Deocca madirra madimanauissa tauiuarrinecca uima
1Rrehe tiadenipe Deocca erredeni tiquerrenarraro. Pouapa titouideni uati cauanari canarrari. Pocca erredeni tiquerrenezape Pouarrinessa tinanemanana, onarraro. 2Pocca touati uanehema bazima touideni tetideni cauanariri canarri. Zeso Cristo itoui uati uana tazapa poua ccaccoraza zoqquerrari. Narraro pocca danirripe Deoza bica tarraro. Pina bani bedi Deoza da taui botta taza marro ocassa tarrarissa narrari.
3Tiadeni Deoza tiquerrenarrarope uananehe bazima tinanemana terrerarri. Tettideniza naqui uananehecca uatide nouerana. Uaidirehe oppina tanicca onihi onihi Deocca madirraza nouerarraro. Madirracca tarabaia acconi, tozepetarri accone naqui tedimana terrerarri. Ziniro, tozepetarri uemani touini tiquenerrerarri. Deocca madirra tiquerreneza timadimananissa taniuarrinepe nema nanicca uima uapima uati tiquena terrerarri. 4Uima ponima uaidira tarrarope uati tiquena terrerarri. Touatti ponimacca, rrizehe uaidira tanicca naqui uati tiquena terrerarri. Nema nanicca touatti uaidira tarrarope Deocca madirraza nouerarraro. Tettideni bica taniccazara Deoza tetizemanana. —Rrehe Abi Deo, bica tinani −titizanapomana nanina bica tani. 5Arrirraro uima nauatoqquiri tiquenani: Uananehe inanemanarrarodeni, uaidirehe oppina tanicca inanemanarrarodeni bazimapa Cristo, Imehi Deo tezerre poccadeni cacaueheza bacco toquena-rrarauitoui. Denima touini quenarrarideni naco pina ziniro touini, pina tozepetarri toui quenarrari, narrarideni bazimapa Cristo, Imehi Deo tezerre poccadeni cacaueheza bacco toquena-rrarauitoui. Nama quenarraridenipa pina siba nauatoniza uatizemanarrarissa quenarrari. Namicca touinira uatideni uanaqquiri narrari. Deoza uatideni uanaqquiri narrararrari. 6Parri, madirra tiadeni tocamaizabaqquimanarana! Touatti ponimacca uati uati toquenazapa pina: — Uaidirehe tinanemanani oppina terrerani. Deo tiadeni tonarrizobaqqui-rrarauitoui −quena taui. Naraha narrarideni attideniza parrissa tiquenerrerarri. Deo Attiza iboqquiri narrarideni bazimaza Deocca narrizoue oppina tanicca ssonarinitoui. 7Nama quenarrarideniza ticarrimemana terrerarri. Pouadeniza tiarrimanani nanina bica tani.
Ssiuarraniza imadirraro
8Rrehe uaidireheza timadimanapozape Deo rrirehe timadimanarrarode. Pina ziziniza timadimanarrarossa naraha Zeso Cristoza tiquerrenezape Deo tiadeniza torrizerarrari. Rridapanape ssiuarraniza timadimanezape pina Deo ssiuerreneza madimanarraridenissa tiquenana. 9Nema tiquenezape Deo Poua ssiuerrene tibodideniza tossiuarrabaqquiuitoui. Narraripa Poua Corimerrine biquehe tinanemanarraro, ticcadeni uima parrirenissa tarraro, parrissehezara timadimanarraro. 10Deo Poua nacassa tauicca ticauatterarri. Pouaza bica tanicca nauatoto tinezape narrarora tinanarizemananiuarrine. 11Arra ziziniza madimanarraridenipa uima bicani tonanade ssamoqquiri narrari. Pouadenipa uima ponimacca, uaidira tanicca inanemaneraha tiadenipe pouadeniza ticarrimemana terrerarri. Pouadenirrine uaidira tarrarope auato tinanemananina bica tani. Pina ssiuarraniuarri rroca tininebaqqui-manarrarissa tiquenana. 12Pouadenipa auatoreheza uaidirehe inanemanarraro. Poccadeni uaidirehecca uima ecomeraniuarrinepe iaza oppina tani. 13Naraha uaidirehe inanemanarraroza Deo ssiuerrene ssonaririzazapa poccadeni uaidirehe nemanehe auato tanitoui. 14Deo ssiuerrenerrine bazima touatonissa tarraro. Narrarorrine maittaccazama arrama quequenanarrari:
—Tedarraro nocco tirrarri! Tetieraha ticamittemanirri!
Cristo poua ssiuerrene tibodiza ssiuarrarizanitoui
−quequenanarrari, rriri rriri quenaza.
15Nazama timadimananissa taniuarrine tibodideni uatonissa zanapona. Pina ssamoqquiri narraridenicca madiessa tiquenerrerana. Nauatoqquiri narraridenissa tiquenana. 16Rridapanape uaidirehe carri tarizaniza timadimanaccarraro. Naraha tiadenipe uima bicanira tinanemananiuarrine tinarroremanehe timadimanarri.
17Pina ssamoqquiri narraridenissa tiquenerrerarri. Ia Zozossede Deo toui nauiccara timittemananissa taniuarrine dameraqquiri tiquenarri. 18Tinoccodeni rrano taniuarrine coma tanicca ze tiquenarrerana. Ze tiquenezape ticcadeni madie touaidiranitoui. Arrima tiquenanina bica tani: Deo Poua Corime tiadeniza torrauiuarrine Pouaza: —Ticorime ouaza tinanarri −tiquenana. Nema tiquenezana uima bicanira tinanemananiuarrine Deo Corime tiadeni zosse zosse nauitoui. 19Nama nazapa timecotedeni tinauatizebaqquimanauiuarrine rriri rriri tiquenarri. Arri Dabicca rrirriricca bica tani, arri Deo Atti dozo nanicca rrirriri naqui bica tani. Deo Corime tibodideni tonauattabaqquiza naqui rriri rriri tiquenani bica tani. Tettideni, tibodideni nemanehema ia Zozossede Zeso Cristoza rriri rriri tiqueneza naqui pouaza: —Bica tinani, deni tirrani! −titizanapomana narri. 20Uarrirriraza ia Zozossede Zeso Cristo onima Abi Deoza: —Rrehe, peperri. Tirrine bica tani −titizanapomana nana. Nezape imadinicca bazima icarriza, icappireza naqui Deoza: —Rrehe, peperri −inani bica tani. Uima bica tanicca iaza aniza, uima ocassera tanicca aniza naqui nema nehe Deoza: —Rrehe, peperri −inani bica tani.
Maqquiderrepa bedimeni tazarrani madimanauissa tauiuarrinecca uima
21Zeso Cristoza tetideni uanaqquiri nezape pina Zeso Cristo poua arramani tonanarrarissa tiquenarri. Timecotedeni tezerre tettideniza arriuarri ibora, arriuarri ibora tiquenarri.
22Amonerre maqquiderre ticarrimanarrarodeni naqui ticcadeni maqqui attiza iboraqquiri tiquenana. Pina ia Zozossede Zeso Cristo attiza iboraqquiri tiquenarrarossa tiquenana. 23Amonerre carrirraripa pocca amonerre zossede torrarrari. Pina Zeso Cristo pouaza toquerrenarrarideni zossede torrarrarissa narrari. Pouaza toquerrenarraridenipa pina Zeso Cristo assiressa quenarrari. Poua naco pina pouadeni tatissa narrari. Poua naco pouaza toquerrenarrarideni Tonassiuauade. 24Nezape maqquiderre carrimanarrarodeni ponidenicca maqqui atti nemaneheza iboraqquiri nana. Pina Zeso Cristoza quequeriqquimana narrarideni pouaza iboraqquiri narrarissa quenaniuarrine, onarraro.
25Maqquiderre amonerre ticarrimanarrarodeni naqui ticcadeni amonerreza tetideni uanaqquiri narri. Pina Zeso Cristo pouaza iquerrenarraro itoui uati uana tarrarissa tiquenarri. Pouapa itoui uati uana taza zoqquerrari. 26Nama narraripa pocca madirra ibicarizaniuarrine. Poua attiza ibodi inauissorraro. Uaidirehe ineborraro auato taniuarrine naqui passo dopaniza niniqui icarrirraro. 27Icca uima uisso, ibodi ssiuarra teza icca uima parrirenissa taniuarrine. Pina etero bicabote ssicari terrerarrarossa, casisi rrerarrarossa inaniuarrine. Niza poua ccanipomaza poua pocca iquerrenarraro bicaqquiri ineza ia touaccamacossani- baqquiuiuarrine.
28Nazama maqquiderre amonerre carrirraripa pocca amonerrezara uati uana tana. Pina poua poua assireza uati uana tarrarissa nana. Pocca amonerreza uati uana tarraripa poua pouaza naco uati uana tarrari. 29Madirrapa poua assireza nacassera-tarrararrari. Poua assireza uati uana tazapa rrirripa narrari, poua assire cacacaua narrari. Rrehe narraro uimape pina Zeso Cristopa pouaza toquerrenarrarideni ecauabaqquirrarissa narraro. 30Ia bazima pouaza iquerrenarrarope pina poua assire namanahassa inarraro.
31Uima narrarossa narrarope maittaccazama Deo uati tarrari: — Maqquiderre poua bedimeniza torrazapa imehi imenideniza nebo, pouadenira madimanarrari. Nazapa pamaraha pina orrarirrarissa quenarrari −naui nade Deo. 32Narraro uimape assiredeni pamaraha pina assire orrarirrarissa naha toquerrenarrari. Narraro carricarricca uimape imittaporaha auatora taccade. Naraha rridapanana omittezape Zeso Cristoza irrariqquirrarocca uimape pina carricarricca uimassa narrarona parri, onarraro. Narraro uimape ouaza bica tarraro. 33Nazama tiadeniza uati omanipomarraro: Maqquiderre amonerre carrimanarraridenipa poccadeni amonerrezara uatideni uanaqquiri nana. Pina poua pouadeniza uatideni uanaqquiri narrarissa nana. Amonerre maqquiderre carrimanarrarodeni naqui ponidenicca maqquizara iboraqquiri nana, onarraro.
