Atos 1

_1-3Nirra Teopiro? Ouape Roca. Tiaza Zeso Cristo tauimari dozo onaporraro. Arra poua zepe ihirri narraricca uima dozo, arra madirra mari mari ihicanabaqqui narraricca uima dozo onarronarraroa poua toccamacossaniui bacco tarraroparri. Zesopa zoqqueza ppa izemanaraha nauatonizapa memeuarri toccamacossani-rraraccaza pocca zozosse tabaqquiza arra poua icatterriza-baqquiporrarideniza ahauatoni narrari. Pouadeniza madirizapomaccarrari. Zesozana Deo Corime madiza pocca zossenirricca uima pouadeniza uati uati tatarra narrari. Pocca bero naqui pouadeniza noue inezape: —Rrehe, Zesopa parrissa assire madinipomarrari −quenarrari. Nazapa uada 40 nehe pouadeniza madirizapomaza naco Deocca cacauehecca uima mari mari ihicanabaqqui narrari.

₄Nazama pocca zozosse tabaqquiza madirizapomaza naco arrirraro uima pouadeniza uati tarrari: —Rrehe, arri oza panani Zerozare tinebomana-rrerarri. Occa Abi uati taporraricca uima bicani parrissa tiadeniza torraniuarrine touini timadimanaccarri. Narraro uimape tiadeniza uati onapode. ₅Taidezama tibodideni cacarriqquimerezape: “Occa uimasiri onebona” tiquenezape Zouaopa passo dopaniza tiadeni niqui tozanabaqquiraha niza uada onihizana Deo Poua Corime tiadeniza da inarizazapa tibodideni denima cacarriqquimeranitoui. Deopa tibodideni zati inananitoui −narrari Zeso.

₆Uada onihiza Zesoza queriqquipomazapa pocca zozosse tabaqqui pouaza uati toquenarrari: —Ia Zozossede, maittaccazama icca idideni Izarraeodenicca cacauehe rricaporaha rridapana tirrine torrapomaniuarrinequi? −quenarrari. ₇Naraha Zeso pouadeniza uati tarrari: —Tettidenipe: “Nerrecoma naza ia Izarraeodenicca cacauehe torrapomapazerre?” tiquenarraroqui? Naraha narraro uimape ticcadeni rrerani. Abi Deo Pouana nauato tarrari. Niza Poua nacassa taza ticcadeni cacauehe torrapomanitoui. ₈Naraha Deo Corime ccarronabote naui. Tibodideniza torrarizazana pocca dacorehe ticarrimananitoui. Nazana otauimari maride tiquerrenarizaniuarrine. Arri timadimananicca oza panani Zerozareza maride tiquerrena, ticcadeni zama Zodeaza maride tiquerrena, Zodea uinorinicca zama Samariaza maride tiquerrena narizaniuarrine, onarraro. Arra zama uarri tanicca madirizemanarrarideni naco bazima otauimari mittarizemanauiuarrine teccorarize-manana. Arri ouaza rraui tirrarizeza qqui tiquenarrarocca uima, occa marinarra timittemanarrarocca uima naqui mari ticanabaqquirizana, onarraro –narrari Zeso.

₉Zeso pocca uima uati uati taha rricazapa poua uatimadedeni cattomama canaraha toccamacossanirrari. Meme esseniza touatorarrari. ₁₀Nazama Zeso poua uatimadedeni memeuarri tocattamacossassa cananarra pouadeni uinoriza maqquiderre pamaha eterorideni mopoqquiri naha auatomemanarrari. ₁₁Pouadeni attipa arrama quenarrari: —Arri zama Carireacca madirra arriza timadimanarrarodeni nerrecotoui memeuarri ticattamacossassa canarraro? Arra Zesopa tiadeniza madiraha Deo idinimacossanirrari, memeuarri madipomauiuarrine. Arra toccamacossaniui qqui tiquenarraripa ccanipomaza naco narrarissa nauitoui. Meme essenima carrimaha namiuarri ccaronapomauitoui −quenarrari.

₁₂Nanarra Zesocca zozosse tabaqquipa ssono Rritonaza queriqquiraha: —Rrina, Zerozareuarri rrauirrezippanina –quenarrari. Arra pouadeni rrauizippaniuicca ssonope Zerozareza uarrira tani, pina rrassinarracca uadazape uarrira taniza ccarizade oppinera tani, quequenanarrari. ₁₃Nazapa ozauarri bacco nanimanazapa oza tetepiuarricca coba canauarraninizana rraui torramaronizapa nauiza madimanarrari. Nauiza madidepa: Pedoro, Zouao, Tiaco, Adere, Piripi, Tome, Batoromeo, Mateo, Arapeo bedi Tiaco, Simao, pouaza rromanodeni momouade quequenanarrari, Tiaco bedi Zoda quenarrari. ₁₄Oza tetepiccaza madimanazana uarrirriraza Deoza uatide totoqueriqqui narrari. Zeso imecotedeni, poua imeni Maria, amonerre onihi naqui naui pouadenizama Deoza uatide totoqueriqqui narrari.

₁₅Nazapa uada onihiza Deoza uatide queriqquipomarrari. Madirra 120 quenaha queriqquimanarrari. Nazapa Pedoro totemaza pouadeniza uati tarrari: ₁₆—Rrehe ouimecotedeni, Deo Atti dozo naponiccape parrissa torrarraro. Maittaccazama Deo Corimepa tamine Dabiza Zodacca uima auato inanapoza Dabi uati taporrari. Narraria arra Zodarrine Zeso tozepe torrarrariparra. Narraroa arri ia qqui inarraroparri. ₁₇Zodapa Zeso icattazapa pina arra iassa narahade. Poua zepe irrirrari naco pina arri iccassa narahade. ₁₈Naraha Zodapa pocca uaidirehe manaconi ziniro carrirrariza zama mitta inarraro. Nauiza poua tatiuarri touedimazapa assire sseo tarrari, izone naqui ccodo tezape zoqquerrari. ₁₉Nazapa oza panani Zerozarecca madirra narraro uima mittemanazapa pocca zama icanacanimanarraro: Aseodama, quenarrari. (Ettizape: Touemene pina sso tabaqquini nani, inarraro.) ₂₀Narraroa maittaccazama tamine Dabi madiza pocca rrirririza Deo Atti dozo inaporraro:

₂₁—Nazapa arra Zoda zepe irrirrariccaza madirra ouaha zepe irriuiuarrine qqui inana. Arra ia Zozossede Zeso iaza ccarizaza iazama rrauirizarrarideni arraza madimanaui. ₂₂Narrarideni orraria nerrecorrarina Zouao Zeso passo dopaniza niqui izanapouizama qqui narronarraria Zeso poua toccamacossaniui qqui tarraritta? Narrarina iazama Zeso nauatoniui tauimari eccorarizaniuarrine, onarraro −narrari Pedoro.

₂₃Nanarra Pedoro atti mittemanazapa madirra pamaha onideni ua inabaqquimanarrari: —Arra Zoze, Matia quenarraridenina parra −quenarrari. Zoze oni ouahapa Barsaba, oni ouaha naco Zosto quequenanarrari. _24-25Nazapa Deoza uati toquenazapa arrama quenarrari: —Ia Zozossede Deo, tiape madirra bodideni qquide nauatorride tirrirani. Tiape tetti nerrecoma nani? Arraza madirra pamaha icatterriza-baqquiui nerrecorrarizana touini tani? Nerrecorrarina arra Zoda zepe irrirrariccaza torrauiuarrine? Zodapa uimasiri inaneza ia tonebobaqquiza Deo Tirrine poua tezerremacca uima tinanarroraponiuarri torraui −quenarrari. ₂₆Nazapa pouadeni pamahaza: —Nerrecorrarina Zoda zepe irrirrariccaza torrauiuarrine? −quenaza siba bedeni pamehe izabemaneza: —Arrirrarope Zozecca, arrirrarope Matiacca −quenaza zamineza icodizemana neza qqueze qqueze quenaza orrarie ssonezape: —Matiana parra –quenarrari. Nazapa Matia Zesocca zozosse tabaqquiza torrarrari. Nazapa 12 quenapomarrari.