Deo Corime madirraza torrarizaporrari
1Nezape zodeodenicca errete imenibote bacco tarraro. Errete oninipe Pentecosti. Narraro uadaza Zesoza rrehe quenarrarideni queriqquimanarrari. 2Naraha amazati memeuarri mouini pina rrorrode dacorarrarossa nehe mittaronezape nani oza bodiuarri queriqquiuiza naqui rrazirema moui tarraro. 3Nezape pouadeniza pina rrororonissa nehe auatomarizarraro. Torraribaqquizape pouadeniza carrororori narizarraro. 4Nazapa pouadeni bodiza Deo Corime torrarizauissa tazapa Deocca nauatoue carrimanarrari. Orrariapa touatti rriza tarraroza uati, ouahapa touatti rriza tarraro onihiza uati, ouahapa touatti onihiza uati uati narizemanarrari. Deo Corimerrine nama narizemanarrari bazima.
5Nazapa zodeodeni Deoza dameraqquiri narrarideni zama onihicca, zama onihicca naui Zerozareza queriqquimanarrari. 6Narrarideni bazima mouini oppina tani mittemanazapa domo ccarronarrari. Amossiniuarri queriqquirronemanarrari. Nazapa queriqquimanarrarideni arra oza bodicca uati uati toquenaui attideni mittemanarrari. Touatti onihi, onihi carririzemanaraha poccadeni madirra attideni rrizera nerre canimezape uarro canirerrari. 7-8Nazapa arra oza uapiuarri domo uarrari attidenia: —A… Nerrecotoui pouadenipa zama Carireauarriccaraha touatti onihi, onihiza uati uati toquenarrari? Etti imittarizaua −quenarrari. 9—Arri iqueriqquinizape Partouarricca, Mediauarricca, Eramiuarricca, Mesopotamiauarricca, Zodeauarricca, Capadosiauarricca, Pontouarricca, Asia arobeniuarricca, 10Piriziauarrica, Papiriauarricca, Ezitouarricca, Ribia arobeniuarricca oza panani Sirene uarrira taniza madimanarrarideni naco mittemanarrari. Nazapa oza panani Rromauarricca, 11Cretauarricca, Arabiauarricca naco mittemanarrari. Motadenipa zodeo madirra pouara, naraha motadenipa madirra ouaha zodeo querrena-rrararaha zodeodenicca marinarraza toquerrenarrari. Iape zama bazimacca madirra tezerre icarrimama caneraha ettiza uati uati toquenarrari: “Deopa bica taui, canauatori canaui” quenarrari. Deocca uima ettiza uati uati toquenaza imittapa −quenarrari amossiniza domo uarrarideni attideni.
12Bazima uarrorro canazapa uimahaha canarrari: —Nerrecotoui nama quenarrari? Iape nerrecoma inapazerre? −quenarrari. 13Naraha madirra motapa rriza rriza quenaza: —Coma tanicca ze quenaza noccodeni rranoqquiri naza moua moua canimarrari −quenarrari.
Pedoro zodeodeniza uati tarrari
14Nazapa arra Zesocca zozosse tabaqqui 11 quenarrarideniza: —Noccodeni rranoqquiri narrari −quenaui uima mittemanazapa totememanaza Pedorona rrazirema uati uati tarrari: —Rrehe ouimecotedeni, Izarraeo potemaui zodeo iquerrenarrarodeni, arri zama Zodeauarricca, zama uarri tanicca madirra arri oza panani Zerozareza errete qquide rraui tirrarronarrarodenima pina ouatti titauaribobo canarri. 15Tettidenipe: “Noccodeni rranoqquiri narrari” tiqueneraha iape inocco rranoraqquiri nani. Marri uarizatizapa zodeodeni iape inocco rrano taniuarrine zeze coma tanicca ze ze ihina nerrerani −narrari Pedoro atti. 16—Naraha arri timittemanarrarope maittaccazama Deo Atti cacomerabote Zoueo madipoza dozo inaponi nade. Narraroa arri timittemanarraroparri. Narraroa arri qqui tiquenarraroparri. Deona Zoueoza uati taza dozo inaporraro:
17“Oua Deo Ouattipe: Niza zama rricanicca uada touarrirezape Ocorime naqui madirraza onanarizauitoui. Ticcadeni erredeni zabisso, zouato naqui Ouatti ecomerarize-mananitoui.
Zabissodeni, rradauideni naco occa uima parrissehecca pouadeniza noue onezape poccadeni uadassa neza qqui qqui toquenauitoui.
18Nema nezape arra ouaza iboraqquiri narrarideni maqquiderredeni, amonerredeni naqui pouadeniza
Ocorime da onarizezana otauimari ecomerarize-mananitoui. Ouatti naqui uati iqquime-mananitoui.
19Niza memeuarri ocanauatori canani qqui tiqueneza naqui. Namiuarri occa dacorehe onaneza naqui touemenedeni toccarizanitoui.
Dirri tani rrororoni naqui rrororo canarizezape esseni dacorehema toccamacossanitoui.
20Marri ouiuitoui, abazico naco tocamaccoua pina touemenessa canauitoui. Ouape tiadeni Zozossede, occa uada deni torranicca, denima bica tanicca bacco terreraccazape narraro oppinehe bazima onanarizaponitoui.
Nazana ouaza iboqquiri narrarideni onarrizobaqquiuitoui. Ouaza iboraqquiri narraridenina onassiuauabaqquiuitoui.
21Naraha arra madirrapa: ‘Oua Zozossede, oua naqui tiaza orraniuarrine oua tidinirri’ quenarraridenina tocassiuauerauitoui”
naui nade Deo Atti Zoueo dozo inapoza −narrari Pedoro.
22-23Nazapa denima uati uati tarrari: —Rrehe ouimecote Izarraeo potemaui zodeo iquerrenarrarodeni, ouatti titauaribobo canarri. Arra Nazaretiuarricca Zesopa Deorrine parrissa canauatori canaui qqui tiquenade. “Pouapa parrissa Deo zosse inaronarrari” titiquena naniuarrineraha tinanazoqquemanarrari. Naraha Abi Deopa taide nauato taporrari: “Arrima nanitoui” naporrari: “Occa erredeni madirra uaidiraqquiri narrarideni dama iquenaza aua porimacossaniza inanazoqque-manauitoui” napoui nade. Narraro uimaha arri ia imadiza qqui inarraroparri. Tirrinedeni narrarossa tinanemanarraroparri. 24Zesopa zoqqueraha Deorrine nauatonirrari. Zoqquehe comanipe pouaza mari zaneraha Deorrinena Zeso tappa inarrari. Zoqquehepe pouaza mari zananiuarrine ssamo tani. 25Maittaccazama tamine Dabi naco Zeso tauimari dozo inaporraro. Pina Zeso attissa inanapoza uima arrima narraro:
“Oua Zozossede Deo, otezerrema tia qqui qqui ohonanarraro. Ouaza ticcarizezape ticca dacorehe ocarriza ocappina-rrerani.
26Nezape obodi uatizeza rriri rriri onarraro. Ouime ouassirema ozoqqueniuarrine ocappina-rrerani. Ozoqqueni nattinipe uima bicani torranitoui. Narrarotouira obodi uauatoma narraro.
27Ozoqqueza naqui ocorime zoqquemana-porrarideniuarri tinebo-rreranitoui. Tirrine ouime naqui namiza rrazi-rreranitoui. ‘Arrarraripa occa erredeni bicabote’ tanitoui.
28Arri camittehe imadi-zanaponiuarrinecca naqui oua mari ticanarraro. Tiaza omadizape ticca uatizehe naqui ocarrinitoui”
naui nade Dabi dozo inapoza −narrari Pedoro.
29Nazapa denima uati uati tarrari: —Ouimecotedeni, parrissehera tiadeniza uati onana. Tamine Dabipa maittaccazama zoqquezapa ppa izemanarrari. Poua noccobiri naqui rridapana ecauemanani parri naccani. 30Nazama Dabipa Deo Atti cacomeraboterra narrari nauato taporrari. Pouaza Deo uati tapozapa: “Parrissehera tiaza uati onarraro. Tipotemani orrariapa tamine deni torrauicca torrauitoui” napoui nade Deo. 31Narrarorrine Dabi pina Zeso nauatoniui qqui taporrarissa naza uati taporrari. Narraria arra Cristo-Mesia quequenanarraripa “zoqqueza ppa izemanaraha poua ime rrazi-rreranitoui. Poua corime naco zoqquemana-porrarideniuarri inebo-rrarauitoui” napoui nade Dabi atti. 32Narraria arra Zeso Cristo Deorrine nauatoniui qqui inarrariparra. 33Abi Deo Pouarrinea toccamacossanirrariparra. Narraria Deorrine Zeso Cristo deni inanazapa poua attiza madirra bazima iboraqquiri nauiuarrinepa Deo Poua uinori nauatoniuarri inauittarirrariparra. Deopa pina poua uati taporrarissa narraro Poua Corime Zesoza da inarrarope manaco madirraza da inarizauiuarrine. Nazapa Zeso Deo Corime iauarri zosse inaronarrari. Narrarirrinena arri mouini oppina tehe pina rrorrode dacorarrarossa narraro timittemanarraro. Pina rrororonissa narraro naqui qqui tiquenarraroparri. Poua Corimerrinea arri touatti onihiza uati uati ineza timittemanarraroparripa. 34-35Naraha Dabipa memeuarri toccamacossa-rrararaha arrirraro uima dozo inaporraro:
"Deopa Oua Zozossedeza uati tarrari:
‘Ouinori nauatoniuarri tittarirri. Otezerrepe touatti dacorarraro ticarrirri.'
Niza tia uauadidedenipa arramani onanabaqquiuitoui. Poccadeni dacorehe onarricanitoui.
Niza orrinepa tiaza attideni naco: Oua Zozossede, quenauitoui, onarraro’
naui nade Deo −narrari Pedoro.
36—Rrehe Izarraeodeni bazima, tiadeniza parrissehera uati onarraro, tibodideni uatomarize-manarri. Zesopa tinanazoqquemanaraha Deorrine nauatonizapa arra ia Zozossede Cristo-Mesia torrarrariparra −narrari Pedoro atti.
37Narraro uima mittemanazapa rrazirema bodideni ocassera taza orri quenabote narrari. Nazapa Pedoroza, Zesocca zozosse tabaqqui ouahadeniza naco uati toquenarrari: —Rraho, imecotedeni, iana nerrecoma inapazerre? −quenarrari.
38Nazapa Pedoro pouadeniza uati tarrari: —Ticcadeni uimasiri tinebomanarri, Deozara tiquerrenaniuarrine. Nazana Deo ticcadeni uimasiri peperri inanezape passo dopaniza niquide ticarrimanani bica tani. Zeso Cristo oniza passo dopaniza niniqui ticarrimanarri. Nazana Deo Poua Corime tibodideniza torrarizauiuarrine. 39Pina Deo Poua uati taporrarissa narraro: “Ocorime tiadeniza da onarizaniuarrine” napoui nade. Nazapa tiadeniza, ticcadeni erredeniza, tipotemanideniza naco Poua Corime da inarizauitoui. Arra zama uarri tanicca madirizemanarrarideniza naco Poua Corime da inarizauitoui. Ia Zozossede Deo uaua inabaqquirraridenizana Poua Corime da inarizauitoui −narrari Pedoro.
40Nazapa Pedoro denima uati uati tarrari. Poua attiza rrehe quenauiuarrine uatide damera tarrari: —Niza Deocca uadie torrezape pouaza iboqquiri narrarideni zori tocanire-rrarauitoui. Rricauitoui. Narrarideniza tiarrimanani narri −narrari Pedoro.
41Pedoro atti mittemanaza rrehe quenarraridenipa amazati passo dopaniza niniqui carrimanarrari. Narraro uadaza denima Zesoza toquerrenauipa 3 mil quenarrari.
42Nazapa Zesocca zozosse tabaqquicca marinarra mittemana-zanaporrari. Bazima queriqquimanazapa catizerara canarrari, rrirripaqquimana narrari, Zesoza bodideni uatomauiuarrine naco pao dize nariui rrirripemana narrari. Deoza naco uati uati zazanapomana narrari.
Zesoza toquerrenarraridenicca madie
43Nazapa Zesocca zozosse tabaqquiza Deocca dacorehe bacco tezape nauatoqquiri narrari. Deo pocca nauatoue pouadeniza torrarizezape arra madirra comaqquiri narrarideni naco ihinanomi-baqquimana narrari. Nazapa madirra bazima Deocca dacorehe qqui toquenazapa: —A, uima bicani torrarizani −quenarrari. 44Nazama Zesoza rrehe quenarrarideni bodideni pina orrariqquimanazapa pouadeni zepetarri, pouadeni tapari naco pouadeni tesseza arrauarri da arrauarri da quequenanarrari. 45Pouadeni zepetarri mota naqui manaconiza da iquenezape ziniro cacarrimana narrari. Narraro zinirope pouadeni tesse cappiremanarrarideniza da da ihiquenanarrari. 46Deoza dada toqquimauarri naco rrarraui torrezima narrari. Poccadeni ozauarri naco arrauarri rripa, manaco arrauarri rripa nanarizemana nazapa bodideni parrissehema uatizemaneri nanarra narrariparra. 47—Abi Deopa bica taui −quequenanarrari. Madirra ouahadeni naco arra Zesoza rrehe quenarrarideni qqui toquenazapa: —Bicaqquiri naui −quequenanarrari. Nazapa ia Zozossede Zeso pouarrine pouaza rrehe quezati denima touapirra zanapoui narrari. Uada ssiuarra madirra ouahadeni, uada ssiuarra madirra ouahadeni zanapomanarrari: —Zesopa oua tonassiuauaui −quequenanarrari.
