Atos 17

₁Nazapa Paoro Sira tezerre touedarrari, oza panani Apiporiza tossoniqquimemana, oza panani onihi Aporoniaza tossoniqquimemana zanaporrari. Nazapa oza panani Tesaronicaza bacco toquenarrari. Nauicca zodeodenipa Deo Atti mamari carrimanarrari. ₂Arra Paoropa bobodeza ccarizazapa uarrirriraza zodeodenicca Deo Atti mamariuarri toqquezima toqquezima narizarrari. Nama nanariza nazapa naui Tesaronicaza naco zodeodenicca Deo Atti mamariuarri totoqquezima narrari. Semana 3 naha madiccazapa rrassinarracca uadaza Deo Atti maride totoqquezima narrari. Nauiza Paoro zodeodeni tezerre uimahaha canarrari. Paoropa Deo Atti maittaccazama dozo naporraroccaza mari icanabaqquirrari. ₃Cristo-Mesiacca uima pouadeniza auato taniuarrine mari icanabaqquirrari. Pouadenipa Mesiatoui madimanarrari. Mesiapa ocasserani auaza zoqqueuitoui, zotode nauatoniuitoui, quequenanarrari Deo Atti cacomeraqquiri narrarideni. Narraro uima Paoro mari icanabaqquizapa poua atti zodeodeniza: —Arra Zeso tauimari tiadeni mari ocanabaqquirrarope arra icca Mesiaparra −narrari.

₄Nazapa zodeodeni mota Zesoza rrehe quenazapa Paoro, Siradeniza toquerrenarrari. Zama Cresiacca madirra Deotoui quenarrarideni uapi taha Zesoza rrehe quenarrari. Nani Cresiauarricca amonerredeni zapanideni sseqquiri narraro mota uapi tehe naqui Zesoza rrehe quenarraro. ₅Naraha zodeodeni mota Zeso tauimariza nacasseraqquiri narraridenipa poccadeni madirra Zesoza toquerrenarrari acconedeni uadimanarrari. Narraridenipa oza pananicca madirra iboueza uaidireheza madirizemanarrarideni uaua inabaqquimanarrari. Nazapa narrarideni tezerre bazima domo ccarizaza moua moua narizemanarrari. Oza pananicca madirra bazima pouadenirrine domo qquenazapa arrauarri rroua arrauarri rroua quenarrari. Arra domo ccarizarraridenipa Paoro Siradenitoui Zasoncca ozauarri bacco toquenazapa moua tozimemanarrari. Paorodeni rrocaca ininebaqquimanaza madirradeniza dahaha inabaqquimanazapa inarrizo-baqquimanauiuarrineraha. ₆Naraha Zasoncca ozaza Paoro Sira tezerre noue querazapa Zasonra dama, poua tesse Zesoza rrehe quenarrari pamaha damama iquenaza oza pananicca tamineuarrina iaccabaqqui-manarrari. Bacco toquenazapa momouadedenipa taminedeniza poccadeni maizehera uati toquenarrari: —Icca zamauarri madirra ouaha bacco quenaui! Pouadenipa zama onihiza, zama onihiza uima inauaidira-rizemaneza rridapanapa arra izamariza bacco quenarrari! ₇Arra Zason rroca izimarraripa pocca ozaza ecauabaqquiui! −quenarrari, rrouaua rrouaua canaza. —Arra madirra ouaha rrauirronarraripa icca tamine deni torrauicca marinarraza iboqquiri narrari. Icca madirra mota naco pouadeni attirrine touibomanauitoui. “Rridapanapa tamine ouaha torraui, poua onipa Zeso” quenaui imittani −quenarrari maizemanaza.

₈Nazapa narraro uima mittemanazapa nauicca queriqquimanarrarideni taminedeni tezerre boquemanarrari. ₉Naraha Zason poua tesse tezerre poccadeni uima cattema-rreraccaza taminedenipa pouadeniza uati toquenarrari: —Zarra tinerreraniuarrine iaza ticcadeni ziniro da tiquenaccarri −quenarrari. —Nezape niza ticcadeni uima cattemehe rriquezana ticcadeni zinirope da inaniniuarrine −quenarrari. Nazapa Zason poua tesse tezerre taminedeniza ziniro da iquenezape tappa inabaqquiza rraui torranirrari.

₁₀Naraha narraro zomeza Tesaronicacca Zesoza rrehe quenarraridenipa uassinarra Paoro Sira tezerre zossesse inabaqquimanarrari, oza panani Bereauarri touedauiuarrine. Touedazapa Bereaza bacco toquenaza nauiza madimanarrari. Nazapa zodeodenicca Deo Atti mamariuarri totouedezima narrari, Zeso tauimari maride. ₁₁Zodeodeni Bereaza madimanarraridenipa bicaqquiri narrari, pina arra Tesaronicacca uadiqquiri narraridenissa quena-rrararrari. Deo Atti mittemanezatirra narrari touini quenarrari. Nazapa uarrirriraza Deo Atti dozo naporrarocca uade toquerrenarrari. Pouadeni bodipa: —Paoro attipa parrissaqui? Pina arri uima dozo naporraroccassa naqui? −quenarrari. ₁₂Nazapa zodeodeni mota uapi taha parrissa quenarrari. Cresiacca madirra naco mota uapi taha parrissa quenarrari. Arri amonerre zapanideni sseqquiri narrarodeni, maqquiderre naco uapi taha parrissa quenarrari. ₁₃Naraha arra Tesaronicacca zodeodeni mota Zeso tauimariza nacasseraqquiri narraridenia uima mittemanarrari: —Paoro Sira tezerrepa Bereacca madirra naco Deo Atti mari icanabaqquiui −quenaui mittemanazapa boquemanapomarrari. Nazapa Bereauarri rraui torrarrari. Bacco toquenaza nauiuarricca madirra Paorodeniza uadimanauiuarrine uima inanemanapomarraro. Moua moua narizemanazapa Bereacca madirra ssamoni auemanarrari. ₁₄Naraha Zesoza rrehe quenarrarideni uima mittemanazapa Paoro uassinarra zama onihiuarri zosse iquenarrari. Naui Bereacca madirra naco pouaza rraui torrarrari. Nazapa Paoro Bereacca madirra quenaza ueni imeni inidiuarri rraui torrezipparrari, poni uapi rraui torrabacossauiuarrine. Naraha Sira Timoti tezerrepa naui Bereaza madimanaccarrari. ₁₅Nazapa Bereacca madirra Paoro iaqquemanazapa oza panani Atenauarri bacco toquenaza nauizana Paoro inebomanarrari. Rrauinizapa Paorocca uima uati nanimanarrari: —Paoro attipa: “Sira Timoti tezerre uassinarra uedarronana” naparra −quenarrari.

_16-17Paoropa Sira Timotideni toui oza panani Atenaza madirrari. Nauiza madizapa rrassinarracca uadaza Deo Atti mamariuarri totoqquezima narrari, Zeso tauimari maride. Nauizapa zodeodeni, zodeo querrena-rrararrari Deoza nacassaqquiri narrarideni tezerre quequeriqqui naza pouadeni mari mari ihicanabaqqui narrari.

Naraha Paoro nauiza madiza narraro oza panani siba nauatoni irririzani qqui tarizazapa bodi nacassera tarrari. Nama nazapa uada uarrirriraza tozepetarri dadade madirra carri tauiuarri arra nauiza madirra rrauirizarraridenima Zeso tauimariza uimahaha canaza arrauarri uati arrauarri uati quenarrari. ₁₈Nazapa madirra mota marinarra epicorioza rrehe quenarrarideni, marinarra estoicoza rrehe quenarraridenipa Paoro tezerre arrauarri uati arrauarri uati quenarrari. Nazapa mota attidenia: —Arrarrari attirriderabotepa nerreco uimara iaza uati uati tarrarinarra? −quenarrari. Madirra ouaha attideni naco: —Zama onihicca madirradeni cacauade tauimari eccorarizarraro ranerre! −quenarrari. Nama nama quequenanarrari. Paoropa uima bicani icassiuaueraniuarrinecca uati uati tarrari, Zeso nauatonirrari tauimari naco uati uati tarrariraha pouadenipa mittemana-rrararrari. ₁₉Nazapa Paoroza: —Rrina, arricca ssono Areopacouarri ticca uima uati tinanissa taniuarrine iaza tiqquemorarri −quenazapa iaqquemoremanarrari. Nauizana uada uarrirriraza nauatoqquiri narrarideni totoqueriqqui narrari, uimahaha canauiuarrine. Ssono bacco tomoremanazapa pouaza uati toquenarrari: —Rrari, ticca uima imittana. Nerreco uimara uati uati tinarraronerre? −quenarrari. ₂₀—Ticca marinarra imittapo-rrerarraro, iaza pina uima rriza taniccassa narraro. Denima imittaniuarrine nacassassa inani −quenarrari. ₂₁Arra Atenacca madirra, zama onihicca nauiza madimanarrarideni naco Paoroza nama nama quequenanarrari, arri uima zati touinira quequenanarrari.

₂₂Nazapa naui Areopacoza Paoro totemaza pocca uima uati tarrari: —Rrehe Atenacca madirra, tiadeniza uati onana. Ticcadeni siba nauatoni deo ouaha corime rricarraraui qqui onarizani. Ticcadeni danirri botta botta tauiuarrinecca siba ua tamaroni naqui qqui onarizani. Tiadenipe tiadeni cacauadedeni touideni dameraqquiri tiquenani qqui onani −narrari. ₂₃—Rrehe, ticcadeni ozaza occarizeza ticcadeni nauatonirri tiadeni cacauadedeniza da tiquenauiuarrinecca uauanari qqui onarizarraro. Uauanari orrarie uapiniza dozo nanipe arrima narraro: “Deo ouahapa oni ssamoqquiri inaccani” titiquena narraro dozo naniza qqui onarraro. Rrehe, tettidenipe bica tani. Arra Deo ouaha oni ssamoqquiri tiquenaccarrarope pouaza tetetizemana narraroparri. Narrari pocca uimaha tiadeniza ouacomerarraroparri −narrari Paoro.

₂₄—Arrirraro zamape Deo inauatorraro. Arra bazima carri tarizarrari naco Deo inauatorizarrari. Poua inauatorizarraripa Deo Pouana bazima ecauarraro. Meme ecaua, nami ecaua narraro. Deopa madirracca nauatonirriza madiriza-rraraui. Pina ozaza, siba nauatoniza, Deopa nama nauiza madiriza-rraraui. ₂₅Deopa cappiraha madi-rraraui. Poua birri accode toui narrararrari. Poua touini nauicca nauatorride raui. Pouana camittehe rrinede. Pouarrinena rrappopponi icarrizape rrassi rrassi ihinanarraro. Pouana icappira-rreraniuarrine bazima iaza da da ihinariza narraroparri −narrari Paoro.

₂₆—Deopa madirra orraria inauatoporrari. Narraria arra icca idi taideccaparra. Deo Pouarrine madirra bazimapa narrari potemaui toquerrenarrariparra. Narrari poua potemauia madirra zama onihiza toquerrena, zama onihiza toquerrena, zama onihiza toquerrena narizarraria zama bazimaza madirizemanarrariparra. Deopa nauato tapoza madirra icatterriza-baqquirrari: “Arrarraridenipa arrirraro zamaza madimanauiuarrine, zama onihiza madimana-rrarana. Arraccarraridenina arriccarraro zamaza madimanauiuarrine, zama onihiza madimana-rrarana” narizaporrari. Deopa Poua nacassa taza zama onihi deni inana tani. Zama onihi naqui arrimani inana tani. Nama narizarrari. ₂₇Deo madirra inauatobaqquirraripa Deo Poua toui quenauiuarrine. Deo Poua toui quenaza qqui narizemanarraridenipa Deo Pouaza bacco toquenauiuarrine uitide. Naraha Deopa madirra bazimaza uarri tarraraui. Iaza uarrira taui. Tiadeniza uarrira taui. Ouaza naco uarrira taui. ₂₈Abi Deo Pouarrinena arri imadirraroparri. Pouarrine rrarrauirrariza narraroparri. Pouarrine iquerrenarizarraroparri. Narraroa arri ticcadeni arrie nauatobotedeni rriri icanemanapozape: “Deo Poua potemaui iquerrenarraro” quenaporrariparra. ₂₉Nazama arri iape Deo ia tonauatobaqquirrari. Deo Poua potemaui iquerrenani. Nazapa ibodiza: “Deopa pina madirracca nauatonarrassa naui” inerrerana. Deopa pina uatini ccara tanicca oro nauatonissa narraraui. Pina zibehi tanicca prata nauatonissa narraraui. Pina ccara tanicca siba nauatonissa narraraui. Nema naniccape madirra poua bodiza: “Oua cacauade corime onauatona. Arrima onanana” naza ihinauato narraroparri. ₃₀Madirrapa Deoza ssamoqquiri naporaha Deo pouadeni inarrizobaqquirra narronapoui narrararrari. Deo Pouana madirracca uimasiri inauanarronaporaha rridapanape zama bazimacca madirraza Poua Attia: “Ticcadeni uimasiriza peperri tiquenarri, tibodideni tecarriqquimera-rizemanarri” narrariparra Deo. ₃₁Deopa madirra bazimacca uima icattemanitoui. Niza Deo Poua nacassa tauicca uada bacco tezape zama bazimacca madirradenicca uima pocca parrisseheza nattome inanitoui. Madirra bazimacca uima cattemadepa Deo icatterrizaporrari. Narraria arra Poua Bedi zoqqueraha Deo Pouarrine nauatonirrari. Madirra bazima pouaza: “Parrissa, narraripa madirra Tonassiuauade torrauiuarrine Deo icatterrizaporrari” quenauiuarrine −narrari Paoro atti.

₃₂Naraha Atenacca madirra arra rricarrarideni nauatonimanauicca uima mittemanazapa motapa rrarra quenarrari. Naraha madirra motapa: —Uada onihiza ticca uima imittapomana −quenarrari Paoroza.

₃₃Nazapa Paoro madirra quequeriqquimana nauiza paparra nazapa ozauarri qquezippanirrari. ₃₄Naraha nauicca quequeriqquimana narrari motapa Paorocca uimaza parrissa quenaza pouaza toquerrenarrari. Madirra orraria onipa: Dionisio. Pouapa nauato tarrari. Ssono Areopacouarri quequeriqqui narrari. Amonerre orrarie naqui oninipe Damarisa. Madirra mota naco Zeso tauimariza parrissa quenarrari.