Zeso Cristo ccaniuitoui ibodi uatoue imadina
1Naraha imecotedeni, arra Zeso ccaniuicca uada tauimarini tiadeniza uati onapode. Nezape dozo onerrerani. 2Arra ia Zozossede Zeso ccaniuicca uada bacco tanicca uimape nauatoqquiri tiquenani. Narrarope arrima napode: Eti rrimama caneraha ccaniuitoui. Pina zome bobotide icca ozaza botide qquezimauicca uima ssamo inarrarossa nauitoui. 3Zeso ccaniuicca uada bacco tabote nezape madirra attidenipa: —Rridapanape rrazire tomossi, oppinehe tomossi narraro −quequenanaraha amazati pouadeniza oppina tehe ssonarizape zori tarra canima-rrarauitoui. Pina erredeni comauicca uada amonerredeni ssamoqquiri narrarossa narraro. Amazati tossonauiuarrinecca uada bacco taza amonerrepe erredeni comene zori terre canima-rrerani. 4Naraha imecotedeni, tiadenipe ssamoqquiri tiquenerrerani. Ziziniza timadimana-rrerani. Niza ia Zozossede Zeso Cristo ccaniuicca uada bacco tezape pina bobotiderrine oza rrinede uarro narrarissa tiquenerreranitoui. 5Deoza tiquerrenarrarope pina ssiuarraniza timadimanarrarossa tiquenani. Deo ssiuerrene tiadeniza auato tarraro. Iape ziziniza madimanarraridenissa inerrerani. 6Pina narrarideni pouama cauadirrarrarissa inerrerana. Icca madie ecauanissa zanapona. Zeso Cristo touira ibodi uatoue imadina. 7Arra Zeso Cristo ccaniuitoui bodideni uato-rrararraridenipa ziziniza madimanarrari. Zomepa cacauadirra narrari. Noccodeni rranoqquiri nauiuarrine toui quenaza naco zomeza coma tanicca ze ze quenarrari. 8Naraha iape ssiuarranicca madirra iquerrenarrarope inocco rranoraqquiri nehe imadirraro. Ibodi uatoue imadirraro bica tani. Iape pina isso teppeppe rrazireza biquera-rrarauiuarrine poua bacco cacauauiuarrine ccara tanicca carri, poua tati cacauauiuarrine ccara tanicca carri narrarissa inana. Uimasiri inana-rreraniuarrine ia ecauaniuarrinepe Deoza icca rrehenirri icarri, Deocca touati uanehe icarri narraro. Icassiuaueraniuarrine touini inarrorehe imadirraroparri. 9Deo ia tocatterrizabaqquirraripa ia tonarrizo-baqquiuiuarrine rraraui. Deo ia tocatterrizabaqquirraripa ia Zozossede Zeso Cristo ia tonassiuauabaqquiuiuarrinena parra. 10Zeso Cristo itoui poua ccaccoraza zoqquerrari. Nama narraripa camitta inaccaza, izoqqueza naqui pouaza imadinitoui. 11Nazama tiadenipe timecotedeni tezerre ticatizerara canarri. Ticcadeni rrehenirri todacorani naniuarrine naqui acco acco titicana narri. Narrarossa tinanemanarrarope nema tizanapomanana, inarraro.
—Arrima tiquenanina bica tani −quenarrari
12Imecotedeni, tiadeniza uati inana. Tiadeni maridedeniza bicaqquiri tiquenarri. Attideniza naqui pina titauaribobo canarri. Tiadeni maridedenipa ia Zozossede Zeso Cristoza tiquerrenarraro cacauade toquerrenazapa zepedeni irrimanauissa tarrari. Timadimananissa taniuarrine tibodideni acco acco totocanabaqquimana narrari. 13Deo Atti tiadeni mari tocanabaqquiza naco: —Rrehe, pouadenipa iaza bicaqquiri naui −titiquenanarri. Pouadeniza tetideni uanaqquiri narri, inarraro. Bazimaza rroneqquiri tiquenehe timadimanarri, inarraro.
14Imecotedeni, tiadeniza denima uati inana. Madirra zepe irriuiuarrine ibo tazapa tettideni dacoraza uati ticanemanarro, zepe irride ibora tauiuarrine. Madirra bodi ocassera taza Zesoza: —Peperri onana −nabote nazapa poua tinauatizemanarro, Zesoza torraniuiuarrine. Madirra pocca rrehenirri tomirriraza poua bodi acco ticanemanarro, pocca rrehenirri todacorani napomaniuarrine. Madirra bazimaza rroneqquiri tiquenarri. Pina madirra tiadeniza uima inassonarizape pouaza tedimane-rreraza mouaraza tinauanemanarri, inarraro.
15Madirra tiadeniza uima inanezape: —Manaco pouaza uima onanana −tiquenerrerarri. Uaidirehe tinanemana terrerarri. Uima bicanira tinanemananiuarrine dameraqquiri tiquenarri. Timecotedeniza, madirra ouaha bazimaza naqui uima bicanira titinanarizemana nana, inarraro.
16Uarrirriraza tetetizemana narri. 17Deo Pouaza ssiuarra uati, zome uati titizanapomana narri. 18Arri ocasserani temaneza, uima bicani tiadeniza torreza naqui Deoza uati uati titiquena narri. Pouaza: —Rrehe, peperri. Tirrine bica tani −titiquena narri. Deopa arra Zeso Cristoza rrehe quenarrarideni attideni nama quequenanauiuarrine nacassa tarrari.
19Deo Corime tiadeniza madirraripa tettarro mana-rrarana. 20Madirra Deo Corimerrine Deo Atti ecomerezape tettideni: —Maiza maiza narrari −tiquenerrerana. 21Madirradenicca marinarra bazima titauaribobo caneza: —Pina Zeso Cristo tauimarissa naqui? −titiquena nana. Narrarossa nezape tibodideniza torraniuarrine bica tani. 22Naraha uima uaidira taniccape tibodideniza tinanemana terrerarri. Tiarrimanani nanina bica tarraro.
23Deo Pouana rronehe rrinede. Deo Pouana tibodideni tonauissobaqquiuissa tauiuarrine, inarraro. Deo Pouana ticorimedeni, tibodideni, tessiredeni nehe ecauanissa tarraro, uimasiri ticappiremanehe ia Zozossede Zeso Cristo poua ccanipomaui bacco tiquenaniuarrine, inarraro. 24Abi Deo titouideni uaua narraripa maizera taui. Tiadeniza Poua Attissa inananitoui. Arri uati onarrarope tiadeniza inananissa tanitoui.
Bazimaza: —Zesocca biquehe tiadeniza torrana −quenarrari
25Imecotedeni, Deo ia acco tocanabaqquiuiuarrine itoui naqui Pouaza uati uati titiquena narri.
26Timecotedeni Zeso Cristoza rrehe quenarrarideni bazima bacco bacco ticanezape nirra tiqueneza dama, ticauarracossa titiquena narri, inarraro.
27Arra ia Zozossederrine ouatti ocarriza tiadeniza arrima onarraro: Timecotedeni bazimaza arrirraro uima teppe ua tarizemanarri, onarraro.
28Ia Zozossede Zeso Cristo tiadeniza biquehe inanana, inarraro.
Peperri. Ia onipe Paoro, Silvano, Timoti inarraro.
