Oza panani Rromauarri Paoro zosse iquenarrari
1Nazama: —Zama Itariauarri Paoro zosse inana, nauizapa icca tamine deni torrauiccana pocca uima icattemaniuarrine −quenazapa rromadenicca isso teppeppe zossede Zorioza uati toquenarrari. Arra Zorio pocca zozosse tabaqquipa 100 quenarrari. Narraridenipa isso teppeppe 600 quenarrari mota. Pouadeniza: —Tamine deni torrarrari Acostocca isso teppeppedeni −quequenanarrari. Nazapa narrariza uati toquenarrari: —Rrari Zorio, toponi cocoroza domo uezarrarideni, Paoro quenaza Itariauarri tiaccabaqquimanarro −quenazapa arri oua Roca naqui pouadeniza occarrarode. 2Itesse Aristaco naco iaza toccade. Pouapa zama Masedoniacca oza panani Tesaronicauarricca madirra. Nazama nani oza panani Sezareacca rrauiza ia bazima rrauirrezippeza oza panani Adaramitiouarricca darroni imeni etero ssoque caniqquimani carrinicca zama Asia rrippeuarri touaccabote nani qqui icanade. Nezape narraro darroni imeniza rrauirrezeza iaccarrarode. 3Uada ssiuarrape oza panani Sidouarri uana icanade. Nazapa Paoro cacauade Zoriopa pouaza uati uana taza: —Titessedeni qquide tiqquemorani bica tani −nade. Nazapa poua tessedeniza Paoro toqquemorazapa inarripemanade. Poua cappirauicca naco pouaza da iquenarrari. 4Nezape uada ssiuarra Sidoza irroppemapomade. Naraha rrorrode dacorehe iauarri rro narronezape darroni imeni parri touaccarini naniuarrine ssamo tade. Nezape zama bedeni passo imeniza uittacossani Sipre inidiuarrina touaccarraro. Narraro zama bedeni uittacossarrarorrine rrorrode orrizema nezape darroni imeni touaccanissa tade. 5Nezape Sipreza iaqqueqquimezape passo imeniuarrina iaqquerrizade. Zama Sirisiaza issoniqquima, zama arobeni Papiriaza issoniqquima, zotodepe zama Risiauarri bacco inade. Nanicca oza panani Mirazana uana icanade.
6Nazapa nauiza rromanodenicca isso teppeppe zossede darroni imeni onihitoui qqui narizazapa oza panani Aresadriacca darroni imeni Itariauarri touaccaniuarrine qqui icanade. Pouapa narraroza ia touaqquezabaqquizapa iaccapomade. 7Nezape darroni imeni touaqqueraha rrorrode rrazirema iauarri rro narronapomezape darroni imeni touaqqueraha narro tocanarraro. Uada uapi tani inarro-zanapozape oza panani Quinido uarrira taniza bacco inade. Nezape rrorroderrine denima parri touaccarini naniuarrine ssamo tani. Nezape passo nocconiza zama uittacossani onini Cretauarrina acca icanemaneza rrorrode ia cco tocarrizabaqquide. Nezape nanicca oza panani Saomonezape icassoniqquimade. 8Denima Creta inidiuarri iaqqueza naqui narro teraha iacca… iacca… darroni imeni uauana tocana oninipe Bons Portouarri bacco inarrarode, arri oza bedeni Rasea uarrira taniza. (Bons Porto ettizape: Uauana tocana bicani, inarraro.)
9Nazapa uada uapi tani inarrorroneza zazarradecca abazico bacco tocanade. Zazarradezape passo imeniza darroni imeni touaccani oppina tarrarorrine Paoro nauato taza darroni imeni ahaccadedeniza uati tade: 10—Rrehe otessedeni, denima rrauirrezape oppinabote bacco inanitoui. Icca darroni imenipe cabararinitoui. Nezape tozepetarri naco amossiuarrauitoui. Ia naqui irriquerana −nade Paoro. 11Naraha rromanodenicca isso teppeppe zossede Paoro attiza uaribo didi tarrari. Pouapa darroni imeni rrinede atti, ahaccade attidenira mittarraride. 12Nani uauana tocana Bons Portope zazarradeza bica terrerani nauatoqquiri narrari. Rrorrode passo, rrorrode passo zanaporraro noppineni cappinemanaza: —Rrina, denima iaccana −quenade. Bazimapa Creta inidiuarri touaqquemanaza oza Peniseza bacco toquenauiuarrine touini quenarrari. —Nani Peniseza bacco inezape nanizana imadiccana, zazarrade rriquezana rrauirrapomaniuarrine −quenade.
Rrorrode dacorehe ccarronarraro
13Nazama rrorrode rrazirema iauarri rro narronarraro cacarriqquimerezape orrizema inattiuarri ccarronarraro. Nezape: —Rrehe, rridapanape bica tani −quenaza pperro ccanarrabote idimoranimanezape icca darroni imeni touaccapomade. Nezape Creta inidima nani iaccapomade. 14Iaqqueraha zotodepe zamauarricca rrorrode dacorabote ccarronapomeza darroni imeniza ssonari ssonari nade. Narraro rrorrode oninipe: Norodeste, icanacanimanarraro. Darroni imeni arobeniuarri ssonarirraro. 15Rrorrodepe iaza dacoreza passo nocconiuarrina iaccade, naniuarripe touini inerrereraha. Nezape rrorrode poni ccarronaniuarri acca icaneraha rrorrode dacorezape peperri inade. Nezape rrorrode poni toccaniuarrina rrouizo icazanapode.
16Nezape zama bedeni uittacossani Caoda icassoniqquimeza rrorrodepe orrizama nade, zama uacosserre narraro. Nezape naniza darroni bedenipe darroni imeni uinoriniza ssoque cazanani rre tocanani noppineni cappinemanaza: —Rroca icanamacossanina −quenade. Passo irrirrarorrine narro teraha nema nehe rroca icanamacossanimanade. 17Nezape darroni imeni tetepiniza rrore icazanemanade. Cotaniuarri pina corodanarraro coro izippemaneza darroni imeni dopaniuarri rroca inarronemanezape daco carriraniuarrine nocconiza ssoque izanemanade. Zotodepa ssiqui carrimama canarraro onini Sireteza doi canaza cabararini noppineni cappinemanaza aua rrore canani tappa icanemanade. Nattinipe darroni tabo tocanezape orrizama touaccarraro. Rrorrode toccaniuarrira touacca-zanaporraro. 18Rrorrode dacorarraro nebo-rrerezape icca darroni imeni rrazirema arriuarri pati arriuarri pati canade. Uada ssiuarraza naqui nema cazanapozape tozepetarri mota, zamatapa mota naco ua izippemanade. Nezape: —Darroni imeni tocappauani nana −quenaraha nema cazanaponi parri nade. 19Ssiuarrapomeza naqui nema cazanaponi parri nezape darroni imeni totouaccarinicca mota dicca iquenezape ua izippemanade. 20Nezape uada uapi teraha marri qqui inarrarade. Zome naqui amouadeni qqui inarrarade. Taidepe: —Icassiuaueranitoui −inaporaha passo rrorrode dacorehema uaidira zanapozape: —Arriza irricanitoui −inade.
21Uada uapi teraha irripa-rrerade. Nazapa Paoro totemaza uati tade: —Rrehe otessedeni, taide Cretaza tiadeniza uati onapode: “Denima rrauirrezape oppinabote bacco inanitoui” onaporaha ouattiza rrehe tiquenerrerezape oppinabote bacco inani tarri. Rridacca ouattiza rrehe tiquenezape tizepedenitarri pouama ua tizippemana-rraranarra. Tiadeni naqui ocasserani temana-rreranitouiraha. 22Naraha rridapanape tiadeniza uati onana: Ticappinemane-rrerarri. Dacoco tirrirarri! Icca darroni imeni cabarariza amossi caneraha irrique-rreranitoui. Bazima icassiuaueranitoui −nade Paoro. 23—Arra Deo oua zosse narizarraripa oua Zozossede. Narraria arra zome Poua Atti ccaccaronade ouaza zosse inaronaza auatopa. 24Ouaza uati tazapa: “Paoro ticappine-rrerarri” napa. “Tiape oza panani Rromauarri bacco tinanitoui, tamine deni torrauicca baccouarri teza: Ouape arri ouani, tanitoui” napa ouaza. “Nema tezape Deorrine arra tiaza rrauirronarrarideni naco tocassiuauerauitoui” napa −nade Paoro. 25—Rrehe otessedeni, tibodideni pina tetizemanarri. Ouattipe: Deopa maizera taui, onarraro. Nazama arra Poua uati uati taui omittarrarope Deo Pouarrine nema nanitoui. Pocca zozosse memeuarricca attissa inananitoui. 26Naraha passo nocconiza zama bedeni uittacossani uarri ia rrotocanani toui −napode Paoro.
27Nezape passo imeni onini Adriatico nocconiuarri rrorroderrine arriuarri iacca, arriuarri iacca nezape icca uada 14 neza zome nocconiraha darroni imeni ahaccadedeni attipa: —A, zama touarrirarronanitide −quenade. 28Nazapa: —Tozerrerarronanitide −quenaza ssiquitoui nattome quenade. Siba corodaza ssoque zanani tappa izippemanade. Nezape passo 36 metro carride. Denima nattome iquenapomezape arrimani torrarraro: 27 metro torrarronade. 29Nazapa passo bodicca sibaza darroni imeni uacca canani noppineni cappinemanaza ahaccadedeni darroni imeni zotoniuarri pperro 4 nehe ua izippemanade. Pperrope coroda imeniza ssoque toppiza passoza ua izippemaneza poni inoni ssiquiza rraro nezape darroni imeni arriuarri touacca, arriuarri touacca nerreraniuarrine. Nazapa: —Rraho, ssiuarra naccaraho −quenaza marritoui madimana-zanapode. 30Naraha ssiuarra-rreraccazama darroni imeni ahaccadedeni attidenia: —Pperro onihi darroni imeni cotaniuarri ua izippana −quenaraha pouadenipa maizemanade. Pouadenipa: —Idomo toccana −quenazapa darroni bedenira tappa icanaronemanade. 31Naraha Paoro qqui tazapa poua cacauade rromanodenicca isso teppeppe zozossedeza, arra pocca isso teppeppedeniza naco uati tarrari: —Rraho, darroni imeni ahaccadedeni arraza madimana-rrarazapa tiadenirape ticassiuauera-rreranitoui −nade Paoro. 32Nazapa darroni ahaccadedeni domo tocca-rrarauiuarrine isso teppeppedenia darroni bedeni madoni ca ippimanade. Darroni bedeni passoza cassonippezape tocatabode.
33Nezape ssiuarrabote naza rripemanauiuarrine Paoro ua inabaqquide: —Rrehe, rridapana uada 14 nehe tossoniqquimaraha oppina tezape ticattomama canarrarorrine tirripemananissa terrerani. 34Rrari, rridapanape tirripemanarri! Tidacoremanani nezape ticassiuaueranitoui. Ticappinemane-rrerarri. Tiberorre cane-rreranitoui. Nouerani! Bacco tiquenanissa tanitoui −nade Paoro. 35Nazama atti rricazapa pao bobi idi naza bazima mittemanauiuarrine Deoza: —Rrehe, peperri bica tani −nade. Nazapa pao dize, apa nade. 36Paoro nama naui qqui toquenazapa bodideni bazira tehe tobicaui naza pouadeni naco rripemanade. 37Ia bazima darroni imeni bodiniza imadinipe 276 inade. 38Nazapa arrarideni rricazapa zamatapa mota, arroi rrizaza tirico sacocca ua izippemanade: —Darroni imeni tocappauani nana −quenaza.
39Ssiuarraponi ahaccadedenipa zama qqui toquenaraha noccodeni rriza tarrari. Naraha arrauarri qqui, arrauarri qqui quenazapa toqquidouarranicca ssiqui bicani qqui toquenaza: —Rrina, naniuarri iaqquezimeza uana icanana −quenade. 40Nezape pperro madoni ca ippimanezape passo bodiza inebomanade. Darroni imeni zotoni uauacossa naqui acca acca quenapomauiuarrine ssoque zanani dicca iquenade. Cotaniuarricca auaza etero imeni ssoque zanani dicca iquenaza rroca inamacossanimanezape rrorroderrine touaccapomade. Nezape toqquidouarraniuarri iaqquezimade. 41Naraha passo bodicca quequeuemeri narraroza cassonari cassonari zanapode. Denimacca ssiquizape darroni imeni cassonaride. Cotanipe toqueuemora nade. Naraha zotoniuarripe passo rribabani dacorarraro ssonari ssonari nezape cabararirrarode.
42Nazapa isso teppeppedeni: —Toponi cocoroza ua tozimarrarideni cona cona toquenaza domo toccarana −quenaza: —Rrari, rricana −quenade. 43Naraha rromanodenicca isso teppeppe zossedepa Paoro zoqqueuiuarrine nacassera tazapa rrehe narrarade. Nazapa dicca inabaqquiza zosse inabaqquide: —Rrari, conade nauatoqquiri tiquenezape taide passoza rroppa tizippemanaporri, ssiquiuarri cona cona tiquenaniuarrine −nade. 44—Naraha conade ssamoqquiri tiquenezape taba qqui tiquenarri. Arri darroni imeni arobeniza naqui titiporimaneri neza tibirrideniza cona cona tiquenarri, ssiquiuarri bacco tiquenaniuarrine −nade rromanodenicca isso teppeppe zossede atti. Nema inezape ia bazima zama bacco ineza icassiuauerade.
