Uima cattemadedeniza Pedoro Zouao tezerre barrari
1Nazapa Pedoro Zouao tezerre uima uatide toquerrenaccaraha dada toqquimade motadeni bacco narronemanarrari. Dada toqquima cacauadedenicca tamine qquezima, zodeodeni mota marinarra onini sadoseoza rrehe quenarrarideni naco rrauizima narrari. 2Narraridenina Pedorodeniza boquemanarrari. Pedoro pouadenipa Zeso Cristorrine madirra tocassiuauerauiuarrine tauimari maride toquerrenarrari. —Zesopa zoqqueraha Deorrine nauatonirraride. Pouarrinepa madirra naco nauatonimanauitoui −quenaui mari icanabaqquiraha taminedenipa narraro uimaza nacasseraqquiri naza boquemanarrari. 3Nazapa Pedoro dama, Zouao dama iquenaza toponi cocoroza cororo izimemanarrari. Nazapa: —Marri toccaui, uada onihizana uimarideni icattemaniuarrine −quenarrari. 4Naraha motadenipa Pedorodenirrine Deo Atti mittemanaza parrissa quenarrari. Narrarideni arra rrehe quenaporrarideni tezerrepa uapi tarrari. Maqquiderre pouara 5 mil quenarrari. Amonerredeni, erredenidenipa uaraui.
5Uada ssiuarrapa uimahaha canauiuarrine zodeodeni taminedeni, ime rrocouideni, zodeodenicca marinarra maridedeni quenaza Zerozareza queriqquimanarrari. 6Anasa naco naui pouadenizama carrimarrari. Pouapa dada toqquimadedenicca tamine deni torrarrari. Pouapa taminedenicca tamine. Caipa naco nauiza carrimarrari. Pouapa Anasaza: Coco, narrari. Anasa poua imecotedeni naco nauiza carrimemanarrari. Orraria onipa Zouao, ouaha onipa Aresadre, denima uapi taha nauiza carrimemanarrari. 7Nazapa Pedoro Zouao tezerre uedenaza uedarronauiuarrine touideni madirra zosse iquenarrari. Nazapa eccarronabaqqui-manaza queriqquimanaui nocconiza barrari. Nazapa pouadeniza uati toquenarrari: —Rrari, toponi tonabicadepe nerrecouarricca ticauatterarrarotte? Ticcadeni nauatouepe nerrecouarricca ticarrimanarrarotte? Arra isso siri tinabiquemanarraricca uima iaza tecomeremanarri −quenarrari taminedeni atti.
8Nazapa Pedoroza Deo Corime torrauissa tarrarirrine cappinera taza ecomerarraro: —Rrehe taminedeni, ime rrocouideni, tiadeniza uati onana. Titauaribobo canarri. 9Tettidenipe: “Nerrecoma tiqueneza isso siri tinabiquemanarraritta?” tiquenarraro. Tettideni onihi naqui: “Nerrecouarricca dacoreheza toponi tonabicade ticauatterarrarotte?” tiquenarraro. 10Rrehe, nazama narraro uimape tiadeniza uati onana. Icca madirra Izarraeodeni bazima naco bodideni nauatoqquiri nauiuarrine uati onana. Iape: “Parrissa Nazaretiuarricca Zeso Cristo atti dacorani” inarraro. Poua onima isso siriza: “Titemeza ticcarizarri” inezape Zesorrine isso siri tonomirrariparra. Narraria arra tobicaui qqui tiquenarrariparra. Narrari Zesopa tirrinedeni aua porimacossaniza coba tizanemanaza zoqqueraha Deorrine nauatonirrariparra. Pouarrinea arri nauatoue icarrirraroparri. 11Narrari Zesopa tettarromanaraha Deorrine madirra bazimaza deni torrarrari. Zeso tettarromanauipa pina arrirraro uimassa narraro. Narraro uimape Deo Atti dozo naniza arrima narraro:
“Oza sibaza icanauatomananiuarrinepe nanauatodedenipa siba orrariepe ettarromanani nade.
Naraha zotodepe narraro sibana oza daco carriraniuarrine torrarraro.”
Zeso attiza teribodeni didiqquiri nezape narraro uimassa tinanemanarraro. Zesopa tettarromanaraha Deorrine deni torrarrariparra! 12Madirra ouahapa icca uimasiri inatappaniuarrine noueraui. Deocca danirri Zesona ia Idinide orrarirrari. Zama bazimaza madirra ouaha ia tonassiuauabaqquiuiuarrine noueraui. Nizaranibote Deocca uadie torrezape Zeso pouana ia zori tonanabaqquiuiuarrine orrarirrari −narrari Pedoro.
13Nazapa Pedoro Zouao tezerre pouadeni cacomeremanaza taminedenipa uarro canireza: —A iaza cappinanera tarrarico? −quenarrari. Pedorodenicca madie taide nauatoqquiri nazapa: —A, pouadenipa pouama madimanaccade. Moizecca marinarra, Deo Atti cacomeraqquiri narraridenicca dozonirriza ssamomo taccade. Zeso uatimade toquerrenazapa tocauatterarrari uitiderra −quenarrari. 14Nazapa taminedeni Pedoro Zouao tezerre izauabaqqui-manauitouiraha naui uinoridenizapa isso siri tobicaui uaui parra nazapa paparra quenarrari. 15Nazapa Pedoro, Zouao, isso siri tobicaui quenaza taminedeni zosse ininebaqqui-manarrari. Nazapa rraui torrenaui nattidenipa pouadenira uimahaha canarrari: 16—Nerrecoma inanabaqquiuiuarrine? Naraha pouadenirrine isso siri tobicaua. “Maizehe” inerrerana. Arra Zerozarecca madirra bazima qqui toquenarra naui −quenarrari. 17—Naraha Zeso tauimari denima torrariza-rreraniuarrine arrima inana: “Parri, tipamarronerana” inana, cappinemanauiuarrine. Nazana Zeso tauimari denima mari zanapomana-rrarauiuarrine −quenarrari taminedeni atti.
18Nazapa Pedoro, Zouao, isso siri tobicaui quenarraridenitoui uaua quenapomarrari. Rrauizimanipomaza taminedeni pouadeniza uati toquenarrari: —Peperri tiquenarri! Zeso Cristo tauimari mari maripe tinebomanarri −quenarrari. 19Naraha manaco Pedoro Zouao tezerre pouadeniza uauatiti tarrari: —Deopa tettideni mittaui. “Ettizara ibobora tana” tiquenarraroqui? Nema tiquenezape “Deo Atti tinebomanarri” tiquenarraro nitide −quenarrari. —Rrari, narraro uima tibodideni uatome-manarri. Tettideni nema tiquenezape Deoza bica tapazerre? 20Naraha iape Deo Attizara damamera inanitoui. Deo Atti ecomaniuarrinepe nacasserara inani. Arri ia qqui inarraro, ia imittarraro maride inebo-rreranitoui −quenarrari Pedorodeni.
21-22Nazapa taminedeni atti pouadeniza: —Parri tipamarronerana −quenarrari. Denima rrara inabaqquimanazapa tappa inabaqquimanarrari. Taminedenipa Pedoro Zouao tezerre inarrizo-baqquimanauitouiraha madirradeni noppine cappinemanarrari. —Iaza boquemanarana −quenarrari. Arra Deocca canauatori caneherrine isso siri tobicaui bazima qqui toquenazapa: —Deopa bica taui −quenarra naza taminedeni cappinemanarrari. Nazama isso siripa uarrano uapi taha tonomi-rrararaha uarranori 40 denima carrizana tobicarrari.
Deocca dacorehe carrimanauiuarrine Pouaza uati toquenarrari
23Nazapa taminedeni Pedoro Zouao tappa inabaqquimanazapa touedanirrari. Zesoza rrehe quenarrarideniza bacco tanimanazapa dada toqquimade tamine attideni uati, ime rrocoui attideni uati tanimanarrari. 24Nazapa narraro uima mittemanazapa bazima Deoza uatide toquerrenarrari. Poccadeni uatinarrape orrariqquirrarossa naza Deoza uati toquenarrari: —Abi Deo nauatorride tirrirani. Tiana meme tinauato, zama tinauato, coriza imeni tinauato, uapima tinauatorizarrari −quenarrari. 25—Maittaccazama naco icca ididenicca tamine Dabi arra ticca zozosse Ticorimerrine bodi nauato taza arrirraro uima dozo inaporraro:
“Nerrecotoui madirra ouahadeni bazima uadiqquiri narrari?
Nerrecotoui icca madirra Izarraeodeni naco uaidirehe inanemananiuarrine bodideni uauatome-mana narraritta?” napoui nade.
26“Arra zama bazimacca taminedeni uadie inanemananiuarrine toqueriqquiza ia Zozossede Deoza rrara rrara quenarrari.
Madirra Tonassiuauade torrauiuarrine Deo icatterrizaporrariza naco rrara rrara quenarrari” napoui nade Dabi.
27Narraro uimassa narraro torrarrarode. Arri Zerozareza queriqquimanaza tamine Erodi, tamine Ponsio-Pirato, zama onihicca madirra, icca madirra Izarraeodeni quenaza naco ticca Erredeni Bicabote inanazoqque-manauiuarrine uima narroremanarraride. Narraria arra Zeso tiaza ibora tarrari ticatterrizaporrari, ia Tonassiuauade Cristo-Mesia torrauiuarrineraha pouaza boqueqquiri nade. 28Abi Deo, Tettipe Dabirrine dozo nani maittareraha taminedeni narrarossa inanemanarraro −quenarrari.
29—Rridapana naqui, ia Zozossede Deo, ia qqui tinabaqquirri. Iaza uadiqquiri narrari. Iape ticca zozosse tabaqqui iquerreneraha iaza rrara rrara quenaui. Nezape ticca dacorehera iaza da tarri, nani icappine-rrereza tetti ecomerarizaniuarrine. 30Nazama ticca dacorehe iaza tinanarizezape comaqquiri narrarideni naco titinanomibaqqui narro. Ticca Erredeni Bicabote Zeso Cristo oni deni torrauiuarrine naco ticanauatoriri canarri, inarraro −quenarrari Deoza uati toquenaza.
31Deoza uatide rriquezape narraro oza rrene rrene canarraro. Nazapa Deo Corime pouadeniza torrarizauissa tarrarirrine cappinemana-rraraza Deo Atti ecomerarize-manarraro.
Bazima poccadeni orrariqquirrari
32Nazapa Zesoza rrehe quenarrarideni bazima poccadeni uima narrarossa caniqquimerezape rrehe canirere quenarrari. Pouadeni zepetarri naqui pouadeni attipa: —Oua mottacca −quena-rrararrari. Tozepetarri, zamatapa naco bazima poccadeni orrariqquirrari. Narrarossa naza pouadeni zepetarri dade accoraqquiri narrari. 33Nazama Zesocca zozosse tabaqqui pouadenipa ia Zozossede Zeso nauatoniui qqui toquenarraricca uima uati uati zanapomanarrari. Deocca dacoreherrine attideni dacorazapa tauaribobo canarrarideni bodideniza uana tarraro. Nezape Deocca uatizehe, pocca touati uanehe naqui bazimaza torrarizarraro. 34Nazapa bazima cappiremana-rrararrariparra. Poccadeni zama, oza naqui cacarrimaneri narraria arri zinirotoui da da ihiquenanarrari. 35Narraro zinirope Zesocca zozosse tabaqquiza da da iquenarraro. Nazapa Zesocca zozosse tabaqquipa cappiremanarrarideniza da da ihiqquimemana narraroparri.
36Nazapa madirra oni Zoze naco narrarossa narraro inanarraro. Pouapa rebitadeni. Zama bedeni ueni imehiza uittizacossani onini Sipreza tossonarrari. Zesocca zozosse tabaqqui pouaza: Banabe, quequenanarrari. (Ettizape: Toponi nanauatizede, inarraro.) 37Banabepa poua madiuicca zama mota da inarraro zinirotoui. Nezape pocca ziniro Zesocca zozosse tabaqquiza da inarraro.
