Atos 20

₁Oza panani Epesodenicca mouanirri rriqueza Paoropa Zesoza rrehe quenarrarideni queriqquimanauiuarrine uaua inabaqquirrari. Nazapa atti bica taza pouadeniza uati tarrari, bodideni uatizemanauiuarrine. Naui zotodepa poua attia: —Rridapanape Masedoniauarri occapomana −nazapa: —Rrehe, ticcarri −quenaza toccarrari. ₂Naui Masedoniauarricca Zesoza rrehe quenaporrarideniza bacco tarizapomaza mari icanabaqquipomarrari. Atti bica taza inauatize-baqquirizarrari. Zotodepa Cresiauarri bacco tapomarrari. ₃Nauizapa abazico 3 canaha madiccarrari. Zotodepa zama Siriauarri darroni imeniza toccaniuiuarrineraha Paoro poua inarrizomanauiuarrine zodeodeni narroremanaui quenaui mittarrari. Nazapa: —Zamana occaniniuarrine −naza poua natti Masedoniauarri tozodonirrari. ₄Nazama Paoroza rraui torrarraridenipa Bereauarri madirrari Piro bedi Sopatero tocca, Tesaronicacca pamaha Aristaco tocca, Secondo tocca, Derbeuarricca Caio tocca, Timoti tocca, Asiauarricca Tiquico, Tropimo tezerre toueda, arri oua Roca naqui Paoroza occarrarode. ₅Nazapa motadenia taide oza panani Troadeuarri rraui torraporrari. Troadeza bacco toquenapozapa itoui madimanarraride. ₆Naraha iape zodeodenicca errete imenibote Pao ssarra tarrarauicca rricazana arri oza panani zama Piripoza irroppemarraro. Darroni imeniza iaqquezape icca uada 5 nazana Troadeza itessedeni bacco inabaqquide. Nanizape uada 7 nehe imadirrarode.

₇Nezape rrassinarracca uada rriquezape narraro zomeza arra Zeso zoqqueui tauimari ibodi uatomaniuarrine, pao dize nariui irripaniuarrine iqueriqquirrarode. Paoro attipa: —Izamassape denima rrauirraniuarrine −naza Zesoza rrehe quenarrarideni mari icanabaqquizapa zome nocconi torrade. ₈Nazama iape oza capamacossarraro tetepiuarricca coba canauarraniniza iqueriqquirrarode. Nauizapa rrorrororo carri tarrari, carrororori narizarraride. ₉Nauizana zabisso oni Eotico noccobirriza uittari canarraride. Naraha Paorocca marinarra arabo tezape zabisso uadarrari. Oza tetepiuarricca coba canauarranini uarri teraha ssonaha uatiarra nade. Idimemanaraha uatiauira idimemanarrari. ₁₀Naraha Paoro rroppa taronarrari, zabisso uatiarrari uarri tocatteza naza, icauarrocossa rrari. Nazapa Paoro pouadeniza uati tade: —Orri orri tiquenerrerarri, camittemaniui −nade.

₁₁Nazapa Paoro ccamaronipomaza pao dize inariza iaza da inarizazapa apa inade. Nazapa Paoro denima maride torrazapa icassiuarrade. Nazapa maride rricaza toccarrari. ₁₂Nanarra zabisso camittemaniuipa pocca ozauarri iaccanimanaza uatizemaneri tanimanade.

₁₃Nazapa Paoro: —Ouape rraui occana. Tiadenipe darroni imeniza rraui tirrarri. Oza pamehema narraro onini Asaoza otoui timadimanaccana −narrari. Nazapa Paoro rraui toccaza iape darroni imeniza iaccarraro… Asaoza bacco inade. ₁₄Naui Asaoza Paoro bacco naza darroni imeniza qquezazapa iaccapomade. Iaqquezape oza pamehema narraro onini Mitireneza uana icanade. ₁₅Uada ssiuarra irroppemapomezape zama uittacossani Quioza uana icanade. Naniza irroppemapomezape oza panani Epesozape issoniqquimade. Zama uittacossani Samosozana uana icanade. Naniza irroppemapomezape oza panani uarrira tanicca oza pamehema narraro onini Miretoza uana icanapomade. ₁₆Paoropa arri zodeodenicca errete Pentecostes bacco tabote naza narraro qquide touini naza: —Zama Asiauarri inarro-rreraccana, uassinarra oza panani Zerozareuarri rrauirrana −nade. Narrarorrine Epesozape uana icana-rrerarrarode.

₁₇Nazama Miretoza imadizape Paoro Epesouarricca Zesoza rrehe quenarrarideni cacauadedenitoui madirra zosse inade: —Oua qquide rrauirronana −naza. ₁₈Bacco narronemanazapa Paoro pouadeniza uati tade: —Maittaccazama ticcadeni zama Asiauarri bacco onapozape oua qqui tiquenade. Tiadeniza omadiza naqui omadinissa tani nauatoto tinani. ₁₉Ia Zozossede Zeso Cristocca zozosse orrezape poua tauimariza ozepe irririzade. Obodipe deni orrani ohonana-rrerade. Ocassereherrine orri orri oneraha nema nehe ozepe ihirri nade. Arrina ozoqqueniuarrine zodeodeni occa madirraraha oua dama iquenabote naza naqui ocasserani ouarizade. ₂₀Naraha ouape ocappine-rrereza nema nehe timadimananissa taniuarrinecca tiadeni maride damera onarraro. Madirra quequeriqquimana nauiuarri bazima mittemanauiuarrine naqui mari mari ohocanabaqqui nade. Oza carrari carrariza naqui tiadeni mari mari ohocanabaqquiriza nade. ₂₁Arri zodeodeni, zodeo querrena-rrararrarideniza naqui Zeso Cristo tauimari mari mari onarizezape ouatti arrima ohonanarrarode: “Ticcadeni uimasiripe tinebomaneza Deozara iboraqquiri tiquenarri. Ia Zozossede Zeso Cristoza parrissa tiquenarri” ohonanarrarode.

₂₂—Naraha rridapanape Zerozareuarri occana. Deo Corime ouaza uati tapode: “Oza panani Zerozareuarri ticcana” nazapa Poua Attiza ibora onarraro. Naraha ouaza uima torranitoui. Nerreco uimara inanemananiuarrine? Ssamo onaccani. ₂₃Naraha uima orrariepe nauato onani. Zerozareuarripe ocasserehe imeni onauananitoui. Deo Corime ouaza uati tarrari: “Cadeiaza tia rrore iqueneza tia coro izimemananiuarrine titoui narroremanaui” napode. Oza uapima occarizeza naqui narraro uima Deo Corime ouaza uati uati tatarra napode. ₂₄Naraha ouape narraro uimaza ocappina-rrerani. Oua inanazoqque-maneza naqui peperri, bica tani. Oua Zozossede Zeso Cristo oua cazosserraricca uimaza ouatizezape orrine parrirenissa taniuarrine, onarraro. Arra oua cazosserraripa Deo madirraza uati cauanari canauicca uima bicani mari mari ohonanarraroparride.

₂₅—Nazama uima onihi obodiza nauato onarraro naqui. Arri tiadeni occa mamari tabaqqui Deocca cacauehe tauimarini tiadeni mari mari ohocanabaqqui narrarope oua qqui timanimanapoma-rreranitoui. _26-27Narrarorrine arri rridapana tiadeniza uati onarraroparri. Arri Deo Pouarrine madirraza inananiuarrinecca uima nemanehe mari mari onarraro motape ouacoma nerrerarraro. Naraha madirra motadeni ouatti mittemanaraha parrissa quena-rrarazapa pouadenirrine Deocca uadie pouadeniza ssonarinitoui. Pouadeni emene toccarrarope orrine rrerani, onarraro.

₂₈—Nazama ouattipe tiadeniza arrima onarraro: Deoza timadimananissa taniuarrinepe tiadeni tecauemanarri. Zesoza rrehe quenarrarideni, arra tiadeniza quequeriqqui narrarideni naco tecauabaqqui-manauissa tarro. Deo Corimerrine pouadeni cacauade tiquerrenarraro. Deocca madirra pouadeni manaconepa Deo Poua Bedi zoqqueza poua emene toccarraro. Narrarorrine pouadeni tecauabaqqui-manauissa tarro, onarraro. ₂₉Niza oua noue orrirezape madirra ouahadeni tiadeniza bacco quenazapa poccadeni marinarra maizehecca mari icanabaqqui-rizauitoui. Pouadenipa pina zouazoua uadibote bani bedi itaccarizaza rricarrarissa quenauitoui. Tiadeniza ssonarimanaza Zesoza rrehe tizanapomana-rreraniuarrine dameraqquiri nauitoui. ₃₀Arri tiadeni titiqueriqquimana narraro motadeni naco maizeheza toquerrenauitoui. Poccadeni maizehera mari mari quenazapa arra Zesoza rrehe quenarrari pouadenizara toquerrenauiuarrine touini quenarrari.

₃₁—Nema nezape tiadeni bazimaza ouattipe: Parri! Poccadeni maizeheza parrissa tiquena terrerarri. Tibodideni uatome-manarri. Ouape tiadeniza omadizape tiadeni ouacauabaqquinissa tade. Uarrano 3 naha tiadeni maride orrezape zomema mamari, ssiuarrama mamari onade. Timadimananissa taniuarrine oneza occa orriema tiadeniza uati uati onarrarode.

₃₂—Ouimecotedeni, rridapanape Deoza timadimanana, tiadeni onebobaqquini. Deo tiadeni touacaua-baqquiuissa tauiuarrine Pouaza uati uati ohonanarraro. Deopa madirraza uati cauanari canaui tauimari tiadeniza uati onarrarode. Pocca touati uanehe tauimarinirrinena ticcadeni rrehenirri todacorani nanitoui. Deo Poua uati taporraricca uima bicani tiadeniza da inanitoui. Narrarope arra pocca madirra toquerrenauiuarrine icatterriza-baqquirrari bazimaza da inarizanitoui. Pina poua uati taporrarissa narrari −narrari Paoro.

₃₃Nazapa denima uati tarrari: —Ouape ticcadeni ziniro toui, ticcadeni etero toui onerrerade. ₃₄Tiadenipe occa madie nauatoto tinade. Ouape oua ozepeza tarabaia onezape ziniro ohocarri narraro. Narraro ziniroza otapari mitta, oua accodedeniza mitta ohonariza narrarode. ₃₅Nema onezape occa madie auato onaneza qqui tiquenarraro. Ozepe irriza ohocarri narraro. Nezape ocarriza madirra cappiremanarrarideniza naqui da da ozanaponiuarrine oparrireni. Tiadeni naqui nema tiquenani bica tani. Nezape pina ia Zozossede Zeso Cristo attissa tinanemananiuarrine: “Madirra iaza manaconi rrirehe da iquenazapa etize tani. Naraha ia naqui madirra ouahaza manaconi rrirehe da inazana denima etizerraro” −narrari Paoro.

₃₆Paoro pocca uima uati taha rricazapa arra Epesouarricca Zesoza rrehe quenarrarideni cacauadedenima Deoza uati toquenauiuarrine pouadeni pitoza rrassi tarrari. ₃₇Nazapa bazima Paoro orri icanaqquimanaza icauarrocossemana, pano mose iquenarrari. ₃₈Nazapa Paoro attia: —Oua qqui timanimana-rreranitoui −napoza pouatoui bodideni uatome-manaza bodideni uanacossarrari. Nazapa Paoro darroni imeniza toccauiuarrine qquide rrauizippade.