Itoui Deoza uati uati titiquena narri
1Rrari, imecotedeni, itoui Deoza uati uati titiquena narri, arri irrine amazati ia Zozossede Zeso Cristo tauimari icassiuaueraniuarrinecca torraribaqquiniuarrine, inarraro. Poua tauimari mittarizemanazapa: —Rrehe, rridapanape iaza uima bica tani −nanarizemana nauiuarrine, inarraro. Pina arri tiadeniza Zeso Cristo tauimari bacco tapoza rrehe tiquenaporrarossa naniuarrine, inarraro. 2Arrirraro uima naqui Deoza uati uati titiquena narri, arra madirra uaidiraqquiri narrarideni, madirra Deoza iboqquiri narrarideni naco ia tonarrizobaqqui-rrarauiuarrine, inarraro. Arra Zeso Cristoza rrehe quena-rrararraridenipa carri taui. 3Naraha ia Zozossede tiadeni tonebobaqqui-rraraui. Pouapa tiadeni tonadacora-baqquiuitoui. Poua naco tiadeniza uimasiri rrinede deni torra-rrarauiuarrine tiadeni touacaua-baqquiuitoui. 4Nazama icca marinarrassa tinanemanani ia Zozossede ecauarrarope nauatoto inarraro. Ia Zozossederrine nema tizanapomananiuarrine naqui nauatoto inarraro. 5Ia Zozossede tiadeni tonauattabaqquiza Deocca touati uanehe tibodideniza auato taniuarrine touini inarraro. Tiadeniza ocasserani ssonariza mouaraza tinauanemananiuarrine ia Zozossede Zeso Cristo pocca dacorehe tiadeniza inananiuarrine naqui touini inarraro.
Madirra zepe irrizana bica tani
6Imecotedeni, ia Zozossede Zeso Cristo onima tiadeniza dozo inarraro. Arra timecote Zeso Cristoccaraha zepe irriuiuarrine nacassera taui qqui tiquenazapa poua tezerre ticabera terrerarri. Pocca madie pina icca marinarra tiadeni mari icanabaqquiporrarossa nerrerezape tiadeniza carrima-rrarana, inarraro. 7Nazama pina arri icca madiessa tinanemananiuarrine naqui nauatoqquiri tiquenani. Nani tiadeniza imadizape izepe irrirani imadini qqui tiquenerrerade. Izepe irrizanapode. 8Ticcadeni zamatapa ihirripa narrari naco manaconi rriraha ihirripa narrarade. Itapari manaconiza mitta inauiuarrine inezape tarabaia inarraro. Arri ssiuarra, zome naqui izepe ihirri narraroparride. Tiadeniza narro terreraniuarrine nema inarrarode. 9Arri Deo Atti tiadeni mari icanabaqquirrarorrine ticcadeni da naqquinarratoui, ticcadeni zamatapatoui tiadeniza uati ineza bica taraha nema inerrerarraro. Izepe ihirri narraroza manaconi ihicarri narrarode. Nezape izepe ihirri nani qqui tiquenezape tiadeni naqui nema tiquenaniuarrine, inarraro. 10Naza tiadeniza imadipoza etti arrima ihinanade: —Madirra zepe irriuiuarrine ibo tarraripa rripa-rrarana. Poua −ihinanade.
11Nazama iape arri tiadeniuarri timecotedeni pamahapa tarabaiaraui madimanarrari quenaui imittani. Boronizara arrauarri totoueda tarra narizarrari. Ozaza naco touedezimarra narizapoui nanarra narrari. Uimara marri totouaqquemana naui quenaui uima imittani. 12Naraha pouadeniza icca uima zosse inarraro. Ia Zozossede Zeso Cristo onima tiadeniza uati inarraro: —Ponima rraui tirrariza-rrerarri. Timadimananiuarrineccatouira tizepedeni ihirrimana narri −inarraro.
13Naraha imecotedeni, tiadenina uima bicani tinanemanarraroza: —Narro tani, onebona −tiquenerrerana. 14Nazama timecotedeni orrari uitide, pama uitide, icca marinarra dozo inarraroza ibobo tarrari tiadeniza queriqquizapa tinoccoza-baqquimanarro. Nama quenarraridenipa titouimana tarrararro. Naui tinoppinedeni cappinauiuarrine. 15Naraha narraripa ticcadeni uadi torra tarrararro. Pouapa timecotedeni. Pina madiuissa tauiuarrine bodi acco ticanemanarro.
—Deocca biquehera tiaza torrarri −quenarrari
16Ia Zozossede Deo pouapa rronehe rrinede. Tiadeniza uima ssonariza, uima noueraza naqui Deocca rronehera tiadeniza torrazanapona, inarraro. Deopa tiadeni touacauabaqqui-zanapouitoui, inarraro.
17Rrehe, oua Paoro, arrirrarope oua ozepeza dozo onarraro. Arrirrarope rricanicca tiadeniza: nirra onarraro. Arri occa uima teppe bazimaza nema onanarizarraro. Occa dozonirri qqui tiquenezape: —Rrehe, parrissa, arrirrarope Paorocca uima teppe −tiquenaniuarrine, onarraro.
18Ia Zozossede Zeso Cristopa tiadeni bazimaza biquehe inanana, inarraro. Parrissa uimape nema nani. Peperri icca uima. Ia onipe Paoro, Silvano, Timoti tezerre.
