2 Tesaronicadeniza 2

₁Nazama imecotedeni, ia Zozossede Zeso Cristo ccanipomauicca uima, pouaza iqueriqquiniuarrinecca uima naqui tibodideni uatomanissa tarri, tibodideni tossamo-rreraniuarrine. ₂Parri, arri Zeso Cristo ccanipomauicca ticauatteraporrarope tinebomana terrerarri. Arra madirra attidenipa: —Ia Zozossede ccaniuicca uadape bacco tani, bacco tani −quenazapa uarroticanire-rrerarri. —Deo Corimerrine nauatoto inani −quenauitide naraha pouama uati toquenarrari. —Paorocca uima teppeza qqui inade −quenaza naco pouadeni attiza parrissa tiquenerrerarri. Ouape narraro uima dozo onerrerade. ₃Imecotedeni, madirra tiadeni tocamaizabaqqui-manaza pouadeni attiza parrissa tiquenerrerana. Niza ia Zozossede Zeso Cristo ccanipomauicca uada bacco terreraqquezama madirra uapi taha Deoza iboqquiri napouitoui. Mouanirri idimemana-rizezapa arra madirra uimasiri ssebote auatomauitoui. Naraha narraripa niza Deocca narrizoue rriquerreraniuarri torrauitoui. ₄Arra madirra uimasiri ssebotepa Deoza uadi, arra Deo rrararaha —Ia cacauade −quequenanarrariza uadi, arra madirra poccadeni nauatonirriza uauatizemana narrarideniza naco uadi tauitoui. Nazama arra uimasiri ssebote mamaizade attipa: —Ouana deni orrani, orrari onani −nanarra nauitoui. Nazapa Deoza dada toqquimauarri toqquezimaza uittarizapa: —Ouana Deo orrani −nauitoui. ₅Tiadeniza omadipoza narraro uima tiadeniza uati uati onaporrarope tetideni rrimemanarraroqui?

₆Tiadenipe nauatoqquiri tiquenaponi, arra uimasiri ssebote auato-rraraccauiuarrine cacauadepa madiui. Auatomauiuarrinecca uada bacco terreraqquezape cacauaderrine auato-rraraccaui. ₇Naraha pocca uima uaidira tanicca auatora taraha pouarrine madirra uapi taha uimasiri ihinauanemana nani qqui qqui izanaporraroparri. Naraha uimasiri deni torra-rreraccanirrine cacauadepa Deocca zossenirri madiccaui. Rridapana uimasiri denima torra-rreraniuarrine pouana uacossarrari. Naraha niza zotode narrari cacauade Deo iaccamacossaniza toccanizapa uimasiri denima auatomanitoui. Nezape uima oppina tehe torrarizanitoui. ₈Nazana uimasiri ssebote auatomauitoui. Naraha zotodepa ia Zozossede Zeso Cristorrine rricauitoui. Zeso Cristo poua zibehinema, pocca dacorehema ccaronapomazapa poua arrariza rrappo naza inanazoqqueuitoui. ₉Arra uimasiri ssebote auatorraripa Tocorime-Taminecca zossenirri. Pouapa Tocorime-Taminecca dacorehe carrirrari. Pocca uimaza madirra parrissa quenauiuarrine canauatori canaraha maizehe. ₁₀Uimasiri onihiza onihiza ihicamaizabaqqui nauitoui. Nazapa madirra narrizoueza toquerrenauiuarrinedenipa pocca uimatoui dameraqquiri nauitoui. Zeso Cristo tauimari parrisseheccaza parrissa quenazapa tocassiuauerauiuarrineraha uima parrisseheccaza nacasseraqquiri narrari. ₁₁Narrarorrine Deo inebobaqquizapa uimasiri ssebote icamaizabaqquiuitoui. Nazapa pocca maizehezara parrissa quenauitoui. ₁₂Madirra bazima uima parrisseheccaza parrissa quena-rrararrarideni uimasiriza dameraqquiri nazapa Deorrine narrizoueza toquerrenauitoui.

₁₃Naraha imecotedeni, ia Zozossedepa tiadeniza uati uana tarrari. Titouideni uarrirriraza Deoza uati uati ihinanarraro. Pouaza: —Abi Deo, Tesaronicadeniza ticca uima torrezape bica tani −ihinanarraro. taide ticassiuaueraniuarrine tiadeni tocatterrizabaqquiporraria arri ticassiuauerarraroparri. Nazapa Deo Corime tibodideni tonauissoza, arri Zeso Cristo tauimari parrisseheccaza parrissa tiqueneza naqui Deorrine ticassiuauerarraroparri. ₁₄Nazapa Zeso Cristo tauimari icassiuaueraniuarrinecca tiadeni mari icanabaqquizape timittemanarrarode. Narraroza Deopa titouideni uaua narrari. Niza zotodepe arra ia Zozossede Zeso Cristo poua zibehine, pocca deni torrehe tiadeniza torranitoui.

₁₅Nezape imecotedeni, Deoza rrehe tizanapomananiuarrine damamera tinarri. Tiadeni mari icanabaqquirrarocca, tiadeniza dozo inarrarocca naqui tetideni rrimemana terrerarri, onarraro.

₁₆Nazama arra ia Zozossede Zeso Cristo, Abi Deo tezerre iaza uatideni uanana tarrari. Pouadeni pamaha bicaqquiri naza ibodi acco acco totocanabaqquimana zanaporrariparra. Pouadenirrine itezerremacca uima bicani iaza torraniuarrine nauatoqquiri inehe imadirraroparri. ₁₇Pouadeni pamahapa tibodideniza uatizehe inanarizemananiuarrine, inarraro. Pouadenirrine tibodideni todacorani nezape tettideni bica taniccazara uati uati titiquena naniuarrine, uima bica taniccara tizepedeni ihirririzemana naniuarrine, inarraro. Rrehe, narraro uima tiadeniza torraniuarrinepe Deoza uatide inebo-rrerarraro.