Isso siri tobicauicca uima
1Nazapa uada onihiza Pedoro Zouao tezerre Deoza dada toqquimauarri marri touenarronarrari pina 3'za touedezimarrari. Narrari marriza zodeodeni Deoza uatide rrarraui torrezima narrari. 2Nauiza maqquiderre isso siri nama naha tossonauipa uittarrari. Pocca madirra uarrirriraza ihinequemana naza totoqquezima onini Bicani quequenanaui uinoriniza ihinauittemana narrari. Nauiuarri madirra rrarraui torreqquima nazapa: —Ouaza da tiquenarri −tatacossa narrari. 3Nanarra isso siripa Pedoro Zouao tezerre uedarronaui qqui inabaqquirrari. Bacco narronemanazapa: —Rrari, ouaza ziniro da tiquenarri −narrari pouadeniza. 4Nazapa isso siri qqui toquenazapa Pedoro pouaza uati tarrari: —Rrari, iauarri qqui tarri −narrari. 5Poua bodi: —Ouaza ziniro da iquenaniuarrine nitide −nazapa pouadeniuarri qqui narrari. 6Naraha Pedoro attipa: —Ouape ziniro ocappirani. Nouerani! Naraha Abi Deorrine nauatoue ocarrizape tia acco ocananiuarrine. Nazaretiuarricca Zeso Cristo onima uati onarraro. Titemeza ticcarizarri! −narrari. 7Nazapa Pedoro isso siri zepe nauatoniuarriccaza dama inaza rroca inazapa totemarrari. Deorrine poua amori, amori cosarini naqui tobicarraro. 8Nanarra isso siri ccarizaui tobicazapa rroppa rroppa narizarrari. Nazapa Pedorodenizama Deoza dada toqquimauarri toqquezimarrari. Uatizeri naza rroppa rroppa tozaza: —Deopa bica taui! Deopa deni torraui! −narizarrari. 9Nazapa Deoza dada toqquima bodiza ccarizazapa madirra ouahadeni qqui toquenarrari. Deoza uatizeui naco mittemanarrari. 10Narraridenipa uarro quenaraha uatizemanarrari. Attidenipa: —A, arrarraria totoqquezima Bicani quequenanauiza zinirotoui uiuittacossa naccade −quenarrari.
Pedoropa Deo tazariza uati uati tarrari
11Naraha isso siri tobicauipa Pedoro Zouaodeniza uanarizarrari. Arra Deoza dada toqquimacca boroni inidiuarri tetepini carrini oninipe Portico de Saromao quequenanauiza isso siri tobicaui qquide bazima queriqquirrari. Nanizape tetepini carrini oninipe Portico de Saromao quequenanauiza madirrapa: —A… nerrecoma narrari? −narizemanarrari. 12Naraha Pedoro madirra queriqquiui qqui tazapa pouadeniza uati tarrari: —Ouimecote Izarraeodeni nerrecotoui ia cattade tiqueriqquirraro? Arra isso siri tobicaza tibodidenipe: “Pouadeni touini quenaza dacorehe carrimanarrari. Nauatoto tarrariua!” tiquenarraroqui? “Arra pouadenipa Deoza bicaqquiri naza isso siri inabiquemanaui” tiquenarrarorane? Naraha ia irrine rraraui. Deorrinena tobicarrari −narrari Pedoro.
13—Icca Abi Deopa, icca idideni Abarahao, poua bedi Izaqui, poua bedi Zaca quenarraridenicca Deo. Pouarrine isso siri tobicazapa Poua Bedi Zeso deni inanarrariparra. Narrari Zesoa tirrinedeni tozepe torrarraride. Tamine Pirato attipa: “Zeso tappa onaza toccaniuiuarrine” naraha tiadenipe tettarromanaza: “Aua porimacossaniza zoqquena zoqquena!” tiqueneza zoqquerraride −narrari Pedoro. 14—Zesopa poua bodi ssiuarra, pocca uima borocco teraha pouaza parrissa tiquenerrerezape tamine Piratoza uati tiquenarraro: “Barrabana tappa tinarro” tiquenarrarode, pouapa toponi nanazoqquederaha. 15Tiadeni camittehe rrinede tinanazoqquemanaraha Deorrine nauatoniza Deo Pouauarri toccamacossanirraride. Iape parrissa qqui inarraroa arri nauatoqquiri inarraroparri. 16Narrari Deo Bedi Zeso Cristo pouarrinena rridacca isso siri tobicarrariparra. Ia ettipe: “Zesopa parrissa canauatori canaui” inezape pouana isso siri inabicaui qqui tiquenarrariparra −narrari Pedoro.
17—Rrehe occa madirradeni, tiadeniza ouattipe: “Tirrinedeni Zeso zoqquerrari” oneraha tibodideni ssamoqquiri napoza tinanazoqquemanarrari nauato onarraro. Deoza dada toqquimade taminedeni naco bodideni ssamoqquiri naza Zeso inanazoqque-manarraride. 18Naraha Deopa madirra Tonassiuauade torrauiuarrine poua icatterrizaporrari ocasserani auaza zoqqueuiuarrine nauato taporrari. Maittaccazama Poua Atti cacomeraqquiri narrarideniza naco Cristo-Mesia zoqqueui tauimari uati tapoza dozo iquenaporraro. Narraro uimassa narraro torrarrarode, pina arri Deo uati taporrarissa narraro tinanemanarraroparri.
19—Narrarorrinea tiadeniza ouattipe: Rridapanape tibodideni cacarriqquimerarri, Deoza tiquerrenarri, onarraro. Nema tiquenezape Deo ticcadeni uimasiri sse inanitoui. Nazapa ia Zozossede Deo tibodideni rrassi tonanabaqquiuitoui. 20Poua Bedi Zeso icatterrizaporraripa tiadeniza zosse inaronapomauitoui. Narraria arra tiadeni Idinide Cristo-Mesia torrarrariparra. 21Rridapanapa Zeso Cristo memeuarri madiccaui, naraha niza Deo Poua nacassa taza zosse inaronapomauitoui. Nazana zama bazima inabiquemaninitoui. Narraro uima naqui maittaccazama Deo Atti cacomeraqquiri narrarideni dozo iquenaporraro. 22Narraro uimape Moize icca idideniza dozo inaporraro:
“Ia Zozossede Deorrine icca madirra orraria Poua Atti cacomerabote torrauitoui, pina ouassa inanauitoui. Narrari attizape ibobora tinarri. 23Naraha poua attiza madirra ibobo tarraripa Deo ettarrobaqquiuitoui. Pocca madirra toquerrena-rrarauitoui” napoui nade Moize.
24Nazama Moize zoqqueui natti Deo Atti cacomerabote Samoeo naco narraro uimassa narraro uati tarrari. Arra Samoeo zoqqueui natti naco Deo Atti cacomeraqquiri narrarideni bazima naco uati narronemanarrari. 25Nazama tiadenipe narrarideni potemaui tiquerrenani. Poccadeni dozonirri arri Deo uati taporraricca uima bicani rridapana tiadeniza torrarraro. Deopa idideni tezerre rrehe canireporrari naqui tiadeniza torrarraroparri. Arra idi Abarahaoza Deo Attipa:
“Tipotemani zotodecca naco pouarrine arrirraro zamacca madirra bazimaza uatizeheri torrarizanitoui”
napoui nade Deo. 26Narraria Deo Poua Bedi taide tiadeniza zosse inaronapoza pina madirrassa naha tossonarrariparrade. Nerrecotoui Poua Bedi arra namiuarri zosse inaronarrari? Poua Bedirrine tibodideni bazimaza uatizeheri inananiuarrine, arra pouapa tiadeni tonauarriui narrari ticcadeni uimasiri tinebomananiuarrine −narrari Pedoro poua imecote Izarraeo potemauideniza.
