Zeso poua uatimadedeniza auatonipomarrari
1Zotode naco zama arobeni Carireacca coriza onini Tiberia inidiza Zesopa poua uatimadedeni iaza auatoni-pomarraride. 2Naniza iqueriqquirrarope Zeso poua uatimadedeni 7 inade. Simao-Pedoro, Tome (poua tessedeni pouaza: Papamade quequenanarrari), Natanaeo (zama Carireacca oza panani Canacca madirra), Zebedeo bedi oua, ocote Tiaco, denima Zeso poua uatimade ouaha pama nade. 3Simao-Pedoropa: —Aba corode occana −nade. Naraha: —Ia naqui tiaza rrauirrana −inade. Nezape rrauirrezippeza darroni imeniza rrauirrezade. Nezape narraro zomeza aba coro inaraha nouerade.
4Nezape ssiuarrarroneza Zeso ssiquiza uaui qqui inaraha ssamoqquiri inade. 5Naraha Zeso iaza uaua nade: —Zabissodeni aba ticarrimanaco? −nade. Naraha: —Aba noueraui −inade. 6Nazapa Zeso attia: —Nani tibirrideni nauatoniuarri tarrapa coro ticazippemanarri −nade. Nezape Zeso attissa inanemaneza tarrapa coro icazippezape aba irrirrari. Rroca icanimoraraha iparrire-rrerade.
7Nezape ouape Zeso uatimade ouazana uati uana tarrari. Ouattia Pedoroza: —A, narraripa ia Zozossede! −onade pouaza. Nazapa Simao-Pedoropa pocca etero bodiccazara aba coro coro narizaraha ouatti mittazapa uassinarra pocca etero ueza, rroppa, corro naza ssiquiuarri cona tarraride. 8Naraha Zeso uatimade mota iape darroniza rrauirrade. Tarrapa abama ori icanade. (Ssiquipe uarri terrerade, pina 100 metrossa narrarode.)
9Nezape ssiquiza bacco ineza rrauirremorezape qqui inanarra pao aba naha zippo rradari taniza uazanarra nade. 10Nazapa Zeso atti: —Aba rridapana coro naui mota teqquemoremanarro −nade. 11Nazapa Simao-Pedoro darroniza toqquezaniza tarrapa equidi, ssiquiuarri rroca icanimorade. Tarrapazapa aba pota tarrari 153 naha tocauarraride. Aba uapi taraha tarrapape tarroppi nerrerade. 12Nazapa Zeso poua uatimadedeni iaza uaua nade: —Nirra, tirripemanarri −nade. Naraha iape: —Nerreco madirra tirrani? −inanitouiraha uapima icappinaqquide. Naraha ibodizape: —Ia Zozossede −inade. 13Nazapa Zeso ccarronarrari, pao idi naza iaza da inarizade. Aba naco da inarizade.
14Zesopa uatiaraha nauatonirrari. Nauatoniui zotodepa poua uatimadedeni iaza auatonirrari. Zotode auatonipomarrari. Zotode arrirraro uimaza iaza auatonipomarrari, nade.
Zesopa Pedoro poua cacomerauiuarrine uati uati tarrari
15Narraro ssiuarra izamassa irripehe rriqueza Zesopa Simao-Pedoroza uati tade: —Simao, Zouao bedi tirrani tiana tibodiza denima ouaza teti uana tarraroqui? Titessedenipa ouaza poccadeni touati uanehe arrimani torrarraro tarraroqui? −nade. Nazapa Pedoro: —Rrehe oua Zozossede, tiana nauato tinarraro tiaza nacassa onani −nade. Nazapa Zeso Pedoroza: —Nazama occa eueue bedi tititapabaqqui nana −nade.
16Naraha denima uati tapomade: —Simao, Zouao bedi tirrani tiape ouaza teti uana tarraroqui? −napomade. Naraha Pedoro uati tapomade: —Rrehe oua Zozossede, tiana nauato tinarraro tiaza nacassa onani −nade. Nazapa Zeso attia: —Nazama occa eueue tecauabaqquina −nade.
17Naraha Zesopa pouaza uati tapomade: —Simao, Zouao bedi tirrani tiape ouaza nacassa tinarraroqui? −napomade. Zesopa Pedoroza uati tarrari, uati nimanirrari, uati nimanipomarrari nazapa Pedoro pouaza tocasserani naza bodi qquezarrari. Nazapa poua cacomerade: —Oua Zozossede tiana nauato tinehe rricarraro. Nauato tinarraro tiaza nacassa onani −nade. Nazapa Zeso uati tade: —Occa eueue tititapabaqqui nana, onarraro. (Arra Zeso atti nama narraripa “Occa madirra mari mari titicanabaqqui nana” narrari.) 18Ouape parrissehera tiaza uati onarraro: Zabisso tirrezape ticca etero oro tizimezape tia touini taniuarri titicca neraha rradaui ticarrezape tibirri da teza madirra ouahana ticca etero tia oro tozimauitoui. Nacassera tineraha nani motta tia iaqquemananitoui −nade Zeso. 19Zeso uima uati tarraripa: —Pedoro arrama naza zoqqueuitoui −narrari. Pocca zoqquehe nema nezape uapimaza Deocca deni torrehe auato taniuarrine. Nazapa Zeso attia: —Ouaza damera tinarri! −nade Pedoroza.
Pedoropa Zeso poua uatimade pocca cacatizecca uimatoui uati tarrari
20Nazapa Pedoro poua nattiuarri qqui naninarra, Zeso uatimade oua pouadeni natti occamissarrarode. Ouazana Zeso uati uana tarrari. (Ouana errete Pascoacca zome taideccaza irripaqquiza Zeso uinoriza ouittariza pouaza uati onarrarode: —Nerrecorrarina tia ccaccorauiuarrine? −onade Zesoza.) 21Nazapa Pedoro oua qqui tazapa Zesoza uati tade: —Oua Zozossede arrarraripa nerrecoma napazarra? −nade. 22Naraha Zesopa: —Touini onezape Zouaopa arrirraro zamaza madi-zanapouiparra naza occanipomeza naco madiuiparra onanauitouiraha narrarope ticca cacauehe rrerani. Ouazara damera tinarri −nade Zeso Pedoroza. 23Nezape imecote bazimaza ponima uima torrarizarrarode. —Zeso uatimade Zouaopa uatia-rrarauitoui −nanarizemana narraride. Naraha Zeso attipa: —Zoqque-rrarana −narrararaha, Zeso poua attipa: —Rrehe, nacassa onezape Zouaopa occanipomeza madiuiparra nauitouiraha narrarope ticca cacauehe rrerani onarraroraha −narraride Zeso. Arra Zeso uati uati tarraripa oua Zouao occa uima.
—Zeso tauimari dozo onarrarope parrissa −narrari Zouao
24Arrirraro uima nemanehepe parrissa. Zeso uatimade oua qqui onarraro dozo onarraro. Nazama narrarope nauatoqquiri inarraro. Narrarope parrissa. 25Nazama arri Zeso inauatorizarraro naqui uapi teraha narraro motape dozo onerrerani. Obodiza ouattipe narraro touatti bazima dozo onehe rriquezape papeo zama uapima irririzanitouiraha. Peperri.
