Zeso Cristocca zozosse tirrezape pina isso teppeppe ibora tarrarissa tarri
1Timoti, tiape pina occa erredenissa tani. Zeso Cristocca touati uanehema daco tirrirarri. 2Madirra bazima occa marinarra mittemanazapa tia naqui ouatti timittade. Narraro marinarrape Deotoui dameraqquiri narrarideniza maride tirrarri. Pouadeni naco parriremanazapa madirra ouahadeni mari icanarizabaqqui-manauiuarrine, onarraro.
3Ocasserani tiaza bacco tezape nema nehe tinauanarri, onarraro. Zeso Cristocca zozosse tirrezape pina isso teppeppe ibora tarrarissa tarri. 4Madirra isso teppeppe torrarraripa isso teppeppe rrararraridenicca madiecca uimaza carrima-rrararrari. Poua zossedecca zossenirrizara ibora zanaporrari, poua zossede inauatizeuiuarrine. 5Narrarossa narraro Zesocca zozossepa pina madirra ittomeza rroppa tarrarissa nauiuarrine. Ittome cacauade attissa inanaza taide bacco nanipozapa manaconi carrirrari. Naraha ittome cacauade attissa inana-rrerezape manaconi carri-rrararrari. 6Zesocca zozossepa pina madirra uizarra ppade damera tarrarissa nauiuarrine. Tarabaiade ibora tazapa pouana taide zamatapa ppa taui bono carripouitoui. 7Rrehe, narrarideni tauimarideniza tibodi uatonissa tarri. Ia Zozossede Zeso Cristopa uima bazima timittanissa taniuarrine tia acco canauitoui.
8Tibodi uatomarri: Zeso Cristopa zoqqueraha nauatonirrari. Pouapa tamine Dabi Potemaui. Narrari tauimari icassiuaueraniuarrinecca mari mari onarizarraro. 9Narrari tauimarirrine ocasserani onauanarizarraro. Pina uaidirehe tonanemanarraridenissa onehe cadeiaza oua rrore iquenezape oua coro izimemanarraro. Neraha Deo Attipe rrore iquenaniuarrine ssamo tani. 10Nezape orri onerrereza ocasserehe uapima onauanarraroparri. Nema onarrarope Deo icatterriza-baqquiporrarideni Zeso Cristo tauimari icassiuaueraniuarrinecca mittemanaza parrissa quenazapa Deo inassiuauabaqquiuitoui, Deo Poua ssiuerrenema Pouaza madimana-zanapouiuarrine.
11Arrirraro uimape parrissa torrani:
Iape Cristo poua tezerre ecotarrarossa nezape niza zotode Cristo poua tezerre imadinitoui.
12Ocasserehe inauanezape niza zotode poua tezerre zama bazima zossede iquerrenanitoui.
Ettipe: —Zeso Cristocca orrarrerani −inezape manaco Zeso iaza: —Occa madirra tirra-rrerani −nauitoui.
13Iape ettissa inane-rrerezape imaiza tani. Naraha pouapa parrissehera poua attissa inanazanaponitoui.
Poua attissa inana-rreraniuarrinepe ssamo tani.
Deo Atti maride bica tauiuarrine arrama nana
14Rrehe Timoti, ticca mamari tabaqquipa occa marinarra uatideni rramemana-rrarauiuarrine pouadeniza uati uati tinarri. Pouadeni attideniza cauadirere cana-rrarauiuarrine pouadeniza: —Deopa etti mittaui, ticauadirere cana-rrerarri −tarri. Narraro uadierrinepe uima tobica-rreranitoui. Narraro uadie mittemanazapa poccadeni rrehenirri tossamorana, onarraro. 15Deocca zozosse bica tinaniuarrinepe ibora tineza tizepe irrinissa tarri. Deo tinauatizezapa tiaza: —Rrehe, bica tinani −nauitoui. Pina tatarabaiade damera tarrarissa tarri. Tarabaia tanissa tezape tia zozossedeza ticappina-rreranitoui. Deo Atti parrissehera zori terreraniuarrine mari tanissa tarri. 16Madirra touatti ponimacca arri Deo Attissa nerreranicca uima uatide toquerrenazapa titauaribo terrerana. Tiarrini narri! Madirrapa uima nema nanicca uimahaha canazapa Deoza touarrimanauitoui. Pouadenirrine uima denima touaidiranitoui. 17Madirrapa ponimacca Deo Attissa nerreranicca uima mari mari nazapa poccadeni marinarra pina zamacoma touime rrazizissa narraro. Denima torrazizape madirra touaidirarizemana taui. Narraro uimaza toquerrenarraridenipa Imeneo, Pireto quenarrari. 18Narraridenipa Deocca uima parrissehecca inebomaneza uima onihira mari mari quenarrari. Poccadeni marinarrape: —Zesoza rrehe inarrarope rridapana ibodira inauatonirraro. Niza essire izoqquezape inauatoni-rreranitoui −quenaraha narrarope rriza tani. Narraridenirrine Zesoza rrehe quenarrarideni mota poccadeni rrehenirri tossamobote nani. 19Naraha Deocca uima parrisseheccaza parrissa inanissa tezape marinarra maizeheccazape parrissa inerreranitoui. Arrina, Deo Atti dozo naniza arrima narrarope: —Ia Zozossede Deopa Pouaza toquerrenarrarideniza nauato tarrari −nani nade. Onihi naqui arrima narraro: —Madirra bazima attideni: “Ia Zozossede Deocca madirra orrani” quenarraridenipa uaidireheza touarrimanaui nana −nani nade Deo Atti dozo naniza.
20Madirra zepe sse tarraricca oza imenizape tozepetarri onihi onihi carri tarraro. Pina uatini ccara tanicca oro nauatoni, zibehi tanicca prata nauatoni carri tarraro. Tozepetarri onihi naqui pina aua nauatoni, zipa nauatoni carri tarraro. Bazima narrorehe anirizarraro motape uisso bica taniccauarrine, pina rrirripauarrine narrorarraro. Motape soue taniccauarrine, pina ocorra cacauittauarrine narrorarrarossa narraro. 21Narraro uimape madirra pocca uimasiri ineboza bodi uisso taha madi-zanapozapa Deoza bica tarrari. Pina tozepetarri bica taniccassa narrari. Deoza zepe irriuiuarrine narrora, uima bica taniccara inananiuarrine narrora narrari.
22Zabissodeni touini quenauicca touini terrerarri. Poccadeni uaidirehezape tiarrini narri. Ticca madie Deozara parrirenissa taniuarrine damera tinarri. Zesoza rrehe tarrarope tinebo terrerarri. Deoza teti uana, madirra bazimaza teti uana tehe timadirri. Rrone tinehe timadi-zanapona. Ia Zozossede Deo pocca madirra bodideni uissoqquiri narrarideni tezerre uimasiri rrirehe nema tizanapomanarri, onarraro. 23Uima ponimacca pina madirra poua bodicca uati tarrari timitteraha parrissa terrerarri. Poni! tana. Nauato tinani uima nema naniccape uadie torra tani. 24Ia Zozossedecca zozossepa rrouauera tauina bica taui. Madirra bazimaza poua atti bica taza uati uati tauiuarrine. Madirra mari icanabaqquiuiuarrine naco nauato tana. Pouaza madirra nacasseraqquiri naza naco mouaraza inauananiuarrine. 25Deoza iboqquiri narrarideni naco mouaraza mari icanabaqqui-zanapona. Nama nazapa Deorrine bodideni cacarriqquimerauiuarrine uitide. Nazana marinarra parrisseheccazara parrissa quenauiuarrine. 26Deorrine bodideni uatomauissa tazapa Tocorime-Taminecca maizehe inebomananiuarrine. Tocorime-Tamine zepeza toquerrenazapa poua toui nauicca inanemanaraha Deo tappa inabaqquiuitoui.
