Epesodeniza 2

₁Taidepe ticcadeni uaidirehe, ticcadeni uimasirirrine Deozape pina tecotarrarossa narrarode. ₂Ticcadeni madie pina Deoza toquerrenarrararraridenissa tiquenarrarode. Arrirraro namicca uimatoui dameraqquiri tiquenezape Deoza uauadide Tocorime-Tamine attizana iboraqquiri tiquenarrarode. Narraripa arra qqui inabaqqui-rrararrarideni zossede torrarrariparra. Pouapa Deoza iboqquiri narrarideniza naco zosse zosse narrari. ₃Ia bazimape taide nema inaporraro. Deoza iboqquiri inarrarode, ibodiza uaidirehe touini inaniccara ihinana narrarode. Ime touini inanicca uaidira taniccaza dameraqquiri inarrarode. Uimasirima issonarrarorrine Deo ia tonarrizo-baqquizapa pina madirra bazima inarrizobaqquirrarissa inanitouiraha.

₄Deopa touati uanehe sse tarrari. Itoui uati cauanari canarrari. ₅Uimasiri sseqquiri inarrarorrinepe pina ecotarrarossa inaccade. Naraha Zeso Cristocca madirra iquerrenezape Deopa iaza camittehe zati da inarraro. Pocca touati uanehepe bica tani, deni torrani. Narraroma tiadeniza uati cauanari canaza tiadeni tonassiuauabaqquirrari. ₆Madirra ia bazima pina ecotarrarossa ineraha Deopa Zeso Cristo inauatoniza ia naqui poua tezerre ia tonauatonibaqquirrari. Nezape memeuarri Deo Pouarrine Cristo tezerre rrassi inarinitoui. ₇Deo nama narraria niza zotode pocca touati uanehe bicani iaza inanani madirra bazimaza auato tanitoui. Arri icca uima Deoza tobicarrarope Zeso Cristo pouarrine. Nazapa Deo iaza uati cauanari canaui madirra qqui toquenauitoui. Narraro uima naqui mittemanauitoui. ₈Abi Deopa titouideni uati cauanari canarraria tiadeni tonassiuauabaqquirrari. —Zeso Cristo parrissa itoui zoqquerrari −tiquenezape tiadeniza tossiuauehe inanarraro. Tirrinedeni rrerani. Abi Deo touini naza manaconi rrirehe tiadeniza inanarraro. ₉Parrissa, Deo tiadeni tonassiuauabaqquirraripa bicaqquiri tiquenarrarorrine rrerani. Uima bicani tinanemanarrarorrine rrerani. Narrarorrine madirrapa: —Bica onarrarorrine Deo oua tonassiuauarrari −narrarauitoui. ₁₀Deopa taide nauato taporrari: —Occa tonauatobaqquinarra uima bicanira inanemananitoui. Ouattiza madimanauissa tauitoui −nazapa Poua Bedi Zeso Cristo zosse inaronarrari, pouarrine inauatomanizati iquerrenaniuarrine.

₁₁Tiadenipe zodeodenissa tiquenehe tissonemana-rrerarrarope zodeo tiquerrena-rrerani. Zopori cotani eteroni uissinarra ticappiremanehe timadimanezape zodeodeni tiadeniza: —Zopori cotani eteroni uissinarra rrirriradedeni −quequenanarrari. Pouadenipa narraro uissinarra carrimanazapa pouadeni canacanimanaza: —Iape narraro uissinarra carrimanarrarideni iquerrenani −quequenanarrari. Nama quequenanazapa: —Iana Deocca madirra iquerrenani auato tani −quequenanaraha assiredenizara auato tarraro. Pouadeni bodidenipa cacarriqquimera-rrerarraro. Naraha tiadenipe tetideni rrimemana terrerana: Maittaccazamape Zeso Cristoza nauatoqquiri tiquenerreraccade. ₁₂Zeso Cristo rrirehe timadimanaccade. Tiadenipe Izarraeo potemaui zodeodeniza ticarrimemana-rreraccade. Deopa pouadeni tezerrera rrehe canireporraride. Pouadenizara uima bicani onihi onihi uati taporrari. —Tiadenira onassiuauabaqquinitoui −napoui nade Abi Deo. Naraha tiadenizapa nama narrararrari. Arrirraro namiza timadimanaporaha ponima Deo rrirehe timadimanezape: —Izoqqueza icassiuaueranitoui −tiquenerreraccade. ₁₃Tiadenipe Deoza uarrirri tinaccade. Naraha rridapana Zeso Cristo pouarrine Deoza uarrirrira tinarraro. Poua zoqqueza emene toccarrarorrinea tirrariqquimanarraroparri.

₁₄Zeso Cristo pouarrine icarronerara canarraro. Ia zodeodeni, zodeo tiquerrenarrerarrarodeni bazima irrariqquirraro. Arra zodeodeni, zodeo querrenarrararrarideni tezerre arriuarri nacassera, arriuarri nacassera quenaporraricca uimape Zeso Cristorrine rricarraro. Narraro uimape pina siba ua tamaroni araboma uarraro ideniuarri zodeodeni, ideni onihiuarri zodeo querrenarrararrarideni quenaporrarissa narraro. Naraha Zeso Cristo narraro uattarrouecca uima inarricarrarope pina siba ua tamaroni araboma uarraro inabarariza touabarrarossa narraro. ₁₅Deocca zossenirri Moize dozo inaporrarope uapi tarraro. Narraroza zodeodeni madirronemanarrari. Naraha Zeso aua porimacossaniza zoqquezapa narraro neborraro. Nama nazapa arra zodeo Zesoza parrissa quenarrarideni, zodeo querrena-rrararrari parrissa quenarrarideni tezerre inatassaqquizapa pouaza orrariqquimanarrari. Nazapa pouaza orrariqquimanarrarideni bazima pouarrine carronerara canarrari.

₁₆Zeso aua porimacossaniza zoqquezapa arra zodeodeni, zodeo querrena-rrararrarideni tezerre arrauarri nacassera, arrauarri nacassera quenarrari uima pouarrine rricarraro. Rridapanapa carronerara canarrari. Pouaza bazima tassaqquimanauissa tazapa pina poua assire orrarirrarissa quenarrari. Pouaza parrissa quenarrarideni bazima Deo tezerre carronerarrariparra. ₁₇Zeso Cristo namiuarri ccaronarraripa uima bicani Deo tezerre icarroneraniuarrinecca uati uati narizarrari. Zodeo tiquerrena- rrerarraro Deoza ssamoqquiri tiquenaporrarodeniza narraro uima uati uati narrari. Ia zodeodeni Deoza nauatoqquiri inarrarodeniza naco uati uati narrari. ₁₈Zeso Cristo pouarrine ia zodeodeni, zodeo tiquerrena-rrerarrarodeni bazima pouaza parrissa inezape Abi Deoza iarriraniuarrine iparrireni. Poua Corime ia bazimaza anirraripa orrarirrari. Narraripa ia acco tocanabaqquiza Deoza uati inezape Pouaza ia tonauarrira-baqquirrari. ₁₉Zodeo tiquerrena-rrerarraro tiadenipe pina zama onihicca madirrassa, pina zama cappiremanarraridenissa tiquenaporaha rridapanape Zeso Cristoza parrissa tiquenezape Deocca madirra tezerre tiadeni naqui pocca ozacca madirra tiquerrenani. Tiadeni naqui Deoza: —Abi −tiquenani. ₂₀Deorrine Zeso Cristoza tirrariqquimanarraro. Zeso Cristo pocca zozosse tabaqquina Zeso poua tauimari mari mari ihicanabaqquimana narrari. Deo Atti cacomeraqquiri narrarideni naco poua tauimari ehecomeremana neza timittemanezape parrissa tiquenarraro. Uima nema narrarope pina oza canauatoniuarrinecca uimassa narraro. Oza sibaza canauatoniuarrinepe taide poni cauittanicca nami narroraporraro. Zotodena siba ua tamarouarranizape oza tocarrarraro. Zeso Cristocca zozosse tabaqquideni, Deo Atti cacomeraqquiri narrarideni tezerrepa pina oza cauittanicca namissa quenarrari. Tiadenipe pina siba ua tamarouarraninissa tiquenarraro. Zeso Cristopa pina siba bicabotessa narrari. ₂₁Pouaza rrehe tiquenarrarodenipe pouaza tirrariqquimanarraro. Tiadeni acco tocanabaqquirrari, tibodideni denima tobicazanaponiuarrine. Tibodideni ssiuarra, uisso teza ia Zozossede Deo madizauiuarrine. Pina Deo pocca oza bica tocanarrarossa tiquenaniuarrine. ₂₂Rrehe Zeso Cristoza tirrariqquimanezape pina Deo madiuiuarrinecca ozassa tiquenarraro. Deo nauiza madiuiuarrine Poua Corime tiadeniza inana-zanaporrari.