1Nazapa Paoro zodeodenicca uima cacattemadedeniuarri tocatta naza uati tarrari: —Ouimecotedeni, ouape obodi bica teza omadinissa tarraroa arri rridapana omadirraroparri. Deoza naqui occa madie auato tarraro −narrari Paoro.
2Naraha dada toqquimadedenicca tamine deni torrarrari Ananiapa naui Paoro uinoriza madirra domo uarrarideni icazossebaqquirrari: —Arrari ppa tizimemanarro! −narrari. 3Naraha Paoro pouaza uati tarrari: —A, tiape mamaizade! Niza manaco Deopa tia ppa tacossauitoui! Uima cacattemade tirreraha uima oppina tani titinana narraro. Moizecca marinarra nauato tinezape pina occa uimara ticattemanitouiraha. Ouarrari ppa izimemananiuarrine ticazossebaqquizapa Moizecca marinarra zori tinanarraro −narrari.
4Naraha naui Paoro uinoriza madirra domo uarrari attidenia: —Nerrecotoui Deoza dada toqquimadedenicca tamine deni torrarrariza tetti uaidira teza uati tinarraro? −quenarrari.
5Nanarra Paoro pouadeniza uati tarrari: —Ouimecotedeni, pouapa dada toqquimadedenicca tamine deni torrarrari ssamo oneza pouaza atti atti onarraropa. Arri Deo Atti dozo nanizape: “Madirradenicca tamineza tamassomana terrerarri” nani. Narraro uima nauato oneraha −narrari Paoro.
6Nazapa Paoro bodi nauato tarraria arra zodeodeni motaha arra marinarra onini parizeoza rrehe quenarrarideniparra. Poccadeni marinarrape onihi ecauemanarraro. Zodeodeni motaha arra marinarra onini sadoseoza rrehe quenarrarideniparra. Poccadeni marinarrape onihi ecauemanarraro. Nazapa parizeodeni pouaza uatideni uanaqquiri nauiuarrine Paoropa rrazirema uati tarrari: —Ouimecotedeni, ouape marinarra parizeoza rrehe onani, occa abi naco rrehe narrari. Nazama ouape arra rricarraridenipa nauatonimanauitoui ohonanarraro. Narraro occa uimarrinea ouaza uadiqquiri narraridenipa oua inarrizomananiuarrine touini quequenanarrari −narrari Paoro.
7Paorocca uima nema nani mittemanazapa parizeodeni, sadoseodeni tezerre pouadenira boquemanaza zaua zaua canarrari. Nazapa uima cacattemadedeni uima inapamemanezapa rrehe canire-rrararrari. 8Arra marinarra sadoseoccape: —Izoqquezape inauatoninira tani, Deocca zozosse tabaqqui memeuarricca naco noueraui, icorime naqui nouerani −quequenanarrari. Naraha marinarra parizeoccape: —Izoqquezape inauatoni tani, Deocca zozosse tabaqqui memeuarricca naco madimanaui, icorime naqui icarrini −quequenanarrari. 9Nazapa sadoseodeni parizeodeni tezerre poccadeni marinarra acconi cauadirezapa rrazirema zaua zaua canarrari. Nazapa zodeodenicca marinarra maridedeni mota arra marinarra parizeoza rrehe quenarraridenina Paoro atti acco icanemanauiuarrine totememana narrari. Nazapa uati toquenarrari: —Arrarrari madirrapa uimasiri cappiraui. Nerrecotoui tinarrizomanauiuarrine? Tocorime uitide, Deocca zozosse memeuarricca uitide pouaza uati tarrari −quenarrari.
10Naraha uadimanaza denima parra moua toquenariui nazapa isso teppeppedenicca tamine cappinarrari. Paoro arrauarri rroca arrauarri rroca iquenaui qqui taza poua bodipa: —A, inatarrorimanaza zoqquerana −naza pocca isso teppeppedeni rrauirronauiuarrine uaua narrari: —Paoro inanazoqque-manabote naui! Qqui tiquenarro! Dama tiquenaza icca ozauarri tiaccanimanarro −narrari. Nazapa poccadeni ozaza uezapomarrari Paoro.
11Narraro zomepe ia Zozossede auatoza Paoro uinoriza ua narrari. Pouaza uati tarrari: —Paoro, daco tirrirana! Arri orrine qqui tinarraro, timittarraro naqui arri Zerozareza tecomerarizarrarope niza oza panani Rromauarri naqui tecomerapomanitoui −narrari.
Paoro zoqqueuiuarrine narroremanarrari
12Uada ssiuarrapa zodeodeni mota queriqquipomaza pouadenira Paoro inanazoqque-manauiuarrine rrehe canirerrari. Nazapa attidenia: —Paoro inanazoqque-rraraccazama irripa-rreraccana, ze inerreraccana −quenarrari. —Arri ettissa inane-rrerezape Deo ia tonarrizo-baqquiza bica tani, inarraro −quenarrari. 13Nazama arra Paoro inanazoqquena quenarraridenipa madirra 40 denima queriqquimanarrari. 14Nazapa dada toqquimade taminedeni, ime rrocouideni tezerre pouadeniza uatide rraui torrarrari: —Iape uima inarrorarraro, Paoro inanazoqqueuiuarrine. Inanazoqque-rraraccazama irripa-rreraccana, inarraro. Ettissa inane-rrerezape Deo ia tonarrizo-baqquiza bica tani, inarraro −quenarrari. 15Nazapa: —Rrari, arrima inana: Tiadenipe uima cacattemadedeni tezerre arra rromanodenicca isso teppeppedenicca tamineza timaizemanana. Arrima tiquenarri: “Paorocca uima icattemanissa taniuarrine poua atti denima imittana, ineza Paoro arrauarri teccarronapomana” tiquenaza eccarronemana-pomauiuarrine. Nazama iape arri rrauiza inarroraza iaqqueqquime-manazapa Paoro inanazoqqueuiuarrine −quenarrari.
16Naraha Paoro poua rridobadipa birredi zodeodeni rrara quenauicca uima mittazapa isso teppeppedenicca ozauarri birrediza uatide toccarrari. Bacco taza toqquezimazapa Paoroza poua rrara iquenauicca uima uati tarrari. 17Nazama Paoropa rromanodenicca isso teppeppedeni zossede orrariaza uaua nazapa pouaza uati tarrari: —Rrari, arrarrari zabisso ticca tamineza tiaccanirro, pocca uima uati tauiuarrine −narrari.
18Nazapa pocca tamineuarri zabisso iaccanizapa pocca tamineza uati tarrari: —Arra Paoro toponi cocoroza uezarraripa ouaza uaua naza atti arrama narrari: “Arrarrari zabissopa ticca tamineza tiaccanirro, pocca uima uati tauiuarrine” naza ouaccarronarrariparra −narrari.
19Nazama rromanodenicca isso teppeppedenicca tamine deni torrauiccapa zabisso birri dama, madirra ouaha mittemana-rrarauiuarrine madirra nouerauiuarri iacca-cca naza uati tarrari: —Nirra nerreco uimara ouaza uati tinaniuarrine? −narrari.
20Nazapa zabisso attipa: —Rrehe, zodeodeni occa coco inanazoqque-manauiuarrine rrehe canireui omitteza uatide occarronarraro. Izamassapa poccadeni uima cacattemadedeniza Paoro tiaqquezimapomauiuarrine tiaza uati toquenauitoui: “Paorocca uima icattemanissa taniuarrine poua atti denima imittaccana” quenauitoui. 21Naraha pouadeni attiza rrehe terrerana −narrari. —Madirra 40 quenauitide, denima uitide, rraui inidiza pouadeni tonarrimemanaza occa coco tossoniqquimazapa inanazoqque-manauitoui. Nazama attidenipa arrama quenaui omittapa: “Inanazoqque-rraraccazama irripa-rreraccana, ze inerreraccana. Ettissa inane-rrerezape Deo ia tonarrizo-baqquiza bica tani” quenaparra −narrari. —Narraro uima narroremanarrari. Rrehe tanitoui madimanaccaui −narrari Paoro rridobadi. (Paoro caripene bedipa)
22Naraha isso teppeppedenicca taminea: —Rrehe, peperri, omittani. Ticcanina. Naraha: “Isso teppeppedenicca tamineza uati onapa” terrerana. Tecomana, onarraro −narrari.
Paoro inanazoqquemana-rrarauiuarrine zama cacauade Perisiuarri iaqquemanarrari
23-24Nazapa isso teppeppedenicca tamine arra zama arobeni Zodea cacauade Perisiza Paoro zosse inauiuarrine isso teppeppedeni zossede pamaha uaua inabaqquirrari. Uedarronazapa pouadeniza uati tarrari: —Ticcadeni isso teppeppedeni tinanarrorariza-baqquimanarro. Niza zome 9'za oza panani Sezareauarri rraui tirrarri −narrari. —Isso teppeppedeni 200 quenaha pouadeni amoriza rraui torrana. Cavaro ideniza naco 70 quenaha rraui torrana. Uauarrinama rraui torrauiuarrine naco 200 quenaha rraui torrana. Cavaro orrariazana Paoro toccauiuarrine. Paoro tecauemanauissa taza zama cacauade Perisiuarri bacco tauiuarrine −narrari. 25Nazama isso teppeppedenicca taminepa zama cacauade Perisiza uima teppe dozo inarraro.
26—Nirra zama cacauade bicaui Perisi. Bica tinaqui? Ouape Craodio Risia tiaza occa uima dozo onarraro. 27Arrarrari madirra tiaza zosse onarraripa zodeodeni dama iquenaza inanazoqque-manauiuarrineraha poua attipa: “Rromano madirra orrani” naui omitteza oua occa isso teppeppedenima poua ecauarrari. 28Nazama obodipe: Nerreco uima carriza zodeodenipa poua onarrizouiuarrine touini quenarrari? oneza poccadeni uima cacattemadedeniza ouaqquezimarrari. 29Nauiuarri uimarideni omittarrarope Paoro pocca uimape zodeodenicca marinarrassa nerrereza pouaza uadiqquiri narrari. Pouapa uadie cappiraraha “Zoqquena” quenarrari. Naraha uima uaidira tani cappiraza zoqqueuiuarrine bica terrerani, onarraro. “Coro tozimana” quenaraha uima cappirazapa coro tozimauiuarrine ssamo tani. 30Naraha zodeodeni motapa: “Paoro inanazoqquena” quenaui uima omittezape uassinarra tiauarri zosse onarrari. Nezape zodeodeniza uati onarraro: “Paoroza boqueqquiri tiquenezape zama cacauadeuarri rraui tirrarri, pouazana ticcadeni uadie tecomeremananiuarrine” onarraro. Rrehe, peperri, occa uima. Oua onipe: Craodio Risia −narrari pocca uima teppeza.
31Nazapa isso teppeppedeni zome Paoro iaqquemanazapa oza panani Atipatriza bacco toquenarrari. Pina poccadeni tamine pouadeni zosse inabaqquipoui attissa inanemanarraro. 32Uada ssiuarrapa isso teppeppe pouadeni amoriza rraui torrarraridenipa pouadeni tazariuarri dozonimanarrari. Naraha cavaroza rraui torrarraripa Paoroza rraui torraccaui. 33Nazapa oza panani Sezareaza bacco toquenazapa zama cacauade Perisiuarri rraui torrezimaza uima teppe da iquenarraro. Paoro naco pouaza inebomanarrari. 34-35Nazapa Perisipa uima teppe ua inehe rriquezape Paoroza uati tarrari: —Nerreco zamauarricca tirrani? −naza Paoro: —Zama Sirisiauarricca orrani −narrari. Nazapa: —Niza tia rraradedeni bacco narronemanazana ticca uima omittaniuarrine −narrari Perisi. Nazapa pocca zozosse tabaqqui icazossebaqquirrari, tamine Erodi tazariboteza Paoro ecauemanauissa tauiuarrine.
