Paorocca bobode oza panani Tirouarri
1Nazapa imecotedeni inebobaqquiza darroni imeniza rrauirrezeza parri iaccarirrarope zama bedeni uittacossani Cosoza uana icanade. Uada ssiuarra rrauirrapomezape zama bedeni uittacossani Rodaza uana icanapomade. Naniza irroppemapomezape oza panani Pataraza uana icanade. 2Naniza darroni imeni onihi zama arobeni Penisiauarri touaccaniuarrine canarrorani qqui icanade. Nezape narrarozana rrauirrezezape rrippeuarri iaqquerrizade. 3Nezape passo imeni nocconi iquerrenaza zama onihi uittacossani qqui inade, oninipe Sipre. Naraha narraro zamazape issoniqquimade. Denima iaccarrarope zama Siriaza bacco inade. Nanicca oza panani Tirozana uana icanezape darroni imenicca tozepetarri inebomananiuarrine narromanaza rrauirremoraccade. 4Nani Tiroza Zesoza rrehe quenarrarideni bacco inabaqquirraride. Nazapa: —Iaza timadimanaccarri −quenazapa pouadeniza uada 7 nehe imadide. Nazapa Deo Corimerrine Zesoza rrehe quenarrarideniza Paoro tezerremacca uima auato inaneza Paoroza uati toquenarrari: —Zerozareuarri tiqquerrerana. Tiqquezape ocasserani tenitoui −quenade. 5Naraha naniza icca uada 7 nezape Zerozareuarri rrauirraniuarrine irroppemapomade. Darroni imeniuarri rrauirrezippanizape pouadeni naco maqquiderre, amonerre, erredeni bazima ia qquide rrauizippade. Nezape nani ssiquiza ipitoza rrassi inaza Deoza uatide iquerrenade. 6Deoza uatide rriqueza: —Rrauirrani −inezape: —Rrehe, rraui tirrarri −quenade. Darroni imeniza rrauirrezanizape pouadenipa poccadeni ozauarri rraui torremoranide.
7Nezape oza panani Tiroza iaccarrarope oza capamema narraro onini Pitoremaidaza uana icanade. Naniza rrauirremoreza naqui Zesoza rrehe quenarrarideni qqui inabaqquide. Naniza naqui pouadeniza uada orrarie imadide. 8Uada ssiuarra iaccapomezape oza panani Sezareaza bacco inade. Nanizape Piripicca ozauarri rrauirrade. Pouapa totapari dadade 7 quenarrari orraria. Poua naco madirra Zesoza rrehe quenauiuarrine mari mari narizarrari. Iape pocca ozaza imadirrarode. 9Piripicca erredenipe tabira 4 quenarraro. Ponidenipe Deo Atti uauati toqquimadedeni. 10Naniza icca uada touapiniza zama Zodeacca madirra Deo Atti uauati toqquimade Acabo bacco narronarraride. 11Nazapa iaza bacco narronaza Paorocca ssoquepe dicca ineza Acabo poua birri pouarrine rrore, poua isso rrore naza Paoro tezerremacca uima iaza uati uati tarraride: —Deo Corime ouaza uati tarrari arrama naui: “Niza Zerozareuarri bacco tiquenezape arrirraro ssoque rrinedepa zodeodeni dama iquenaza birri rrore, isso rrore iquenaza zodeo querrena-rrararrarideniza da iquenazapa tozepe torrauitoui” narrari. Arri, oua rrore onarrarope ssoque rrinede nama inanemanauitoui −nade Acabo atti.
12Nezape narraro uima ia, Sezareacca Zesoza rrehe quenarraridenima imittezape orri inabote naza Paoroza uati uati inade: —Zerozareuarri tiqquerrerarri! −inade. 13Naraha Paoro attipa iaza arrama nade: —Nerrecotoui orri orri tiquenarraro? Nema tiquenezape tirrinedeni oua naqui titouideni obodi orri onani. Naraha ouape nema nehe Zerozareuarri occanitoui. Ia Zozossede Zesocca orrezape peperri, nema nehe oua rrore iquenaza naqui oboque-rreranitoui. Oua inanazoqque-manerre oua inanazoqque-manerrererre nanitide. Nema nehe onarrorani. Zeso oni deni torraniuarrinepe oua nema inanemanana, onarraro −nade Paoro.
14Nazapa Paoro ettiza rrehe narrarazapa denima uati inerrerade. Nazama ettipe: —Abi Deo, Pouana nauato taui. Ia Zozossede Poua nacassa tauiccana bica tani −inade.
15Zotode uada onihizape izepetarri inarrorehe rriqueza Zerozareuarri rrauirrade. 16Imecotedeni Sezareacca mota naco iaza rraui torrarraride. Zerozareuarri bacco inezape pouadenina Masonacca ozauarri ia tonequebaqqui-manarraride. Arra Masonapa zama uittacossani Sipreuarricca madirra. Taidezama Zesoza rrehe naporrari. Narraricca ozaza imadirrarode.
Paoropa Zerozarecca Zesoza rrehe quenarrarideni cacauadedeniza qquide toccarrari
17Oza panani Zerozareza bacco inezape imecotedeni naui Zerozarecca uatizemanazapa iaza. 18Uada ssiuarrape Paoro ineza Zerozarecca Zesoza rrehe quenarraridenicca tamine Tiacoza qquide rrauirrade. Nauiza Zesoza rrehe quenarrarideni cacauadedeni bazima queriqquimanarraride. 19Naniza bacco inezape Paoro pouadeniza nirra nazapa pocca bobodecca uima nemanehe pouadeniza uati uati tade: —Deocca dacorehe ouaza torrezape zodeo querrena-rrararrarideni naco Zesoza rrehe narizemanarrari −nade Paoro. 20Nanarra Paorocca uima mittemanazapa Deoza uatizemanaza: —Deocca uimana bica tani, bica tani! −quenade.
Nazapa Tiacodeni Paoroza uati toquenade: —Rrehe imecote, tiape nauato tinani: Arraza naco zodeodeni Zesoza toquerrenarrari rrica-rraraui. Naraha pouadenipa Moizecca marinarraza dameraqquiri naui parra naccaui. 21Titauimari mittemanarrari, arra icca madirra zodeodeni zama uarri taniuarri zodeo querrena-rrararraridenicca zamaza madirizemanarrarideni mari ticanabaqquirizarrari. Naraha titauimari pouama uati uati quenarraridenipa arrama quenarrari: “Paoro mari mari nanariza narraripa Moizecca marinarra ecauemana-rreraniuarrine, erredeni maqquiderre zopori cotani eterori uissinarra carrimana-rrarauiuarrine, zodeodenicca madie inebomananiuarrine naqui mari mari nanariza narrari” quenarrari. 22Nezape nerrecoma inaniuarrine? inarraro. Pouadenipa bacco tarronani mittemanazapa tiaza uima inanemanerana −quenade Tiaco, Zesoza rrehe quenarrarideni cacauadedeni tezerre. 23—Nema nezape pina ettissa tinanani bica tani. Arra iazapa maqquiderre 4 quenaha poccadeni uatinarra Deoza uati toquenaporrari inaparriremananissa taniuarrine narroremanaui. 24Tia naqui pouadeniza ticarrimana Deoza dada toqquimauarri pouadeni tiaqquezimabaqquina. Tia naqui pouadenizama pina arri zodeodenicca marinarrassa tinanarri. Nazama poccadeni uatinarra inaparriremananissa teza poccadeni danirriuarrine eueue bedi manaco tiana da tinarro, inarraro. Narraro rriquezape dada toqquimadena tatideni ccado inarizauitoui. (arri poccadeni uima madirra bazimaza auato taniuarrine). Rrehe Paoro, pouadeniza ticarrimezape zodeodeni mota tia qqui toquenazapa arrama quenauitoui: “Rraho, uima imittaporrarope maizanirri tteranerre. Paoropa Moizecca marinarrape ecauani, nebo-rraraui” quenauiuarrine (quenade Tiaco, Zesoza rrehe quenarrarideni cacauadedeni tezerre.)
25—Naraha etti onihipe arra zodeo querrena-rrararrari Zesoza rrehe quenarrarideniza icca uima teppeza dozo inapozape arrima inapode: “Arri icca uimara ticauatterarri. Arra madirra icca Deoza toquerrena-rrararrarideni poccadeni siba nauatoniza bani da da iquenarraripa mitta tiquena tarrararro, tirripemananiuarrine oppina taui. Bani ssipori niqui naza zoqqueza emene tocca-rrararrari naco tirripemana terrerarri. Bani emene naco tirripemananiuarrine oppina tani. Uananehe naqui tinebomanarri. Pina maqquiderre amonerre carriraha amonerre onihi arra arrape poni. Amonerre maqquiderre carriraha maqquiderre ouaha narra narrape poni. Tabiradeni naco pouama arra arra canarizera-rrarana” inade dozo inaza −quenarrari Tiaco, Zesoza rrehe quenarrarideni cacauadedeni tezerre.
Paoro tozepe torrarrari
26Nazapa pouadeni attissa inananiuarrine Paoropa maqquiderre 4 quenaha Deoza dada toqquimauarri iaccabaqquirrari. Uada ssiuarrapa Deoza dada toqquima uapiuarri pina zodeodenicca marinarrassa inanemanarraro. Naraha Paoropa zotode poua motta Deoza dada toqquima bodiuarri toqquezimarrari, poccadeni uima uati tauiuarrine. Nazapa dada toqquimadeza poua attia: —Niza uada 7 nehe rriquezape rrauirrezimapomanitoui. Nazana icca da naqquinarra da onezape icca uima Deoza uati inaporrarocca rricaniuarrine −narrari.
27Nazapa uada 7 nehe bacco tabote naza Paoropa poua motta Deoza dada toqquimauarri toqquezimapomarrari. Naraha zama Asiauarricca zodeodeni naui bodiuarri rraui torrezimaza Paoro qqui toquenazapa pouaza uadimanarrari. Pouadenipa Paoroza noccodeni rrizera narrari. Poccadeni zamauarri maride ccarizaza taide pouaza uadimanaporrari. Nazapa narrarideni uadimanapomazapa Paoroza uima inanemanarraro. Rroua rroua quenaza Paoro dama iquenarrari. Madirra bazima pouaza uadimanauiuarrine attidenipa arrama quenarrari: 28—Rrari, icca madirra Izarraeodeni, ibirri acco ticanemanarri! −quenarrari. —Arrarrari madirrapa zama onihiuarri ccarizaza madirra bazimaza mari mari narizaraha pocca marinarrape uaidira tani. Ia Izarraeodeniza madirra tonacasseremanauiuarrine mari mari narrari. Moizecca marinarra nebomanauiuarrine mari mari narrari. Deoza dada toqquima naqui madirra ettarromananiuarrine mari mari narrari. Rridapana pouaha icca Deoza dada toqquimauarri zodeo querrena-rrararrarideni eqquezimabaqquiparra. Narrarope oppina teraha! Pouadenirrinea Deocca oza toppinani −quenarrari.
29Arra nama quenarraripa taide amossiniuarri Paoro poua tesse Tropimo tezerre ueuedariza naza qqui toquenaporrari. Tropimopa oza panani Epesouarricca madirra. Pouapa zodeo rrarazapa pouaza noccodeni rrizeraqquiri narrari. Paoropa Deoza dada toqquimauarri Tropimo eqquezima-rrararaha pouama attideni: —Zodeo querrena-rrararrarideni eqquezimabaqquirrari −quenarrari.
30Nazapa rroua rroua quenaui mittemanazapa madirra bazima domo ccarronarrari. Paoro dama iquenazapa Deoza dada toqquima amossiniuarri rroca ininemanaza toqquezimani-rrarauiuarrine totoqquezima uassinarra icauacossemanarraro. 31Nazapa Paoro inanazoqque-manauitouiraha rromanodenicca isso teppeppedenicca tamine deni torrauiccaza uima bacco tarraro: —Zerozarecca madirra moua moua quenaparra! –quenarrari. 32Nazapa isso teppeppedenicca taminepa pocca isso teppeppe zossededeni, poccadeni zozosse tabaqquima uaua inabaqquizapa moua moua quenauiuarri domo toccarrari. Bacco toquenazapa boquemanarrarideni Paoro idaqquimanaraha isso teppeppedenicca tamine, pocca isso teppeppedenima rrauirronaui qqui toquenaza inebomanarrari. 33Nazapa isso teppeppedeni bacco narronemanazapa poccadeni tamine attiza Paoro dama iquenaza corriti pameheza rrore iquenarrari. Nazapa Paoro narrizodedeniza isso teppeppedenicca tamine uati tarrari: —Arrarraripa nerreco madirranarra? Nerreco uimara inanarraronerre? −narrari. 34Naraha arra rroua rroua quenarrarideni uima onihiza, uima onihiza arrauarri rroua arrauarri rroua narizemanazapa isso teppeppedenicca tamine uima mittauissa tarrararrari. Nazapa taminea: —Rrari, icca ozauarri tiaccanimanarro! −narrari. 35Naraha poccadeni totoccamaro bacco tanimanabote naraha madirra Paoro inarrizomanauiuarrine dameraqquiri nazapa pouadenirrine oppina tarraro. Nazapa isso teppeppedeni Paoro idimemana, meme da iquenaza iaccanimanarrari. 36Naraha nattideniuarri rrauirronarraria: —Zoqquena! Zoqquena! −quenarrari.
Paoro zodeodeniza uati tarrari
37Nazapa totoqquezima memeuarriccaza bacco tamaronimanazapa Paoro isso teppeppedenicca tamineza uati tarrari: —Niza pazerre! tiaza uati onaccana rrehe taqui? −narrari. (Naraha Paoro Cresiacca madirra attiza uati taza tamine mittazapa pouaza uati tarrari) —A zama Cresiacca madirra atti nauato tinaqui? −narrari. —(Rrehe, nauato onani −narrari Paoro.) 38Nazapa tamine attia: —Naraha zodeodeni tiaza uadimana naza oua: Tiape zama Ezitocca madirra tirrarraroqui? onapa. Arra uarrano taideccaza toponi uauarrina zozorrodedeni 4 mil quenaha madirra madide nouerauiuarri queriqquimanarrari, rromanodeniza rrazire inanemananiuarrine. Narrarideni tamineridenibote tirrarraroqui? onaraha −narrari rromanodenicca isso teppeppedenicca tamine deni torrauicca.
39Naraha Paoro attipa: —Ouape narrari orrarrerani. Ouape zodeo madirra, zama Sirisiauarri ossonarrarode. Occa oza pananipe Tarso. Narrarope oza panani imeni. Madirra bazima nauatoqquiri naui. Ouattiza rrehe taqui? Occa madirraza uati onaccana, onarraro −narrari.
40Nazapa tamine rrehe naza Paoropa totoqquezimaza uariza poua zepe memeuarri da icanarraro, tocadidireuiuarrine. Tocadidire nazapa zodeodeniza uati tarrari. Pouadeni atti ebereoza uati uati tarrari.
