Zerozareza queriqquiza uimahaha canarrari
1Nazapa Paoro Banabe tezerre oza panani Atioquiaza madimanaccaza zama Zodeacca madirra bacco quenarrari, Zesoza rrehe quenarrarideni maride rrauirronarrari. Poccadeni marinarrape arrima narraro: —Arri, zodeodenicca zopori cotani eteroni uissinarra pina Moizecca marinarrassa narraro tetideni rrimezape oppina tani. Narraro uissinarraza nacasseraqquiri tiquenezape ticassiuauera-rreranitoui −quenarrari Zodeacca madirra. 2Naraha Paoro Banabe attidenipa: —Nema nerrerani, oppinera tani −quenarrari. Nazapa Moizecca marinarra nauatoqquiri narrarideni tezerre arrauarri uati arrauarri uati quenarrari. Naraha poccadeni uima tobique-rrerezape Atioquiacca madirra attidenia: —Rrari, narraro uima uatide imecotedeni Zerozareuarri zosse inabaqquina, arra Zesocca zozosse tabaqquiza uati toquenauiuarrine. Nauicca Zesoza rrehe quenarrarideni cacauadedeni tezerre arrirraro uima icattememananiuarrine −quenarrari. Nazapa icatterriza-baqquimanarrari Paoro, Banabe, naui Atioquiacca Zesoza rrehe quenarrarideni pamaha quenaza oza panani Zerozareuarri zosse inabaqquimanarrari.
3Nazapa arra icatterriza-baqquirraridenipa Atioquiacca Zesoza rrehe quenarrarideni attideniza Zerozareuarri rraui torrarrari. Zama arobeni Penisiaza bacco toquenazapa nauicca Zesoza rrehe quenarrarideniza Paorodeni uati toquenarrari: —Rrehe, icca bobodezape zodeo querrena-rrararaha poccadeni uima inebomaneza rridapanapa Abi Deozana toquerrenarizaderra −quenarrari. Zama arobeni Samariaza bacco toquenaza naco narraro uima uati narizemanarrari. Nazapa Zesoza rrehe quenarrarideni bazima poccadeni uima mittemanazapa uatizemanarrari.
4Nama narronemanarraria Zerozare bacco toquenarrariparra. Bacco toquenazapa Zerozarecca Zesoza rrehe quenarrarideni, Zesocca zozosse tabaqqui, Zesoza rrehe quenarrarideni cacauadedeni quenaza bazima pouadeni qquide queriqquiza: —Nirra, bicaqquiri tiquenaqui? −quenarrari. Nazapa Paoro Banabe tezerre pouadeniza uati toquenarrari: —Rrehe, icca bobodeza Deo Atti maride icadarizezape Deorrine zodeo querrena-rrararrarideni naco Zesoza parrissa narizemanade −quenarrari. 5Naraha zodeodeni taide parizeocca marinarraza rrehe quenaporaha, naza zotode Zesoza rrehe quenarrari, narrari deni mota Paorodenicca uima mittemanazapa totememanaza uati toquenarrari: —Arri ettipe madirra ouahadeni naco zodeo querrena-rrararaha ia Zozossede Zesoza rrehe quenazapa uissinarra carrimanana, inarraro. Moizecca marinarraza iboqquiri nazapa oppina tani −quenarrari.
6Nazapa Zesocca zozosse tabaqqui Zesoza rrehe quenarrarideni cacauadedeni tezerre queriqquimanapomarrari, narraro uima icattememananiuarrine. 7Nazapa bazima arrauarri uati, arrauarri uati, arrauarri uati quenanarra manaco Pedoro totema naza pouadeniza uati tarrari: —Ouimecotedeni, occa uima tiadeniza rrizera tapode. Arra madirra ouahadeni naco zodeo querrena-rrararaha pouadeniza Poua Atti ouaccoraniuarrine Abi Deopa oua tocatterrizarraride. Zeso tauimari bicani icassiuaueraniuarrineccaza parrissa quenauiuarrine oua cazosserraride. 8Deopa madirra bodideni nauato tarra narrari. Zodeo querrena-rrararrarideni Zesoza parrissa quenaui Deo nauato tazapa pouadeniza Poua Corime inanarizarrari. Pina iaza Poua Corime inanarizaporrarissa narrari. Nama nazapa Deo Pouarrine zodeo querrena-rrararrarideni naco pocca madirra toquerrenauiuarrine nacassa taui auato inanarraro. 9Deopa pina iaza inanarrarossa narraro pouadeniza naqui nema inanarraro. Arra Pouarrine Zesoza parrissa quenazapa pouadeni bodi inauisso-baqquirrari. 10Naraha tiadenipe nerrecotoui tibodideniza: “Deo Pouarrine bica terrerani” tiquenarraro? “Deo nattome inana, ettiza uadi-rrarauitide” tiquenarraroqui? Arri tettidenipe: “Zodeo querrena-rrararrarideni Zesoza parrissa quenazapa Moizecca marinarra nemaneheza iboraqquiri nana” tiquenarraro. Naraha icca ididenipa Moizecca marinarraza iboraqquiri nauiuarrine parriremana-rrararrari. Ia naqui narraro marinarraza iboraqquiri inanissa taniuarrinepe iparrire-rrerani. Nazapa imecotedeni zodeo querrena-rrararrarideniza: “Moizecca marinarra nemaneheza iboraqquiri tiquenarri” tiquenezape pina madirra mirrira tarrariza: “ccanarrabote tinauanarro” tiquenarrarossa narraro. 11Naraha nema tiquenerrerarri, inarraro. Ia Zozossede Zesona pocca touati uanehema pocca dacorehema ia tonassiuauabaqquirrari. Narraro uimaza parrissa inarraro. Zodeo querrena-rrararrarideni naco pina iassa quenarrari. Zesopa pocca touati uanehema pocca dacorehema pouadeni naco inassiuauabaqquirrari −narrari Pedoro atti.
12Nazapa madirra bazima tocadidire naza tauaribobo canazapa manaco Banabe Paoro tezerre poccadeni uima uati toquenarrari. Arra zodeo querrena-rrararrarideniza Deo Atti maride uedarizazapa Deo canauatori canarizarrari tauimari uati uati toquenarrari.
13Poccadeni uima rriquezape manaco Tiaco uati tarrari: —Ouimecotedeni, ouatti titauaribobo canarri. 14Simao-Pedoro iaza uati taporraricca uimape arrima narraro: “Deopa zodeo querrena-rrararrarideniza pocca touati uanehe auato inanaporraro. Pouarrine zodeo querrena-rrararrarideni mota pocca madirra toquerrenauiuarrine icatterriza-baqquiporrari” nade Simao-Pedoro. 15Uima narrarossa narrarope maittaccazama Deo Atti cacomerabote Amos dozo inaporraro:
16“Ia Zozossede Deo Attipa arrima narraro: ‘Rrehe, Dabi Potemaui zodeodenicca cacauehepe rricani. Pina oza toqueuedimarrarossa narraro.
Naraha niza occanipomezape Dabi potemauipa ouacauabaqqui-pomauitoui.
Orrine poccadeni cacauehe torremaniniuarrinepe pina oza rraca canimanirrarossa nanitoui.
17Nama onanabaqquizapa madirra bazima arra zodeo querrena-rrararrarideni naco pouadeni Zozossede Otoui qqui narizemanazapa Ouaza bacco quenauitoui.
Occa madirra toquerrenana, oneza ocatterriza-baqquiuitoui’ napoui nade Deo Atti maittaccazama.
18Rrehe, ia Zozossede Deopa maittaccazama Poua Atti iaza uati narronarrari, itezerremacca uima nauatoqquiri inaniuarrine, naui nade Deo Atti cacomerabote.”
19—Nazama ouattipe arrima onarraro: Madirra ouahadeni zodeo querrena-rrararraripa poccadeni uima rradani nebomanaza bodideni cacarriqquimeraza Deoza toquerrenarizarraridenipa irrine ocasserani auemana-rrarana. Pouadeniza: “Moizecca marinarraza iboraqquiri tiquenana” inerrerana onarraro. 20Nezape pouadeniza arrirraro uimara dozo inana: Arra siba nauatoniza bani da tauiccapa mitta tiquena tarrararro, tirripemananiuarrine oppina tani. Bani ssipori niqui naui zoqqueza emene tocca-rrarauicca naco tirripemana terrerarri. Bani emene tirripemanauiuarrine naco oppina taui. Uananehe naqui tinebomanarri. Pina maqquiderre amonerre carriraha amonerre onihi arra arrape poni. Amonerre maqquiderre carriraha maqquiderre ouaha narra narrape poni. Tabiradeni naco pouama arra arra canarizera-rrarana. Narraro uimara pouadeniza dozo inana, onarraro. 21Narraro uima uapima Moizecca marinarraza dozo nanipe zama bazimaza torraribaqquirraro. Narraro marinarra maittaccazama mari mari quenaporraripa rridapana iaza bacco narronarraro. Icca zamaza, zama onihiza, zama onihiza naqui rrassinarracca uadaza Deo Atti mamariuarri pocca marinarra mari mari quenaui parra naccaui −narrari Tiaco.
Zodeo querrena-rrararrarideniza uima dozo iquenarraro
22Nazapa Zesocca zozosse tabaqqui, Zesoza rrehe quenarrarideni naco, pouadeni cacauadedeni tezerre bazima attidenipa: —Rrehe, arrima inana. Narraro uima Atioquiacca imecotedeniza zosse inana. Paoro Banabe tezerre zorro inanimananiuarrine bica tani −quenarrari. Nazapa poccadeni madirra pamaha naco Paorodeniza touedauiuarrine icatterriza-baqquimanarrari. Orraria onipa Zoda, poua oni ouahapa Barsaba. Poua tesse icatterrizemanarrari onipa Sira. Pouadeni pamahapa Zesoza rrehe quenarrarideniza deni toquerrenarrari. 23Nazapa pouadeniza uima teppe zosse iquenarrarope arrima narraro:
—Nirra imecote zodeo tiquerrena-rrerarrarodeni bicaqquiri tiquenaqui? Iape Zesocca zozosse tabaqqui oza panani Zerozareuarri Zesoza rrehe quenarrarideni cacauadedeni ineza tiadeniza icca uima dozo inarraro. Arri oza panani Atioquiaza timadimanarrarodeniza, zama Siriaza timadimanarrarodeniza, arri zama Sirisiaza timadimanarrarodeniza naqui icca uima zosse inarraro. 24Arri uima imittarrarope: Icca zama Zodeauarricca madirra tiadeniuarri rraui torrarraridenicca marinarrarrine ocasserani temanani imittani. Attidenipa: “Zodeodenicca zopori cotani eteroni uissinarra ticarrimanarri, Moizecca marinarrassa tinanemananiuarrine” quenazapa ssamoni temanarraro. 25Nazama uimahaha icaneza rrehe icanirezape: “Imecotedeni Atioquiauarri uatide zosse inabaqquina” inezape arrauarricca imecotedeni pamaha icatterrizabaqquiza tiadeniuarri zosse inabaqquiuitoui Banabe Paoro tezerre. Rrehe, Banabe Paorodenipa imecote bicaca tarrari, pouadeniza eti uana tarraro. 26Pouadenipa ia Zozossede Zeso Cristo tauimari maride toquerrenarizaza oppinani auarizemanaraha attidenipa: “Ipamarroneza naqui bica tani” quenarrari. 27Nazama ia zosse inabaqquiuiuarrinepa Zoda Sira tezerrena icca uima iaqquemaneza tiadeniza uati toquenauitoui. 28Deo Corime ibodi acco canazapa etti arrima inarraro: Arri Moizecca marinarra nemanehe tibodideniza ccanarra tezape Moizecca marinarra mota deni torraniccazara iboraqquiri tiquenarri, inarraro. Narrarope arrima narraro: 29Arra madirra icca Deoza toquerrena-rrararraridenicca bani poccadeni siba nauatoniza da tauiccapa mitta tiquena tarrararro, tirripemananiuarrine oppina tani. Bani ssipori niqui naui zoqqueza emene tocca-rrarauicca naco tirripemana terrerarri. Bani emene naco tirripemanauiuarrine oppina taui. Uananehe naqui tinebomanarri. Pina maqquiderre amonerre carriraha amonerre onihi arra arrape poni. Amonerre maqquiderre carriraha maqquiderre ouaha narra narrape poni. Tabiradeni naco pouama arra arra canarizera-rrarana, inarraro. Tiadenipe arri icca dozonirrissa tinanemanezape bica tani, inarraro. Peperri icca uima −quenarrari poccadeni uima teppeza.
30Nazapa Zoda Siradeniza poccadeni uima da iquenezape: —Deo onima rraui tirranissa tana −quenarrari. Nazapa Paoro, Banabedeni touedanizapa Zoda, Sira tezerre pouadeniza touedarrari. Atioquiaza bacco tanimanazapa nauiuarricca Zesoza rrehe quenarrarideni tezerre queriqquimanaza pouadeniza uima teppe da iquenarraro. 31Nazapa Zesoza rrehe quenarrarideni uima teppe ua iqueneza uima bicani mittemanazapa uatizemanarrari. 32Zoda Sira tezerrepa Deo Atti uauati toqquimadedeni toquerrenazapa Zesoza rrehe quenarrarideniza Deo Atti uati iqquimemanarraro. Poccadeni uatinarra arabo taniccaza uati uati toquenazapa Zesoza rrehe quenarrari bodideni inauatize-baqquimanaza poccadeni rrehenirri todacorani narraro. 33Nazapa nauiza madimana-zanaponarra pouadeni zosse inabaqqui-manaporrarideniuarri touedaniuiuarrine Atioquiacca Zesoza rrehe quenarrari Zodadeni zosse inanibaqquimanarrari. Attidenipa: —Rrehe, Deo pocca rronehema tiadeni touacaua-baqquiuissa tauitoui −quenarrari. 34Naraha Sirapa ibouiuarrine touini naza toccani-rrararrari. 35Paoro Banabedeni naco Atioquiaza madimanaccarrari. Pouadenipa Atioquiacca Deo Atti mamaridedeni tezerre ia Zozossede Zeso Cristo tauimari icassiuaueraniuarrinecca mari mari zanapomanarrari.
Paoro pocca bobode zotodecca
36Nazapa naui Atioquiaza madimana-zanaporaha Paoropa Banabeza: —Rrina, Deo Atti mari icanabaqquipouiuarri icadapomana. Arra imecotedeni Zesoza rrehe quenarrarideni nerrecoma quenaui? −narrari Paoro.
37Nanarra Banabepa Zouao pouaza Maraco quequenanarrari pouadeniza toccauiuarrine touini narrari. 38Naraha Paoro attipa: —Narraripa poua. Taidena ibirri accode torraraha zama Papiriauarri ia tonebobaqquide, denima Deo Atti maride iquerrena-zanaponiuarrineraha −nade. 39Nazapa uimahaha canaraha rrehe canire-rraraza pouadeni queneborezapa arrauarri toccade arrauarri toccade quenarrari. Nazapa Banabe Maraco tezerre darroni imeniza touedarrari. Zama bedeni ueni imehiza uittacossani onini Sipreuarri bacco toquenarrari. 40Naraha Paoropa: —Sirana ouaza toccana –nazapa touedauiuarrine Zesoza rrehe quenarrarideni Deoza uati toquenarrari: —Abi Deo, arrarrarideni tecauabaqquiuissa tana. Ticca touati uanehema uedarizauissa tauiuarrine −quenarrari. Nazapa touedarrari. 41Touedazapa zama Siriaza bacco toquenaza maride toquerrena, denimacca zama Sirisiaza bacco toquenaza maride toquerrena zanaporrari. Nauiuarricca Zesoza rrehe quenarrarideni inauatizebaqquirra zanapoui narrari.
