1-2Nazapa Saoro Estevao zoqqueui qqui tazapa uatizerrari. Naraha madirra Zesoza dameraqquiri narraridenina Estevao zoqquezapa ppa izemanarrari. Nazapa Estevao toui uatideni uanaqquiri naza bazima orri quenarrari.
Zesoza rrehe quenarrarideni narrizoue noppineni torraribaqquirrari
Nezape narraro uadaza Estevao zoqquezapa Zerozarecca Zesoza rrehe quenarrarideniza narrizoue torrarizarraro. Nazapa rrehe quenarrarideni bazima nanarrizo toquerrenazapa torraribaqquirrari. Naraha Zesocca zozosse tabaqqui 12 quenarraridenipa domo toccabaqqui-rrararrari. Arra domo toccabaqquirraridenipa zama arobeni Zodeauarri rraui torra, zama arobeni Samariauarri rraui torra narrari. 3Naraha Saoropa rrehe quenarrarideni Zeso tauimari nebomanauiuarrine damera tarrari. Oza bazimaza toqquezimarra narizapoui nazapa maqquiderredeni itadama, amonerre itadama narizaza toponi cocorouarri rroca rroca inabaqquiza ua ua ihizimabaqqui narrari.
Zama arobeni Samariaza Zeso tauimari mari icanabaqquirrari
4Naraha arra Zerozareza domo toccarrarideni oza onihiuarri bacco tarizemanazapa Zeso Cristo tauimari icassiuaueraniuarrinecca eccorarize-manarraro. 5Piripi naco narrizoue noppineni rroppa tarrari. Pouapa Samariauarri toccaza oza panani bacco tazapa Zeso Cristo tauimari maride torrarrari. 6Nazapa Deorrine Piripi canauatori canaui qqui toquenazapa nauicca madirra bazima pocca marinarra mittemanauissa tarrari. 7Arra canauatori canazapa madirra bodideniza Tocorime-Taminecca zozosse tabaqqui tocorime mona carrimanarrari naco inanomibaqquirrari. Madirra bodidenicca tocorime siri rrauininezapa rroua rroua quenarrari. Madirra isso sirideni naco inanomibaqquirrari. Madirra idedeni tone biqueraza issodeni siri toquerrenarrarideni naco inanomibaqquirrari. 8Piripirrine nama naui qqui toquenazapa naui oza pananicca madirra uatizemanarrari.
9Naraha nauiza naco zoppinerre madirrari, onipa Simao. Poua attipa: —Ouape zoppinerre nauatorride orrirani, orrari onani −nanarra narrari. Samariacca madirra ihicamaizabaqqui nazapa —A, nauato taui −quequenanarrari. 10Nazapa Simaozapa madirra bazima erredenideni naco attideni: —Arrarraripa pina Deossa narrari −quenazapa poua onipa Deocca Nauatoue Dacorabote icanacanimanarrari. 11Uarrano uapi taha canauatori cacanana nazapa pouaza parrissa quequenanarrari. 12Naraha Piripipa Deocca cacauehecca uima bicani uati uati tarrari. Zeso Cristo onina deni torrarrari uati uati taza naco mittemanazapa manaco narraro uimazana parrissa quenarrari. Zesoza parrissa quenazapa maqquiderredeni amonerredeni naqui passo dopaniza niqui izanabaqquirrari. 13Nazapa Simao naco Zeso tauimari mittaza rrehe nazapa passo dopaniza niniqui carrirrari. Nazapa Piripiza ccarizarrari. Piripi canauatori canarizaui Simao qqui tazapa: —A… bica taui −narrari.
14Nazama Zesocca zozosse tabaqqui Zerozareza madimanarrari uima mittemanarrari: —Samariauarricca madirrapa Deo Attiza parrissa quenaui −mittemanazapa Pedoro Zouao tezerre Samariauarri touedauiuarrine zosse inabaqquimanarrari. 15Nazapa touedarrari, naui Samariaza bacco toquenazapa Deoza uati toquenarrari, Poua Corime madirra bodideniza torrarizauiuarrine. 16Arra Piripi mari icanabaqquipoza ia Zozossede Zeso oniza passo dopaniza niniqui carririzemanaporaha Deo Corimepa pouadeniza torra-rraraccarrari. 17Naraha Pedoro Zouao tezerre pouadeniza bara quenaza Deoza uati toquenazapa Deo Corime bodideniza torrarizarrari.
18Naraha pouadeniza bara quenaza Deo Corime bodideniza torrarizaui Simao qqui tazapa narraro nauatoue touini naza: —Tiadeniza ziniro da onana −narrari. 19Pedorodeniza uati tarrari: —Ouaza ticcadeni nauatoue da tiquenarri, onarraro. Oua naqui arri ticcadeni dacorehessa onaniuarrine. Madirraza bara oneza Deo Corime pouadeniza totorrariza nana −narrari Simao. 20Naraha Pedoropa pouaza uati tarrari: —Parri! Tibodipe: “Deocca danirri ziniroza mitta onana” tezape tia ticca ziniroma narrizoue rriquerreraniuarri ticcanitoui. 21Tibodicca uaidirehepe Deoza auato tarraro. Nema tezape Deocca danirri tiaza torra-rreranitoui. 22Rrari, tibodi nema zanapo-rreraniuarrine ticca uimasiri tineborri. Tibodicca uaidirehe rricaniuarrinepe ia Zozossedeza uati tinarri. Poua touini naza ticca uimasiri peperri inananitoui. 23Tibodiza icca nauatoue acconi tedini nauato onani. Tiape ticca uimasiri tia rrore naqquirrarossa narraro −narrari Pedoro, zoppinerre Simaoza.
24Nanarra Zoppinerre Simao: —Rraho, rridacca uati tiquenarraro arri ziniroma narrizoueuarri oqquerreraniuarrine ouaza Deoza uati tiquenarri −narrari Pedorodeniza.
25Nazapa naui Samariaza Zesocca zozosse tabaqquipa Zeso Cristo tauimari maride nama zanapomanarrari. Arra pouadeni qqui toquenarraricca mittemanarraricca naco uati uati totoquena narrari. Nazapa oza panani Zerozareuarri rrauiniza naco arra Samariacca oza capamema narizaniuarri Zeso Cristo tauimari bicani icassiuaueraniuarrinecca maride toquerrena nanirrari.
Piripi zama Etiopiauarricca tamine birri accode tezerre bacco tocanirerrari
26Naui zotode naco Deocca zozosse memeuarricca Piripiza auatoza uati tarrari: —Piripi, arri zama Caza uarri tiqquezipparri, madirra madide nouerauicca rrauiuarri ticcana. Narrarope Zerozarecca rraui oza panani onini Cazauarri toccarraro. 27Nazapa narraro rraui Piripi toccazapa zama Etiopiauarricca madirra qqui tarrari. Pouapa Etiopiacca tamine birri accode deni torrauicca. Nauato tarrari. Etiopiacca ziniro naqui pouana ecauarraro. Pouapa Deotoui naza Zerozareuarri ccarronarrari, Deoza dada toqquimaza uatizeuiuarrine. 28Nazapa pocca oza Etiopiauarri toccanirrari. Pocca nami rrorroppadeza touittariniza cavaro rroca icananimanazapa maittaccazama Deo Atti cacomerabote Izaiarrine dozo nani ua ua tanirrari. 29Nazama Piripi tezerre bacco tocanirebote nazapa Deo Corime Piripiza uati tarrari: —Rrari, uassinarra tiqqueza arricca nami rrorroppade uinorinina tianarri −narrari. 30Nazapa uassinarra toccamissarrari, bacco tarrari. Nazapa tamine birri accode uinorina toccanizapa Izaiacca dozonirri ua ua taniui mittarrari. Nanarra Piripi uati tarrari: —Nirra, narraro uima ua tezape timittanissa taqui? −narrari. 31Naraha tamine birri accode attipa: —Oua maride nouerazapa nerrecoma neza omittaniuarrine? Nazapa Piripiza uaua narrari. Poua uinoriza Piripi uittariuiuarrine. 32Arri Deo Atti ua inarrarope arrima narraro:
—Poua iaqquemanarrari, pina eueue inanazoqque-manauiuarrine poua zozoqque nauiuarri iaqquemanarrarissa narrari.
Poua narrizode baccodeniuarri didi narrari, pina eueue cone ccado iquenaza didi narrarissa narrari.
33Pouapa arramani inanemanarrari. Uimasiri carri narrararaha uimasiri manaconi pouaza inanemanezape inanazoqque-manarrari.
Nizaranibote poua potemaui tauimarideni uatide anipazarra? Nouerauitoui.
Poua potemaui cappiraha zoqquezapa arrirraro zamaza amossi narrari −naui nade Deo Atti.
34Nazapa Etiopiauarricca tamine birri accodepa Piripiza uati tarrari: —Rrari, oua mari ticanarri. Izaiacca dozonirriza nerreco madirrara pina eueuessa nauiuarrine? Izaia poua uitide, madirra ouaharana? Ssamo onani −narrari tamine birri accode. 35Nazapa Piripi narraro Deo Atti arri Izaiacca dozonirriza Zeso tauimari uati uati narronarraripa arri Zesorrine icassiuaueraniuarrinecca uima bicani bacco tarraro. 36Nazapa denima touedazapa passo qqui toquenarrari. Tamine birri accodepa: —Arriccarraro passo dopaniza niquinarra ocarriniuarrine oppinera taqui? −narrari. 37Nazapa Piripi pouaza uati tarrari: —Tibodi bazimama parrissa Zeso Cristo Deo Bedi torraui tezape naza passo dopaniza niquinarra ticarrina, narrari. 38Nazama Piripi rrehe naza tamine birri accodepa pocca nami rrorroppade cauittauiuarrine uati tarrari. Cauittaza touedezippaza Piripi tamine birri accode passo dopaniza niqui izanarrari. 39Nazapa passo dopaniza niqui, idimora naza uedemoraniraha Deo Corimerrine Piripi amazati zama onihiuarri toccarrari. Naraha tamine birri accodepa Piripi qqui inimani-rrararaha poua motta touatizenirrari. 40Naraha Piripipa oza panani Asotozana auatomarrari, uarri teraha. Nazapa Asotoza rroppemaza oza capamema narizaniuarri naqui Zeso tauimari bicani icassiuaueraniuarrinecca mari mari narizarraria oza panani Sezareauarri naqui uarri teraha bacco tarrariparra.
