2 Timoti 3

₁Rrehe Timoti, zama rricabote nanicca uima nauato tinaniuarrine tiaza dozo onarraro. Niza zama rricani touarrirezape imadinissa taniuarrine narro tanitoui. ₂Madirrapa poccadeni uima touini dameraqquiri nauitoui. Zinirotoui naco dameraqquiri nauitoui. Madirra attidenipa —Orrine uima parrirenissa tani −quenauitoui. Bodideni naco: —Ouana bica onani, ouana deni orrani −quenauitoui. Madirrapa attideni uaidira taza atti atti quenauitoui. Imehideni attideniza naco iboqquiri nauitoui. Imenideniza, Deoza naco: —Peperri, tirrine bica tani −quena-rrarauitoui. Deo Poua noppine cappinemana-rrarazapa Deo oniza rrarra quenauitoui. ₃Uatideni uaneraqquiri nauitoui. Pouadeni tesse tezerre cauadirezapa poccadeni uima peperri inanemana-rreranitoui. Madirra ouahacca uima touaidiraniuarrine naqui pouama uatirridede rauitoui. Pouadenipa uimasiri inanemana-rreraniuarrine pouadeni cacauade ssamoqquiri nauitoui. Madirrapa uadiqquiri naza pouadeni tesseza narrizoqquiri nauitoui. Pouadenipa uima bica taniccaza nacasseraqquiri nauitoui. ₄Pouadeni tessedeni uima oppina taniccaza eheccora-baqquimana nauitoui. Bodideni uatomemana-rraraza madimanauitoui. Pina uimasiri inanemanezape bodideni: —Orrine bica terrerani −quenauiuarrine ssamoqquiri nauitoui. Attidenipa: —Ouana bica onani, nauatorride orrirani −quenazapa pouadeni bodiza madirra ouaha arramani inanabaqquimanarrarissa quenauitoui. Pouadenipa Deotoui quena-rrarazapa arri namicca uima pouadeni touini quenauiccazara uauatizemana nauitoui. ₅Inoccoza qqui inabaqquizapa pina Deoza dameraqquiri narrarissa quenaraha Deocca dacorehe ettarromanani poccadeni madieza auato tanitoui.

Nezape narrarideniza tiarrini narri, onarraro. ₆Pouadeni motapa uaidirehe touini quenaza oza onihiza, oza onihiza madirizemanarrarideni icamaizabaqqui-manauiuarrine rrone tozimemanarra narizapoui narrari. Pouadenipa amonerre bodinideni rrapariqquiri narrarodeniza bacco tozimemanazapa icamaizabaqqui-manarraro. Narraro amonerredenipe uimasiri sseqquiri narraro. Ponideni touini quenanicca uimape pina ponideniza rroca rroca narrarossa narraro. Uimasiri inanemananiuarrine narroremanehe madimanarraro. ₇Ponidenipe poccadeni marinarra tocauattera-zanaporaha marinarra parrisseheccape mittemana-rrerarraro. _8-9Arra amonerreza maiza maiza quenarraridenipa marinarra parrissehecca ecossemananitouiraha parriremana-rrararrari. Pouadenipa uaidirehe touinira bodideni uauatome-mana narrari. Nama quenazapa Zeso Cristoza rrehe quena-rraraza Deopa pouadeniza: —Occa querrena-rraraui −narrari. Naraha mamaizadedenicca marinarrape deni torra-rreranitoui. Madirra poccadeni marinarrazape denima rrehe zanapomana-rrarauitoui. Poccadeni maizehe bazimaza auato tezape: —A, pouadenipa uima parrissehecca ssamoqquiri naha –quenauitoui. Arra pouadenipa pina maittaccazama oppinaqquiri narrari zoppinerredeni Janese, Jamebredenissa quenarrari. Poccadeni nauatoueza Moizecca uima inassamomananiuarrine dameraqquiri naraha parriremana-rrararrari.

₁₀Naraha Timoti, tiana occa marinarra timittazanaporraro. Occa madie naqui qqui tizanaporraro. Deoza ozepe irrizanaponirrine damera onani naqui nauato tinani. Zeso Cristoza rrehe onarraro naqui tiaza auato tarraro. Narro tanicca naqui mouaraza nema nehe onauanani nauato tinani. Madirratoui ouati cauanari canani naqui nauato tinani. Ocasserehe ouaza ssonariza daco orrirani naqui tiaza auato tarraro. ₁₁Arri oza panani Atioquiaza, Iconioza, Listaraza naqui nanarrizo onauanarizani nauato tinani. Naraha oua Zozossede Deopa oua tonassiuauarraride. ₁₂Arri ocasserani ouarrarope ouaza orrari-rrerani. Madirra Zeso Cristoza madimanauissa tauiuarrine dameraqquiri narrarideni bazimapa ocasserani inauanemananitoui. Parrissa nema nanitoui. ₁₃Naraha uaidiraqquiri narrarideni, mamaizadedeni naco denima uaidirehe inanemanerre zanaponi nanitoui. Madirra icamaiza-baqquimanaraha pouadeniza naqui maizehe ssonarinitoui. Uaidireherrine poccadeni uima touaidira-zanaponitoui.

₁₄Pouadenipa nama quenaraha Timoti tiana Zeso Cristo tauimari tia mari icanarraroza parrissa tade. Narraroza parrissa tizanaporri, onarraro. Tia maridedeni nauato tinani: maizeraqquiri inani. ₁₅Erredeni tirrapozama Deo Atti dozo nani tiattezape touattehe ticarrirronarraro nauato tinani. Narraro touattehe ticarrizape Zeso Cristoza rrehe teza narrarorrine Deo tia tonassiuauarrari. ₁₆Deo Atti dozo naniccape Deo Pouarrine bodideni nauatoqquiri naza dozo iquenarraro. Narraro iaza torrarrarope bica tani. Ia acco cananiuarrine parrireni. Arrirraro Deo Attipe parrissehe ia mari cananiuarrine parrireni. Icca uimasiri auato inanarraro. Icca uimasiri cattemaniuarrine parrireni. Icca madie Deoza bica taniuarrine ia mari canarraro. ₁₇Madirra Deocca torrarrari Poua Atti touattazapa Pouaza zepe irriuiuarrine narrorauissa tarrari. Bica tanicca bazima inananiuarrine parrireuissa tarrari.