Epesodeniza 4

₁Rrehe ouape ia Zozossede Zeso Cristo tauimari mari mari ohonariza narrarorrine toponi cocoro onauanarraro. Tiadenipe Deo pocca madirra tiquerrenaniuarrine tiadeni uaua tabaqquirrari. Nezape timadimananissa tarri. Ticcadeni madie pina Deo touini nauiccassa tinanemanana, onarraro. ₂Tibodideniza: —Ouape arrimani orrani −tiquenani bica tani. Rroneqquiri tiqueneza tettideni bica teza uati uati tiquenana. Timecotedeni tezerre tetideni cauanerara caneza amazati tedimana-rrerana. Madirra tiadeniza nacassera taza naco pina mouaraza tinauanemanana, onarraro. ₃Deo Corime tiadeni acco tocanabaqquiza tirrariqquimananissa tarri. Narrarossa tizanapomananiuarrine dameraqquiri tiquenarri. Ticarronerara canehe timadimanezape nema tizanapomananiuarrine tiparriremananitoui.

₄Ia bazima Zeso Cristoza iquerrenarrarope pouaza irrariqquirraro. Pina poua assire orrarirrarissa inarraro. Deo Poua Corime iaza anirrari naco orrariui. Itezerremacca uima bicani touini imadirraro naqui orrarini. Narraro iaza torraniuarrine Deo ia tocatterrizabaqquirrariparra. ₅Ia Zozossede Deopa orrariui. Narraripa Zeso. Pouazara rrehe inarraro. Pouaza iquerrenani auato taniuarrinepe orrarini. Narrarope passo dopaniza ia niqui zanarraro. ₆Icca Abi Deopa orrariui. Pouapa bazimacca Abi memeuarricca Pouaza iquerrenarraro. Pouana ia touacauabaqquirrari, ia Cacauade deni torrauicca. Pocca zossenirri Poua touini nauicca ia cazossezapa narrarossa inana tani. Pouapa bazimaza madirizarrari.

₇Ia bazima irrariqquirraroraha izepe irriniuarrinepe onihi onihi icarririzarraro. Deo Poua touini nauiccassa inanarizaniuarrine Zeso Cristo ia bazimaza da inabaqquirizarrarode. ₈Narraro uimassa narraro Deo Atti dozo naniza dozo naporraro:

—Memeuarri toccamacossanizapa poua zepeza toquerrenarrarideni eccamacossani-baqquirrari.

Nazapa pocca madirraza pocca danirri da inabaqquirizarraro −nani nade Deo Atti dozo naniza.

₉Naraha —Toccamacossaniui –inezape uima nerrecossa narraro? Rrehe, narraro touattirrine ibodi uatomarrarope taidepa namiuarri ccaronaporrari, inarraro. ₁₀Arra ccaronaporraripa Zeso Cristo. Narrari poua toccamacossanirraria memeuarri madiui parra naccaui. Meme, nami bazimaza Cristopa anirizarrari. ₁₁Nazama madirraza da inarizarrarope zepedeni irrimanauiuarrine inanarizarraro. Ouahadenipa Zeso Cristo pocca zozosse tabaqqui toquerrenauiuarrine inanabaqquirrari. Ouahadenipa Deo Atti uati iqquime-mananiuarrine inanabaqquirrari. Ouahadenipa Deo Atti ecomeremana-rizeza Zeso Cristo pouaza rrehe quenauiuarrine zosse inabaqquirizarrari. Ouahadenipa Deocca madirra cacauade toquerrenauiuarrine inanabaqquirrari. Ouahadenipa Deo Atti mamaride toquerrenauiuarrine inanabaqquirrari. ₁₂Nama nazapa pouaza toquerrenarrarideni inaparrirebaqquirrari, Deoza zepedeni irrimanauiuarrine, imecotedeni acco icanabaqqui- manauiuarrine. Nezape Zeso Cristo poua assiressa inarrarodeni icca rrehenirri denima todacorani naniuarrine. ₁₃Icca rrehenirri todacorani zanapozape niza zotode ia bazima Zeso Cristoza rrehe inarrarodeni irrariqquinissa tanitoui. Deo Bediza inocco torrizeranissa tezape pouaza nauatoqquiri inanitoui. Nezape denima denima Deo touini nauicca icauatterazanapozape pina rradauideni nauatoqquiri narrarissa inanitoui. Deocca nauatoue icarrinitoui. Icca madie parrirenissa tanitoui. Pina Zeso Cristocca madie bica tarrarossa nanitoui. ₁₄Icca rrehenirri dacoreza Deocca nauatoue icarrizape ibodi uatoue pina erredeniccassa nerreranitoui. Erredenipa tocauattera-rraraccaza bodideni uatomanauissa tauiuarrine parriremana-rraraui. Pina rrorroderrine ppaua tarrari arrauarri tocca, arrauarri tocca narrarissa quenarrari. Erredenipa marinarra onihiza, onihiza toquerrena taui. Arra madirra maizehe uatide nauatoqquiri narraridenipa erredeni icamaizabaqqui-manauiuarrine pouadeniza narrora tani. ₁₅Naraha iape Deocca marinarra parrisseheccazana rrehe inarraro. Narraroza imadirraro. Imecotedeniza eti uana tezape pouadeniza uima parrissehera uati uati inarraro. Nema inezape icca madie tobicazanaponitoui. Pina Zeso Cristocca madiessa nanitoui. Zeso Cristopa pocca iquerrenarraro ia Zossede. Pina itati essire zosse zosse narrarossa narraro. ₁₆Itati essire zosse zosse narrarope iccarizaniuarrine, izepe irriniuarrine, irripaniuarrine narraroparri. Essirepe orrariraha naniza touaririzanipe uapi tani. Pina izepe, ibirri, emori, isso narraroparri. Bazima orrariqquizape essire dacorarraro. Narraro uimassa narrarope ia bazima Zeso Cristoza irrariqquizape idacorarraro. Izepe irrie onihi onihi icarriraha imecotedeni tezerre acco acco icanezape pina essire napirrarossa inarraro. Eti cauanerara caneza naqui icca queriqquinarra todacorani narraro.

₁₇Rrehe, nezape oua Zozossede Deo oua cazossezapa poua onima tiadeniza uati onarraro. Ouattissa tinanemanarri. Taide timadimanapozape ticcadeni uaidirehema timadimanaccade. Naraha rridapana Deocca tiquerrenezape pina Deoza toquerrena-rrararraridenicca madiessa tinanemana-rrerarri. Pouadenipa pouama madimana-zanaporrari. Bodideni uatomanauiuarrine ssamoqquiri narrari. ₁₈Bodideni zizi tarrarorrine mittemana-rraraui. Deo Atti ssamoqquiri nazapa Deocca madie bicaniza uatizemana-rrararrari. Bodideniza iboue dacorarraro. ₁₉Narraro iboue pouadeniza dacorezape uaidirehe inanemananiuarrine dameraqquiri narrari. Uananehe bazima ihinanarizemana narraro. Narraro uaidirehe pouadeni idimanaraha peperriua quena-rrararrari. Denima touini zanapomanarrari.

₂₀Naraha tiadenipe nema nanicca uaidirehe Zeso Cristocca marinarraza ticauattera-rrerani. ₂₁Pocca marinarra parrissehecca timittemanezape timadimananissa taniuarrinena ticauatterarraro. ₂₂Nezape narraro Zeso Cristocca marinarra ticauatterezape ticcadeni madie rradani arri tiadeni touini tiquenaporraroccape tinebomanarri. Uaidirehe touini tiquenarrarope tiadeni tocamaizabaqquirraro. Narraro uaidirehepe tiadeni tonauaidirarraro. ₂₃Tibodideni tecarriqquimeremanarri. Deoza: —Occa uima rradani touini onerreraniuarrine obodi zati tinanarri −tiquenarri. ₂₄Nezape Deo tibodideni zati inanezape ticcadeni madie naqui zati torranitoui. Deopa pina pocca uimassa nehe timadimananiuarrine tiadeni acco tocanabaqquiuitoui. Deocca uimape parrirenissa tarraro. Pouapa uimasiri cappirarrari. Pocca parrisseheza timadimanezape pina Pouassa tiquenanitoui.

₂₅Rridapana zati tiquerrenezape denima timaizemana terrerarri. Timecotedeniza uima parrissehera uati uati tiquenarri. Ia bazima Zeso Cristocca iquerrenarrarope pina essire orrariqquirrarossa inarraro.

₂₆Tedimanezape uimasiri tinanemanarrerarri. Tedimaneraha narraro uadaza tetideni ssonani bica tani. ₂₇Parri, Tocorime-Taminerrine uaidirehe tinanemanerana, onarraro.

₂₈Madirra boti tarraripa pocca botie nebona. Tarabaia bica taniccaza zepe irrizapa cappira-rrarauitoui. Cappiremanarrarideniza da inauiuarrine naco parrireuitoui.

₂₉Touatti uaidira taniccape uati uati tiquenerrerarri. Touatti bica taniccara uati uati tiquenarri. Nema tiquenezape timecotedeni bodideni acco ticanabaqquiza rrehenirrirideni todacorani naniuarrine. Tettideni bica taniccara mittemanazapa bodideni uatizemanauiuarrine. ₃₀Deo Corime orri tinanemana-rrarauiuarrine timadimananissa tarri. Zeso Cristoza rrehe tiquenapozama Deo Corimepa tiadeniza anirronaui. Nazapa niza zotode Deo pocca madirra inassiuauabaqquiuiuarrinecca uada bacco tezape Poua Corime anirrarideniza: —Occa −nauitoui. Nazapa narraridenina inassiuauabaqquiuiuarrine.

₃₁Ocasserani temanezape orri tizanapomana terrerarri. Ticcadeni uadie denima dacoranicca naqui tinebomanarri. Uadie arrimanicca naqui tecauemanazanapo-rrerarri. Amossiniza atti atti tiquenarraro, tatamasso tiquenarraro naqui tinebomanarri. Uaidirehe onihi onihi naqui tiadeniza noueraniuarrine tinebomanarri, onarraro. ₃₂Tetideni cauanerara caneza timecotedeni pina acco acco titicanabaqquimana narro. Timecote tiadeniza uima bica terreranicca inaneza naqui pouaza: —Peperri, ouadi-rrerani −tiquenarri. Tiadeni naqui uima bica terreranicca tinanemanezape timecotedeni tiadeniza: —Peperri, ouadi-rrerani −quenauiuarrine bica tani. Pina Deopa Poua Bedi Zeso Cristoza tiquerrenezape tiadeniza: — Peperri, ticcadeni uimasiri ouati rrimani −narrarissa tiquenarri, onarraro.