Banabe Saoro tezerre zama onihiuarri Deo Atti maride uedarizauiuarrine
1Nazama oza panani Atioquiacca Zesoza rrehe quenarrarideniza quequeriqquimana narraripa Deo Atti uauati toqquimadedeni, Deo Atti mamaridedeni naco. Pouadeni onidenipa: Banabe, Simeao-Soueui, Rosio Sireneuarricca, Saoro, Manahe quenarrari. (Manahepa zama arobeni Carireacca tamine Erodi tezerre canapirerrari.) 2Nazapa toqueriqquimanaza rripehe nebocossemanaza Deozara uatizemananarra pouadeniza Deo Corime uati tarrari: —Rrari, Banabe Saoro tezerre ticatterrizabaqquimanarro. Pouadeniza uaua onarrarope zama onihi, onihiza Ouattiza zepedeni irrimanauiuarrine −narrari.
3Nazapa zotode rripehe nebocossemana-pomaza Banabe Saoro tatideniza bara quenaza Deoza uati toquenazapa: —Ticadarri −quenarrari.
Banabe Saoro tezerre Sipreuarri Deo Atti maride toquerrenarrari
4Nazama Deo Corime Banabe Saoro tezerre zosse inabaqquizapa ueni imehi inidicca oza panani Sereosiauarri touedezipparrari. Nazapa darroni imenibote etero ssoque caniqquimani carriniccaza touedezaza iaccabaqqui-manarrari, zama uittacossani onini Sipreuarri touedarrari. 5Narraro zamaza bacco toquenazapa oza onini Saramineza uana tocanemanarrari. Nauiza zodeodenicca Deo Atti mamari onihiuarri, onihiuarri Deo Atti maride toquerrenarizarrari. Arra Zouao pouaza Maraco quequenanarrari naco pouadeni birri accode ccarizarrari.
6Nazapa narraro zama uittacossani Sipreza maride rrauirizazapa oza onihi onini Papo bacco toquenarrari. Naui Papozapa zodeodenicca zoppinerre bacco iquenarrari. Poua onipa Barieso. Poua attipa: —Deo Atti uati toqquimade nauato onani −nanarra naraha maizarrari. 7Arra pouapa zama cacauade Sezio-Paoropa tezerre tocaberarrari. Nazama Sezio-Paoropa bodi nauatorride rarrari. Narraria arra Deo Atti mittauiuarrine nacassa taza Banabe Saoro tezerre uaua inabaqquirrari. 8Naraha zoppinerre Barieso, poua oni zama Cresiacca touattiza: Erima quequenanarrari, narraripa poua tesse Sezio-Paoropa Deoza torrauiuarrine nacassera taza pocca uimara uati uati narrari. Poua attipa: —Pouadeni attiza rrehe onerrerani. Tia naqui rrehe terrerarri −narrari Barieso-Erima. 9Nazapa Saoro, arra poua oni ouaha ua quenauipa Paoro quequenanarrari, poua bodiza Deo Corimecca dacorehe torranissa teza zoppinerre icattoma naza uati tarrari: 10—Maizarride tirrirani! Uaidira tinani, pina maizehe rrinede Tocorime-Taminessa tarraro. Uima bicani uauadide tirrarraro. Ia Zozossedecca marinarrape borocco teraha tirrine rrouizo tarraro. Nerrecotoui ticca uimaza peperri terrerarraro? 11Naraha rridapanape Deorrine tia narrizozapa tinocco siri torrana. Uada uapi tehe marri ssiuerrene qqui tina-rrarauitoui −narrari Paoro Barieso-Erimaza.
Nazapa amazati nocco toziziza poua inequenimanauiuarrine madirratoui pouama bara narizarrari. —Oua acco ticanemanarri −narizarrari. 12Nazapa zama cacauade Sezio-Paoropa arra Paoro atti Barieso-Erimaza uati tarrari parrissa torrani qqui tazapa Zeso tauimariza parrissa narrari. Ia Zozossede Zeso tauimari Paorodenicca marinarraza: —A, poccadeni marinarra bica tani −narrari.
Paoro Banabe tezerrepa zama Pisidiacca oza panani Atioquia bacco toquenarrari
13Nazapa Paoro poua tessedeni tezerre oza panani Papo rrippeuarri darroni imeniboteza touaqquemanazapa zama onini Papiriaza uana tocanemanarrari. Naui uana tocanemanauicca oza oninipe Pezi. Nauizana Zouao Paorodeni inebobaqquiza poua motta Zerozareuarri toccanirrari. 14Naraha Paorodenipa Peziza rroppememanazapa pouadeni amoriza zama arobeni onini Pisidiauarri touedarrari. Nani Pisidiacca oza panani onini Atioquia bacco toquenarrari. Nazapa rrassinarracca uada bacco tezape zodeodenicca Deo Atti mamariuarri touedezimaza zitocanarirrari. 15Nazapa Deo Atti mamaricca taminedeni Moizecca marinarra ua iquenarraro. Deo Atti cacomeraqquiri narraridenicca dozonirri naqui ua iquenarraro. Narraro rriquezape Deo Atti mamaricca taminedenia poccadeni madirra orraria icazossemanaza Paorodeniza uati tarrari: —Imecotedeni, Deoza denima etizeniuarrine uima bicani ticarrimanezape rridapana uati tiquenarri. Ticcadeni uima imittana, quenaparra taminedeni −narrari.
16Nazapa Paoro pocca uima uati tauiuarrine totemaza poua zepe da narrari, tocadidire nauiuarrine. Nazapa pouadeniza uati uati tarrari: —Rrehe occa madirra Izarraeodeni, madirra ouahadeni Deoza iboraqquiri tiquenarraro naqui titauaribobo canarri. 17Ia Izarraeodenicca Deopa icca idideni icatterriza-baqquirrari. Pouarrinena icca idideni madirra ouahadenicca zama onini Ezitoza madimanazapa touapirrariparra. Ezitocca taminerrine pouadeniza uima oppina teraha, Deopa dacorarra narrari. Pouarrine Ezitouarri rrauininerrariparra. 18Nazapa madirra madide nouerauiuarri uarrano 40 naha rrauirizaza naco Pouaza rrehe quenauissa tarrararaha Deopa parra inebobaqquiriui narrararrariparra. 19Nazapa icca ididenicca zamabote Canahauarri madimanauiuarrine Deopa pouadeni acco icanabaqquirrari. Madirra ouahadeni touatti onihi onihi carrimanarrarideni madimanaui 7 quenaraha Deorrine rricarizarrari. Nazapa icca idideniza: “Arrirraro zamape ticcadeni torrana” narrari Deo. 20Nazapa pouadeni madirizemanarraricca uarrano bazimapa 450 narrari. (Arra Ezitouarri uarrano 400 naha madimanarrari, madirra madide nouerauiuarri uarrano 40 naha rrauirizarrari, zotode Canahauarri bacco toquenaza uarrano 10 naha nauicca madirraza rrazire inanemanarraro.)
—Nazama uarrano 450 rricazana icca idideni uimarideni cattemade torrauiuarrine Deopa onideni ua inarronabaqquirrari. Orraria zoqquezapa ouaha oni ua inarrari. Narrari zoqqueza naco ouaha oni ua inarrari. Narrari zoqqueza naco ouaha oni ua inarrari. Nama zanapomanarrari. Uima cattemade rricauiccapa Deo Atti cacomerabote Samoeoparra. 21Nazama Samoeo madizapa icca idideni pouaza uati toquenarrari: “Iape tamine deni torrauicca touina inani” quenarrari. Attideni nama quenazapa Deorrine Sao tamine torrazapa uarrano 40 naha zosse zosse narrariparra. Arra Saopa Benzami potemaui Quis bedi. 22Naui zotodepa Deo Saoza paparra naza Deorrine Dabina tamine torrarrari. Nazapa Dabiza arrama narrari Deo Attipa: “Zese-Izahi bedi Dabina madirra bicaui. Poua bodipa pina obodissa narrari. Pouapa ouattissa inana-zanaponitoui” naui nade Deo Atti. 23Nazama arra tamine Dabi Potemauipa Zesoparra. Narrarina ia Izarraeodeni Tonassiuauade torrauiuarrine Deo zosse inaronarrari. Pina taide Deo Poua uati tapouissa narraro. 24Zeso maride torra-rraraccazama taidepa Zouao Batistana Izarraeodeni bazima mari icanabaqquipozapa arrama narrari: “Rrari, Deoza tiquerrenaniuarrinepe ticcadeni uimasiri tinebomanarri. Nazana passo dopaniza tiadeni niqui ozanabaqquina” naui nade Zouao atti. 25Nazama Zouaopa poua zoqqueuicca uada touarrirezape pocca mamari tabaqquiza taide uati taporrari: “Arra toui timadimanarrarope, arri ouazara: Tia parri nitide, titiquena narraro. Naraha ouape narrari orrarrerani. Arra toui timadimanarrarope onatti ccarronauitoui. Ouape arrimani orrani. Pina pocca zozossessa onaniuarrinepe oparrire-rrerani. Poua amoricca sadaria diccade naqui oparrire-rrerani” napoui nade Zouao −narrari Paoro.
26—Rrehe ouimecotedeni, arri tiadenipe Abarahao potemaui tiquerrenani titauaribobo canarri. Arri motape madirra ouaha tiquerreneraha Deo Attiza iboraqquiri tiquenani titauaribobo canarri. Deopa ia bazimaza pocca uima icassiuaueraniuarrinecca inanarizarraroparri. 27Naraha arra Zerozareza madimanarraridenipa poccadeni taminedenima Zeso qqui toquenaraha bodideni ssamoqquiri narrari. “Zesopa Deocca zossenirri ia Idinide” quena-rrararrari. Narraro uimape Deo Atti cacomeraqquiri narrarideni dozo iquenaporaha mittemana-rrararrari. Poccadeni Deo Atti mamariuarri rrassinarracca uadaza Deo Atti cacomeraqquiri narraridenicca dozonirri mittemana mittemana naraha: “Zeso zoqquena, zoqquena” quenarrariparra. Nama quenazapa pina Deo Atti cacomeraqquiri narrarideni dozo iquenaporrarossa nehe inanemanarraro. 28Pouadenipa: “Zeso uima inanarraro manaconi zoqquena” quenaraha uima cappirauissa tarrari. Naraha tamine Piratoza uati toquenaza: “Zeso zoqquena” quenazapa pouadeni attiza rrehe nazapa zoqqueuiuarrine icazossebaqquirrari. 29Nazapa Zeso inanazoqque-manarraripa poua zoqqueuiuarrine tauimari Deo Atti dozo naporrarocca nemanehe inaparriremananissa tarraro. Aua porimacossaniza idironemanaza sibaza tonoccobiriuarrine ui tozaniza ibezemanarrari. 30Naraha Zesopa uada 3 naza Deorrine nauatonirrari. 31Nauatonizapa poua uatimadedeni arra Carireauarri pouaza rrauirizaza Zerozareuarri bacco toquenarrarideniza uada uapi taha ahauatoni narrari. Narrarideni attidenipa: “Iape Zeso camittemaniui qqui inade. Ia qqui inarrari narraro uima ecomerarizarraro” quequenanarrariparra −narrari Paoro.
32—Nazama oua Banabe tezerre naqui Zeso tauimari bicani icassiuaueraniuarrinecca tiadeniza uati inarraroparri. Maittaccazama Abi Deopa icca idideniza narraro uima uati taporrari. 33Rridapana iape narrarideni potemaui iquerrenarraroza narraro uima parrissa torrarraro. Narraria Deo Poua Bedi Zeso inauatonirrariparra, pina maittaccazama tamine Dabi pocca rrirriri zotodeccaza dozo inaporraro:
“Neppe, tiape occa erredeni tirrani. Rridapana ticca Abi orrarraro. Tiaza camittehe da onarraro”
naui nade Deo. 34Nazama Abi Deo Poua Bedi zoqqueza inauatonizapa zoqquepoma-rrarauiuarrine uati tarrari. Poua ime naqui rrazi-rreraniuarrine uati taporrariparra. Narraro uimape Deo Atti cacomerabote Izaia dozo inaporraro:
“Occa uatinarra parrissehe bicani nemanehe Dabiza uati onaporrarope tiadeniza pina ouattissa onananitoui”
naui nade Deo. 35Narraro uimape tamine Dabicca rrirriri onihiza naqui arrima narraro:
“Ticca erredeni bicabote tirrine poua ime namiza rrazi-rreranitoui”
naponi nade Dabi dozo inaporraro. 36Nazama arri Dabi dozo inaporrarope pocca uima rrerani nauato inani. Arra tamine Dabipa Deoza ibora taza uarrano uapi taha icca idideni ecauabaqquiuissa tarrari. Naraha uatiaza ppa izemanazapa pocca abideni rricaporraridenissa narrarouarri torrarrari. Poua ime naqui batteza rrazirraro. 37Naraha Deorrine Zeso nauatonirraripa poua imena batta-rrerarraro. Narraricca uima Dabi dozo inaporraro −narrari Paoro.
38—Ouimecotedeni, tiadenipe arrirraro uima ticauatterarri: Zesoza iquerrenezape pouarrine Deopa icca uimasiriza: “Peperri, ouati rrimani” narrari. Narraro uimape tiadeniza ecomerarraroparri. 39Zesoza parrissa inezape pouarrine uimasiri ia tappa tabaqquirraro. Naraha Moizecca marinarrape narrarossa nerrerani. Narrarope icca uimasiri ia tappa tabaqquiniuarrine parrire-rrerarraro.
40—Parri, Deo Atti cacomeraqquiri narrarideni dozo iquenaporrarossa narraro tiadeniza ssonarirana! Arra Deo Atti cacomerabote Abacoque pocca dozonirriza arrirraro uima dozo inarraro:
41“Rrari, Ouatti rrarra ticanemanarrarodeni ticattomama canarri. Orrine qqui tiquenezape oppinani temaneza tirraborrerimanehe tirricanitoui! Niza timadimanaqquezama tiadeniza narraro uima torraniuarrine uatide carri taraha parrissa tiquenerreranitoui”
napoui nade Deo −narrari Paoro.
42Nazama narraro uima maride rricazapa Paoro Banabe tezerre zodeodenicca Deo Atti mamariuarri uedenazapa pouadeniza queriqquimanarrarideni uati toquenarrari: —Rrassinarracca uada bacco tapomeza Zeso tauimari ia mari ticanabaqquipomaniuarrine ticadarronapomana −quenarrari. 43Nazapa queriqquimanaha rricaza zodeodeni motapa Paorodeniza rraui torrarrari. Zodeo querrena-rrararaha zodeodenicca marinarraza toquerrenarrarideni naco rraui torrarrari, uima denima mittemanauiuarrine. Nazapa Paorodeni attidenia: —Zesoza parrissa tiquenezape bica tani, nema tizanapomanana. Deo tiadeniza uati cauanari canauicca uima tinebomana-rrerana −quenarrari Paorodeni uati uati toquenaza.
44Nazapa rrassinarracca uada onihi bacco tapomeza queriqquimanapomarrari. Oza pananicca madirra bazima Deo Atti mittade pouadeniza queriqquimanarrari. 45Naraha zodeodeni motapa Paoro Banabe attidenitoui madirra uapi taha queriqquimanaui qqui toquenazapa narraro acconi uadimanarrari. Nazapa attideni uaidira taza atti atti quenarrari: —Ticca uimape parrissa rrerani, ponima uati uati tinarraro. Ticcanirri, uaidira tinani! −quenarrari Paoroza. 46Naraha Paoro Banabe tezerrepa cappinenera taza pouadeniza uati toquenarrari: —Taidepe arri icca madirra zodeodeni tiadenizana Deo Atti icassiuaueraniuarrinecca uima eccoraponiuarrine Deo ia tocazossebaqquizapa nema inanarraro. Naraha tiadenipe timittemananiuarrine nacasseraqquiri tiquenezape parrissa tiquenerrerarraro. Nema tiquenerrerezape tettideni pina: “Iape Deocca camittehe rriquerreraniccaza imadi-zanaponiuarrine iparrire-rrerani” tiquenarrarossa narraro. Rridapanapa arra zodeo querrena-rrararraridenira mari icanabaqquina, inarraro. 47Abi Deopa madirra bazima maride iquerrenaniuarrine Poua Atti dozo naponiccaza ia tocazossebaqquirrari. Narraroa arri Poua Atti cacomerabote Izaiacca dozonirriza arrima narraro:
“Orrine tiadeni pina ssiuarranissa tiquenezape zodeo querrena-rrararrarideniza madirra tocassiuauerauiuarrine tauimari auato tinanemananiuarrine mari mari titicanabaqqui-rizemana nezape zama nemaneheza madirizemanarrarideni tocassiuauerauiuarrine, onarraro”
napoui nade Deo −narrari Paoro.
48Paoro atti nama nazapa zodeo querrena-rrararrarideni mittemanazapa uatizemaneri narrari: —Ia Zozossede Zeso tauimari bica tani, bica tani −quenarrari. Nazama arra camittehe rricaquera tanicca carrimanauiuarrine Deo icatterriza-baqquiporrarideni Zesoza rrehe quenarrariparra.
49Nazapa ia Zozossede tauimari icassiuaueraniuarrinecca narraro zama arobeni nemaneheza torrarizarraro. 50Naraha zodeodeni motapa Paorodeniza boquemanaza denima mari mari quenauiuarrine nacasseraqquiri nazapa uima inanarizemanarraro. Pouadenirrine naui Atioquia oza pananicca cacauadedeni Paorodeniza uadimanarrari. Amonerre deni toquerrenarraro arri Deoza iboraqquiri narraro ponideni naqui Paorodeniza boquemaneza uima ssarra tarizezape poccadeni zama arobeniuarri moua ininebaqqui-manarrari. 51Nazapa Paoro Banabe tezerre narraridenicca uaidirehe auato taniuarrine pouadeni amoricca ssiqui catorraniuarrine pporo pporo quenazapa: —Peperriua! Ticcadeni uima uaidira tani −quenaza oza panani Iconiouarrina touedarrari. 52Naraha naui Atioquiacca Zesoza rrehe quenarrarideni uatizemaneri narrari. Deo Corime naco pouadeni bodiza torrarizauissa tarrari.
