1Nazapa dada toqquimadedenicca tamine deni torrarraripa Estevaoza uati tarrari: —Arra madirra uati toquenarrari attidenipa parrissaqui? −narrari.
2Nazapa Estevao uati tarrari: —Ouimecotedeni, taminedeni tezerre, titauaribobo canarri, occa uima uati onana −narrari. —Icca Abi Deo Bicabote deni torrarrari pouapa icca idi Abarahaoza auatoporrari. Arra Abarahaopa Mesopotamiaza madiccaza oza panani Aranauarri tocca-rraraccaza Deo pouaza uati tarrari. 3Poua attipa: “Rrari, ticca zama tinebo, ticca madirra tinebobaqqui narro. Zama onihi tia zopi ocaneza naniuarri ticcarri, nanizana timadiniuarrine” narrari Deo. 4Nazapa Abarahao caodeodenicca zama Mesopotamiaza madiporaha ineboza oza panani Aranauarri toccarrari. Bacco tazapa nauizana madirrari. Nauiza pocca abi Tera zoqquezapa oza panani Arana ineboza arri icca zamauarri Deo Abarahao zosse inarronarrari −narrari Estevao. 5—Naraha Abarahao arrauarri bacco nazapa poua madiuiuarrinecca zama Deo pouaza da inerreraccani. Madirra ouahadenicca zamaza madiccarrari. Erredeni naco cappiraccarrari. Naraha Deo Attipa arrama narrari: “Abarahao, niza zotode arrirraro zamape ticca zama torraniuarrine, tipotemanicca naqui torraniuarrine” narrari. 6Uima onihi naqui Abarahaoza Deo uati tarrari: “Niza tipotemani naco zama onihiza madirizemanauitoui. Narraro zamaza madirizemanazapa nauicca madirracca zozosse toquerrenauitoui. Pouadeni zossededeniza tarabaia zanapomanazapa uarrano 400 naha nanarrizo toquerrena-zanapoccauitoui” naui nade Deo. 7“Naraha ticcadeni madirra nanarrizodedenipa manaco Ouana onarrizobaqquiuitoui. Tipotemani narraro zamaza orrine rrauininezapa arrirraro zamaza bacco narronemanauitoui. Nazapa arrirraro zamaza Ouattiza iboraqquiri nazapa Ouaza uauatizemana nauitoui” naui nade Deo Abarahaoza −narrari Estevao. 8—Deopa Abarahao tezerre rrehe canirerrari. Narraro rrehe canirenirripe Abarahaocca madirra Deo Pouaza toquerrenaui auatoqquiri nauiuarrine Deopa Abarahao icazosserrari. Poua Attipa: “Abarahao, tia, ticca madirrama occa madirra tiquerrenani auato taniuarrinepe zopori cotani eteroni uissinarra ticarrimanana” narrari. Nazapa poua bedi Izaqui tossonazapa uadari 8 naza imehirrine Deocca torraui auato tauiuarrinecca uissinarra carrirrari. Zotode naco Izaqui poua bedi Zaca tossonaza narrari naco uissinarra carrirrari. Zaca bedi 12 quenarrarideni naco uissinarra carrimanarrari. Narraridenipa ia Izarraeo potemauideni icca idideni parra! −narrari Estevao.
9—Arra icca idideni Zaca bedidenipa pouadeni ouaha Zozeza uauadimana narrari. Nazapa uadieza da iquenarrariparra. Da iquenazapa arra mitta iquenarraridenina zama Ezitouarri iaqquemanarrari. Naraha Deopa Zoze ecauarrari. 10Zoze tossiuauazapa Deorrine pouaza ocassera tanicca rricarraro. Deorrine naco Zoze nauato tarrari, poua atti naco bica tarrari. Nazapa Ezitodenicca tamine Deorrine Zozeza uati uana tarrari. Narrari tamineza: Paraho, quequenanarrari. (Ettizape: tamine, inarraro.) Nazapa Parahorrine Zozepa Ezitocca zama cacauade torrarrari. Parahocca oza naqui ecaua, poua zepetarri ecaua, pocca zozosse tabaqqui naco ecauabaqquirrari −narrari Estevao.
11—Nezape Ezitouarri pemi torrarraro. Zacacca zama Canahauarri naqui narrarossa narraro. Nazapa bazima pemirrine ocasserani auemanazapa orri orri quenarrari. Narraria arra icca idideni zamatapa cappiremanaza pemimanarrariparra quenade. 12Naraha Zaca “Ezitouarri zamatapa uemaui” quenaui mittazapa nauiuarri poua bedideni arra icca idideni zosse inabaqquirrari. Rraui torrazapa zamatapa mitta iquenaza eccanimanarrari. 13Naraha Ezitouarri zamatapa mittade rraui torrapomazana Zoze poua cacomerarrariparra: “Ouape ticotedeni orrani” naui nade Zoze ouahadeniza. Nazana tamine Paraho Zozecca madirra tauimarideni mittarrari. 14Nazapa Zoze poua ouahadeni zosse inanibaqquirrari: “Occa abi, pocca madirrama teccarronabaqquimanana, arriza timadimananiuarrine” naui nade. Nazapa Zaca pocca madirra 75 quenarrarideni Ezitouarri rraui torrarrari quenade. 15Narraria Zaca pocca madirrama Ezitouarri toccarrariparra, madimanauiuarrine. Nazapa nauizana Zaca uatiarrari, poua bedideni arra icca idideni naco nauizana rricarrari. 16Potemauidenipa biridideni assiredeni rrazimana-rrarauiuarrineccaza sse inabaqquimanazapa ecauabaqquimanarrari. Naui zotode uarrano uapi tazana ppa izabaqquimanauiuarrine oza panani Siquemiuarri iaccanibaqqui-manarrari. Naniuarri maittaccazama poccadeni idi Abarahaona Amoro bedideniza zama mitta inaporraro, tonoccobiriuarrine quenade. Nanizana siba odini ui tozaniza biridideni ua izarizemanarrari quenade −narrari Estevao.
17—Maittaccazama arra Abarahao madizama Deo Attipa pouaza: “Arrirraro zamape tipotemanicca torraniuarrine” napoui nade. Deo uati taporraricca touarrirabote naza icca madirra Izarraeodenia naui Ezitouarri touapirrariparra quenade. 18Naraha uarrano uapi taha tossoniqquimaza Ezitocca tamine ouaha torrarraripa pina tamine taideccassa narrararrari. Arra Zoze naco zoqquezapa tamine torrezatipa Zozecca uima ssamo tarrari. 19Narrari taminepa icca idideni ihicamaizabaqqui narrari, ihinarrizobaqqui nanarra narrari quenade. Poua atti naco: “Arra maqquiderre bedi tossonazapa titinebomana narro, rricauiuarrine. Nazana touapi-rrarauiuarrine” nanarra naui nade Ezitocca tamine atti −narrari Estevao.
20—Nazama narrari tamine madiza Moize tossonarrari. Erredeni torrapozama Deopa pouaza uati uana tarrari. Imehipa bedimeni tazarrani poccadeni erredeni abazico 3 canaha ozaza inarrimemanarrari, zoqqueui noppine. 21Naui zotodepa ueni inidiuarri quiquiza poza naza iquenebomanarrari. Naraha tamine Paraho bedenina qqui inazapa zorro inanirrari, inanapiuiuarrine. Pina ponicca erredenissa inanarrari. 22Narrari Moize napizapa pina Ezitocca madirrassa narrari. Poua mari icanemanazapa Ezitocca touattehe bazima touattarrari. Nazapa uatide nauato, zepe irriui naco nauatorride rarrariparra. 23Narraria arra Moize pocca uarrano 40 bacco tazana poua bodipa: “Occa madirra Izarraeodeni qquide occarizana” narrari nade. 24Nazapa Moize qquide ccarizaza Ezitocca madirra Izarraeo zabisso inarrizoui qqui tarrari. Izarraeo zabisso uima cappiraraha inarrizozapa Moize: “A, occa madirra acco ocanana” naza Moizepa Ezitocca madirra inanazoqquerrari. 25Arra Moize poua bodipa: “Rridapanana occa madirra nauatoqquiri naui. Ouape occa madirra Izarraeodeni nanarrizo toquerrenazanapo-rrarauiuarrine Deo oua cazosserrari” narrari nade. Naraha pocca madirrapa pouaza ssamoqquiri narrari. 26Uada ssiuarraza Moize toccapomaza naco Izarraeodeni pamaha pouadenira cauadireui qqui tarrari. Nazapa cauadire-rrarauiuarrine: “Onarronebaqquina” narrari. Nazapa pouadeniza uati tarrari: “Peperri tiquenarri. Tiadenipe tia tiadeniraraha nerrecotoui ticanarrizorerraro?” narrari Moize. 27Naraha nanarrizode boquezapa Moize cco inacossarrari. “Nerrecorrari tia cazosseza ia uatide ticcarronarraro? Tiape icca tamine tirrarrarorane?” narrari. 28“Tiape oua tinanazoqqueniuarrinequi? Pina maitta Ezitocca madirra tinanazoqquerrarissa onaniuarrinequi?” naui nade nanarrizode atti. 29Nazapa: “Ezitocca madirra tinanazoqquerrari” naui uima Moize mittazapa cappinaza rroppa tarrari. Zama onini Midiauarri madiuiuarrine toccarrari. Nauicca madirrapa pocca madirra querrena-rrararaha pouadeniza madizapa amonerre carrirrari. Erredeni naco maqqui pamaha carrirrari −narrari Estevao.
30—Naui midiadenicca zamaza uarrano 40 naha madirrari. Narraro zama uamoniuarricca ssono oninipe Sinai. Naui adami uarrira taniza ccarizazapa aua bedeni ponira raha dirri tani qqui tarrari. Nani aua dirri tani bodiza Deocca zozosse memeuarricca auatoui qqui tarrari. 31Nazapa Moize uarro narrari: “Nerrecotoui nema narraro?” narrari. Nazapa qquide touarriressiza ia Zozossede Deo Atti mittarrari: 32“Ouape Deo. Ticca idideni Abarahao, poua bedi Izaqui, poua bedi Zaca quenarraridenicca Deo orrani” naui nade Moizeza. Nazapa Moize rrororo cananiuarri atti mittazapa cappinarrari. Tacca-cca canazapa rrororo cananiuarri qqui nimani-rraraui nade −narrari Estevao.
33—Nazapa ia Zozossede pouaza uati tarrari: “Ouaza: ‘Deni tirrani’ tezape temoricca sadaria ssititi ticanarri. Arri teniuarripe nami oppina tani Deocca. Arrizape Oua ouarraro” narrari Deo Moizeza. 34“Occa madirra Izarraeodenipa Ezitodenirrine nanarrizo toquerrenaui qqui onani, bodideni orri quenaui naco ohomitta nani. Narraroa arri occaronarraroparri, occa madirra odinibaqquiuiuarrine, oneza. Ezitodenicca narrizoue inauanemanazanapo-rreraniuarrine, onarraro. Rrari, ticcanirri. Ezitouarri tia zosse onanina” naui nade Moizeza −narrari Estevao.
35—Taidepa Izarraeodeni Moize ettarromanazapa: “Tiape icca tamine tirrarrarorane?” quenaporaha Deopa Moize Izarraeodenicca tamine torrauiuarrine toui inacomarrari. Moize pocca madirra idinibaqquiuiuarrine Deo pouaza uaua narrari. Arri aua bedeni dirri tehe rrororo canani bodiza Deocca zozosse memeuarricca auatoza Deopa Moize pocca madirrauarri zosse inanirrariparra. 36Moizepa icca idideni Ezitouarri eqquenabaqquirrari. Pouapa Deocca nauatoue carrirra naza canauatori canarizarrari. Arra taide Ezitoza canauatori canarrari, zotodepa arri ueni imehi oninipa Maccoui quenauiza naco canauatori canarrari. Zotode arri zama uamoniuarri uarrano 40 naha eccariza-baqquiza naco Moizepa canauatori canarizarrari. 37Icca idideni Izarraeodeniza arrama naporrari: “Niza Deorrine icca madirra orraria Poua Atti cacomerabote torrauitoui, pina ouassa inanauitoui” naui nade. 38Moize naco pocca madirra arra icca idideni Izarraeodeni tezerre madirra madide nouerauiuarri madirizemanarrari. Poua naco Deo Atti mittade ssono Sinaiuarri toqquemorarrari. Naui ssonozana Deocca zozosse memeuarricca atti mittaza icca idideniza uati iqquimarraro. Narrarope Deo Atti iaza camittehe da inaniuarrinecca. Narraro uima iaza bacco narronarraroparri −narrari Estevao.
39—Naraha icca ididenipa Moize attiza iboqquiri narrari. Moize ssonouarri Deo Attitoui toqquemoraza nattipa pouaza uattarroqquiri narrari. Bodidenizapa: “Ezitouarri imadiniccaraho” quenarrari nade. 40Nazapa Moize ouaha Araoza uati toquenarrari: “Rrari, ia cacauade icarriniuarrine corime tinauatorizarro, inarraro. Narraridenina itezerrema ia tocanauatobaqquiza rrauirramissaniuarrine” quenarrari. “Moizepa Ezitoza imadiraha ia rrina narronabaqquiraha ssonouarri ccani-rraraui. Uatiarrari ranarra” quenarrari. 41Nazapa pouadeni cacauade boui bedi corime oroza inauatomanarrari. Nazapa eueue inanazoqque-manaza poccadeni nauatonarra baccouarri botta iquenarrari. “Arrima inazana ia cacauade uatizeuitoui” quenarrari. Poccadeni nauatonarraraha narrariza queriqquiza uatizemanarrari nade −narrari Estevao.
42—Nazapa pouadenirrine uima nema nezape Deo pouadeniza paparra narrari. Arra pouadeni motta Deo rriraha madimanazapa marri, abazico, amouadeni narraridenizara: “Ia cacauade” quequenanarrari. Narraro uimape Deo Atti cacomeraqquiri naporrarideni dozo iquenaporraro:
“Izarraeodeni, madirra madide nouerauiuarri uarrano 40 naha rraui tirrarizeraha
Ouaza bani ono torrauiuarrine da da tiquenattaco? Nouerade. Ouaza da da tiquena-rrarade” naui nade Deo.
43“Naraha zama onihicca deo pouamacca, arra ‘marri cacauade’ quequenanarrari onipa Moroquezara tetetizemana naderra. Poua corime poua tazariza uezarrari tinauatomanaza teccarizemanazapa pouaza tetizemaneza ‘ia zozossede’ titiquena naderra.
Deo pouamacca ouaha naco ‘amouadeni cacauade’ quequenanarrari onipa Repana. Narraricca amoua corime ticanauatomanaza naco tipitodeniza rrassi rrassi tineza naqui ‘ia zozossede’ titiquena naderra.
Nema tiquenezape zama onihicca zozosse tiquerrenaniuarrine tiadeni zosse onabaqquinitoui. Arricca zama Babironia deniuarrina tiadeni onebobaqquiniuarrine, ouaza ibobo tinarraro manaco”
napoui nade Deo Atti −narrari Estevao.
44Nazapa Estevao denima uati uati tarrari: —Nazama icca idideni naco madirra madide nouerauiuarri madirizemanazapa Deo Poua tazari eheccarizemana narraro quenade. Narrarozana Deo Attipa: “Tiadeniza omadirraro” naui auato inanarizarraro. Deopa Moize icazosseza Poua tazari icca idideni icanauatomanarraro. Pina Deo tazari corimani Moizeza noue icanaporrarossa narraro bani etero ssequi nauiza icanauatomanarraro quenade −narrari Estevao.
45—Narraro Deo tazaripe icca idideni potemauideni ecauarronemanarraro. Zotode ididenicca zama torraniuarrineuarri Zozoue eccarronabaqquizapa Deo tazari bani etero ssequi nauicca naco eccarronemanarraro. Arrirraro zamaza bacco narronemanazapa madirra ouahana madimanauira qqui toquenarrari. Naraha rrazire inanemanezape Deorrine deni toquerrenarrari. Arraza icca idideni madimanaui uarrano uapi taraha Deo tazari carrimanaui parra naccaui. Zotode Dabi icca idideni Izarraeodenicca tamine torraza naco icca ididenipa Deo tazari bani etero ssequi nauicca inebomana-rraraccaui quenade. 46Nazama Deopa Dabiza uati uana tarrari. Dabi poua naco Deoza uati uana tazapa Pouaza: “Rrehe Abi Deo, tiape icca idi Zacacca Deo tirrani. Tiaza oza bicani ocanauatona, nanizana timadiniuarrine. Naniza naqui ia Izarraeodeni tiaza ehetize zanaponiuarrine” napoui nade tamine Dabi atti. 47Naraha Deopa rrehe narrararrari. Dabi bedi Saromaona Deoza oza bicani icanauatorraro quenade. 48Naraha icca Deo memeuarri madirraripa: “Madirradenicca nauatonirrizapa omadina” narraraui. Deo Atti cacomerabote Izaia dozo inaponipe arrima narraro:
49-50“Ouape Deo. Meme, nami, bazima anirizarrarocca ohouacaua narraro.
Memepe occa uiuittari. Nanizana occa cacauehe cacauade ouittarirraro.
Namipe ouamori cabarinirrinecca uiuittari bedenissa narraro.
Ouaza oza bicani ticanauatomananiuarrinequi?” naui nade ia Zozossede Deo.
“Nerrecouarri omadiniuarrine parrireni?
Naza Ouana meme, nami, bazima onauatorizarrarode” naui nade Deo.
51Nazapa Estevao nauiza queriqquimanarrarideniza denima uati tarrari: —Naraha tiadenipe tibodideni iboqquiri, teribodeni didiqquiri nani! Deo Corimeza naqui uattarrorro tinani, pina ticcadeni ididenissa tiquenani! 52Arra ticcadeni idideni Deo Atti cacomeraqquiri narrarideni ihinarrizobaqquimana narrarattaco? Ihinarrizo-baqquimana narrari. Ihinarrica-baqquimana narrari naco. Deo Atti cacomeraqquiri narraridenipa Deo Attira uati toquenarra narronapoui. Narraria arra madirra Tonassiuauade Bicabote ccarronauitoui quequenanarrariparra. Narraria Mesia quequenanarraripa pocca uima borocco, Deoza ibora tarrariparra. Nazama narraro uimape parrissa torrarraroa arra Mesia ccarronarrariparrade. Narraria ccarronezatiraha Poua Attiza rrehe tiquenerrereza zoqqueuiuarrine teccoremanazapa tinanazoqquemanarrariparrade. 53Tiadenipe Moizecca marinarra ticarrimanani, arri Deocca zozosse tabaqqui memeuarricca Moizeza da iquenarraro. Naraha pocca marinarraza naqui iboqquiri tiquenarraro −narrari Estevao.
54Narraro uima taminedeni mittemanazapa panodeni tozaui nazapa uatideni rramirrari. 55Naraha Estevaopa poua bodiza Deo Corime torrauissa tarrarirrine memeuarri qqui tamacossaza Deo ssiuerrene qqui tarrari. Zeso Cristo Imehi uinori nauatoniuarri uaui naco qqui tazapa pouadeniza uati tarrari: 56—Qqui! Memeuarri touabani qqui tiquenarri! Madirra Bedi poua Imehi Deo uinori nauatoniuarri uaui qqui onaui −narrari Estevao. 57Naraha denima mittemanauiuarrine nacasseraqquiri naza pouadeni uaribo moda quenaza rrouaua rrouaua quenarrari. Estevaoza ssonarimanazapa dama iquenarrari. 58Nazapa inanazoqque-manauiuarrine oza panani ideniuarri iaqquenemanarrari, sibaza iquenaqqui-manauiuarrine. Estevao quenade ppauaqquiri nauiuarrine poccadeni etero motaranicca ssiti quenaza madirra orraria oni Saoroza da inaqquimanarraro, ecauaniuarrine. Nazapa sibaza iquenaqquimanarrari. 59Iquenaqquimananarra: —Rrehe oua Zozossede Zeso, ocorimepe tiaza torrana −narrari Estevao. 60Nazapa poua pitoza uitta naza rrazirema uati tarrari: —Oua Zozossede, poccadeni uimasiri manaconi pouadeniza tinana terrerarri −narrari. Poua atti nama nazapa uatiarrari.
