Paoropa Epesouarri
1Nazapa Aporo naui Corintoza madiccaza Paoro bobode torrapomarrari. Ssono uapi tani toporimacossassa zanapoui nazapa oza panani Epesoza bacco tarrari. Nauizapa Zesoza rrehe quenarrarideniza bacco tarrari. 2Nazapa Paoro pouadeniza uati tarrari: —Tiadenipe Zesoza rrehe tiquenerre Deo Corime tiadeniza torrariza nattaco? −narrari. Naraha pouadeni cacomeremanarrari: —Ssamoqquiri inani. Deo Corimecca uima iaza uatide nouerade −quenarrari. 3Naraha Paoro pouadeniza uati tarrari: —Nerrecorraricca uimaza passo dopaniza niniqui ticarririzemanarrarotte? −naraha pouadeni attipa: —Iape pina Zouao Batistacca marinarrassa inaneza passo dopaniza niniqui icarririzarrarode −quenarrari. 4Nazapa Paoro: —Rrehe, arra Zouaocca passo dopaniza niquinarra carririzemanarraridenipa poccadeni uimasiri nebomanapozana passo dopaniza niniqui carririzemanarrari. Zouao uati tapoui naco atti arrama naporrari: “Niza, zotode bacco narronarrariza naco pouaza rrehe quenauitoui” napoui nade. Nazama arra zotode bacco narronarrari onipa Zeso −narrari Paoro.
5Nazapa narraro uima mittemanazapa attideni: —Rrehe, passo dopaniza niquinarra icarripomana. Ia Zozossede Zeso onima ia madirra passo dopaniza niqui tozanabaqquiuiuarrine −quenazapa passo dopaniza niniqui carririzemanapomarrari. 6Nazapa Paoro Deoza uati tarra naza Zeso Cristoza toquerrenarrarideni poua zepeza bara inebo, bara inebo narizanarra Deo Corime pouadeniza torrarizauissa tarrari. Nazapa Deo Corimerrine touatti rriza tarraroza uati uati toquenarrari. Deo Atti naqui bodideniza auatoza uati iqquimemanarraro. 7Nazapa pouadeniza Deo Corime torrarizarraridenipa 12 quenarrari.
8Nazapa Paoro abazico 3 canaha zodeodenicca Deo Atti mamariuarri maride toqquezima toqquezima zanaporrari. Paoropa cappinera taza Deocca cacauehecca uima mari mari ihicanabaqqui narrari. Madirra parrissa quenauiuarrine pocca marinarra bica teza mari mari narrari. 9Naraha madirra motapa Zeso tauimariza uaribodeni didiqquiri nazapa madirra bazima mittemanauiuarrine rrazirema Zeso tauimariza tatamasso quenarrari. Nazapa Paoro, Zesoza rrehe quenarrarideni tezerre: —Rrina, oza onihiuarrina iqueriqquina −quenarrari. Nazapa zodeodenicca Deo Atti mamariuarri nebomanaza madirra oni Tiranocca oza uima uauatiuarrina rraui torrarrari. Nauizana uada uarrirriraza Paoro Deo Atti mari mari ihicanabaqqui narrari. 10Nazapa maride nama zanaporrari uarrano pama narrari. Narraria arra zama Asiacca madirra bazima ia Zozossede tauimari mittarizemanarrari. Zodeodeni, zodeo querrena-rrararrarideni naco. 11Deorrine Paoropa canauatori canehe deni torranicca auato inanarizani madirra qqui qqui toquenarrari. 12Madirrapa arri etero pouadeni zepe ssesse, pouadeni pano ssesse naqui Paoro uapi tarrorraro comaqquiri narrarideniuarri zorro inanirizemanarraro. Comaqquiri narrarideniza ibarimanezape totocanomireriza narrari. Nama quenazapa Tocorime-Taminecca zozosse tabaqqui pina tocorime sirideni, monadeni rrauininerizarrari.
13Nazapa zodeo toponi totonanomidedeni naco madirra bodideniza Tocorime-Taminecca zozosse tabaqqui tocorime sirideni madimanarrari zosse ininebaqqui-manauiuarrine rrarrauiriza narrari. Ia Zozossede Zeso oniza nama quenauiuarrine touini quenazapa tocorime sirideniza attidenia: —Rrari, arra Paoro mari mari narraricca Zeso onima uati ineza tiqquenarri, inarraro −nanarizemana narrari. 14Nama narizemanarrarideni motapa Seba bedi 7 quenarrarideni. Sebapa zodeo. Pouapa dada toqquimade tamine. 15Nazapa uada onihiza Seba bedi madirra poua bodiza tocorime siri, mona madirrariza nama quenapomaraha arra poua bodicca tocorime siri uati tarrari: —Rrehe, Zeso attipa nauato onani, Paoro atti naco nauato onani. Naraha tiadenipe nerrecorrari madirra tiquerrenani? −narrari. 16Nazapa poua bodiza tocorime madirraripa toponi totonanomidedeniuarri rroppa taza rrazirema itauaccarizarrari. Arra 7 quenarrari bazimaza deni torrarrari. Eterorideni ssorra inarizehe rrica, inabiquerabaqquizapa ccororredeni domo toqquenarrari. 17Nazapa oza panani Epesocca madirra bazima narraro uima mittemanazapa zodeodeni cappinemana, zodeo querrena-rrararrarideni cappinemana naraha attidenipa: —Ia Zozossede Zeso Cristona bica taui, deni torraui −quenarrari.
18Nazapa Zesoza rrehe quenarrarideni naco cappinemanazapa poccadeni uimasiri ecomerarize-mananiuarrine rrauirronana canarrari. Madirra bazima mittemanauiuarrine madirra orraria pocca uimasiri ecomerarraro, madirra ouaha pocca uimasiri ecomerarraro, madirra ouahadeni naco nama narizemanarrari. 19Arra zoppinerredeni naco Zesoza rrehe quenazapa poccadeni papeo arri zoppinerrecca uima tocauatterauirrinecca eccarronemaneza madirra bazima cattomama canaza amossiniza botta iquenarraro. Nezape narraro papeo manaconipe ua iqueneza pina ziniro ccarara 50 mil torrarraro. 20Deocca dacorehe nema naza arri Zeso tauimari madirra bazimaza ssarra tarizezape Zesoza toquerrenaui touapirrariparra.
21Nazama narraro uima rriquezape Paoro bodi uatomaza uati tarrari: —Oza panani Zerozareuarri occapomana −narrari. —Naraha taidepe Masedoniauarri occa, Acaiauarri occa napona. Nazana Zerozareuarri occapomaniuarrine. Zotode naqui Rromauarri occaniuarrine −narrari. 22Paoro atti nama naraha narraro zama arobeni Asiaza madiccarrari. Naraha poua birri accode pamaha Timoti Erasto tezerre Masedoniauarri taide touedauiuarrine zosse inabaqquiporrari.
Epesouarri mouanirri torrarraro
23Arra oza panani Epesocca madirrapa Zeso tauimari mittemana-zanaporaha motapa nacasseraqquiri naza moua moua quenazapa pouadenirrine uima toppinarraro. 24Taidepa madirra oni Demetrio boquezapa poua tessedeniza uati tarrari. Arra Demetriopa zibehi tanicca prata zepe ihirri narrari. Nazama Epesocca madirra motapa siba nauatoni onini Artemisaza: —Ia cacauade −quequenanarrari. Narraro corimani, ponicca uiuittiza oza corimani naqui prata zibehi taniccaza Demetrio ihinauato narraro, dadauarrine. Narraro tarabaia poua birri accodedeni tezerre ziniro cacarrimana narrari. Sseqquiri narrariparra. 25Demetriopa siba nauatoni corimani nanauatodedeni queriqquiuiuarrine uaua inabaqquirrari. Queriqquimanazapa pouadeniza uati tarrari: —Rrehe, arri icca nauatonirriza ziniro ihicarri naraha niza narraro da da inerrerezape ziniro icappiranitoui −narrari. 26—Tiadenipe arra Paoro mari mari narizarraricca uimape ssamomo tinarrarorane? Paorocca marinarrape arrima narraro: “Madirrarrine siba nauatonipe Deo rraraui” nanarra narrari. Narraria arra Paoro attiza madirra ibobora tazapa ia cacauade Artemisaza tonacasseremanarrariparra. Narraria arra imadini Epesocca madirra mota naco Paoroza toquerrenarrari, icca zama Asiacca madirra mota naco Paoroza toquerrenarizarrariparra. 27Pouadenirrine uima nema nezape iaza uaidira tani. Arri icca dadauarrine izepe ihirri narraro naqui rricanitoui. Niza ia cacauade Artemisaza madirra paparra quenauitoui. Niza icca zama Asiauarri madirizemanarrarideni, arra zama onihiuarri madirizemanarrarideni naco poniza tonacasseremanazapa ponicca uima arrimani torranitoui. Ponicca uiuittiza oza naqui parri inebomanarini nanitoui, onarraro −narrari Demetrio.
28Nazapa Demetrio atti mittemanazapa uadimanaza rroua rroua quenarrari: —Epesocca madirra cacauade Artemisa deni torrani, torrani! −quenarrari. 29Nazapa oza pananicca madirra bazima moua moua quenaui mittemanazapa pouadeni naco boquemanarrari. Domodeni ccarizaza moua moua narizemanarrari. Nazapa Paoro uatimade Masedoniacca madirra pamaha onideni Caio Aristaco tezerre damama iquenaza uima uauatiuarri iaccabaqqui-manarrari. 30Nazapa Paoro madirra moua moua canauiuarri uatide toccauiuarrineraha Zesoza rrehe quenarraridenia: —Poni, ticca terrerarri! −quenarrari. 31Asiacca tamine mota naco Paoroza uatideni uanaqquiri nazapa madirra orraria uassinarra zosse inarronemanaza rroppa narronarrari, Paoroza: —Poni! Naniuarripe ticca terrerarri! −nauiuarrine. 32Nazapa bazima queriqquimanauiza uima onihi, uima onihiza pouadenira arrauarri rroua, arrauarri rroua narizemanarrari. Naraha madirra queriqquimanarrarideni motapa ssamoqquiri naza: —Nerreco uimatouira iqueriqquirraro? −quenarrari.
33Nazapa zodeodeni poccadeni madirra Aresadre bazimaza uati tauiuarrine arra moua moua canarrari baccodeniuarri cco ininemanarrari. Pouapa: —Arri ia zodeodeni iape uima inana-rrerani −nauiuarrine poua zepe memeuarri da icaneza uaza uaza naraha tocadidire narrararrari. 34Arra Aresadre poua naco zodeodenirra narrari poua qqui toquenaza pouaza noccodeni rrizeraqquiri nazapa attideni: —A, narrari naco zodeodeni, ia cacauade Artemisaza uauatize narraraui −quenazapa parra moua toquenariui narrari. —Epesocca madirra cacauade Artemisape deni torrani, torrani! −quenarrari. Pouadeni atti pina orrariqquirrarossa naza rroua rroua quenarrari. Nama nama zara marri 2 horas tossoniqquimaraha nama zanapomanarrari.
35Naraha oza pananicca madirra deni torrauicca uima dozode ccarronaza madirra zama rrama inanabaqquiza uati tarrari: —Rrehe Epesocca madirradeni, icca uimape zama bazimacca madirra nauatoqquiri naui: Iape ia cacauade Artemisacca uiuittiza oza ecauanissa tarraro. Ia cacauade Artemisape memeuarri madiraha poni corimani iauarri ssonarrarode. Narraro tauimarini naqui bazima nauatoqquiri naui. 36Nazama narraro uimaza nerrecorrari “Maizanirri” naui? Maizehe uade noueraui. Nezape ticadidirerri! Ponima moua mouape peperri tiquenarri −narrari. 37—Nazama arrarrarideni pamaha teccarrona-baqquimanaraha ia cacauade Artemisacca uiuittizauarri inauaidiremana-rrerani. Poniza naco tatamasso quequenana-rraraui. 38Arra siba nauatoni corimani nanauatodedeni Demetrio poua tessedeni tezerre madirra ouahaza uadimanaza naco uima cacattemauarrira poccadeni uima uatide rraui torrezimana, onarraro. Nauiza uima cacattemadedeni uarrirriraza rrassi rrassi zaza narrari. Nauizana madirra bazima poccadeni uima uatide rrarraui torrezima narrari. 39Nazama tiadeni mota naqui uima onihi ticarrimanezape uima cacattemadedeni narraro uima ecauemane-rrerezape niza icca oza pananicca taminedeni madirra bazima queriqquimanauiuarrine uaua quenazana ticcadeni uima uati uati titiquena narri −narrari. 40—Nazama arrirraro mouanirri ponimaccape oppina tani. Icca tamine rromanodeni attidenipa: “Iaza rrara rrara quenarrari uitiderra” quenapazarra, onarraro. Ticcadeni mouanirri nema zanapozape nerrecoma onapazerre pouadeniza? −narrari oza pananicca uima dozode. 41Pocca uima uati taha rricazapa: —Rraui tirranirri −naza madirra bazima rraui torranirizarrari.
