Atos 14

₁Nazama Paoro Banabe tezerre oza panani Iconioza bacco toquenazapa zodeodenicca Deo Atti mamariuarri totouedezima naza mari mari ihicanabaqqui narrari. Attideni bica taza Zeso tauimari mari icanabaqquizapa zodeodeni mota uapi taha, zodeo querrena-rrararrarideni naco mota uapi taha parrissa quenarrari. ₂Naraha zodeodeni mota arra Zesoza rrehe quena-rrararraridenipa zodeo querrena-rrararrarideniza uati narizemanarrari, Paorodeniza tonacasseremanauiuarrine. Nazapa pouadeni attirrine narrarideni naco Paorodeniza uadimanarrari. ₃Nama quenaraha Paoro Banabe tezerre naui pouadeniza madimana-zanaporrari. Ia Zozossede Zesorrine cappinenera taza Deo madirraza uati cauanari canaui tauimarini mari icanabaqqui-zanaporrari. Nazapa narraro uima parrissa auato taniuarrine Deo Paorodeniza pocca nauatoue da inezape canauatorimanana canarizarrari. ₄Naraha naui oza pananicca madirra uima inapamemanezape motapa: —Zodeodeni Zesoza rrehe quena-rrararraridenicca uimana bica tani −quenarrari. Naraha motadeni naco: —Zeso tauimari maridedenicca uimana bica tani −quenarrari. ₅Naraha Paorodeniza nacasseraqquiri narrarideni arra zodeodeni mota, zodeo querrena-rrararrarideni tezerre, poccadeni taminedenima carrimemanaza uima narroremanaporrari: —Paorodeni damama inaza inarrizobaqquiza sibaza iquenabaqquina, topamarronauiuarrine −quenarrari. ₆Naraha Paoro Banabe tezerre uima mittemanazapa zama onihi Ricaoniauarri zarra tarrari. Narraro zamacca oza panani onini Ristaraza bacco toquenarrari. Zotode naco oza onihi Derbiza bacco toquenapomarrari. Oza pamehema narraroza naqui bacco tarizemanarrari. ₇Narraro zama Ricaoniauarri uedarizazapa Zeso tauimari icassiuaueraniuarrinecca mamariri narizarrari.

₈Nazapa naui oza panani Ristaraza madirra amori siri qqui quenarrari. Pouapa nama naha tossonarrari, ccarizauiuarrine ssamo tarrari. ₉Arra amori siripa Paorocca marinarra tauaribode uittarrari. Nanarra Paoropa amori siri icattoma naza pocca rrehenirri nauato tarrari. Arra poua bodipa: —Rrehe, Zesopa oua tonanomiuiuarrine parrireui −narrari. ₁₀Nazapa Paoro pouaza rrazirema uaua narrari: —Titemarri! Tenissa tarri! −nanarra amazati totema, ccariza narrari.

₁₁Nazama amori siri Paoro attiza Deorrine tobicaui madirra qqui toquenazapa zama Ricaoniacca madirra pouadeni attideniza rroua rroua quenarrari: —Rridapanapa ia cacauade memeuarricca madirra toquerrenaza bacco naronemanaui, bacco naronemanaui! −quenarrari. ₁₂Nazapa pouadeni cacauade memeuarricca oniza icanacanibaqqui-manarrari. Banabepa pouadeni cacauade deni torrauicca Zeho oniza cacanirrari. Paoropa uatirride rarrarirrine pouadeni cacauadedenicca uima uauatide Ermesi oniza cacanirrari. ₁₃Nezape narraro oza panani Ristaraza pouadeni cacauade Zehoza poccadeni danirri da toqquimauiuarrinecca oza carrimanarrari. Oza pananicca rraui bacco tozimaponi inidiuarri cauittarraro. Nazapa Zehoza poccadeni danirri dada toqquimade tamine pocca madirra tezerre Paorodeniza uatizemanazapa: —Icca danirri pouadeniza da inana −quenarrari. Nama quenazapa boui maqqui pamaha eccarronabaqquimana, aua moue nauatoui tomattoccauarrine naco eccarronemana narrari. Paorodeniza: —Ia cacauade tiquerrenani −quenaza boui inapamarrone-manauiuarrineraha.

₁₄Naraha Banabe Paoro tezerre pouadeniza madirra uatizemanaza boui inapamarrone-manauiuarrine quenaui mittemanazapa uarro quenarrari. Bodideni ocassera taza poccadeni etero mattoniza rroca sseo quenazapa madirra domodeni uauiuarri zarra tozimarrari. Attideni dacoraza uati toquenarrari: ₁₅—Nerrecotoui ticcadeni uima iaza nema tinanemanarraro? Iape madirra, arri tiadenissa inani! Tiadeniza uima bicani icassiuaueraniuarrinecca uatide icadarronarraro. Arri ponima iaza: “Ia cacauade Zeho, Ermesi” titiquena narrarope tinebomanarri! Ticcadeni deo pouamaccaza: “Ia cacauade” titiquena narrarope tinebomanarri. Deo camitta tarrarizara parrissa tiquenarri. Pouana bazima inauatorizarraro. Meme inauato, zama inauato, passo imeni inauato narraro. Meme abari inauato, zama abari inauato, passo abari inauato, ia bazima naqui ia tonauatobaqquirrari. ₁₆Naraha maittaccazama Deopa madirra bazima eccoccobaqqui-rrarazapa poccadeni uima touira dameraqquiri naza nama narronemanarrari. ₁₇Nama quenaporaha Deo Pouarrine pocca biquehe bazimaza auato zanaporraro. Pouarrine passo tiadeniza ccacca narraro narraro, zamatapa naco moro moro tarrari. Pouarrine rrirripa titicarrimana zanaporraro, Pouarrine naqui tetetizemana narraro. Narraro bazimaza tibodidenipe: “Deo madiui” titiquena naniuarrineraha −quenarrari Paorodeni.

₁₈Paorodenipa uati uati quenaraha mittemana-rrararrari. Boui naco inapamarronauiuarrine dameraqquiri naraha Paorodeni denima uati uati quenaza mittemanazapa: —Peperriua, poua −quenarrari.

₁₉Nanarra Atioquiacca, Iconiocca zodeodeni arra Paorodeniza nacasseraqquiri narrarideni nani Ristaraza bacco narronemanarrari. Narraro oza pananicca madirraza uati narizemanaza Paorodeniza uima inanemanapomarraro. Nazapa pouadenirrine Ristaracca madirra naco Paorodeniza uadimanarrari. Nazama arra uadimanarraridenina Paoro zoqqueuiuarrine sibaza iquenaqquimanarrari. Iquenaqquimanaza Paoropa pouadeniza pina parra uatiarirrarissa naza oza panani uapiuarri rroca coro iquenaza: —Rridapanapa zoqqueui −quenarrari. ₂₀Naraha arra Zesoza rrehe quenarraridenipa Paoro ponauiuarri qquide rrauirrona, bacco narronemanaza domo uauarraninarra Paoro totemaza ozauarri toccanirrari. Uada ssiuarrapa Paoro Banabe tezerre Derbiuarri touedarrari. ₂₁Naui Derbiuarri bacco toquenaza naco Zeso tauimari bicani icassiuaueraniuarrinecca mari icanabaqquizapa madirra mota uapi taha Zesoza parrissa quenarrari.

Nazapa Derbiuarri maride rriqueza pouadeni nattiuarri dozonimanazapa Ristaraza bacco, Iconioza bacco, Atioquiaza naco bacco nanimanarrari. ₂₂Uedaniza naco Zesoza rrehe quenarrarideni uatizemanauiuarrine bodideni acco icanabaqqui-rizapomarrari. Paoro attidenia: —Zesoza parrissa tizanapomanarri. Deorrine ticcadeni rrehenirri todacorani zanaponitoui. Ocasserani terizemaneraha nema nehe tinauanemanarizana. Tiadenizama ia naqui ocasserani inauananitoui. Nema inezana Deocca cacaueheza bacco inaniuarrine, inarraro −quenarrari. ₂₃Nazapa arra oza panani onihi, onihi narizarrarocca Zesoza rrehe quenarrarideni cacauadedeni toquerrenauiuarrine icatterriza-baqquimanarrari. Deo pouadeni acco icanabaqquiuiuarrine rripehe nebocossemanaza Pouaza uati toquenarrari: —Abi Deo, arrarrarideni acco ticanabaqquina, ticca Erredeniza rrehe quenarrarideni ecauabaqqui-manauiuarrine −quenarrari.

₂₄Naui zotodepa Paoro Banabe tezerre zama arobeni Pisidia tossoniqquimani-manazapa zama Papiria bacco tanimanarrari. ₂₅Arra Papiriacca oza panani Peziza Deo Atti maride toquerrena nanimanarrari. Naui zotodepa oza panani onihi Atariauarri bacco zippanimanarrari. ₂₆Nazapa zama Siriacca oza panani Atioquiauarri touedaniuiuarrine darroni imeniboteza touedezanizapa touaccanimanarrari. Narraro oza pananizape taide pouadeni rroppeme-manapouiuarrine Zesoza rrehe quenarrarideni Deoza uati toquenaporrari, Deo pocca touati uanehema pouadeni ecauabaqquiuiuarrine. Nazapa Paoro Banabe tezerre Deo Atti eccorarizemanehe rriquezape narraro oza pananiuarri uedanirrari. ₂₇Atioquiaza bacco nanimanapomazapa Zesoza rrehe quenarrarideni queriqquiuiuarrine uaua inabaqquimanarrari. Queriqquimanazapa Zeso tauimari maride pouadeni uedarizauicca uima bazima uati uati toquenarrari. Deorrine zodeo querrena-rrararrarideni bodideni narrorauissa taza Zesoza rrehe quenarrari tauimarideni naco uati uati toquenarrari. ₂₈Nazapa naui Atioquiacca Zesoza rrehe quenarrarideniza abazico uapi taha madimana-zanaporrari.