Zama uittacossarraro oninipe Maotaza madimanarrari
1Passo imeniza bazima icassiuauerezape arri ssiquiuarri bacco bacco inarraro. Ssiquiuarri bacco bacco inanicca zama oninipe Maota. 2Nauiuarricca madirra madimanarraridenipa iaza uatideni uanaqquiri nade. Naniza bacco izatiraha passo cca, ssirini torra nezape zippo imeni inazemaneza iaza uaua quenade: —Nirra, arri zippoza rriua tiquenarri −quenade. 3Nazapa Paoro aua marrico eccaniqquiza ua izanade. Naraha maccapa zippo ppoconi noppineni qquenaza Paoro zepeza cca tozazapa zepeza que tade. 4Naraha nauiza madirra madimanarrarideni Paoro zepeza macca que taui qqui toquenazapa pouadenira uimahaha canade: —A, pouapa madirra inanazoqqueza uitide. Passozapa rre tarrararaha rridapanapa ia cacauade Diquerrine zoqqueuitoui −quenade. (Dique ettizape: uimasiri manaconi totonanade.) 5Naraha Paoropa poua zepe dissa nazapa macca zippoza ssonizanade. Naraha Paoropa macca comene aua narrarade. 6Pouadeni bodideniza attidenipa: —Osso torrauitide, amazati uatiaza touedimauiuarrinerana −quenarrari. Naraha poua cattade madimana, madimana naraha Paoro uatia-rrarazapa bodideni cacarriqquimere-manade. Pouadenipa deo uapi taha carrimanarrarirrine Paoroza: —Arrarraripa deo ouaha −narizemanade.
7Nazama arri zippo rriua inani uarrira tanizapa narraro zamacca tamine madirrari. Poua onipa Pobrio. Narraripa iaza: —Rrina, occa ozauarri rrauirrana −nade. Nezape uada 3 nehe pouaza imadide. Pouapa iaza accora, bica tade. 8Naraha Pobrio imehipa coma taha porirrari. Uapi ppocorarra, mirri mirri tarra narraride. Narrari qquide Paoro toqquezimazapa Deoza uati tarrari. Poua zepeza bara inazapa tonomide. 9Nama naui mittemanazapa narraro zamacca comaqquiri narrarideni bazima rrauirronaza Deorrine tocanomirerizade. 10Nazama iaza bicaqquiri nazapa poccadeni danirri uapi tehe iaza da inaqquimanade. Zotode bobodeza rrauirrapomaniuarrine naqui icappira nerreraniuarrine uemaha iaza da iquenapomade.
Rromauarri rraui torrauiuarrine Maotaza rroppememanarrari
11Nani zama bedeni Maotaza abazico 3 canaha imadizape irroppemapomaniuarrine oza panani Aresadriacca darroni imeniza rrauirrezade. Narraro darroni imeni rrinededeni naco zazarrade rricaniuarrine naui Maotaza narromanaccarra narraride. Poccadeni darroni imeni cotanizapa pouadeni cacauade corime pamaha barirrari, onideni Casto, Poro quenarrari. Darroni ahaccadedeni attidenipa: —Ia cacauade papamade −quenarrari. Narraro darroni imeniza rrauirrezezape iaccapomade. 12Nezape zama bedeni passo imeniza uittacossani onihicca oza panani Siracosaza bacco inade. Naniza icca uada 3 nade. 13Nezape narraro zamaza denima issoniqquimezape passo imeni inidima nani iaccabacossade. Zama Itariacca oza panani Rrezio bacco inade. Uada ssiuarrape inattiuarri rrorrode ccarronezape iaccapomade. Zome ssiuarrapomezape narraro rrorroderrine uassinarra oza panani Poteori bacco inade. Nanizape darroni imeni iqueneboza rrauirremorade. 14Nezape narraro oza pananiza Zesoza rrehe quenarrarideni bacco inabaqquide. Pouadeni attipa: —Rrari, iaza semana orrarie timadimanaccarri −quenaza pouadeniza uada 7 nehe imadide. Zotodepe oza panani Rroma rrauini rrauirrapomade. 15Rrauirranerre Rromauarricca Zesoza rrehe quenarrarideni itauimari mittemanaza bacco irrizabaqquiuiuarrine itoui rrauirronarrari. Motadenipa oza capamema narraro onini Poro de Apioza bacco irrizabaqquide. Motadeni ouahapa oza capamema narraro onini Três Taberna quenauiza bacco irrizabaqquide. Nazapa Paoro qqui inabaqquizapa bodi uatizede. Deoza naco: —Rrehe Abi Deo, peperri. Tiape bica tinani −nade. 16Nezape oza panani Rromauarri bacco izimezape Paoropa pouara madiuiuarrine taminedeni rrehe quenarrari. Paoro poua cacauade isso teppeppe orrari orrari zanapomanaza madirraride.
Paoropa Rromauarri
17Nazapa nauiza Paoro uada 3 naha madizapa zodeodenicca taminedeni madimanarrari uaua inabaqquide. Queriqquimanazapa pouadeniza uati tarrari: —Rrehe ouimecotedeni, ouape zodeodeni ohonarrizobaqqui narrarade. Icca ididenicca madie tauimariniza naqui nanacassera onerrerade. Noue orrireraha oza panani Zerozareza zodeodeni occa madirraraha ouaza uadiqquiri naza oua dama iquenezape rromano zepedeniza oua inanemanarrarode. 18Nazapa naui Zerozareza rromanodeni oua uati icanemanade. Ouaza uati toquenaha rricaza attidenipa arrama quenade: “Pouapa uima cappiraui, madirra nanarrizo narraraui. Nerrecotoui zoqqueuiuarrine?” quenade. Attideni nama quenazapa “Paoro tappa inana” quenade. 19Naraha zodeodeni ouaza boqueqquiri nazapa rromanodeni: “Paoropa uima cappiraui” quenaui uima mittemanazapa parrissa quena-rrararrari. Nazapa rromanodenicca zama cacauade tezerre rrehe canire-rrararrariuarrine rromanodenicca tamine deni torrauiccana occa uima icattemaniuarrine oneza uati onarrarode. Arra occa madirra zodeodeniza naqui occa uadie nouererre narraro. 20Narraro timittemananiuarrine oneza titouideni uaua onarrarode. Rraho, pouadeni qqui onabaqquizapa pouadeniza uati onaniuarrine, onade. Arri tiadenipe rridapanana cadeiaza oua rrore iquenani qqui tiquenarraro. Ia Izarraeodenipe ia Idinide toui inarrorani. Narrariza rrehe onezape oua dama iquenarrarode −nade Paoro.
21Nazapa Paoroza uati toquenarrari: —Naraha Zerozarecca madirrapa titauimari uima teppe naqui iaza zosse inarronemana-rrerade. Imecote zodeodeni arrauarri bacco narronemanarrarideni naco “Paorocca uima uaidira tani” quena-rrarade. 22Naraha arri uima zati mari mari tarrarope zama bazimaza: “Bica terrerani” nanarizemana naui ihimitta narraro. Nama quenazapa: Ticca uima imittaccaraho, ihinanarrarode –quenarrari zodeodenicca taminedeni.
23Nazapa pocca marinarra mittemanauiuarrine uada orrarie icatterrizemanade. Narraro uada bacco taza izamassa Paorocca ozauarri bazima queriqquimanade. Nazapa Paoro Deocca cacauehe tauimarini, Zeso tauimari naco mari icanabaqquirrari. Zeso tauimariza parrissa quenauiuarrine damera tarrari. Moizecca marinarraza, Deo Atti cacomeraqquiri narraridenicca dozonirriza naqui mari icanabaqquirrari. Narraro maridepe marri touaqquemanaraha zomezana paparra quenade. 24Nazama zodeodeni mota Paoro attiza uatizemanaza parrissa quenade. Naraha motapa parrissa quena-rrarade. 25Nazama bazima rrehe canire-rraraza motapa: —Rrina rrauirranina −quenaraha Paoro poua atti rricanicca pouadeniza arrama nade: —Rraho, tiadenipe pina ticcadeni ididenissa tiquenarraro. Maittaccazama Deo Corime icca idideniza uati tarrari. Poua Atti cacomerabote Izaia dozo inaporraro tirrinedeni parrissa torrarraro. 26Poua Atti cacomerabote Izaia dozo inaporraro tirrinedeni parrissa torrarraro. Deo Attipa:
“Occa madirraza Ouatti tecomerarizarri. Pouadeniza arrima onarraro:
Teribodeni ticarrimaneraha pina timittemanerani nanitoui.
Tinoccodeni ticarrimaneraha pina qqui tiquerani nanitoui.
27Arrarrari madirra bodideni tossamorizezape parra tossamomanariui nauitoui.
Uaribodeni moda naui nazapa pina mittemaneraui nauitoui.
Noccodeni naco mozi quenazapa pina noccodeni cappiremanarrarissa nauitoui.
Nama quenazapa qqui toquenauiuarrine ssamoqquiri, mittemanauiuarrine ssamoqquiri,
bodideni tocauatterauiuarrine ssamoqquiri nazapa bodideni cacarriqquimere-manauiuarrine ssamoqquiri naui.
Rridacca bodideni cacarriqquimere-manaza ouaza toquerrenazapa onabicabaqquiuitouiraha” naui nade Deo −nade Paoro.
28—Rrehe occa madirradeni, nauatoqquiri tiquenaniuarrine tiadeniza uati onarraro. Rridapanapa zodeo querrena-rrararraridenizana Deo ia tonassiuauabaqquiuiuarrinecca uima torrarizanitoui. Narraridenina mittemanauissa tauitoui −nade. 29[Nazapa Paoro atti rriqueza zodeodenipa pouadenira arrauarri atti arrauarri atti quenazapa rraui torranide.]
30Nazapa uarrano pamaha tossoniqquimaraha Paoro oza panani Rromaza madiuiparra naccade. Poua madiuicca oza manaconi naqui rrinedeza da da zazanapo nauiparra naccade. Poua qquide rrarrauirrona naza naco madirra ihinauatizebaqqui nade. 31Poua qquide rrarrauirrona naza naco Deocca cacauehe tauimarini, ia Zozossede Zeso Cristo tauimari naco mari mari ihicanabaqqui nade. Paoropa cappina-rraraza poua attiza naco ssonacossade noueraza mari mari ihicanabaqqui narraride.
