Atos 16

₁Nazapa Paoro Sira tezerre oza panani Derbiza bacco toquenarrari. Denima touedarraripa oza panani Ristaraza bacco toquenarrari. Nauizapa Timoti madirrari. Pouapa Zesoza rrehe naporrari. Poua imeni naqui Zesoza rrehe naporraro. Ponipe zodeo, naraha imehipa zama Cresiacca madirra. ₂Nazapa arra Ristaracca Zesoza rrehe quenarrarideni attideni, oza panani Iconiocca Zesoza rrehe quenarrarideni attideni naco: —Timotipa zabisso bicaui −quequenanarrari. ₃Nazapa Paoro attipa: —Timotipa ia acco tocanabaqquiuiuarrine iaza toccana −narrari. Naraha Timoti imehipa zodeo rraraha zama Cresiacca madirraha nazapa bazima pouaza nauatoqquiri narrari. Cresiacca madirrapa zodeodenicca Deocca uissinarra cappiremanazapa Timoti naco narraro uissinarra cappirarrari. Nazapa Paoro attia: —Timoti iaza toccazapa zodeodeni iaza nacasseraqquiri nauitoui. Nazapa Deocca uissinarra carrizana toccaui bica taui –naza Timoti amazati Deocca uissinarra carrirrari. ₄Nazapa rraui torrazapa oza panani onihiza rraui torrezima, oza panani onihiza rraui torrezimazanaporrari, arra Zesoza rrehe quenarrarideni maride. Arra Zesocca zozosse tabaqqui Zerozarecca Zesoza rrehe quenarrarideni cacauadedeni quenaza uima teppe dozo iquenarraroccaza mari icanabaqqui-rizarrari. ₅Nama quenazapa madirra Zesoza rrehe quenarraridenipa poccadeni rrehenirri todacorani narraro. Madirra ouahadeni naco uada uarrirriraza Zesoza toquerrena toquerrena zanapozapa touapirrari.

₆Nazapa zama Asiauarri rraui torrauiuarrineraha nauiuarri mari quenauiuarrine Deo Corime ecosseza rraui torra-rrararrari. Nazapa zama Piriziauarri mari mari tossoniqquimemana, zama Carasiauarri mari mari tossoniqquimemana zanaporrari. ₇Nazapa zama onihi Misia uinoriniza bacco toquenarrari. —Zama Bitiniauarri issoniqquimana −quenaraha nauiuarri Zeso Corime ecossarraro. ₈Nazapa naui Misiaza tossoniqquimemanazapa passo imeni inidiuarri rraui torrezippaza oza panani Troadeuarri bacco toquenarrari. ₉Naui Troadeza cauadirrazana Paoropa pina pocca uadassa naha carrirrari. Deorrine zama Masedoniauarricca madirra naui Masedoniaza auatoza uaui qqui tarrari. Pouaza uaua narrari: —Rrari, icca zamauarri ticcarronarri, ia acco ticanabaqquiniuarrine −narrari Masedoniacca madirra. ₁₀Nazapa pocca uadassa naza qqui tarrarirrine Masedoniauarri rraui torrauiuarrine narroremanarrari. Arri oua Roca naqui pouadeniza occaniuarrine onarrorarraro. Deocca zossenirri ibodiza auato tezape parrissa naniuarri Zeso tauimari bicani icassiuaueraniuarrinecca mari icanabaqquiuiuarrine nauatoqquiri inarrarode.

₁₁Nezape oza panani Troadeza irroppemezape darroni imeniza rrauirrarraro. Passo imeni nocconiuarri iaccarraro. Orrari iaccarini nezape zama uittacossani onini Samotrasiazana uana icanade. Uada ssiuarra iaccapomezape passo imeni inidicca oza Neaporiuarri uana icanade. ₁₂Naniza rrauirremoreza rrauirrarrarope oza panani zama Piripoza bacco inade. Narraro oza pananipe Rromacca colonia torrarraro. Zama Masedonia arobeniuarricca oza panani deni torranicca, bica tanicca. Naniza uada pamehema imadirraro. ₁₃Nezape rrassinarracca uada bacco teza Deo Atti mamari oza nouerezape oza panani amossiniuarri rrauirrenarraro, ueni inidiuarrina rrauirrezippade. Nauiuarri Deoza uatide totoqueriqqui narrari uitide ineza. Naniuarri bacco inezape amonerre ponidenira queriqquimanani qqui inabaqquizape ia naqui ponidenizama naniza rrassi ineza Deo Atti mari icanabaqquirrarode. ₁₄Ponideni tassani orrariepe oza panani Tiatirauarricca. Oninipe Ridia. Ponipe etero zorrorani uatini ccara tanicca dadade. Narraro etero cocoro tozippape pina mappara tarrarossa narraro. Narraro amonerrepe Deo Attiza ibora tarraro. Ia Zozossede Zeso poni bodini acco icanezape Paorocca marinarra poniza bica teza mittanissa tarraro. ₁₅Nezape Ridia Zesoza parrissa nezape passo dopaniza niniqui carrirraro. Ponicca ozacca madirra naco bazima passo dopaniza niniqui carririzemanarrari. Nezape poni attini iaza: —Arri ouaza tibodideni: “Ia Zozossedeza parrissa nani” tiquenezape rrina, occa ozauarri timadimanarri −nade. Iaza uatide damera tezape ponicca ozaza imadirrarode.

₁₆Nezape uada onihiza arra Deoza uati uati totoquena nauiuarri rrauirrezippanipomezape zouato madirra tezerremadenicca uima nauato tarraro rrauiza bacco irrizade. Ponipe narraro oza pananicca madirradenicca zozosse. Poni bodinicca tocorime mona rrine nauato tarraro. Narraria arra poni zozosse tonanadedeni ihizossemana nezape madirra tezerremadenicca uima uati uati teza ziniro cacarrimana narrari. ₁₇Narraro zouatope Paoro, ia inarraro inatti motta uaua carramissaponi nade. Poni attinipe arrima nade: —Arrarraridenipa Deo memeuarri madirrari Attiza iboraqquiri naui, naui! Arrarraridenipa Deo tiadeni tonassiuauabaqquiuiuarrine tauimarini tiadeni mari tocanabaqqui-manauitoui, mari tocanabaqqui-manauitoui! –nanamissa narrarode.

₁₈Uarrirriraza inatti motta nema nema nanarrona nezape poni attini mittade iaza tocasserani neza Paoro poua natti qqui taniza zouato bodinicca tocorime monaza uati tade: —Zeso Cristo onima uati onana: Tiqquenarri! onarraro −nade Paoro. Poua atti nama nanarra tocorime monapa amazati qquenarraride.

₁₉Nanarra arra zouato poni zozosse tonanadedeni poni bodinicca nauatobote amossi naui qqui toquenazapa: —Rraho! Nema nezape ziniro icappirapazerre? Rridapanape poni bodinicca nauatobote cappirani −quenarrari. Nazapa Paoro dama, Sira dama iquenaza oza panani nocconiuarri iaccabaqqui-manarrari, uima cacattemadedeniza uati toquenauiuarrine. ₂₀Uima cacattemadedeniuarri bacco toquenazapa uati toquenarrari: —Qqui, arrarrari zodeodenipa icca oza pananicca madirraza moua moua narizemanaparra! −quenarrari. ₂₁—Poccadeni ididenicca madie tauimarini mari mari quenarrari. Naraha iape rromanodeni iquerrenezape poccadeni ididenicca madie tauimariniza rrehe inerrerani. Narraroza iboraqquiri inerrerani. Iaza oppina tani −quenarrari.

₂₂Nazapa madirra bazima Paorodeniza boquemanaza itacossimanauiuarrineraha uima cacattemadedenipa isso teppeppedenina icazossebaqquirrari: —Rrari, eterorideni ssiti tarizemanaza titacossimanarro! −quenarrari. ₂₃Nazapa itacossimanarrari cacotabote naza toponi cocoroza cororo izimemanarrari. Nazapa toponi cocoro cacauadeza uati toquenarrari: Arrarrarideni tecauabaqquiuissa tarro, zarra tarrarauiuarrine −quenarrari. ₂₄Nazapa toponi cocoro cacauadepa uima cacattemadedeni attideni mittazapa bodiccazana iaqquezimabaqquirrari. Issodeni auaza cabasso naza rrore caniqquimaza pamizaza canarrari.

₂₅Nazapa Paoro Sira tezerre zome nocconiraha Deoza uauatiti zarrari, Deoza uatizemanaza rrirririri zazapa toponi cocorocca madirra mittemanarrari. ₂₆Nanarra nami rrazirema zaroro narraro. Toponi cocoro tozimacca ozape sibaza canauatonirre narraro dacoreraha poni cauittanicca nami zaroro nezape narraro oza naqui zaroro canarraro. Nezape totoqquezima naqui touabarraro, domo uezarrarideni issodenicca, birridenicca corriti naqui rreo uarrarizarraro. ₂₇Nanarra toponi cocoro cacauade nocco torraza qqui tanerre totoqquezima touabani qqui tazapa: —Rraho domo toccaui! −narrari poua bodi. Nazapa toponi cocoroza domo uezarrarideni domo toccaui manaconipa pocca taminedeni poua inanazoqque-manaui noppine cappinaza pocca massito cauidiqquimeranarraro zoppa rreo poua nazoqqueuitouiraha. ₂₈Naraha Paoro pouaza uaua narrari: —Parri! Tia terrina terrerarri! Iape bazima arri rrassi izani −narrari.

₂₉Nazapa toponi cocoro cacauade rrorrororotoui uaua naza rrorrororo eccarronemanazapa piri tozimemanarrari. Nazapa toponi cocoro cacauade bodiuarri rroppa tozimanarra uarro narrarirrine tacca-cca narrari. Paoro Sira baccodeniuarri poua pitoza uitta narrari. ₃₀Nazapa toponi cocoro bodiuarri pamizaraha eqquenabaqquizapa uapiccazana pouadeniza uati tarrari: —Rraho, oua naqui ossiuauaniuarrinepe nerrecoma onaniuarrine? −narrari.

₃₁Naraha manaco pouaza uati toquenarrari: —Ia Zozossede Zesoza parrissa tezape tissiuauanitoui. Ticca madirra naco Zesoza parrissa quenazapa tocassiuauerauitoui −quenarrari Paoro Sira tezerre.

₃₂Nazapa toponi cocoro cacauade pocca madirra rrauirronaza Paorodeni ia Zozossede Zeso tauimari mari icanabaqquimanarrari. Nazapa bazima mittemanarrari. ₃₃Nazapa zome nocconiraha toponi cocoro cacauade passouarri iaccabaqquizapa berorideni ssaua inarizarraro. Nazapa narraro zomeza pocca madirra bazima passo dopaniza niniqui carrimanarrari. ₃₄Passo dopaniza niquide rricazapa toponi cocoro cacauadepa pocca ozauarri Paorodeni inarripabaqquirrari. Deoza rrehe nazapa uatizeri narrari. Pocca ozacca bazima naco Deoza rrehe quenazapa uatizemaneri narrari.

₃₅Narraro ssiuarraza uima cacattemadedenipa Paoro Sira tezerre tappa inabaqquimanauiuarrine isso teppeppe pamaha toponi cocoro cacauadeza uatide zosse inabaqquimanarrari. Touedazapa toponi cocoro cacauadeza uati toquenarrari: —Arra uima cacattemadedeni attidenipa: “Paoro Sira tezerre tappa tinabaqquina” quenaparra −quenarrari. ₃₆Nazapa toponi cocoro cacauade Paoroza uati tarrari: —Rridapana uima cacattemadedeni attideniza tiadeni tappa onabaqquiniuarrine. Tiadeniza uima nouerani. Mouaraza ticadenarri −narrari.

₃₇Naraha Paoropa isso teppeppedeniza uati tarrari: —Icadena-rrerani! Arrina, iape rromanodeni iquerreneraha icca uima cattemerani ia uaccade isso teppeppeza ia tocazossebaqquizapa ia itacossimanarraro. Madirra bazima naco ia qqui toquenade. Nazapa ia itacossimanezape ecotabote neza toponi cocorouarri ia coro tozimabaqquirraride. Naraha rridapana naqui icca uima cattema-rrereraha narrimeheza ia zosse tomani-baqquiuiuarrineco? Poni, iape narrimeheza icadena-rrerani! Uima cacattemadedeni rrauirronaza pouadenira ia tappa tabaqquimanauiuarrine uati tinanimanana −narrari Paoro.

₃₈Nazapa isso teppeppe pamaha uima cacattemadedeniuarri touedaniza Paorocca uima uati tanimanarrari. Arra Paoro Siradenipa rromanodeni querrenaui uima cacattemadedeni mittemanazapa uarro quenarrari. ₃₉Nazapa uima cacattemadedeni cappinemanaza toponi cocorouarri rraui torrarrari, bacco toquenazapa Paorodeniza uati toquenarrari: —Rraho! Irrine tiadeniza uima bica terrerani. Rridapanape icca uima naniza peperriua −quenarrari. Nazapa Paoro Sira tezerre eqquenabaqquizapa mouaraza pouadeniza uati toquenarrari: —Rridapanape arri icca oza pananizape timadimana terrerana. Arricca oza panani onihiuarrina ticadana −quenarrari. ₄₀Nazapa toponi cocorouarri uedenazapa Ridia madiniuarri touedanirrari. Nazapa nauiza Zesoza rrehe quenarrari bodideni acco icanabaqquizapa uatizemaneri narrari. Nazapa denima touedarrari.