2 Timoti 1

₁Nirra Timoti? Oua Paoro tiaza occa uima dozo onarraro. Deo touininaza Zeso Cristocca zozosse orrarraro. Ouape Zeso Cristo tauimariza rrehe ineza camittehe rriquerreranicca icarrirraro tauimarini madirra mari ocanarizabaqquiuiuarrinepa Abi Deo, Poua Bedi Zeso Cristo tezerre oua zosse iquenarraro.

₂Rrehe Timoti, tiaza ouati uana tani. Zeso Cristoza rrehe tezape ouaza pina occa erredenissa tarraro. Nezape tiaza ouattia: Icca Abi Deo, ia Zozossede Zeso Cristo tezerre tiaza uima bicani inanemanana. Poccadeni touati uanehema tia acco icanemanana. Poccadeni rronehe naqui tiaza torrana, onarraro.

₃Deoza: Rrehe, peperri, tirrine bica tani, onarraro. Deo Pouaza ibora onani. Pina occa idideni Deoza iboraqquiri naza zepedeni ihirrimana narrarissa onarraro. Oua naqui obodi uisso teza Deoza ozepe irrirraro. Nema onezape zome ssiuarra, zome ssiuarra Deoza uatide orrezape titoui ouati rrima-rrereza uati uati ohonanarraro. ₄Otoui orri orri tade. Narraro obodiza ouati rrima-rrerani. Tia qqui omaniniuarrine touini onani. Tia qqui omanizape ouatizenitoui. ₅Zeso Cristoza parrissa rrehe tanissa tarraro nauato onani. Taidepe ticca ini Roida, ticca ami Eonise rrehe quenaporraro. Narrarodenicca rrehenirrissa tarraro Zesoza rrehe tani nauato onani.

₆Nema nezape teti rrime-rreraniuarrine ouatti tiaza arrima onarraro: Deo pocca danirri bicani taide tiaza da inaporraroza damera tinarri. Pina zippo tinarradaripomarrarossa tinanarri. Narrarope Deo Atti maride tiparrirenissa taniuarrine ozepeza tia bara oneza Deoza uati onezape tiaza torrade. ₇Deo Poua Corime iaza da inarizarraripa icappinaniuarrine rrerani. Ibodi cappina-rrereza daco irriraniuarrine, touati uanehema madirraza eti cauanari cananiuarrine, Deocca dacorehema ia ecauanissa teza uimasiri inane-rreraniuarrine naqui Deo iaza da inarraro. ₈Nazama madirra ouahadeniza ia Zozossede Zeso Cristo tauimari tecomeraza naqui comehi tina-rrereza mari ticanabaqquirizana. Arri oua toponi cocoroza ouezani tauimarini timitteza naqui ticomehi terrerana. Arri ouape Zeso Cristo tauimari mari mari onarizarrarorrine tozepe orrarrarode. Tia naqui Zeso Cristo tauimari icassiuaueraniuarrinecca tecomerarizarrarorrine ocasserehe tinauaneraha nema nehe orri terrerarri. Pina tetizeri narizana, onarraro. Deo tibodi inadacora-zanaponitoui. ₉Deopa ia tonassiuauabaqquirrari. Pouaza bicaqquiri inaniuarrine ia tocatterrizabaqquirrari. Narrarope ia irrine rrerani. Deo iaza uati cauanari canaza: —Madirra onassiuauabaqquina −naporrari. Nama narraria maittaccazama zama inauato-rreraccazama iaza uati cauanari canapozapa Zeso Cristo iaza da inauiuarrine narroraporrari. ₁₀Pocca touati uanehe iaza auato inananiuarrinepe ia Tonassiuauade Zeso Cristo iauarri zosse inaronarrari. Zeso zoqqueza nauatonizapa parri izoqquerinicca zoqquehe inassamorraro. Poua tauimari icassiuaueraniuarrineccape camittehe rriquerreranicca iaza auato inanarraro.

₁₁Narraro uima bicani ouacomera-rizaniuarrinepe Deo otoui uaua naza Pouarrine pocca zozosse orrarraro. Poua tauimari mari ocanabaqqui-rizauiuarrine oua zosse tarrari. ₁₂Nema nezape rridapana ocasserehe onauaneraha comehi onehe omadi-rrerani. Arrina, Zeso pouaza rrehe onapozama maizera taui nauato onarraro. Arrirraro uima naqui nauato onani: Arri Zeso Cristo poua tauimari icassiuaueraniuarrinecca ouaza auato inanarrarope tossamo-rreraniuarrine pouana cacauade parrirerrari. Ecauazanapozape poua ccaniuicca uada bacco tanitoui.

₁₃Rrehe Timoti, Zeso Cristo tauimari parrissehecca tia mari ocanaporrarope tinebo terrerarri. Cristoza rrehe tizanapozape pocca touati uanehema teti uana tehe timadi-zanaporri. ₁₄Zeso Cristo tauimari icassiuaueraniuarrinecca tecauanissa tarri. Deo Corime tibodiza madirraripa tia acco canazapa nema tinananiuarrine, onarraro.

₁₅Rrehe Timoti, arrirraro uima timittaporrarope nauato tinani. Narrarope arri zama Asiauarri madimanarrari Zesoza rrehe quenarraridenipa onoppine tocomehimanaza oua inebomanarrarode. Nama quenarraridenipa uapi taraha pamahana onideni dozo onarrari: Pirrero, Eremorrene quenarrari. ₁₆Naraha otesse orraria onipa Onesiporo pouana uarrirriraza oua acco acco cacana nazapa obodi inauatizerraro. Narrarorrine ouattipe: Deopa pocca touati uanehe acco canehema Onesiporocca ozauarri madimanarrarideniza inananitoui, onarraro. Toponi cocoroza ouezeraha narraro noppineni comehi tarrarade. ₁₇Pouapa oza panani Rromauarri bacco narronazapa otoui qquide damera taza oua bacco tarraride. ₁₈Nama nazapa obodipe: Nizaranibote Deouarri idomo ueza naqui Deo Onesiporoza uati uana tazapa pouaza camittehe rriquerreranicca inananitoui, onarraro. Tia naqui pocca uima nauato tinani. Pouapa taide oza panani Epesouarri imadiza obirri accode damera tade.