Epesodeniza 3

₁Ouape Paoro, Zeso Cristocca zozosse orrarrarorrinepe toponi cocoroza ouezarraro. Zodeo tiquerrena-rrerarrarodeni Deocca madirra tiquerrenaniuarrine tiadeni mari mari ohocanabaqqui naraha occa madirra zodeodenina ouaza uadimanaza oua coro izimemanarrarode. ₂Occa uima timittemanezape rridapanana nauatoto tinani: Deocca touati uanehe pocca biquehe naqui tiadeniza torrani tauimarini timittemananiuarrine Deo oua cazosserrari. ₃Deo pocca uima bicani taide madirraza auatora taporaha Pouarrine ouaza touatorraro. Narraro uima bazira tehe taideuarri dozo onapopa. ₄Narraro ua timanimanezape timittemananissa tanitoui. Nazana: —Parrissa, Paoropa Deocca uima bicani Zeso Cristo tauimari nauato tarrari −tiquenanitoui. ₅Narraro uimape taide icca ididenizama Deorrine aniporaha pouadeniza auato inana-rrerarraro. Naraha rridapanape Deo Poua Corimerrine arra pocca zozosse tabaqqui bicaqquiri narrarideniza, Poua Atti cacomeraqquiri narrari bicaqquiri narrarideniza naco pocca uima bicani auato inanarraroparri. ₆Arri Deocca uima bicani narroraporaha auatora taporrarope arrima narraro: Zeso Cristo pouarrine icassiuaueraniuarrinecca uima zodeo querrena-rrararrarideniza naqui bacco tarraro. Zodeo querrena-rrararraridenipa zodeodeni tezerre Zeso Cristoza parrissa quenazapa pouaza orrariqquimanarrari. Pina poua assire orrarirrarissa quenarrari. Nama quenazapa zodeo querrena-rrararrarideni, arra zodeodeni tezerre Zeso Cristoza toquerrenazapa Deocca danirri bicani Poua uati taporraricca carrimanarrari.

₇Ouape bica onerrereraha Deo ouaza bica taza ouaza uati uana tarrari. Pocca dacorehe ouaza inaparrirenissa teza oua cazosserrari. Zeso Cristo tauimari icassiuaueraniuarrinecca madirraza torraniuarrine maride orrarizarraro. ₈Zeso Cristoza toquerrenarrarideni mota uapi taha bicaqquiri naraha ouape bica onerrerani. Occa uima rradanipe uaidira tade. Ouape Deocca madirra bazimaza arrimani orrani. Nema oneraha Deona ouaza bica tarrari. Oua tocatterrizazapa tozepe irrie bicani ouaza da inarrarode. Narrarope arri zodeo querrenarrararrarideniza Zeso Cristo tauimari icassiuaueraniuarrinecca uima bicani maride occarizaniuarrine. ₉Deo ia Nauatode Pouarrine maittaccazama pocca uima bicani narroraporaha auatora tapoccade. Rridapana narraro uima touatozape madirra bazima mittemanauiuarrine maride oua cazosserrari. ₁₀Deopa nama narraria rridapana pocca madirra Zeso Cristoza quequeriqquimana narrarideni Deo pocca nauatoue bicani rriquerreranicca auato inanemananiuarrine. Nazapa memeuarri cacauehe carrimanarrarideni, pina Deocca zozosse tabaqqui taminedeni, pina inoccoza qqui inabaqqui-rrararraridenicca taminedeni bazima Deocca nauatoue qqui toquenazapa: —Parrissa, Deopa nauatorride rarrari −quenauiuarrine. ₁₁Deo nama nauiuarrinepa zama inauato-rreraccazama: —Niza zotode arrima onananitoui −naporrari. Nazapa ia Zozossede Zeso Cristo ocasserani auaza ia Tonassiuauade torrazapa Deocca uima narroraporrarocca parrissa torrarraro. ₁₂Nezape Zeso Cristo ia Tonassiuauadeza parrissa inezape icappinerrereza Deoza iarriressirraro. Pouaza uati ineza ibodipe: —Parrissa etti mittaui −inarraro. ₁₃Nezape toponi cocoro onauaneraha Deo tinebomana-rrararro. Zodeo tiquerrena-rrerarrarodeni Zeso tauimari tiadeniza torraniuarrine maride orrezape oua coro izimemaneraha pina tetizemanarri. Arri ocasserani ouarrarope tiadeniza uima bicani torraniuarrine.

₁₄Rrehe nazama Deo iaza uima bicani inanarraro obodi uatomezape opitoza ouitteza Pouaza uati uati onarraro. ₁₅Memeuarri animanarrarideni, namiuarri animanarrarideni bazimapa Deo inauatobaqquirrari, inarraro. ₁₆Deopa orrariui bica tarra, nauatorride rarra nazapa Pouaza uati onezape: —Abi Deo, Ticorimema ticca madirra bodideni todacoremanaui nauiuarrine ticca dacorehe tinanarizarri −ohonanarraro. ₁₇Zeso Cristoza parrissa tiquenaza tibodideniza madiuiuarrine Deoza uati uati onarraro. Deocca touati uanehema timadimananiuarrine naqui Pouaza uatide damera onarraro. Pina aua rrabo nami bodiuarri toqquezimarrarissa tiquenarri. Tirrabodeni Deocca touati uaneheza denima toqquezima-zanapozape Deoza tetideni uana taniuarrine, timecotedeniza naqui tetideni uana taniuarrine. ₁₈Tiadeni, ia inarraro bazima Deocca madirra iquerrenarraro. Deocca touati uanehe nauatoqquiri inaniuarrine Pouaza uati uati onarraro. Zeso Cristo itoui uati cauanari canaui tauimaripe deni torrani. Pocca touati uanehepe motarani. Zama nemaneheza irririzarraro. ₁₉Pocca touati uanehe deni torrarrarorrinepe nauato inanissa taniuarrine iparrire-rrereraha tiadeniza auato taniuarrine Deoza uati uati onarraro. Pocca touati uanehe tiadeniza torrizerezape Deo tiadeniza aniuissa tauiuarrine, onarraro.

₂₀Nezape Deo deni torrarrariza etizena. Pocca deni torrehe, pocca dacorehe nemanehepe ibodiza anirraro. Narraroza uima bicani inananiuarrine iparrireni. Touini inanicca Pouaza uati inezape iaza inana tani. Naraha ibodi uatomarrarope arrimani. —Deopa arrama nauiuarrine parrireui −inanitide naraha Pouapa denima inananiuarrine parrireui. ₂₁Ia bazima Zeso Cristoza ihiqueriqqui narrarope Deoza etizeza: —Abi Deo, bica tinani, deni tirrani! −inaniuarrine bica tani. Rridapanazama nema izanapona, onarraro. Parrissa nema nana.