Zama cacauade Perisipa Paorocca uima mittarrari
1Nazapa Perisiza Paoro madiuicca uada 5 nazapa tamine Ananiapa oza panani Sezareaza bacco narronarrari. Pouapa oza panani Zerozareuarricca dada toqquimadedenicca tamine deni torrarrari. Pouaza rrauirronauipa ime rrocouideni mota, uima uauati toqquimade nauatobote orrari narronemanarrari. Uima uauati toqquimade onipa Teotoro. Nazama narraridenipa zama cacauade Perisiuarri rraui torrezimarrari, Paoroza uima inassonarimananiuarrine.
2Nazapa Paoro naco ua iquenaza qquezimazapa Teotoro poccadeni uadie uati tarrari Perisiza: —Nirra tamine Perisi. Tiape bica tineza tirrine rroneheza imadinissa zanaporrarode. Nauato tinezape icca zama Zodea bazima naqui tirrine tobicarizarraro. 3Rrehe tamine bicaui Perisi, tirrine iaza bica tezape “Bica tinani, deni tirrani” inarraro. 4Arri tiaza uatide naqui rrauirrarrona-rreraraha iaza uima torreza tiaza rrauirrarronarraro. Tiaza icca uima narro terreraniuarrine uima bazira tehe uati onana. Bica tinezape titauaribo canarri −narrari Teotoro. 5—Arrarrari madirrapa uima ponima inanarizarraro. Pouarrine zama uapimacca zodeodeni uadimanaza moua moua narizemanarrari. Pouapa Nazaretiuarricca Zesoza toquerrenarrarideni arra Nazareno quequenanarraridenicca tamine torrarrari. 6Pouarrine Deoza dada toqquimauarri oppina tehe torrabote neraha pouapa dama inade. [Nezape iqueriqquiza arri ia zodeodeni icca marinarra ua ineza narraroza pocca uima icattemana inarrarode. 7Naraha rromanodenicca isso teppeppedenicca tamine Risia ccarronaza pocca isso teppeppedeni dacorehema rrauizimazapa Paoro dama iquenaza iaccanimanade. 8Nazapa Risia attipa iaza: “Naui zama cacauade Perisizana Paoro tizauemanarro” naza tiaza ia zosse narronabaqquirraride.] Rrari, tiana pouaza uati tinarri. Poua atti timitteza attideniza parrissa tanitoui −narrari Teotoropa. 9Nauiza zodeodeni toqueriqquirrarideni attideni naco: —Teotoro attipa parrissa, Paorocca uimape uaidira tani −quenarrari.
10Nazapa manaco Paoro uati tauiuarrine Perisi poua zepe Paorouarri da icanaza Paoro uati tarrari: —Rrehe tamine Perisi, tiana occa uima timittaniuarrine touini onarraro, tiape uarrano uapi taha arrirraro zamaza madimanarraridenicca uima titicattema narraro. 11Maittazama onihima naza Zerozareuarri bacco onanirraro. Rridapanape uada 12 bacco tani. Naniza bacco onanipozape Deoza ouatizeniuarrine dada toqquimauarri oqquezimade. Touini tezape nauiza madimanarrarideniza uati tineza “Parrissa poua qqui inade” quenauitoui. 12Naraha arra rrauirronarraridenipa uima ponima onanarizani qqui toquena-rrararaha ouaza uadimanarraride. Ouape madirra tezerre arriuarri atti arriuarri atti inerrerade. Deoza dada toqquimauarri naqui madirraza moua moua onerrerade. Zodeodenicca Deo Atti mamariuarri naqui moua moua onerrerade. Arri ozaza, amossiniuarri naqui moua moua onariza-rrerade. 13Nema nezape pouadeni atti tossamorraro, orrine uima nouereza. Pina pouadeni uati toquenarrarissa narraro auatomaniuarrine ssamo tani −narrari Paoro.
14—Naraha ouape uima orrarie ocarrirrarope arrima onarrarode: Abi Deopa, arra icca ididenicca Deo, Pouazara ibora onarraro. Naraha Deocca zossenirri zatiza parrissa onezape arrarrari zodeodeni mota narraroza: “Rriza tani, uaidira tani” quenaraha. Ouape Moizecca marinarra bazimaza naqui parrissa onarraro. Deo Atti cacomeraqquiri narraridenicca dozonirriza naqui parrissa onarraro. 15Ouape arri touini omadirrarope pina ouimecote zodeodeni touini madimanarrarissa narraro. Narraro arri rricarraridenipa Deorrine niza nauatonimanauitoui, ihinanarraroparri. Bicaqquiri narrarideni rricarrari naco nauatonimanauitoui. Uaidiraqquiri narrarideni rricarrari naco nauatonimanauitoui, ihinanarraroparri. 16Narraro touini onezape obodi uisso tehe omadiniuarrine damera onarraro. Deo oua qqui, madirradeni naco oua qqui toquenazapa ocappina-rrerarraro −narrari Paoro.
17—Rrehe, nezape uarrano uapi taha zama onihiuarri occarizade. Nazama nauiuarricca madirradeni ouaza ziniro da iqueneza ouaccanirraro, ouimecote Zerozarecca zodeodeni cappiremanarrarideniza da onarizaniuarrine. Oua naqui Deoza da onaniuarrine occanirrarode. 18Nema onezape Deoza dada toqquimauarri oqquezimarraroparride. Pina ia zodeodeni icca marinarrassa ihinana narraro onanarrarode. Narraro rriquezape occa danirri Deoza dade oqquezimeza oua qqui toquenarrari. Madirra uapi taha ouaza rraui torrezima-rrararrari. Orrine naco madirra moua moua cana-rrararrari. 19Naraha zama Asiauarricca zodeodeni nauiza oua qqui toquenazapa ouaza uadimanarraride. Narraridenina tiauarri rrauirronaza poccadeni uadie tiaza uati toquenauiuarrine bica taraha, onarraro. 20Naraha Asiauarricca zodeodeni noue querazapa arraza domo uarraridenina rridapana tiaza uati toquenana, onarraro. Naui zodeodenicca uima cacattemadedeni deni toquerrenarrarideniza oqquezimeza uaidira tanicca onanarraro qqui toquenarrari uati toquenana, onarraro. 21Arri uima orrarie uati onarrarora uati toquenauitide. Arra pouadeni baccouarri ouaza rrazirema ouatti arrima onarrarode: “Rricarraridenipa nauatonimanauitoui ohonanarrarorrinea oua inarrizomananiuarrine touini quenarrari” onarrarode. Narraro tiaza uati toquenauiuarrine uitide −narrari Paoro.
22Nazapa zama cacauade Perisi narraro mittazapa: —Peperriccani, denimape uada onihizana −narrari. Zeso Cristoza rrehe quenarrarideni tauimari arri —Deocca zossenirri zati −quequenanarrari pouaza rrizera tarraro. Nazapa Paoroza uati tarrari: —Niza, isso teppeppedenicca tamine Risia arrauarri bacco naza ticca uima ocattemaniuarrine −narrari. 23Nazama isso teppeppe zossedeza uati tarrari: —Paoropa toponi cocorouarri cadeia rriraha tecauauissa taccana −narrari. —Poua tessedeni naco pouaza qquide rrauirronauiuarrine oppinera tani. Poua cappirauicca eccarronemanauiuarrine naco oppinera tani. Zosse tinanibaqqui tarrarana −narrari Perisi atti.
24Nazapa uada onihiza Perisipa Sezareauarri bacco nanirrari, pocca amonerre Drosira tazarrani. Ponipe zodeo madirra. Perisipa Paorotoui uaua naza pouadeniuarri eccanimanarrari. Nazapa Paoro Zeso Cristoza rrehe inani tauimarini mari icanabaqquizapa tauaribobo canarrari. 25Nazama Paoro mari icanabaqquizapa uima 3 nehe uati tarrari: —Madirra uimari borocco tanina bica tarraro −narrari. —Madirra uimasiri inana-rreraniuarrine poua poua cacauade nauato tarrarina bica tarrari −narrari. —Nizaranibote Deouarri bazima idomo ueza Deona icatterriza-baqquiuitoui −narrari Paoro maride torraza. Naraha Perisi mittaza cappinazapa Paoroza: —Peperriua, ticcanina. Niza ozepe rrirapomezape titoui uaua onapomanitoui −narrari. 26Perisi poua bodipa: —Poua tappa onauiuarrine ouaza ziniro da inanitide −nazapa uarrirriraza Paoroza uati tauiuarrine pouatoui uaua uaua naraha ziniro da inerrerarraro. 27Nama zanapozapa uarrano pamaha tossoniqquimarrari. Nazapa tamine Perisi zama cacauade nebozapa Porsio-Pestona zama cacauade torrarrari. Naraha Perisi pouaza zodeodeni uatizemana-zanapouiuarrinepa Paoro tappa inarrararrari.
