Atos 6

₁Rrehe, nauizapa Zesoza rrehe quenarrarideni denima touapirra zanapoui naraha pouadenirrine uima bica terrerarraro. Pouadeni bazimapa zodeodeni. Motapa zama Cresiacca madirra attideni nauatoqquiri narrari, motapa pouadeni attira nauatoqquiri narrari. Pouadeni atti oninipe: ebereo. Nazapa zama Cresiacca touatti nauatoqquiri narraridenipa atti atti quenarrari: —Arra zamatapa inatassaqquimanarraripa cappiremanarrarodeniza da iquenauissa tarrararrari −quenarrari. —Icca madirra amonerre tobaccopero deniza zamatapa arramani da da iquenarrari. Naraha zodeodeni pouadeni atti ebereo nauatoqquiri narraridenicca madirra amonerre tobaccopero deniza zamatapa denima da da iquenarrari −quenarrari. ₂Nazapa Zesocca zozosse tabaqqui 12 quenarrarideni narraro uimaza nacasseraqquiri naza Zesoza rrehe quenarraridenitoui uaua quenarrari, uima cattemade queriqquimanauiuarrine. Rrehe quenarrarideni queriqquimanazapa pouadeniza uati toquenarrari: —Ia zamatapa dade iquerrenezape Deo Atti mari inanissa terrererana −quenarrari. ₃—Nazapa zamatapa dade toquerrenauiuarrine madirra 7 quenaha ticatterrizabaqquimanarro. Pouadenipa Deo Corimecca dacorehe carrimanarrari. Bicaqquiri, bodideni nauatoqquiri narraridenira zamatapaza zepedeni irrimanauiuarrine qqui tinabaqquimanarro. Iaza teccarronabaqquimanazapa bazima qqui toquenaza pouadeniza: “Rrehe, zamatapa dade tiquerrenana” inaniuarrine −quenarrari. ₄—Nezape iana Deozara uati uati izanaponiuarrine. Deo Atti naqui mari mari ihicanabaqqui nauiuarrine, inarraro −quenarrari Zesocca zozosse tabaqqui.

₅Nazapa bazima: —Rrehe, bica tani −quenazapa zamatapa dadade toquerrenauiuarrine icatterriza-baqquimanarrari. Onidenipa: Estevao, Piripi, Procoro, Nicano, Timao, Paomena, Nicora quenarrari. Estevaopa Zesoza rrehe nauissa zanaporrari, Deo Corimecca dacorehe naco carrirrari. Nicorapa oza panani Atioquiacca madirra zodeo rrararaha zodeodenicca marinarraza torraporrari. ₆Nazapa arra icatterriza-baqquimanarraripa Zesocca zozosse tabaqqui 12 quenarrarideniza eccarronabaqqui-manarrari. Nazapa Zesocca zozosse tabaqqui baccouarri domo uaza zamatapa dadade toquerrenauiuarrine pouadeniza bara quenaza Deoza uati toquenarrari. —Rrehe Abi Deo, arrarrarideni zamatapa dadade toquerrenauiuarrine pouadeni acco ticanabaqquina −quenarrari. Nama quenazapa arra Zesocca zozosse tabaqqui attidenipa: —Rrehe, rridapanape narraro tarabaia pouadeniza torrani −quenarrari.

₇Nezape Deo Atti torraribaqquirraro. Oza panani Zerozarecca madirra Zesoza rrehe quenarrari touapirrari. Dada toqquimadedeni naco Zesoza rrehe quenaui uapi tarrari.

₈Estevaopa Deocca touati uanehe carri, Deocca dacorehe naqui carri nazapa canauatori canarrari. Madirra bazima Estevao canauatori canaui qqui qqui zanapomanarrari. ₉Naraha zodeodeni motapa Estevao tezerre arrauarri uati arrauarri uati quenarrari. Naui Zerozareza pouadeni quequeriqquimana nauiuarricca oninipe: Zozosse toquerrenaporaha tappa tabaqquiuicca icanacanimanarraro. Pouadenipa oza Sirenecca, oza Aresadriacca, zama Sirisiauarricca, zama Asiauarricca quenarrari. ₁₀Narraridenipa Estevao tezerre arrauarri uati arrauarri uati quenaraha deni toquerrena-rraraui. Deo Corimerrine Estevaopa nauato tarrari, atti bica tarrari. ₁₁Nazapa pouadeni atti arrimani torreza Estevaoza uadimanazapa uima inanarizemananiuarrine cacomeheza madirra ouahadeni paca inabaqquimanarrari. Pouadeniza: —Arrima tiquenarri −quenarrari. —Estevao atti imittezape poua atti uaidira teza Moizecca marinarraza tatamasso narrari. Deoza tatamasso naui naco imittani, tiquenana −quenarrari. ₁₂Nazapa uimasiri uauatidedeni rraui torrarizazapa narraro uima madirra bazimaza uati narizemanarrari. Ime rrocouideniza, zodeodenicca marinarra mamaridedeniza naco uati toquenarrari. Nazapa boquemanaza domo ccarronarrari, Estevao dama iquenazapa zodeodenicca uima cacattemadedeni deni toquerrenarrarideniuarri iaqquemanarrari, izauemanaui uarrine. ₁₃Nauiuarri Estevaoza uadimanarraridenipa madirra ouahadeni maizehe uati toquenauiuarrine qqui inabaqqui-manapomarrari. Narrarideni attidenipa: —Arra Estevaopa Deoza dada toqquimaza Moizecca marinarraza naco atti uaidira taza uati uati tarrari −quenarrari. ₁₄—Uima onihi naqui uati taza imittarraro, arra Nazaretiuarricca Zeso attipa arrima nani narrari: “Deoza dada toqquimape madirradenirrine canauatoraha ocatabona” nanarra narrari. “Zodeodenicca madie taidecca arri Moize icca idideni mari icanabaqquiporraricca uima naqui orrine cacarriqquimerana” nanarra narrari −quenarrari, maizemanaza.

₁₅Nazapa arra uima cacattemadedeni, Estevaoza uadimanarrarideni naco bazima Estevao icattomemana nazapa poua pano tozibehia, pina Deocca zozosse memeuarricca panossa naui qqui toquenarrari.