Zama cacauade zati Pestopa Paorocca uima mittarrari
1Nazapa Pesto zama cacauade torrauiuarrine oza panani Sezareauarri bacco narrari. Naui Sezareaza madiraha uada 3 naza oza panani Zerozareuarri toccarrari. 2Nauiza bacco taza dada toqquimade taminedeni, zodeodeni ime rrocouideni tezerrepa zama cacauade zatiza rraui torrezimarrari, Paoro tauimari uati toquenauiuarrine. —Paorocca uimape uaidira tani −quenaza uati uati toquenarrari. 3Pouadeni attipa: —Rrari tamine Pesto ettiza rrehe taqui? Paorocca uima uassinarra ticattemaniuarrine Zerozareuarri eccanimanauiuarrine uaua tana. Denima inarro-rrerana −quenarrari. Nama quenaraha rraui inidiza madirra pouadeni tonarrimemanaza Paoro inanazoqque-manauiuarrine narroremanaporraripa ecomemanarrari. 4Naraha Pestopa pouadeni attiza rrehe narrararrari. Poua attipa: —Paoropa Sezareauarri toponi cocoroza uezaui. Oua naqui arri Zerozareza occa uada uapi terrerani. Nani Sezareauarri occanibote nani −narrari. 5—Narrarorrine tiadeniza arrima onarraro: Ticcadeni taminedeni mota Sezareauarri ouaza rraui torranina, onarraro. Paoropa uimasiri carrirra carri-rrararra nauitide. Nani Sezareazana ticcadeni uima arri “Paorocca uimape uaidira tani” tiquenarraro ouaza uati nimanimana-pomauiuarrine, onarraro −narrari Pesto.
6Nazapa naui Zerozareza Pesto pocca uada 8 nitide, 10 nitide, nazana Sezareauarri toccanirrari. Bacco tanizapa uada ssiuarrana uima cacattemauarri toqquezimaza nauiza uima icattemaniuarrine uittarirrari. Nazapa Paoro eccarronemanauiuarrine uaua narrari. 7Naza Paoro bacco zimazapa Zerozareuarricca zodeodeni rrauirronarraridenia Paoro icauauarranimanaza tamine Pestoza uati toquenarrari. Uimasiri onihi, onihi uati uati toquenaraha attidenipa parrissa rrerani. Pina pouadeni uati toquenarrarissa narraro Pesto qqui tauiuarrine nouerezape ssamo tani.
8Nazapa Paoro manaco uati tarrari: —Ouape zodeodenicca marinarra onarrizo nerrerade. Zerozareuarricca Deoza dada toqquimauarri naqui onarrizo nerrerade. Rromanodenicca tamine deni torrauicca pouaza naqui uima onana nerrerade −narrari.
9Nazapa tamine Pesto zodeodeni inauatizebaqquiuiuarrine Paoroza uati tarrari: —Zerozareuarri ticcaniza nanizana ticca uima ocattemaniuarrine touini taqui? −narrari.
10Naraha Paoro attipa: —Ouape rromanodenicca uima cacattemauarri ouezarraroa. Arrizana occa uima cattemaniuarrine bica tani, onarraro. Zerozarezape poni! Occa madirra zodeodeni naco ohonarrizobaqqui narraraderra. Narraro uimape nauato tinani −narrari. 11—Uaidirehe onanezape occa uaidirehe manaconi ozoqqueniuarrine bica tani. Naraha attideni parrissa rrerezape pouadeniza oua teccoremananiuarrine bica terrerani, onarraro. Ouape rromanodenicca tamine deni torrauiccana occa uima icattemaniuarrine touini onani −narrari Paoro.
12Nazapa Pesto poua birri acco canadedeni tezerre uimahaha canarrari. Nazana Paoroza: —Rrehe, tiape rromanodenicca tamine deni torrauiccana ticca uima icattemaniuarrine touini tezape narrariza ticcanitoui −narrari Pesto atti.
Pestopa tamine Aquiripaza Paorocca uima uati tarrari
13Nazama uada onihizapa rromanodenicca zama arobeni onihiuarricca tamine onipa Aquiripa poua caripene Berenise tazarrani oza panani Sezareauarri uedarronarrari, zama cacauade Pestoza qquide. 14Nauiza poccadeni uada uapi taza Pestopa tamine Aquiripaza Paoro tauimari uati tarrari poua atti nerrecoma napazarra? naza. Pesto attipa: —Zama cacauade orraponipe toponi cocoroza madirra orraria bacco onapode. Zama cacauade Perisi inebozapa manaco ouana ouacauarraride −narrari. 15—Naraha zama cacauade orrapozape Zerozareuarri oqqueza zodeodeni dada toqquimade taminedeni, poccadeni ime rrocouidenima Paoroza boqueqquiri naui parra nazapa ouaza uati toquenade: “Paorocca uimape uaidira tani. Ticca zozosse tabaqqui ticazossebaqquirro, Paoro inanazoqque-manauiuarrine” quenarrari. 16Naraha pouadeniza ouattipe: Iape rromanodeni iquerrenezape madirra pouama ihinanazoqque narrararrari. Uima cacattemauarri bazima queriqquimanaza taide poua uadidedeni poccadeni uima uati toquenapozapa manaco poua pocca uima ecomerarraro. Nazana uima cacattemade: “Rrehe, zoqquena” nazapa zoqqueui bica taui. Naraha: “Zoqque-rrarana” nazapa zoqqueuiuarrine ssamo tani, ihinanarraro, onade pouadeniza. 17Nema onarrarorrinea Zerozareuarricca zodeodeni arrauarri rrauirronazapa uada ssiuarra uima cacattemauarri oqquezimarraro, inarro-rreraniuarrine oneza. Uima cacattemacca uiuittariza ouittarizape Paorotoui uaua onarrarode. 18Obodipe: Uimasiri oppina tanicca inanarraro nitide, onaraha poua uadidedeni uati toquenazapa nema nanicca uati toquena-rrarade. 19Pouadeni attidenipa: “Paoropa icca ididenicca marinarrassa nerrerarraro mari mari narizarrari. Pouapa arra zodeo madirra onipa Zeso narraricca uimaza parrissa naraha narrari Zesopa zoqquerrari” quenarrari. Naraha Paoro attipa: “Zesopa camittemaniza madiui parra naui” narrari. 20Narraro uima ouaza ssamo tezape peperri onade. Nezape Paoroza uati onade: “Zerozareuarri ticcaniza nanizana ticca uima ocattemaniuarrine touini taqui?” onade. 21Naraha Paoropa: “Ouape rromanodenicca tamine deni torrauiccana occa uima icattemaniuarrine touini onani” nade. Nazapa: “Rrehe, toponi cocoroza timadiccana. Niza icca tamineza tia zosse onanitoui” onade −narrari Pesto, Aquiripaza uati taza.
22Nazapa tamine Aquiripa attia: —Rrari Pesto, oua naqui Paoro atti omittana −narrari. Nazapa: —Rrehe, izamassana poua atti timittanitoui −narrari Pesto.
23Nazapa uada ssiuarra tamine Aquiripa, Berenise tazarrani madirra bazima: —A… tamine deni torrauicca −quenauiuarrine taminedenicca etero uatini ccara tanicca oro izimemanazapa uima cacattemauarri uedezimarrari. Pouadeni tezerre rromanodenicca isso teppeppedenicca taminedeni, oza pananicca deni toquerrenarrarideni rrauizimaza uima cacattema bodiuarri queriqquimanarrari. Nazapa Pesto Paoro eccarronemanauiuarrine uaua narrari. 24Paoro qquezimazapa Pesto atti: —Rrehe tamine Aquiripa, arri iaza tiqueriqquimanarraro naqui rridapana timittemananiuarrine tiadeniza uati onana. Arra qqui tiquenarraripa zodeodeni bazima pouaza uauadimana narrari. Oza panani Zerozareuarri oqqueza naqui pocca uima ouaza uati toquenarrari. Arri oza panani Sezareaza naco ouaza uati toquenarrari. Uatide dameraqquiri naza rroua rroua quenazapa pouaza: “Zoqquena, zoqquena” quequenanarrari. 25Poua uadidedeni attideni omitteraha pouapa uimasiri cappiraui. Poua uima inane-rrerezape inarrizomanaza inanazoqque-manauiuarrinepa oppina tani. Poua atti naco: “Rromanodenicca tamine deni torrauiccana occa uima icattemaniuarrine” nazapa ouape rrehe onade. Nazapa nauiuarri zosse onauitoui, onarraro −narrari Pesto. 26—Naraha icca tamineza poua zosse onazapa uima teppema zosse onauitouiraha pocca uimasiri tauimarini ssamo onezape nerreco uimara occa tamineza dozo onapazerre? onarraro. Narrarorrine Paorotoui uaua onarraropa. Rrari, rridapana pocca uima timittemanarri. Tamine Aquiripa, tia naqui pocca uima timittezape pocca uimasiri tiaza auato tanitide. Nema nezape pocca uimasiri tauimarini nauato oneza occa uima teppeza dozo onaniuarrine. 27Madirra toponi cocoroza uezazapa pocca uimasiri tauimarini ssamo onezape Icca tamine deni torrauicca pouauarri zosse onaui bica taco? Bica tarraraui. Uimasiri tauimarini dozo onerrerezape pina pouama zosse onarrarissa nauitoui −narrari Pesto.
