Atos 5

₁Naraha madirra ouaha oni Ananiapa bedimeni Sapira tazarrani poccadeni zama da iquenarraro. ₂Narrari madirra bedimeni tazarranipa poccadeni zama manaconi ziniro motape pouadeniza anirraro. Ananiapa poua motta ziniro motara Zesocca zozosse tabaqquiza zorro izimeza pouadeniza da inarraro. Pouadeniza: —Arra, icca zama manaconi ziniro nemanehe −narrari. Naraha maizarrari.

₃Naraha Pedoro pouaza uati tarrari: —Anania nerrecotoui maizehe rrinede Tocorime-Tamine attizara ibora tineza Deo Corimeza timaizarraro? Ticca zama manaconi motape tinarrimarraro. ₄Ticca zamape ticca rreraqui? Ticca zama da tineza manaconi naqui ticca ziniro rreraqui? Narraro zinirope ticcaraha nerrecotoui tibodiza maizehe touini tarraro? “Madirra ocamaizabaqquina” teraha Deozana timaizarraro −narrari Pedoro.

₅Nazapa Anania Pedoro atti nama naui mittazapa uatiarrari. Edima… boua narrari. Nazapa Anania uatiauicca uima bazima mittemanazapa cappina-rizemanarrari. ₆Nazapa narraro ozacca zabisso madimanarrarideni totememana, Anania assire rrore inaqquimanaza zorro ininemanarrari, ppa izemanauiuarrine.

₇Nazapa marri 3 naui tossoniqquimaza Anania zoqqueraha bedimeni ssamo teza ccarronarraro. ₈Nazapa Pedoro poniza uati tarrari: —Ticcadeni zama manaconipe ziniro arrima nehe tiadeniza da iquenarraroqui? −narrari. Nezape Sapira attini: —Rrehe, manaconi narrarossa nehe da iquenade −narraro.

₉Naraha Pedoropa: —Rraho nerrecotoui Deo Corimeza maizaza tinarraro? Tiadeni tipamehe: “Deo Corime nattome inana, icca maizehe qqui tarraraui” tiquenarrarorane? Rrari, qqui tanerre, arracca rrauinirraripa ticca maqqui ppade rrauinirrari. Niza tia naqui tia ppa izemananiuarrine tia zorro iquenanitoui −narrari.

₁₀Nanerre Sapira naqui uatiheza edima… boua narraro. Zabisso rrauiniza qqui toquenanerre uatiani ponerre narraro. Nezape poni naqui zabissodeni zorro ininemanarraro, maqqui uinoriza ppa izemananiuarrine. ₁₁Nazapa Zesoza toquerrenarrarideniza oppinehe imeni torrarraro. Madirra bazima uima mittemanazapa Deo noppine cappina-rizemanarrari.

₁₂Nazama Zesocca zozosse tabaqquipa Deocca dacorehe pouadeniza torrarizezape nauatoqquiri narrari. Canauatorimanana canazapa Zerozarecca madirra qqui toquenarrari. Arra Zesoza toquerrenarraridenipa Deoza dada toqquima boroni inidi tetepini carrini Portico de Saromao quequenanauiza quequeriqquimana narrari. ₁₃Naraha madirra mota Zesoza rrehe quena-rrararraridenipa Zesocca madirraza carrimemanauiuarrine cappinaqquiri naraha pouadeni attipa: —Zesoza rrehe quenarraridenipa bicaqquiri naui –quenarrari. ₁₄Nazapa madirra mota maqquiderre amonerre quenaha ia Zozossede Zesoza rrehe quezati touapirrari. ₁₅Nazapa madirra comaqquiri narrarideni bazima pouadeni taboro zorro zorro narronemanarrari. Rraui inidiza pouadeni taboroza poporiri narizarrari. Pedoro tezerrema: —Niza Pedoro arra toqqueqquimaza marriza poua corime poua nauine iaza bacco tezape icanomirenitoui −quenarrari. ₁₆Madirra Zerozare uarrira taniza madimanarrarideni, oza capamema narraro onihicca, onihicca naco bacco narronemanarrari, comaqquiri narrarideni eccarrona-baqquimanarrari, madirra bodideniza Tocorime-Taminecca zozosse tabaqqui tocorime siri carrimanarrarideni naco eccarrona-baqquimanarrari. Nazapa narrarideni tocanomirerizarrari, tocorime sirideni naco rraui torrenarizarrari.

₁₇Naraha arra dada toqquimadedenicca tamine deni torrarraripa pocca madirra tezerre comaqquiri narrarideni tocanomireui uima mittemanazapa boquemanarrari. Arra pouadenipa marinarra onini sadoseoza rrehe quenarra narrari. ₁₈Narrari pouadenina isso teppeppe icazossebaqquiza Zesocca zozosse tabaqqui itadamemanazapa toponi cocoroza ua izimemanarrari. ₁₉Naraha zome nocconi torraza Deocca zozosse memeuarricca auatozapa toponi cocorocca totoqquezima icataborrizeza iaqquenabaqquizapa zosse inanibaqquirrari. ₂₀—Rraui tirranirri, Deoza dada toqquimauarri uima uati tinanimanarri. Madirra bazima camittehe rriquerreranicca carrimanauiuarrine uima mari ticanabaqquimanana −narrari Deocca zozosse memeuarricca. ₂₁Nazapa poua attiza iboraqquiri nazapa izamassa Deoza dada toqquimauarri rraui torrezimaza madirra mari icanabaqquimanarrari.

Naraha dada toqquimadedenicca tamine deni torrarraripa pouaza queriqquimanarrarideni naco Zesocca zozosse tabaqqui toponi cocoroza rrauinineui ssamoqquiri narra narrari. Nazapa zodeodenicca uima cacattemadedeni deni toquerrenarrarideni queriqquimanauiuarrine uaua inabaqquimanarrari. Nazapa dada toqquimadedeni mota, ime rrocouideni mota naco, arra zodeodenicca marinarra maridedeni mota rrauirronaza queriqquimanarrari. Nazapa poccadeni zozossedeni zosse inabaqquimanarrari toponi cocorouarri. —Zesocca zozosse tabaqqui teccanibaqqui-manarro −quenarrari. ₂₂Nazapa rraui torrarrari, toponi cocorouarri bacco toquenaza qqui toquenaraha Pedorodeni amossiuarra narrari. Nazapa domo ccaniza uima uati nanimanarrari: ₂₃—Totoqquezimape pico cazacossanissa tani, bodicca totoqquezima cacauadedeni naco uaueri narizaui. Icataborrizeza rrauirrezimeraha Zesocca zozosse tabaqquipa noue querapa. Qqui inabaqqui-rraraui −nanimanarrari. ₂₄Nazapa dada toqquimade taminedeni, nauicca oza cacauadedenicca tamine tezerre narraro uima mittemanazapa uarro canirerrari. Uimahaha canaza: —Rraho nerrecoma quenarrari? Nerreco uima torrapazerre? −quenarrari. ₂₅Nanarra orraria qquezimaza taminedeniza uati tarrari: —Maitta toponi cocoroza ua tozimarraripa Deoza dada toqquimauarrina madirra maride toquerrenapa −narrari. ₂₆Nanarra Deoza dada toqquimacca oza cacauadedenicca tamine, pocca zozosse tabaqqui tezerre uima mittemanazapa Zesocca zozosse tabaqquitoui rraui torrarrari. Bacco inabaqquimanazapa mouaraza rrina inanibaqquimanarrari. Sibaza pouadeni iquenabaqquimanaui noppine cappinemanazapa Zesocca zozosse tabaqqui inarrizobaqquimana-rrararrari. ₂₇Nazapa uima cacattemadedeni queriqquimanauiuarri eccanibaqqui-manazapa dada toqquimadedenicca tamine deni torrarrari pouadeniza uati uati tarrari: ₂₈—Madirra mari mari tinebomanarri, inade. Naraha nerrecotoui mari mari tinebomana-rrerarraro? Rridapanapa arra Zerozarecca bazima ticcadeni marinarra tocauatterarizaui. Tirrinedeni narrari madirra emene toccarraricca uima iaza ssonarini. Arri tettidenipe: “Zodeodenirrine Zeso Cristopa zoqquerrari” titiquena neraha ettipe: “Irrine rraraui” inarraro –narrari tamine deni torrarrari atti.

₂₉Nazapa Zesocca zozosse tabaqquipa tamine atti ecomeremanarrari. Pedorona uati tarrari: —Ia bazima Deocca madirra iquerrenezape taidepe Pouazaha iboraqquiri inanina bica tani, zotodena madirra attiza iboraqquiri inaniuarrine. Naraha madirracca zossenirripe pina Deocca zossenirrissa nerrerezape Deocca zossenirrizara iboraqquiri inanina bica tani. ₃₀Abi Deopa icca ididenicca Deo. Narrarirrinena Zeso nauatonirrariparra. Tirrinedeni aua porimacossaniza zoqqueza ppa tizemanaraha nauatonirrari. ₃₁Deopa pocca dacorehe Zesoza inanezape deni inanarrariparra. Deo Poua uinori nauatoniuarri Zeso inauittarizapa Pouarrine madirra bazimacca tamine torrarrari. Deo Pouarrine madirra Tonassiuauade torrarrariparra. Ia Izarraeodeni Tonassiuauade torrazapa pouarrine ibodi cacarriqquimerezape Deoza iquerrenarraro. “Icca uimasiri inebona” inezape Pouapa icca uimasiriza: “Ouati rrimani” narrari. ₃₂Iape Zeso tauimari nauato inezape parrissehera uati inarraro. Arri inoccoza qqui inarraro, eriboza imittarrarora tiadeniza ecomerarizarraro. Deo Corime naco nauato tarrari parrissehera mari icanabaqquirrari. Narraria arra Deo Poua Attiza iboraqquiri narrarideniza Poua Corime da inarizarrari −narrari Pedoro, Zesocca zozosse tabaqqui tezerre.

₃₃Nazapa taminedeni narraro uima mittemanazapa nacasseraqquiri naza boquemanarrari. —Rrari, rricana! −quenarrari. ₃₄Naraha uima cacattemadedeni queriqquimanaui orraria totemaza poua tessedeniza uati tarrari. Pouapa Moizecca marinarra mamaride, marinarra onini parizeoza naco damera tarrari. Bazima pouaza: —Bica taui −quequenanarrari. Poua onipa Camarieo. Narrari totemaza Zesocca zozosse tabaqqui amossiniuarri zosse inabaqquirrari. ₃₅Nazapa taminedeniza uati tarrari: —Parri, occa madirra Izarraeodeni. “Pouadeniza nerrecoma inaniuarrine?” tiquenezape mouaraza tibodideni uatome-manarri. Uima torrerana. ₃₆Tibodideni uatome-mananissa tarri. Arrana, maittazama onihima naha Teoda madiccaza poua atti: “Ouape nauato onani” nanarra nazapa madirra 400 quenaha pouaza toquerrenarraride. Naraha madirrarrine Teoda zoqqueza pocca madirra torraribaqquizapa pocca uima rricaqquirrarode −narrari Camarieo atti taminedeniza. ₃₇—Naui zotode madirra onideni dozode toquerrenaza naco Carireauarricca Zoda ccarronarrari. Rromanodeni moua inabaqquimanauiuarrine madirra inaqueriqquiraha zoqquezapa torraribaqquirrari. ₃₈Nazama tiadeniza ouattipe: Peperriua, arrarraridenipa tinebobaqquimanarro, onarraro. Poccadeni uima Deocca rrerezape niza rricanitoui. ₃₉Naraha pouadenipa Deocca zossenirri uitiderra. Parrissa Deocca uima torrezape Deocca uima tinarriquemananiuarrine ssamo tani. Parri! Deozape rrara tiquenerrerarri. Poni! −narrari Camarieo taminedeniza uati uati taza.

₄₀Nazapa Camarieo atti mittemanazapa paparra quenaza Zesocca zozosse tabaqqui rrauizimaniuiuarrine uaua quenarrari. Nazapa itacossimanaza izauabaqquimanarrari. —Rridapanape Zeso Cristo tauimari mari maripe tinebomanarri −quenazapa zosse inanibaqquimanarrari. ₄₁Naraha Zesocca zozosse tabaqquipa uima cacattemadedeni queriqquimanauiza rraui torrenazapa uatizemaneri tanimanarrari. Zeso oniza toquerrenarrarirrine narrizoue inauanemananiuarrine parriremanaui Deo nauato taporrarirrine narrizoue ecossa-rrerarraro. ₄₂Nazapa uarrirriraza maride toquerrena-zanaporrari. Deoza dada toqquimauarri maride toquerrena, poccadeni ozauarri naco maride toquerrena zanapomanarrari. —Ia Zozossede Cristo-Mesiatoui imadirrarope arra Zeso Cristoparra. Pouaza parrissa tiquenezape ticassiuaueraniuarrine −quenarrari Zesocca zozosse tabaqqui attideni.