2 Tesaronicadeniza 1

₁Nirra imecotedeni? Oua Paoro, Silvano, Timoti ineza tiadeniza dozo inarraro. Nani oza panani Tesaronicacca Zeso Cristoza titiqueriqqui narraro icca Abi Deo, ia Zozossede Zeso Cristo pouadeni pamahaza tirrariqquimanarraroza icca uima dozo inarraro.

₂Abi Deo, ia Zozossede Zeso Cristo pouadeni pamaha tiadeniza uima bicani, poccadeni rronehe naqui tiadeniza inanemana-zanapona, inarraro.

₃Imecotedeni, ticcadeni uima bica tezape titouideni Deoza uati uati ihinanarraro: —Rrehe Abi Deo, bica tani. Imecotedeni Tesaronicauarri madimanarraridenicca uima bica teza Tiaza etizerraro −ihinanarraro. Nema inanipe bica tani. Arri ticcadeni rrehenirri Zeso Cristoza todacorani-zanaponicca uima imittani. Tetideni cauanerara canehe denima denima tizanapomananicca uima naqui imittani. ₄Nezape titauimarideni Deocca madirra quequeriqqui-rizemana narrarideniza uati uati ihinariza narraro. Arrima inarraro: —Tesaronicauarricca imecotedeni Zeso Cristoza rrehe quenauissa tarrari. Arra madirra Zeso Cristoza nacasseraqquiri narrari uadierideni pouadeniza ssonari ssonari naza naqui mouaraza inauanemana inauanemana narraro. Ocasserani auemanaraha Zeso Cristoza dameraqquiri naui −ihinariza narraro. ₅Rrehe, nanarrizo tiquerrenaraha arri nanarrizo tiquerrenarraroza Deo Pouapa uima cattemade parrireuissa tarrari auato inananitoui. Niza bazimacca uima cattemade torrazapa tiadeniza: —Occa cacaueheza tiquerrenana −nauitoui. Nazama tiadenipe narrarotoui narrizoue mouaraza titinauanemana narraroparri.

₆Niza zotode tiadeni narrizodepa Deo inarrizobaqquiuitoui. Nema nezape madirra tiadeniza uaidirehe inanemanarraro manaconi Deo inaparrirenissa tanitoui. ₇Arri ocasserani temanarrarope Deo tiadeni rrassi tonanabaqquiuitoui. Ia naqui Deorrine nema inanitoui. Narraro rrassinarracca uimape niza ia Zozossede Zeso Cristo memeuarri neboza namiuarri ccaronapomazana iaza torranitoui. Pouapa pocca zozosse tabaqqui memeuarri dacoraqquiri narrarideni tezerre rrororoni imenima ccaronapomauitoui. ₈Nazapa madirra inarrizobaqquiuitoui. Arra madirra Deoza noccodeni rrizaqquiri narrarideni, arra ia Zozossede Zeso Cristo tauimari icassiuaueraniuarrineccaza iboqquiri narrarideni naco inarrizobaqquiuitoui. ₉Ia Zozossede bacco nanizapa poccadeni uimasiri manaconi narrizoue rriquerreraniuarri madimana-zanapouitoui. Ia Zozossedeza uarriqquiri naza madimanauiuarrine Deo zosse inabaqquiuitoui. Nazapa Zeso Cristocca deni torrehe, poua zibehine, pocca nauatoue qqui toquena-rrarauitoui. ₁₀Naraha ia Zozossede Zeso Cristo namiuarri ccaronapomazapa pocca madirra bazima pouarrine uimarideni tobicarrarideni pouaza: —Rrehe, tiape bica tinani, deni tirrani −quenarra, nauitoui. Arra Zeso Cristo pouaza parrissa quenarrari bazima poua qqui toquenazapa: —A, ia Zozossede dacorarrari, bica taui −quenauitoui. Nezape arri tiadeni naqui Zeso Cristo tauimari tiadeni mari icanabaqquiporraroza parrissa tiquenarrarorrine pouaza tetizemananitoui.

₁₁Arrirraro uima bazima tiadeniza torraniuarrine Deoza uati uati ihinanarraro. Deo ticcadeni madie qqui tazapa: —Occa uaua tabaqquinarrapa ouaza dameraqquiri naui. Ponima pouadeniza uaua onerrerarraro −nauiuarrine. Deoza uati uati ihinanarraro. Uima bicani tinanemananiuarrine touini tiquenaza naqui Deo pocca dacorehema ticcadeni uima bica taniuarrine ineza Deoza uati uati ihinanarraro. Deoza rrehe tiquenarrarorrine Pouaza tizepedeni ihirrimana narraro naqui ticcadeni uima toccanissa taniuarrine ineza Deoza uati uati ihinanarraro. ₁₂Nezape ticcadeni uima bicani nema tinanemanarrarorrine ia Zozossede Zeso Cristo tauimari madirra mittemanazapa: —Rrehe, pocca uima dacorani. Pocca nauatoue naqui pocca madirraza qqui inani −quenauitoui. Manaco Zeso Cristo tiadeniza: —Bicaqquiri tiquenani, occa madirra tiquerrenani −nauitoui. Rrehe icca Deo, ia Zozossede Zeso Cristo tezerre titouideni uatideni cauanarimana canarrarirrine tiadeni tonaparrire-baqquiuissa tarrariparra.