima teppe tiadeni tonarrizobaqqui-rrerani nauato onani. ₁₀Rrehe orri tiquenarrarorrine tibodideni cacarriqquimeraza Deoza tiquerrenani-pomarrarope Deoza bica tarraro. Narraro orriezape: —Rraho orriepe uaidira tani −tiquenerrerarri. Narraro orrierrinena ticassiuaueranitoui. Naraha arrirraro namicca uimaza dameraqquiri narrarideni orri orri quenaraha zoqquemanazapa narrizoue rriquerreraniuarri toquerrenauitoui. ₁₁Arri orrie tinauanemanarrarope Deo nacassa tauiccassa tinanemanarraro. Arrina, qqui! Tirrinedeni uima bicani torrarraro. Uima tonanarrari tiadeniza qquezima-rrarauiuarrine teccoccomanarraro. Ticcadeni uima tobicaniuarrine touini tiquenarraro. Uima tonanarraricca uimaza tedimanarraro. Pocca uimarrine narrizoue tiadeniza ssonarini noppineni ticappinemanarraro. Oua qqui tiquenapomaniuarrine, ouaza uima rricaniuarrine naqui touini tiquenarraro. Uima tonanarrari pocca uima manaconi tonauanauiuarrine naqui touini tiquenarraro. Nema tiquenezape ouaza auato tinanemanarraro: Uima tonanarraricca uimaza ticarrimemana-rrerarraro. ₁₂Nema nanipe tiadeniza occa uima dozo onaporrarope uima tonanarrari tinarrizomanauiuarrine dozo onani orrari-rrerade. Pouarrine imecoteza uima ssonarirraro acco ocanauiuarrine naqui dozo onani orrari-rrerade. Arri tiadeniza parrissa itoui tibodideni uatoni parri naccani tiadeniza auato taniuarrinena dozo onarrarode. Itoui tetideni rrimemana-rrerani Deo nauato tarrari. ₁₃Narrarorrinena ibodi tobicarraro. Icca orrie eti rrimezape etizerraro.

Uima onihi naqui Tito ticatizemanaui imittezape denima etizerraro. Ticcadeni uima pouaza bica tarraro. ₁₄Nazama Titoza ticcadeni uima uati onapode. Ouattipe pouaza: —Corintocca Zeso Cristoza rrehe quenarraridenicca uima bica teza ouatizerraro −onapode. Nazapa Tito tiadeniuarri toccaza parrissa ticcadeni uima bica tani qqui tazapa ouatti zori terrerani qqui tarrari. Pina tiadeniza parrissehera uati uati onarrarossa narraro Titoza naqui parrissa uati onarraro. ₁₅Nazapa Tito poua attiza iboraqquiri tiquenani poua bodi uatomazapa uatizerrari. Poua noppine ticappinemaneza naqui pouaza bicaqquiri tiquenade. Narrarorrine Titopa tiadeniza denima uati uana tarrari. ₁₆Tirrinedeni parrirenissa taniuarrine touini tiquenani nauato onani. Narrarorrine tiadeniza ouatizerraro.