Atos 26

₁Nazapa tamine Aquiripa Paoroza uati tarrari: —Rrari, manaco ticca uima uati tinarri, imittana −narrari.

Nazapa Paoro uati tauiuarrine poua zepe meme da icaneza uati tarrari: ₂—Rrehe tamine Aquiripa, tiaza occa uima uati oneza timittaniuarrinepe ouatizerraro. Zodeodeni occa uima uaidira tani quenaza oua izauemaneraha tiaza occa uima uati onezape uima onane-rrerani nauato tinanitoui −narrari. ₃—Rrehe, tiape zodeodeni tauimari nauatorride tirrirani. Tiaza naqui icca madirra zodeodenicca madie rrizera tani. Iape zodeodeni icca uimaza rrehe icanirenissa terrerani. Zodeo motadenipa uima onihiza rrehe quenarrari, zodeo motadeni ouahapa uima onihiza rrehe quenarrari. Uima nema nani nauato tinezape occa uima mouaraza titauaribo canarri −narrari Paoro.

₄—Arra zodeodeni bazimapa occa madiecca uima nauatoqquiri narrari. Ouape erredeni orrezama pouadeniza omadirizarrarode. Taidepe occa zama Sirisiauarri ossoneza oua qqui toquenaporrari. Zotode zabisso orrezape oza panani Zerozareuarri omadiza naqui oua qqui narronemanarraria arrirraroparri. ₅Rrehe, pouadenipa taidezama ouaza nauatoqquiri narronaui. Marinarra onini parizeoza rrehe onaporrarocca uima naqui nauatoqquiri naraha tiaza uati toquena-rrararrari. Iape marinarra parizeoza rrehe inarrarope pina zodeo motadenissa inerrerani. Iape zodeodeni icca marinarraza denima dameraqquiri inarraro. ₆Naraha rridapana tibaccodeniuarri ouarraro, occa uima ticattememananiuarrine ouaza uaua tiquenarraro. Oua ouattipe: Rricarraridenipa nauatonimanauitoui, pina Deo icca idideniza uati taporrarissa narraro. Narraro torraniuarrine touini omadirraro. Nema onezape ouaza uauadimana narrari. ₇Icca madirra zodeodeni arra icca idi Izarraeo poua bedi 12 quenarrarideni potemaui bazima rricarrarideni Deorrine nauatonimanaui qqui inabaqquiuiuarrine touini imadi-zanaporraro. Pina Deo uati taporrarissa narraro touini imadirraro. Narrarorrinea zodeodeni Deoza iboraqquiri naza zome ssiuarra, zome ssiuarra zepedeni ihirrimana narrari. Naraha tamine Aquiripa, oua naqui narrarotoui onarrorarrarorrine zodeodeni motaha ouaza uauadimana naza ozoqqueniuarrine touini quequenanarrari. ₈Naraha nerrecotoui tiadenia rricarraridenipa Deorrine nauatonimanauiuarrinecca uimaza parrissa tiquenerrerarraro? −narrari Paoro.

₉—Nazama oua naqui taidepe Nazaretiuarricca Zeso tauimariza parrissa onerreraccade. Zesocca uima rricaniuarrine naqui damera onade. Ouape Zesoza rrehe quenarrarideni ohonarrizobaqqui nazapa: Bica tani, ohonanaccade. ₁₀Ouape Zerozareza nema onarizade. Dada toqquimade taminedeni oua icazossemaneza naqui Zesoza rrehe quenarrarideni uapi taha otadamazapa toponi cocoroza coro coro ohozimabaqqui naccade. Zesoza rrehe quenarrarideni inarriquemanaza naco: Rrehe, bica tani, ohonanaccade. ₁₁Nema onarizarraroa zodeodenicca Deo Atti mamariuarri bazima quequeriqquimana narrarideni onarrizobaqquiuiuarrine touideni ohoccariza naccade. Zesoza rrehe quenarrari nebomanauiuarrine touini oneza pouadeni ohonarrizobaqqui narraride. Pouadeniza boque oneza nacassera onezape oza panani uarri tanicca onihi onihiuarri naqui touideni ohoccariza naccade −narrari Paoro.

₁₂—Nezape Zesoza rrehe quenarrarideni damade nema onarizezape oza panani Damascouarri occarrarode, otadamauiuarrine. Dada toqquimade taminedeni ouaza: “Rrehe, titadamauiuarrine ticcarri” quenazapa pouadeni atti uima teppeza dozo iquenezape poccadeni uima teppema occarrarode. ₁₃Rrehe, nazama tamine Aquiripa, narraro uima tiaza uati onana. Ouape rraui occarraro… marri orrari uaririnaza Damasco bacco onabote naraha memeuarricca ssiuarrani dacorehe amazati ouaza bacco naronezape ouinoriza rraui torrarrarideniza naqui ssiuarrauarraniriza nade. Marripa zibehi taraha arramani. Arri oua qqui onarrarona denima dacorarraro. ₁₄Iape bazima iedimarizade. Nazama ouape etti ebereoza omittade: “Saoro, Saoro nerrecotoui occa madirra nanarrizo tarizarraro? Arra occa madirra nanarrizo tarizarrarope pina oua nanarrizo tarizarrarossa narraro” nade. “Nema tezape tia tinauaidirarraro. (Pina boui poua momoua bono ssacararrariza ttai naniza boui poua pouarrine biquerarrarissa tarraro” nade.) ₁₅Naraha manaco pouaza uati onade: “Tiape nerrecorrari?” onade. Naraha: “Ouape Zeso. Tiape oua tinarrizorraro” nade ouaza. ₁₆Nazapa ouaza: “Titemarri, arri tiaza ouatomarrarope ouaza tizepe irriniuarrine. Occa uima naqui tecomerarizaniuarrine oneza titoui uaua onarraro. Arri rridapana oua qqui tinarrarope narraro occa uima tecomerarizaniuarrine. Niza tiaza ouatopomeza oua qqui tinapomarraro naqui tecomerarizaniuarrine. ₁₇Arra zodeodeniza timadirizezape tia ouacauarizanitoui. Zodeo querrena-rrararrarideniza timadirizeza naqui tia ouacauarizanitoui, madirra tia inanazoqquemana-rreraniuarrine. Rridapanape zodeo querrena-rrararrarideniza tia zosse onaniuarrine. ₁₈Pouadenipa pina ziziniza rrauirizaraha tia zosse onarrarope noccodeni ssire tinanabaqquiuiuarrine. Naui zizini nebomanazapa Deo ssiuerrenezana madimanauiuarrine. Uimasiri totonanade Tocorime-Taminecca zosseheza toquerrenaraha nebomanazapa Deozara toquerrenauiuarrine. Ouaza parrissa quenazapa poccadeni uimasiri onanamossiniuarrine. Bodideni onauissobaqquiza naco niza memeuarri Deoza toquerrenazapa pocca zozosse bicaqquiri narrarideni tezerre pocca biquehe carrimanauitoui” nade Zeso ouaza −narrari Paoro.

₁₉Nazapa Paoro attia: —Tamine Aquiripa, arri uati onarrarope Deorrine pina occa uadassa nehe ocarrirraro Zeso ouaza auatozapa poua attiza ibo onerrerarraroparri. ₂₀Taidepa oza panani Damascouarri Deoza toquerrenauiuarrine uati onabaqquiporraride. Zotode oza panani Zerozarecca naco uati onabaqquirraride. Arrirraro zama Zodea bazimacca naco uati onabaqqui-rizarraride. Zodeo querrena-rrararrarideni naco uati onabaqqui-rizarraride. “Tibodideni tecarriqquimeremaneza ticcadeni uimasiri tinebomanarri. Deozara tiquerrenarri” ohonanade. “Ticcadeni rrehenirri, tibodideni cacarriqquimere-manani auato taniuarrinepe Deo Attizara iboraqquiri tiquenarri. Uima bicanira tinanarizemanarri” oneza mari mari ohocanabaqqui narraride. ₂₁Nema onarizarraroa arri Deoza dada toqquimaza zodeodeni oua dama iquenaza oua inanazoqque-mananiuarrine dameraqquiri narraride. ₂₂Naraha Deo oua acco canazapa maride damera onarraroa arri damera onaniparri narraroparri. Narraroa arri Deo Pouarrine arriza ouarraroparri. Arri uati onarrarope parrissehera uati onarraro madirra bazima arramani toquerrenarrarideni, deni toquerrenarrarideni naco mittemanauiuarrine, onarraro. Occa marinarrape rrizera tani. Maittaccazama Moize, arra Deo Atti cacomeraqquiri narrarideni naco narrarossa narraro uati toquenaporrari. Pouadeni tezerremacca uimape arri imadizama parrissa torrarraroparri. ₂₃Narraro uimape arrima narraro: “Mesiapa narrizoue imeni tonauanaza uatiauitoui. Ppa izemanaraha nauatoniuitoui. Rricaporrarideni bazimapa niza zotodena nauatonimanauitoui. Naraha Mesiapa taide nauatonipouitoui. Nauatonizapa pina ziziniza ssiuarrani tossiuarrabaqquirrarossa naza pouana icassiuaueraniuarrine tauimarini auato inanezapa zodeodeni, zodeo querrena-rrararrarideni noccodeni ssire inanabaqquiuitoui” quenaporrari Deo Atti cacomeraqquiri narrarideni attidenipa −narrari Paoro.

₂₄Paoropa uima cappiraui uati uati taraha Pesto rrazirema atti atti narrari: —Paoro, tiape tissamorraro! Papeo uarride tirrireza tibodi tossamorraro! −narrari.

₂₅Naraha Paoro attipa: —Noue orrirani, tamine Pesto, obodi tossamo-rrerani. Parrissehera tiaza uati onarraro. Occa uima borocco tani, ssamo terrerani −narrari Paoro. ₂₆—Arra tamine Aquiripa arraza uittariui, pouazape occa uatinarra rrizera tani. Narraroa arri ocappine-rrereza poua mittauiuarrine uati uati onarraroparri. Rrehe tamine Aquiripazape Zeso tauimari bazima pouaza rrizera tani ouape nauato onani. Arri Zesoza uima inanemanarrarope auatoreheza uima inanarizemana-rrerarraro. Bazima qqui toquenarizarraride −narrari Paoro. ₂₇Nazapa: —Nirra tamine Aquiripa, Deo Atti cacomeraqquiri narrarideni dozo quenaporraroza parrissa terreraqui? Parrissa tani nauato onani −narrari Paoro.

₂₈Naraha tamine Aquiripa: —A, tettipe: “Amazati Cristoza torrana” tarrarorane? −narrari.

₂₉Nazapa Paoro attia: —Rrehe, peperrina amazati naqui bica tani. Zotode naqui bica tani. Tiadeni bazimape pina oua Zesoza rrehe onarrarossa tiquenaniuarrine Deoza uati uati ohonanarraro. Neraha corriti rrirehe, onarraro −narrari Paoro.

₃₀Nazama Paoro poua atti rricazapa tamine Aquiripa, Berenise, zama cacauade Pesto, arra pouadeniza queriqquimanarrarideni quenaza totememanarrari. ₃₁Nazapa touarrimanaui naza pouadenira uimahaha canarrari: —Arra Paoropa madirra ihinarrizobaqqui narrarazapa zoqqueuiuarrine ssamo tani. Toponi cocoroza uezauiuarrine naco uezauiuarrinepa noueraui −quenarrari.

₃₂Nazapa Aquiripaha Pestoza: —Paoropa tappa inaui bica taraha poua attipe: “Rromanodenicca tamine deni torrauicca pouana occa uima icattemaniuarrine” nazapa tappa inauiuarrine ssamo tani −narrari.