Atos 18

₁Zotodepa Atenaza Paoro rroppemazapa oza panani onihi Corintouarri toccarrari. ₂Narraro oza pananiuarri Paoro bacco tazapa zodeo madirra bacco inabaqquirrari. Onidenipa Aquira, bedimeni oninipe Prisira quenarrari. Aquirapa zama arobeni Pontouarricca madirraraha zama Itariaza madiporrari. Naraha zama Itariacca tamine Craodio zodeodeniza nacassera tazapa nanicca oza panani deni torranicca onini Rromaza madimana-rrarauiuarrine zodeodeni bazima zosse ininebaqquirrari. Nazapa Aquira bedimeni tazarranipa Itariauarri nebomanaza Corintouarri bacco toquezati madimanarrari. Nauiza Aquira bedimeni tazarrani madimanazana pouadeni qquide Paoro toccarrari. ₃Nazapa Paoro Aquiradenicca tarabaiaza nauato tazapa pouadeniza madiccarrari. Pouadenipa etero siba tanicca ozauarrine ssequide zepedeni irrimanarrari. ₄Nazapa Paoro rrassinarracca uadaza zodeodenicca Deo Atti mamariuarri zodeodeni, zodeo querrena-rrararrarideni tezerre quequeriqquimana naza Zeso tauimariza rrehe quenauiuarrine mari mari ihicanabaqqui narrari.

₅Nanarra Sira Timoti tezerrepa zama Masedoniauarri uedarronaza bacco narronemanarrari. Nazapa Paoro zepe irriraha neboza Deo Attira inarrariza mari mari ihicanabaqqui narrari. Zodeodeni mittemanauiuarrine pocca marinarrape: —Madirra Tonassiuauade arra Cristo-Mesia quequenanarraripa Zesoparra −narrari. ₆Naraha Zeso tauimariza nacasseraqquiri nazapa Paoro itamassoqquimanarrari. Nazapa Paoro pouadeniza paparra naui auato tauiuarrine pocca etero ppoto ppoto naza uati tarrari: —Peperri! Nema tiquenezape tirrinedenina uimasiri tiadeniza tinassonarimanarraro. Deo tiadeni tonarrizo-baqquizapa orrine rrerani. Rridapanapa zodeo querrena-rrararrarira mari ocanabaqquina −narrari Paoro.

₇Nazapa Paoro Deo Atti mamariuarri qquenaza poua tesse Tisio-Zostocca ozaza toqquezimarrari. Poua naco Deoza uatize-zanaporrari, Deo Atti mamari uinoriniza madirrari. ₈Zodeodenicca Deo Atti mamariuarricca tamine onipa Crispo, pocca amonerre, pocca erredeni bazima naco ia Zozossede Zesoza parrissa quenarrari. Naui Corintocca madirra mota uapi taha naco Paorocca marinarra mittemanaza Zesoza parrissa quenazapa passo dopaniza niniqui carririzemanarrari.

₉Nazapa narraro zomeza Paoropa pina pocca uadassa naha carrirrari. Deorrine ia Zozossede Zeso pouaza auatozapa uati tarrari: —Paoro, ticappina-rrerarri. Ouatti teccorarizarri. Ouatti tecoma terrerarri −narrari. ₁₀—Ouape tia ouacauarizanitoui. Arrirraro oza pananizapa ouaza toquerrenarrarideni uapi taui. Nezape madirra tia inarrizomana-rreranitoui, onarraroparri −narrari Zeso. ₁₁Nazapa Paoro Corintocca madirra Deo Atti mittemanauiuarrine mari mari ihicanabaqqui nazapa uarrano orraria narrica, denima uarrano arobe narrica naza madirrari.

₁₂Naraha tamine Cariopa zama arobeni onini Acaia ecaueza Paoro oza panani Corintoza madiccazapa zodeodeni mota pouaza uadimanarrari. Dama iquenaza tamine Carioza iaqquemanarrari, uima cacattemauarri izauemanauiuarrine. ₁₃Nazapa tamine Carioza uati toquenarrari: —Arrarrari madirrapa icca madirra mari icanabaqquizapa: “Deoza tiquerrenarri” nanariza nazapa icca madirra mota poua attiza rrehe quenaui. Naraha pocca marinarrape rriza tani. Pina icca marinarrassa nerrerani. Pina rromanodenicca marinarrassa nerrereza naqui oppina tani −quenarrari Carioza. ₁₄Nazapa manaco Paoro pocca uima uati tabote naraha tamine Cario pouana zodeodeniza uati tarrari: —Peperriua! Pina botiecca uima uatide, pina toponi nanarrizodecca uima uatide ouaza rraui tirrezimazape ticcadeni uima mittade nacassa onanitouiraha ticcadeni uimape narrarossa nerrerani. ₁₅Tiadenina arrarraricca marinarraza nacasseraqquiri tiquenarraro. “Icca marinarrassa nerrerani” tiquenezape tiadenira ticattememanarri. Occa cacauehepe onihi. Ticcadeni uima cattemade touini onerrerani −narrari tamine Cario zodeodeniza. ₁₆Nazapa uima cacattemauarri moua ininebaqquirrari.

₁₇Nazapa boroniza zodeodeni motapa poccadeni Deo Atti mamariuarricca tamine dama iquenaza idaqquimanarrari. Poua onipa Sostene. Uima cacattemacca boroniza idaqquimanaraha Cariopa qqui taraha narraro uimaza nacassera tazapa pina qqui toraui narrari.

₁₈Nazapa oza panani Corintoza Paoro uada uapi tehe madizanaporrari. Zotode naco oza panani Atioquiauarri toccaniuiuarrine: —Occanini −naza Zesoza rrehe quenarraridenipa: —Rrehe ticcanirri −quenazapa Paoro zama Siriauarri toccanirrari. Aquira, poua bedimeni Prisira tazarrani naco pouaza touedarrari. Nazama rraui torranizapa oza panani Secreauarri bacco toquenarrari. Nauizana Paoropa pocca uatinarra Deoza inaparrirenissa taniuarrine poua tati uire tauiuarrine tati ssa cananissa tarraro. Poua tati ssa canehe carriquezape rraui torrezippaniza rraui torranirrari. ₁₉Nazapa rraui torranirrari, oza panani Epeso bacco toquenarrari. Nauiza Aquira bedimeni tazarrani madimanauiuarrine inebobaqquizapa Deo Atti mamariuarri toqquezimarrari, zodeodeniza Deo Atti maride. ₂₀Nazapa zodeodeni Paoroza: —Iaza timadiccarri −quenaraha pouapa touini rarrari. ₂₁Pouadeniza uati tarrari: —Occanini. Naraha nizaranibote Deo touini naza tiadeni qquide occanipomanitoui −narrari. Nazapa: —Rrehe ticcanirri −quenarrari. Nazapa darroni imeniza toqquezanizapa Epesouarri neboza rroppemapomarrari. ₂₂Nazapa oza panani Sezareaza bacco tanizapa oza panani Zerozareuarri toqquemoranirrari, Zesoza rrehe quenarrarideniza nirra narizauiuarrine. Naui zotodepa Atioquiauarri toccanirrari.

₂₃Nazapa Atioquiaza bacco taniza nauiza madirrari. Madiui poua idi nazapa bobode torrapomarrari. Zama arobeni Carasiauarricca oza pananiza, oza capamema narraroza naco, zama arobeni Piriziauarricca oza pananiza, arri oza carrari carrari narraroza naco qquide ccarizapomarrari. Zesoza rrehe quenarrarideni bazima inauatizebaqquizapa poccadeni rrehenirri todacorani narraro.

₂₄Nazapa Aquira bedimeni tazarrani Epesoza madimanazapa zodeo madirra onipa Aporo Epesoza bacco narronarrari. Pouapa zama Ezitocca oza panani Aresadriaza napirrari. Pouapa uima uatide nauato, Deo Atticca naco nauato tarrari. ₂₅Arra Aresadriaza madiza Zeso tauimari touattarrari. Nazapa Aporo uatizeri naza Zeso tauimari mari mari narizarrari. Epesocca madirra naco mari icanabaqquiuissa tarrari. Arra pouapa Zouaocca marinarra passo dopaniza niniqui carrimanarrari tauimarinira nauato tarrari. ₂₆Nazapa Aporo cappina-rraraza zodeodenicca Deo Atti mamariuarri Zeso tauimari maride torrarrari. Naraha Aquira bedimeni Prisira tazarrani Aporocca marinarra zori tani mittemanazapa poccadeni ozauarri rrina inanimanaza Zeso tauimari denima mari icanemanarrari.

₂₇Aporopa zama arobeni Acaiauarricca madirra mari icanabaqquiuiuarrine touini naza Epesocca Zesoza rrehe quenarrarideni poua toccauiuarrine acco icanemanarrari. Arra oza panani Corintocca Zesoza rrehe quenarrarideni pouaza bicaqquiri nauiuarrine naco poccadeni uima dozo iqueneza zosse iquenarraro. Nazapa Aporo Corintouarri bacco taza Deocca touati uaneherrine Zesoza parrissa quenarrarideni acco icanabaqquirrari, poccadeni rrehenirri todacorani naniuarrine. ₂₈Arra Aporopa madirra bazima mittemanaza zodeodeni mota Zesoza nacasseraqquiri narrarideni tezerre arrauarri uati arrauarri uati quenarrari. Pouapa Deo Atti nauato taza pocca marinarra dacorezape narrarideni attideni arramani torraza pouana uima ecomera ecomera zanaporraro. Deo Atti maittaccazama dozo naporraroccaza mari mari nazapa pouarrine arrirraro uima auato tarraro: —Cristo-Mesia quequenanarraripa Zesoparra −narrari.