Atos 9

₁Nazama Saoropa Zesoza rrehe quenarrarideni rricauiuarrine rrara rrara zanaporrari. Nazapa dada toqquimadedenicca tamine deni torrarrariza uatide toccarrari. ₂Nazapa narrari tamineza Saoro uati tarrari: Arra Zesoza rrehe quenarrarideni otadamauiuarrine oza panani Damascouarri oua zosse tinarri. Oua zosse tinaniuarrine touini tezape ticca uima teppe dozo teza Damascouarri zorro onaniuarrine. Naui Damascouarri zodeodenicca Deo Atti mamari onihi onihicca taminedeniza noue onarizaniuarrine. Nezape Zesoza rrehe quenarrari maqquiderre, amonerredenima otadamaza birrideni rrore onabaqquiza arri Zerozareuarri ouaccani-baqquiuitoui −narrari Saoro. ₃Nazapa tamine Caipa rrehe naza pocca uima teppe Saoroza da ineza Damascouarri zorro inarraro.

Toccaraha Damasco bacco tabote naza memeuarricca ssiuarrani amazati pouaza bacco naronezape poua uinoriza ssiuarrauarrani narraro. ₄Nazapa Saoro touedimarrari. Namiza ponaza toatti mittarrari: —Saoro, Saoro nerrecotoui occa madirra nanarrizo tarizarraro? Arra occa madirra nanarrizo tarizarrarope pina oua nanarrizo tarizarrarossa narraro −narrari. ₅Nanarra Saoro uati tarrari: —Tiape nerrecorrari? −narrari. Naraha: —Ouape Zeso. Oua tinarrizorraro. ₆Nama nazapa tacca-cca canazapa uarro nanarra uati tarrari: —Oua Zozossede nerrecora onauato pazarra? −narrari. Nazapa Zozossede Zeso pouaza uati tarrari: —Rrari, titemezape, oza panani Damascouarri ticcarri. Nanizana occa uima, arri ouaza tizepe irriniuarrinecca uima timittaniuarrine −narrari.

₇Arra Saoro pouaza rraui torrarrarideni naco toatti mouini mittemanaraha assirepa qqui quena-rraraui. Uarro tocanirezapa attideni rriraha domo uarrari. ₈Nazapa Saoro namiza ponaraha totema, nocco ssire-re naraha nocco siri torraha totemarrari. Nocco tozizizapa birriza dama iquenaza oza panani Damascouarri iaqquemanarrari. ₉Nauiza uadari 3 naraha nocco tobica-rraraccaui. Zamatapa rripa-rraraccaui, passo naco ze narraraccaui.

₁₀Naui Damascoza Zesoza rrehe narrari madirrari onipa Anania. Pouapa pina pocca uadassa neza ia Zozossede Zeso auatoza pouaza uaua narrari: —Anania! −narrari. —Rra? Ouape arri, oua Zozossede −narrari.

₁₁Nazapa Zeso pouaza uati tarrari: —Anania, titemarri. Arricca rraui onini Boroccobote quequenanauiuarri ticcarri. Naui Zodacca ozaza bacco tinezape oza panani Tarsocca madirra qqui tinauitoui, poua onipa Saoro. Pouapa otoui naza ouaza uatide torrarrari. ₁₂Ouape pina pocca uadassa neza pouaza uima auato onanapa. Narraro uimape arra madirra oni Anania ccarronaza tinocco bara ineza tinocco tobicapomanitoui, onapa pouaza −narrari Zeso.

₁₃Naraha Anania: —Rraho, oua Zozossede, narrari maqquiderrepa arra Zerozarecca tiaza toquerrenarrari bicaqquiri narrarideni inarrizobaqquiui quenaui uima omittade. ₁₄Rridapana naco Zerozarecca dada toqquimade taminedenicca uima teppema ccarronarraripa tiaza rrehe inarrarodeni tozepe iquerrenaniuarrine ia damade ccarronarrari −narrari Anania.

₁₅Naraha ia Zozossede Zeso Ananiaza: —Rrari, nema nehe ticcarri, pina ouattissa tinanarri. Saoro ocatterrizarrari. Pouapa occa uimaza zepe irririzauitoui. Zama bazimacca madirra, taminedenima mari icanabaqquiuiuarrine. Izarraeodeniza naco otauimari mari icanabaqquiuiuarrine. Nazapa otauimariza: “Rrehe, Zesopa parrissa Deo Bedi” quenauiuarrine, onarraro. ₁₆Pouapa otauimari maride torrarizaraha ocasserehe oppina tanicca inauanarizanitoui. Narraro uima naqui niza pouaza noue onanitoui −narrari Zeso Ananiaza.

₁₇Nazapa Anania Zeso attiza ibora tazapa toccarrari. Zodacca ozauarri bacco tazapa toqquezimaza Saoroza bara naza uati tarrari: —Ouimecote Saoro, rraui ticcarroneraha ia Zozossede Zeso Cristopa tiaza auatode. Narrari oua zosse narronaza occarronarraro, tinocco biquemaniniuarrine, Deo Corime tibodiza torrauiuarrine −narrari Anania.

₁₈Nazapa Saoro noccoza bara naza amazati pina aba eterossa naha catorrazapa nocco biquemanipomarrari. Saoro totemaza passouarri toqquezippaza passo dopaniza niniqui carrirrari. ₁₉Nazapa rripaza ccaremanirrari. Naui Damascocca Zesoza rrehe quenarrarideniza uada pama torrari naha madiccarrari.

₂₀Nazapa Saoro amazati zodeodenicca Deo Atti mamariuarri maride torrarrari. —Zesopa Deo Bedi −narizarrari pouadeniza. ₂₁Nazapa madirra bazima Saorocca marinarra mittemanazapa: —A pohua bodi cacarriqquimerarrari ttarana? Naza narraripa Zerozarecca madirra Zesoza toquerrenarrari nanarrizo narizaccade. Arrauarri ccarronaza naco Zesoza rrehe quenarrarideni itadamaza dada toqquimade taminedeniza iaccanibaqquiuitoui quequenanaraha narrari rraraco? −quenarrari.

₂₂Naraha Saoropa Deocca dacorehe carriza poua atti bica taza uati uati tarrari: —Zesopa arra Cristo-Mesiatoui imadirraroparri −narizarraria arra Damascouarricca zodeodeni pouaza atti atti quenaraha arramani toquerrenaza tossamomanazapa zama rrama quenarrariparra.

₂₃Nazama zotode naco zodeodeni pouadenira uimahaha canaza: —Rrari, Saoro zoqquena −quenarrari. ₂₄Naraha Saoropa pouatoui narroremanaui uima mittarrari. Oza pananicca siba sse nauarraninicca totoqqueqquimacca noccobirriza pouatoui cacassiuarremana narrari. ₂₅Naraha narraro zomeza Zesoza rrehe quenarraridenipa quiqui imeniza Saoro inauittizemanaza oza pananicca siba sse nauarraninicca noccobirri bedeniza mouaraza madoza tappa icanaronemanarrari. Nama inanemanazapa Saoro inassiuauemanarrari.

₂₆Nazama Saoro oza panani Zerozareuarri toccaniza bacco tanizapa Zesoza rrehe quenarrarideniza carrimauiuarrineraha poua noppine cappinemanarrari. Zesoza torrarrari tauimari mittemanaraha parrissa quena-rrararrari. ₂₇Naraha Banabena Zesocca zozosse tabaqquiza Saoro iaccarrari. Poua tauimari pouadeniza uati uati tarrari: —Arrarraripa Damasco rraui toccaraha ia Zozossede Zeso Cristo pouaza auatoza atti mittarrari. Naui zotodepa cappinera taza Damascouarri Zeso Cristo tauimari maride torrarrari −narrari Banabe. ₂₈Nazapa poua noppine tocappineremanaza pouadeniza ccarizarrari, pouadeniza madirrari. Nazapa Saoro cappinera taza naui Zerozareza ia Zozossede Zeso Cristo tauimari mari icanabaqquiuissa tarrari. ₂₉Naraha zodeodeni mota zama Cresiacca touatti nauatoqquiri narrarideni Saoro tezerre uimahaha canazapa arrauarri uati arrauarri uati quenarrari. Uadimanazapa zoqqueuiuarrine toui dameraqquiri narrari. ₃₀Naraha Zesoza rrehe quenarraridenipa Saoro inanazoqque-manauiuarrinecca uima mittemanazapa oza panani Sezareauarri poua iaqquemanarrari. Naui Sezareaza bacco toquenazapa Saoro pocca oza panani Tarsouarri zosse inanimanarrari.

₃₁Nazama Zesoza rrehe quenarrarideniza madirra ouahadenicca narrizoue totappezape rroneheza madirizemanarrari. Arri zama arobeni Zodeauarri, zama arobeni Carireauarri, zama arobeni Samariauarri naqui narrizoue totapparraro. Nazapa Deo Corimerrine poccadeni rrehenirri todacorani zanaporraro. Zesoza rrehe quezati naco touapirra zanapoui narrari. Bazima ia Zozossede touira bodideni uatomemana-zanapozapa madimanauissa tarrari.

₃₂Pedoro naco Zesoza rrehe quenarrarideni qquide ccarizarrari. Oza panani onini Ridauarricca rrehe quenarrarideniza bacco tarrari. ₃₃Nauiza maqquiderre ide tone biqueraza isso siri torrarrari bacco inarrari, onipa Enea. Pouapa uarrano 8 naha coma tarrari. Ccariza-rraraui. Pouarrineza popori narrari. ₃₄Nazapa Pedoro pouaza uati tarrari: —Enea, Zeso Cristorrine tinomini. Titemarri, ticca uauada mouaraza domo taqquirro −narrari.

Nanarra amazati totemaza ccarizarrari. ₃₅Nazapa Ridacca madirra bazima, zama arobeni Saronauarricca madirra naco Enea tonomiui qqui toquenazapa bodideni cacarriqquimere-manarrari. Nazapa bazima ia Zozossedeza toquerrenarrari.

₃₆Nazama Zodea arobeniuarri oza panani Zopezape amonerre Zesoza rrehe narraro madirraro, oninipe Tabita. Zama Cresiacca madirra attidenizape: Dorca. Ponipe amonerre bicani madirraro, uima bicani inanarizarraro. Madirra cappiremanarrarideni acco acco ihicanabaqqui narrari. ₃₇Naraha Tabita quiza nezape uatiarraro. Uapini passoza ssaua iquenezape oza tetepiuarricca coba canauarraninizana ibarimanarraro. ₃₈Nazama oza panani Zopepe Ridauarri uarrira tarraro. Zopecca Zesoza rrehe quenarraridenipa Pedoro Ridauarri madirrari quenaui mittemanazapa Pedorotoui maqquiderre pamaha zarra tarrari. Nazapa Pedoroza bacco toquenaza uati toquenarrari: —Uassinarra icca ozauarri ticcaccarri −quenarrari.

₃₉Nazapa Pedoro pouadeniza toccarrari. Oza bacco tanimanazapa Tabita poriniuarri iaqquezimemanarrari. Nani Tabita poriniza poni tassani amonerre tobaccoperodeni domoni uariza orri orri quenarraro. Ponidenicca eterope Tabitacca ssequinarra Pedoroza noue iquenarraro. Poni madiqqueza poni tassanideniza ssequi inarizarraro. ₄₀Naraha Pedoropa bazima amossiniuarri zosse ininebaqquiza poua pitoza uitta naza Deoza uati tarrari. Nazapa totemaza arri uatiarraroza uaua narrari: —Tabita, titemarri −nanarra nocconi ssire-re neza Pedoroza cattoma neza totema, uittari narraro. ₄₁Nazapa zapaniza Pedoro rroca inimezape totemarraro. Nazapa arri amonerre camittemanirraro qqui toquenauiuarrine Zesoza rrehe quenarraridenitoui amonerredenitoui uaua narrari. Qqui toquenazapa uatizemanarrari. ₄₂Nazama narraro uimape Zopeuarricca madirra bazima mittarizemanarrari. Nazapa Zopeuarricca madirra mota denima Zesoza rrehe quenarrari. ₄₃Nazapa Pedoro naui Zopeuarri uadari uapi taccauiuarrine nauicca bani etero nanadacomade oni Simao tazariza madiccarrari.